لندن (ھمگام نیوز) ایپ بی ایم ءِ جارکش وتی درشان ءِ تہ ءَ گشتگ زورگیریں پاکستانی لشکر ھمے وڑ ءَ چائینہ ءِ نپانی پاسداری کتگ ءُ وتی زلم ءُ زوراکیانی گیش کنگ ءِ ھاترا یک دگہ پوجی آپریشنے ءِ جار جتگ چش کہ بلوچستان ءُ پشتون سرڈگار ءَ چوناھا زلم ءُ زوراکی ترندی ءَ گوں برجم انت۔
جارکش ءَ گشتگ ھمے ھساب ءَ بلوچستان ءَ مزنیں کچے ءَ پوجی ساز ءُ سامان ءُ ایدگہ سر ءُ پُر گندگ بوھگ ءَ انت، ایشی ءَ چہ پیسر زورگیریں پاکستانی ریاست ءَ اے رنگیں باریں دگہ چنچو آپریشن کتگ بلے اے رندی چائینا نیمگ ءَ چہ سرمایہ کاری ءِ پھریزگ ءِ ھاترا سکیں مزنیں آپریشن ءِ پیسلہ کنگ بوتگ ءُ ایشی ءِ تہ ءَ مزنیں کچے ءَ بلوچ ءُ پشتون ءِ چکچینی ءِ شوربندی کنگ بوتگ پرچا کہ بلوچاں پیسرا اے گپ ءِ درشان کتگ کہ آئی راج ءِ واھگ ءَ ابید وتی سرڈگار ءِ سر ءَ ھر پیمیں سرمایہ کاری ءُ انفراسٹکچر ءِ ھلاپ انت۔
بیان ءِ تہ ءَ دیمتر ءَ گشتگ ئے کہ زورگیریں پاکستان ءِ اے ھون ریچیں شوربندی ءَ بلوچستان ءُ پشتونستان ءَ رنگ گندگ بوھگ ءَ انت، ھمے وڑ ءَ گوستگیں روچ ءَ پشتون راج دوستیں سیاسی گل پشتون تحفظ مومنٹ ءِ سنگت گیلہ من وزیر بے دردی ءَ گوں تیر جتگ ءُ درد ءِ سگ ات نہ کتگ انت ءُ شھید بوتگ ءُ ایشی ءَ چہ بلوچستان ءِ تہ ءَ اوں ایمنی ءَ نشتگیں زھرشانی کنوکانی سر ءَ زوراکی کتگ ءُ آیانی سر ءَ تیر گواری کتگ چش کہ اے یک ھونریچیں آپریشن ءِ بھرے، اے رند ءَ پاکستان اے آپریشن ءَ ھد ءَ چہ گیشیں رنگے ءَ دیم ءَ برگ ءِ ارادگ کتگ ایشی ءِ تہ ءَ ھر رنگیں رپک ءُ رھبند کار بند ایت۔
جارکش ءَ دیمترا گْوشتگ کہ زور گیریں پاکستانی لشکر ءِ ھما وڑ ءَ کہ ٹارگٹ بیسڈ آپریشن ءِ گال ءَ کارمرز کنگ ءَ اِنت ءُ بلوچ ءُ پشتون چکچینی شوربندی میان اُستمانی ءُ دمگی رسانکدر ءَ دانکہ منّگ بہ بیت، اے اسل ءَ وتی مزنیں شوربندی ءِ چیر دیگ ءِ جھد ءَ اِنت کہ آئی ءِ تہ ءَ بلوچ ءُ پشتون راج ءِ نسل کشی ءِ عمل ءَ جتا جتائیں رنگ ءَ بے گشگ ءَ تیز کنگ بیت کنت۔
