ھمگام بلوچی
زی ءُ مرچی من ءَ لھتیں دزگْوھاراں کلوہ پہ کلوہ کتگ کہ من پد ءَ اوگانستان ءِ بارو ءَ چیزے نبشتہ بِہ کن آں گُڑا منی پسّو وَ ھمے بوتگ کہ اگاں شُما منی نبشتانک “اوگانستان ءِ آس” ءِ تیوگیں بَھراں ونت کت نہ کن اِت گُڑا گڈسری بھر ءَ بِہ وان اِت، بزاں اِلم بِہ وان اِت ئِے گُڑا شُما وت سرپد بَہ اِت انچوشکہ کہ من وتی نبشتانک “اوگانستان ءِ آس” ءِ گُڈی بَھر ءِ آسر ءَ ھر چیزّ وانوکانی دیم ءَ آؤرتگ اَت کہ اوگانستان دیمی بیست سال ءَ چون بیت۔ بلے پہ وتی راج ءِ گُلیں وانوکاں من یک رَندے پد ءَ اوگانستان ءِ بابت ءَ چیزے نبشتہ کن آں کہ ھما مردم کہ انگت اوگانستان ءِ جیڑہ ءَ پوہ نہ بوتگ اَنت پد ءَ شالا پوہ بِہ بات اَنت۔
انچوشکہ 29 اُستپان 2020 ءَ پہ نوزدہ سال ءِ اوگانستان ءِ جنگ ءِ ھلاسی ءَ کتر ءِ بُنجاھی شھر دوھہ ءِ توک ءَ گیدی ءِ پنجاہ استان ءِ جھگیرانی دیم پہ دیم ءَ امریکہ ءُ تالبان ءِ نیام ءَ یک نامداریں منّگ نامھے ءِ سر ءَ تپاک ءُ دزنام بوتگ اَنت، البت اوگانستان چہ 1975 ءَ جنگ ءِ آس ءُ انگران سوچان انت ھرکس زان ایت کہ چہ سوت یونین ءِ اوگانستان ءَ آیگ ءَ پیش ءَ پاکستانی کاسگ چٹّیں اوگاناں اوگانستان ءِ سر ءَ وتی زاتی جنگے بُنگیج کتگ اَت۔ بیا کہ نی توری دگنیا ءِ ھر رسانکدرے بِہ بیت توری گیدی ءِ ھر وڑیں ھوالکار ءُ زانتکارے بِہ بیت دراہ اے گْوشگ ءَ انت کہ چہ اے منّگ نامہ ءَ امریکہ ءَ چہ اوگانستان ءِ جنگ ءَ پروش وارتگ پمیشکا نی امریکہ چہ اوگانستان ءَ درکپگ لوٹ ایت بلے من نہ منّ آں کہ امریکہ ءُ مرچیگیں اُلسان ءُ راجمستری(ڈیموکریسی اینڈ ریپبلک) اوگانستان ءَ چہ اے جنگ ءَ پروش وارتگ بلکیں اسلامی نیکراھی ءِ منّوگِریں تالبان ءَ پروش وارتگ چوناھیگا چہ ھپت دریا ءَ دِیریں یک ملکے اوگانستان ءَ چی ءَ مُدام نند ایت آئی ءَ وتی جنگی شست، مول ءُ مراد پیلو کتگ اَنت زاھر انت نی آ وَ روت۔
دلگوش بِہ بیت کہ اے گپاں من چہ منّگ نامہ ءِ وانگ ءَ رند ءَ کنگ ءَ آں۔ انچوشکہ اے منّگ نامہ اے وڑ انت کہ اوگانستان ءِ جیڑہ چد ءُ پد ھستیں وھد ءِ اوگانستان سرکار ءُ تالبان ءِ نیام ءَ نند ءُ نیاد، ٹَوک ءُ توار ءِ آکبت ءَ ھلاس بِہ بنت ءُ تالبان وت ءَ را راجمستری اوگانستان ءِ لاپ ءَ کار ایت بلے امریکہ لھتیں ماہ گِند ایت کہ اگاں گپ ءُ توار جْوانیں وڑے ءَ توجیلّے درگیجگ ءَ انت گُڑا پنچ ماہ ءَ رند امریکہ وتی لشکر ءِ شمار ءَ چہ 13000 ءَ کم کنت ءُ 8600 کنت، گُڑا ھمے ماھاں تالبان اوگان لشکر ءِ سر ءَ ھچ وڑ اُرُش نہ کنت۔ پہ اوگانستان سرکار ءُ تالبان ءِ وشیں نند ءُ نیادے ھاتر ءَ اوگان سرکار 5000 تالبان ءِ بندیگ آجو کنت ءُ تالبان ھم سرجمیں بندیگاں یلہ کنت۔ اگاں گچینکاری یے ءَ تالباناں باج بُرتگ ءُ اوگانستان ءِ لاپ ءَ تالبان ءِ سرکار بوتگ گُڑا اوگانستان ءِ ڈگار پہ ھچ کسی ھلاپ ءَ کارمرد نہ بیت بزاں تالبان ءَ اوگان پارلیمنٹ ءُ جرگہ منّگی اَت۔
