ھمگام بلوچی نبشتانک
نبشتہ کار: امینہ سربازی بلوچ
بندات ءَ منی ھبر ایش انت کہ بلوچستان ءِ تھنا روکپتی ءُ رودرتکی نہ انت بلوچستان باز جاہ ءَ بھر ءُ بانگ کتگ یک مزنیں بھرے مان افغانستان ءَ ھم ھوار انت ءُ ایشی ءَ ابید روکپتی بلوچستان ھم 1928 ءِ ایرانی شاہ ءِ قبضه کنگ ءَ پد کرمان کہ بلوچستان ءِ تاریخی بھر انت جتا کنگ بوت بندرعباس در میناب ءُ دگے بازیں دمگے ھم چہ جلگھیں بلوچستان ءَ سست ءُ جتا کنگ بوت انت ـ بستار کرزیں ھبر ایش انت کہ انی پدا ایران سرگپتگ کہ بلوچستان ءَ بھر بھر کناں ءُ ایران ءَ وتی سرکاری دپتری کارانی یا کاگدانی تھا بلوچستان ءُ نام دیر کتگ تھنا “سیستان ” کتگ ءُ روکپتی بلوچستان ءِ مکران بھر ءِ نام مکران ھم بدل کتگ که مکران بلوچانی اولی پجار انت بلکیں مکران ھست انت بلوچ ھست انت ـ دومی ھبر ایش انت کہ رودرتکی بلوچستان ءِ سرا پاکستانی قبضه کنگ ءَ پد ھم پاکستان بلوچستان ءِ دیرہ غازیخان ءَ سندیت چه بلوچستان ءَ ایشی ابید کوہ سلیمان که بلوچستان پھازوکیں ھسار انت چو سرمگیں بولان ءِ وڑا ءَ ماں پنجاب ءَ ھوار کنت ءُ دگے بازیں بھرے ماں سند ءَ ھوار کنگ بیت ـ نی تھنا کجام رھشونے رودرتکی بلوچستان ءِ مشکے ءُ مند یا خضدار ءُ مستونگ ءَ داں وتارا نز میاریت چیا که بلوچستان سک شاھگان انت نا که کجام رھشون ءُ سیاسی باسکے تھنا بلوچستان ءِ بلوچانی بارو ءَ چرت بجنت بلکیں دنیا ءِ ھر کنڈ ءَ کہ بلوچے است آئی بابت ءَ چرت جنگ راجی فرض انت ـ بلے افسوز ءِ ھبر ایش انت که مئے چندے رودرتکی بلوچستان ءِ راجی ءُ آزاتی ءِ رھشون تھنا رودرتکی بلوچستان ءِ سرا بوھوکیں زلم ءُ زوراکی ءِ سرا ھبر کنت بلے ایرانی چیر دستیں بلوچستان سرا ایرانی زالم ءُ ناروائیں حکومت ءِ ھلاپ ءَ وتی زبان ءِ سرا بندش اش جتگ چو پرچا؟ ما بلوچ نیاں؟ یا که روکپتی بلوچ انسان نیاں؟ تئ سرا مستریں زمه واری ھمیش انت که سرجم ءُ کاملیں بلوچستان ءِ ھاترا جھد ءُ کوشست بکن ـ ایران ما روکپتی بلوچستان ءِ بلوچان ھر روچ کشگ ءُ چگل دیگ انت ادا تئی سرا راجی فرض انت که جنگ اگاں نه کن ئے بلے دنیا ءِ دیم ءَ وتی توار ءَ بالا کن کہ ایران زوراک انت پہ بلوچاں ـ پہ ایرانی چیر دستیں بلوچستان ءِ بابت تھنا سردار حیربیار مری ءُ آئ سازمان (FBM) ءِ باسک توار چست کنگ ءَ انت بلے BNM)، (BSO)) ءُ (BRP) بی ال اف ءُ بی آر اے (BLF), (BRA) ھچ رھشون ءُ باسک ایرانی زوراکیانی سرا تک ءُ نک انت ایشی سبب چی انت؟ ھالانکہ بی این ایم ءِ گوستگیں رھشون ءُ سرکماش شھید واجه غلام محمد بلوچ ءَ مدام ایران ءِ کتگیں سلکاریانی ھلاپ ءَ توار چست کتگ ءُ واجہ نواب اکبر خان بگٹی ءَ ھم گشتگ کہ ما کل یک انت ءُ آ تری روکپت ءِ بہ بنت یا رودرتک ءِ بلوچ ءُ ایشی ابید پیسری بی ایس او ءَ ھم پہ بلوچ ءَ مدام جھد کتگ ءُ ایرانی چیر دستیں بلوچستان ءِ واستا جھد وتی سازمان دستور ءِ تھا ھوار گیتکگ ـ نی!!!!!!! تو روکپتی بلوچستان ءِ بابت ءَ پمیشه ھاموش ات کہ گوش ئے یکین وھد ءَ گوں دژمن ءَ جنگ نہ بیت ـ شر یکین وھد ءَ گوں دژمن ءَ جنگ نہ بیت بلے کم چه کم ایرانی کچکیں فوج ھر روچ روکپتی بلوچستان ءِ توکه بلوچاں کُشگ ءَ انت ھمے بلوچانی ناروائیں کوش ءِ ھلاپ ءَ تئ دل ءَ دردے وا بئیت اگاں تو گوں ایران ءَ جنگ کت نه کنے کم چه کم وتی آواز ءَ چست بکن که بلوچ ءِ چکچینی ءِ سرا ءُ اپسوز و بکن ـ من اگاں گوں رودراتکی بلوچستان ءِ توکه گوں دژمن پاکستان ءَ جنگ کت نه کناں که ھر روچ بلوچاں شھید کنگ ءُ بیگواہ کنگ ءَ انت بلے من راشد حسین بلوچ ءِ مات ءِ چمانی ارساں سما ءُ مارشت کت کناں من بیگواھیں راشد حسین بلوچ ءِ په برات ءَ آئ گھار ءِ پریات ءَ وتی اندر ءَ جذب کت کناں من کوئٹہ ءَ پہ برات شبیر بلوچ ءِ گھار ءِ رتکگیں ارساں دنیا ءِ دیم ءَ مانائے دات کناں ـ من مشکے ءُ کولواہ ءُ کلات ءُ پارود ءِ توکه رستریں پاکستانی فوج ءِ دست ءَ شھید بیتگیں بلوچ ورناھانی ھاترا ءَ آواز چست کت کناں ءُ دنیا ءِ دیم پَدّر کناں پاکستان بلوچستان ءِ توکه بلوچانی سرا سک ظلم کنگ ءَ انت ـ نی تو منا بگوش سراوان ءَ دژمن ءِ دست ءَ شھید بیتگیں عمر حسین بر ءِ ھاترا تو آواز چست کن ئے، نی تو من ءَ بگوش بے گناھیں مولانا فضل الرحمان کوھی ءِ ھاترا آواز چست کنے که ایرانی گجراں بلوچ ءِ حق ءِ ھبر کنگ ءِ سرا زندانی کتگ ءُ نی تو منا بگوش تو ادا وتی آواز ءَ بلند ءُ بالا کن ئے که سپاہ پاسداران انقلاب ھر روچ مئے لوگ ءَ سوچگ ءَ انت مئے کشت ءُ کشاراں ماندارگ ءَ انت، مئے ماھیگیراں ھر روچ کشگ ءُ شھید کنگ ءَ انت ـ اگاں انگت تو گوش ئے کہ من ھچ نه گوشاں که ما دو دژمن ءَ جنگ کت نہ کناں یا تو دروگ گوشی (Hypocrisy) کنگائے یا کہ گوں ایران ءَ تھا یک چیریں معائدہ ئے بیتگ تو فقط بلوچ راج ءَ ریپینگ ءُ رد دیگ ءَ ات ـ
