ھمگام بلوچی
آس ءَ گوشت من ءَ سک زور مان. من وھدیکہ سوچاں کن آں تر ءُ ھُشک نہ زاناں ءُ جھانے سوچاں,!!!! آپ ءَ گوشت کہ تئی زورءِ ھال ءَ من سھی آں وھدیکہ من تئی سر ءَ بہ رچاں تو مرئے!!!!! گوات ءَ گوشت کہ شما دوئیں ھچ کُت نہ کن اِت تاں من ھور مہ باں ,,, آس برانز گپت کہ من ھنوں جھانے سوچاں. آس ءَ درچکے سوتک بلے گوات ءَ بوتی ارواہ بند کت ءُ نہ کش اِت ئے آس ءِ نپس سِست ءُ درچک نہ سُتک. آپ ءَ جَت گُُرّگے کہ من آس ءَ گوشتگ کہ منی زور گیشتر اِنت بلے آس بھتاورے نوں بچار من توپان کن آں ءُ ڈن ءُ ڈگاراں آپ کن آں گوات ءَ جت بچکندگے ءُ گوْشت ئے بیچارگاں شُما بے من ءَ ھچ کُت نہ کن اِت بلے آپ ءَ نہ مَنّ اِت جت ئے زور جت ئے زور چہ وتی جاہ ءَ ٹکّ اِت ئے کُت نہ کُت. گوات ءَ گوْشت کہ من پیسر ءَ شمارا گوشتگ کہ بے من ءَ شما ھچ کت نہ کن اِت بلے شمارا باور نہ بوتگ .تاں من مہ کشاں. آس ھچ چیز ءَ سوتک نہ کنت تاں من مہ کشاں جمبر یک دومی ءَ ٹکّر نہ ور اَنت ءُ ھور نہ بنت وھدیکہ من باھند کن آں ءُ شمئے ھمراہ باں شما کردگار کن اِت آس ءَ نپس مان بیت ءُ چہ کسان کسانیں چیزاں بُن گران کنت من کشان باں آ مزن بوان بیت ءُ سوچان کنت من وھدیکہ ساوڑ ءُ زِرانی نوداں بُرز ءَ بران ءُ کسان کسانیں شینک اِش کناں ءُ اے شینکاں مزن کنان کن آں ءُ سیاہ بزیں جمبر بنت ءُ من ترندی ءَ کشاں ھُور اِش کناں ءُ گرندگ اِش پرمائیناں ءُ چمے گرندگاں بیر درکیت ءُ آس روک بیت ءُ جمبر گورگءَ لگ اَنت ءُ برے اِے جمبرانی آپاں من ترونگل ءُ کرپدانک کن آں ءُ برے برے منی شوک پاد کیت من کسان کسان کشاں ءُ ھَور ءُ شبُندان کن آں ءُ بھار میچیں ھور گوار اَنت ءُ آپ ءُ آپ شانی بیت ڈن ءُ میدان ، کورءُ کوہ ءُ تل آپ ءَ چہ پُر بنت ءُ من کشاں ءُ آپاں جھلاد کناں. آپ ءُ آس ءَ دوئیناں گوْشت ھو تئی زور گیشتر اِنت ءُ بگیر ھوری ءَ ھچ کار نہ بیت سئیناں اھد کُت مدام ھور بئیں بلے مارا بلوچاں کے سرپد بہ کنت کہ سوبمندی ءِ راز ھوری ءُ تپاکیءَ گون اِنت ءُ چہ تپاکی ءُ ھوری ءَ بلوچ راج ءِ نپ اِنت بیا اِت وت ءَ ھور ءُ یکجاہ کن اِت وتی تالہ ءِ کتاب ءَ بوان اِت وتی دست ءِ لکیراں بہ بچار اِت وتی ھست ءُ نیستاں بہ مار اِت ءُ وتی دژمناں پجاہ بیار اِت وتءَ چہ گلامی ءِ سانکلاں آجو کن اِت بیا اِت بلوچاں وت ءَ یکجاہ کن اِت چو آس ءُ چو آپ ءَ چو گوات ءَ ھور بہ بہ اِت ءُ دژمناں چہ وتی گنجیں ڈیھ ءَ تاچین اِت کہ اے نیلیں زر گوں تیاباں اے تنک ءُ تُرّ وروکیں تنک ھوریں مُز شُمیگ اِنت اے بلاھیں گُلزمیں گوں نیلیں آزمان ءَ شُمیگ اِنت بلے انگت چمداریں پگر کنگ لوٹ اِیت ھِمت کنگ لوٹ اِیت یک تپاکی ئے آرگ لوٹ اِیت آگاں ناں گوات کش اِیت آس سوچ اِیت آپ توپان کنت ءُ مارا ما لنجیں زِر ءَ اوگار اِیت بیا اِت پگر کن اِت بیا اِت ھوش کن اِت بیا اِت وت ءَ آجو کن اِت چو آسءَ آپ ءَ گوات ءَ ھور بہ بہ اِت ءُ دژمناں گار ءُ بیگواہ کن اِت. بیا اِت تپاکی ءِ راہ ءَ کہ زورمند بہ اِت… پادا منی میریں بلوچ!!!!!!