بزاں تالبان ءَ ھر وڑ ءَ راجمستری اوگانستان ءِ سرکار ءَ گوں نند ءُ نیاد، ٹَوک ءُ توار ءِ آسر ءَ وتی جیڑہ ھلاس کنگی انت نیکہ جنگی زور ءَ اوگانستان ءَ وتی چنگُل ءِ تہ ءَ بیار ایت پمیشکا چہ اے منّگ نامہ ءَ تالبان 1996 تا2001 ءِ ڈول ءَ سرجمیں اوگانستان ءَ ایوک ءَ گوں اسلامی رِد ءُ کانوداں سرکار کت نہ کنت بلکیں اُلسانی اوگانستان ءَ وتی بَھر زور ایت پد ءَ آئی ءِ بھت انت کہ اگاں اوگان لس مھلوک آئی پلامرزی کنت یا اِنّا۔
بلے مارا یات بِہ بیت کہ تالبان یک نیکراھی گلّے کہ آ اوگانستان ءِ تہ ءَ راجمستری ءِ رِد ءُ راھبنداں نہ منّ ایت بلکیں گْوش ایت کہ اوگانستان ءَ اسلامی کانود ءُ رھبند بِہ بنت تالبان ءِ ھیال ءُ لیکھانی رَد ءَ اُلسان ءُ راجمستری ھرام انت پمیشکا راجمستری نہ منّ ایت بلکیں زورانسری ءَ اسلامی رِد ءُ کانود آرگ ءِ سر ءَ بیسو کنت دومی تالبان جْوان پوہ ءُ سرپد انت کہ اوگانستان ھرراجی(بازیں) استانے بزاں اوگانستان ءَ تاجک، اُزبک، پشتون، ھزارا ءُ بلوچ ھست انت بلے تالبان گیشتر پاکستانی کاسگ چٹّیں پشتو اَنت بزاں پشتواں ابید تالبان ءِ تہ ءَ دگریں راج نہ اَنت بزاں تاجک، اُزبک، ھزارا ءُ اوگانستان ءِ بلوچ تالبان ءِ گَلّ ءَ نہ اَنت۔
پد تیوگیں پشتون ھم تالبان نہ اَنت انچوشکہ ھستیں وھد ءِ اوگانستان ءِ پاگواجہ اشرپ گنی ھم پشتونے ءُ آئی ءِ تیوگیں ھمدزی پشتو ٹکر تالبان نہ منّ ایت ھمے وڑ ءَ جلال آباد تیوگیں پشتو بزاں ھاجی ابدلھک ءُ ڈاکٹر ھنیپ اتمر، اوگان رکینگ ءِ وزیر واجہ ھالد ءُ ھلمند ءِ گْوستگیں پاگواجہ ڈاکٹر ھامد کرزائی ءُ جنرل رازک، ابدلروسول سیاپ ءُ نجیب اللہ ءِ اھمدزی دَمک ءُ شھر ءِ مردم ھم تالبان نہ منّ اَنت دومی تالبان ءَ وتی تیوگیں ھونی جُنز ءَ امریکیانی سر ءَ باز اُرُش نہ کتگ بلکیں وتی اوگان لشکر ءِ سر ءَ باز اُرُش کتگ رند ءَ شھرانی لاپ ءَ لَس مھلوک ءِ سر ءَ ھونیں وتکُشیں بمب ھم ترکینتگ اَنت چمیشکا لکّھانی ھساب ءَ بیگناھیں مردم مرتگ ءُ لکّھانی کساس ءَ نیم جان بیتگ اَنت پمیشکا اوگانستان ءِ ھر مردم چہ تالبان ءَ نہ وش اَنت گُڑا چہ اے آکبت ءَ ماں راجمستری اوگانستان ءَ تالبان ھچبر سوبین نہ بیت پمیشکا منی پال ءُ ھیال ءِ رِد ءَ اے منّگ نامہ تالبان وت نہ منّ ایت اگاں منّ ات ئِے بزاں راجمستری ءَ تالبان ھلاس بنت پمیشکا اے منّگ نامہ کس نہ منّ ایت۔
