ھلسینکی (ھمگام نیوز) آجوئی بلوچستان جنز (ایف بی ایم) ءِ نیمگ ءَ ھلسینکی پن لینڈ ءَ 13 گوبشان ءَ را شھمیریں بلوچانی روچ ءِ درگت ءَ برجاہ داشت، ایشی ءِ تہ ءَ آجوئی بلوچستان جنز (ایف بی ایم) ءِ سنگتاں چہ ابید پی ٹی ایم ءِ سنگتاں ھم بھر زرتگ، بنارس ھان وتی ھیال درشان کرت اَنت ءُ گوشت کہ شھمیریں بلوچاں کہ پہ بلوچستان ءِ واست ءَ دیمونی داتگ، اِے پہ بلوچ راج ءِ آجوئی ءِ واست ءَ دیمونی دیگ بوتگ اَنت۔ ھان مھراب ھان انگریز ءِ بگیری ءَ یکمشتیں بلوچستان ءِ دیمپان بوتگ، آیاں پہ وتی ماتیں سرڈگار ءِ واست ءَ وتی جان اِش ندر کرتگ اَنت، ھمے پیم ءَ بلوچ ورنا وتی سرڈگار ءِ دیمپانی ءَ کن اَنت، بلوچ ءُ اوگان اِے آرزی ئیں لکیر ءَ نہ من اَنت۔
پی ٹی ایم ءِ ابدالباری بڑیچ ءَ 13 گوبشان ءِ بلوچ راجی شھمیراناں ستک شانی ندر کرت ءُ گْوشت کہ بلوچ راج ءِ شھمیراں وتی راج ءِ آجوئی ءُ وشھالی ءِ واست ءَ دیمونی داتگ۔ اِے دیمونی آیوکیں پدریچ ءِ رھشونی ءَ کن اَنت۔
پی ٹی ایم ءِ شپیک اللّہ یوسپزئی ءَ وتی درشان ءِ تہ ءَ بلوچ شھمیراناں ستک شانی ندر کرت ءُ گْوشت کہ پنجاپی ءَ بلوچ ءُ پٹانانی چکچینی ءِ درچ یکشل ءَ برجاہ داشتگ، بلوچ ءُ پٹان رھشون تپاک ءُ یکجاہ بہ بنت تاںکہ دژمن ءَ گْوں جوانی ءَ بے سوب بہ کن اَنت۔
آجوئی بلوچستان جنز (ایف بی ایم) ءِ سادک رئیسانی ایڈوکیٹ، ایم بی مری بلوچ، ڈاکٹر نودھان بلوچ ءُ سموئیل ڈیوڈ بلوچ ءَ بلوچ شھمیراناں ستک شانی ندر کرت ءُ دیمتر ءَ گْوشت کہ ھان مھران ھام 1839 ءَ بلوچستان ءُ بلوچ راج ءِ دیمپانی کرت وتی جان ندر کرت، آئی شھزانتی ءِ کشک ءَ رھادگیں کشک ءَ پاکستان ءِ ایردستیں ءُ ایران ءِ ایردستیں بلوچستان ءِ بلوچ وتی ماتیں سرڈگار ءِ دیمپانی ءَ کنگ ءَ اَنت، ھزارانی کساس بلوچ ورنایاں وتی جان ندر کرتگ، 13 گوبشان شھمیریں بلوچانی روچ پہ بلوچ راج ءَ یک شرپداریں روچے، بلوچ راج ھمک سال اِے روچ ءِ یک یاتگیری روچے ھساب ءَ برجاہ دار اِیر ءُ وتی شھمیراناں ستک شانی ندر کنت۔
