لندن (ہمگام نیوز) بلوچ راجی رهشون ءُ فری بلوچستان موومنٹ ءِ سروک هیربیارمری ءَ چاگردی رسانکدر ءَ ایکس ( ٹویٹر) ءَ وتی تازگیں بیان ءَ گوشتگ کہ ایران ءُ پاکستان دوئیں بلوچ گُلزمین ءِ دژمن ءُ زورگیر اَنت۔ بلوچ راج ءِ هلاپ آیاں وت ماں وت ءَ شوربندی کرتگ ءُ نی آ بلوچ راج ءِ هلاپ ءَ هواری ءَ پوجی آپریشن کنگ ءَ اَنت بژن ایش انت کہ بلوچستان ءِ سر ءَ درآمدیں کبزه گیریں تاکت بلوچاناں وتی جند ءِ گلزمین ءِ سرا درانڈه کنگ ءَ انت-
بلوچ رهشون ءَ وتی بیان ءِ تہ ءَ گوشتگ کہ من اے دوئیں پاشسٹ ءُزورگیریں راجانی سر ءَ تچک کنگ لوٹاں کہ بلوچ کدی هم آیانی دیم ءَ وتی سر ءَ جهل نہ کنت-ما وتی گلزمین ءِ آجوئی ءَ تاں جُهد کن ایں ،بلوچ رهشون ءَ گْوشت کہ بلوچ ءِ دژمن وت ماں وت ءَ یکجاه ءُ یکمُشت بوگ ءَ اَنت-نوں وهد اتکگ کہ ما بلوچ هم یکجاه سنگر ءِ جوڑ بہ کن انت دژمن ءِ دیم ءَ بہ دار اَنت-
بلوچ راجی رهشون ءِ نوکیں بیان ءِ پُشدر تچک انت کہ دیوس ءَ والڈ اکنامکمس فورم ءَ ایران ءِ وزیر خارجہ عبدالحیان ءُ پاکستان مزن وزیر ءِ گند ونند ءِ دومی روچ ءَ ایران ءَ 16جنوری 2024 ءَ کبزه بوتگیں بلوچستان ءِ شهر پنجگور ءَ لس مهلوک ءِ سرا ارش کرت ایشی ءِ سوب ءَ چہ بے میار ءُ بے گناه زهگ ءُ زالبول زدگ ءُ شهید بوتگ انت دومی روچ ءَ 17 جنوری ءَ پاکستان ءَ ایران ءِ کبزه کرتگیں بلوچستان ءِ شهر سراوان ءِ سرا ارش کرت آئی تہ ءَ ده زالبول ءُ زهگ شهید ءُ دگہ بازیں مردم زدگ بوت انت
پاکستان ءِ جنگ ءِ اوگام ءِ رد ءَ اے اُرشاناں ’’مرگ بر سرمچار‘‘ گْوشتگ۔ اے جنگی بیانیہ چہ اے تچکیں کلوه رس ایت کہ ایران ءُ پاکستان بلوچ گہگیری ءَ را یکجاه هلاس کنگ ءِ واست ءَ یکمشت بوگ ءِ پیسلہ کرتگ،