بلاھیں گپ ایش انت کہ اے منّگ نامہ ءَ را بیست ءُ چار ادار نہ گْوستگ کہ آئی پروشینگ ءِ گندیں بو ءَ من ءَ بے ھوش کتگ۔ امریکی پاگواجہ واجہ ڈونلڈ ٹرمپ ءَ گْوشت ” من ءَ امیت انت کہ اے منّگ نامہ اوگانستان ءِ نوزدہ سال ءِ جنگ ءَ دائمی کنت ءُ اوگانستان ءَ ایمنی کیت، من لوٹ آں کہ تالبان ءِ رھشُوناں گوں ڈیکے ور آں ۔۔۔۔۔اگاں تالبان چہ اے منّگ نامہ بَجّ اتگ اَنت گُڑا من آیانی سر ءَ کھرواریں اُرُش کن آں، من آیاں گوں بمباری ءَ برباد کن آں”
پد ءَ امریکی ڈنی کارمستِر واجہ مائیک پومپیو ءَ گْوشتگ” اگاں تالبان ءَ ھرابستانی یے کت گُڑا ما اوگانستان ءَ یلہ نہ کن ایں بلکیں اُلسان ءُ راجمستری ءَ کُمک کن ایں دو ماہ ءِ توک ءَ ھر شے پدر بیت” بزاں ھیر ءُ وشی ءِ رند ءَ کسے اے وڑیں گپاں کنت۔ بلے منّگ نامہ ءِ پروش ھما وھد ءَ بوتگ کہ پاکستان ءِ مزن وزیر امران ھان ءَ گْوشت”۔۔۔۔۔ اوگان وتی جیڑاں نند ءُ نیاد ءِ گپ ءُ توار ءَ ھلاس بِہ کن اَنت ۔۔۔۔۔باید انت ھرابیں ملک چہ اوگانستان ءَ کشگ بہ بنت” اد ءَ ھرابیں ملک “ھندوستان” ءَ گْوشت ئِے۔
بزاں اد ءَ امران ھان ءِ دل لوٹگ ءَ اَت کہ ھندوستان گوں اوگانستان ءَ ھچ وڑیں سْیادی مہ دار ایت بژن انت چہ اے وڑیں ھبراں اے سرپدی رس ایت کہ پاکستان وتی کاسگ چٹّاں اوگانستان ءِ سیاست ءَ کمک کنت گُڑا چُشیں دزمانگیجی ءَ مُدام اوگانستان ءِ جاور ھراب بیتگ اَنت ءُ پد ءَ ھم بنت۔
چوناھیگا ھر کسے وَ زان ایت کہ ھندوستان اوگانستان ءِ ھچ سیاسی گل ءَ کُمک نہ کنت بلکیں مُدام اُلسان ءُ راجمستری اوگان سرکار ءُ اوگان ءِ لس مھلوک ءَ ھر وڑیں کُمک ئِے کتگ ءُ پد ءَ ھم کنت بزاں دیمروی ءِ ھمُک پِڑ ءَ توری لین ءِ کارجاہ اڈ کنگ بِہ بنت توری وانگجاہ ءُ نادراھجانی بندگ بِہ بیت، توری اوگان نودربراں ھندوستان شھدربرجاہ وانینگ ءُ دَگ ءُ آپ ءِ کورانی کار کنگ بِہ بیت، توری اوگان سرکاری لشکر ءَ جنگ ءِ بلد کنائینگ ءُ لشکر ءَ جنگی بالیگراب، سلاہ ءِ سامان ءُ ازباب دیگ بِہ بیت توری زدگیں لشکر ءِ ماں ھندوستان ءَ مپتیں اِلاج بہ بنت بزاں ھندوستان مُدام ھر وڑ ءَ کابل سرکار ءَ کُمک کنت نیکہ سْیاسی گلاں گوں سیادی دار ایت بلے پاکستان مُدام پہ اوگانستان ءِ بیرانی ءَ بدیں کار ءُ پندلاں سازل کنت۔
چہ امران ھان ءِ اے وکگ ءَ اوگانستان ءِ مردم ھم دلگران بیت انت۔ بزاں منی چمانی نز ءَ من اوگانستان ءِ منّگ نامہ سوبین نہ گِندگ ءَ آں بلکیں امریکہ زیت برانز گیپت پد ءَ تالبان ءُ آئی کُمکّاراں گوں ھم ھمے وڑ کنت۔
