شال (ھمگام نیوز) آجوئی بلوچستان جُنز (ایف بی ایم) ءِ بنجاھی جارکش ءَ وتی جار ءِ تہ ءَ گْوشت کہ اوگان ءُ بلوچانی میان ءَ یکے دومی ءَ گْوں راجدپتری سیادی ھست اِنت، راجی بنیات ءَ وتی ھستانک ءُ یکے دومی ءِ نپانی پھازگ ءَ ھوار اِے دویں راج سدانی سال اِنت کہ اِے دمگ ءَ گْوں ایمنی ءَ نشتگ اَنت۔ اگاں کجام وھد ءَ وت مہ وتی جْیڑہ ءُ رَد پھمی ودی بوتگ گُڑا راجدپتر شاھد اِنت کہ بلوچ ءُ پٹانانی راجی رھشوناں گْوں گپ ءُ تران ءِ وسیلہ ءَ یکے دومی ءِ شرپ ءُ ازت ءِ بنیات ءَ وتی جْیڑہ گیش ءُ گیوار کرتگ اَنت۔
آجوئی بلوچستان جُنز (ایف بی ایم) ءِ جارکش ءَ وتی جار ءِ تہ ءَ دیمتر ءَ گْوشت کہ ھما وھد ءَ کہ انگریز ءِ گلام پنجاپی آناں انگریز ءَ یک بے ابرمی ءُ سامراجی نپانی پھازگ ءِ واست ءَ یک ملکے پاکستان ءِ نام ءَ جْوڑ کرت ءُ دات، ھما اِنت کہ گلام پرزندِ گلام پنجاپی ایوک ءَ بلوچستان ءُ اوگانستان ءِ واھند جوڑ بوگ ءِ تگ ءُ تاچ ءَ نہ اَنت بلکیں آئی ءَ اوگانستان ءَ را آس ءُ ھون ءِ تہ ءَ شُشتگ، چہ سویت یونین ءِ در آیگ ءَ پد پاکستانی لشکر ءَ اوگانی آناں وت مہ وت ءَ گْورجیگ کرت، تاںکہ آ اوگاناں نِزور بہ کنت ءُ اوگانستان ءَ را پاکستان ءِ یک سوبھے جْوڑ کرت بہ کنت ءُ اوگانستان ءِ سر ءَ ھم کبزہ بہ کنت، ھمے وڑ ءَ چہ بازیں دھکاں پنجاپی لشکر ءَ بلوچستان ءَ را کبزہ کرتگ، بلوچ ءُ پٹانانی کُشت ءُ کوش ئِے برجاہ داشتگ۔ اِے زوراکیں اِستان ھمے لْوٹ اِیت کہ بلوچ ءُ پٹان وت مہ وت ءَ گْورجیگ بہ بنت تاںکہ آ گْوں جوانی ءَ وتی بدیں واھگاں سرجم کرت بہ کنت، ایشی ءَ ابید آ لھتیں چم جھلیں بلوچ ءُ پٹاناں کارمرز کنگ ءُ بلوچ ءُ پٹانانی میان ءَ کست ءُ کینگ ءِ ودی کنگ ءِ جھد ءَ کنگ ءَ اِنت۔ ما گْوں تچک ءَ اِے گپ ءَ کنگ لوٹ اَیں کہ کجام بلوچ ءُ پٹان کہ آ پاکستان ءِ گْوشگ ءِ بنیات ءَ پلینڈی کن اَنت گُڑا آ بلوچ ءُ پٹانانی ایوک ءَ دژمن نہ اَنت بلکیں اِے پیمیں مردم زوراک ءِ کاسگ چَٹ اَنت ءُ وتی نپانی گلام اَنت۔ اِے پیمیں مردماناں بلوچ ءُ پٹانانی مچانکی سکی ءُ سوری، اڑ ءُ جنجالاں گْوں ھچ کار نیست۔
آجوئی بلوچستان جُنز (ایف بی ایم) ءِ جارکش ءَ گْوشت کہ گْوستگیں لھتیں روچ اِنت کہ ھما اوگان کہ آ پشتونستان ءُ بلوچستان ءِ تہ ءَ جاھمند اَنت آیاناں زورگیریں پاکستان ءَ وتی بدیں واھگانی سرجم کنگ ءِ ھاتر ءَ یک تیزیں تُکشامے بندات ئِے کرتگ، شال، کراچی ءُ آ دگہ شھرانی تہ ءَ پٹاناناں چو ناشرکار ءِ دروشم ءَ انگیر ئِے کرتگ ءُ آیاناں بے شرپ کنگ ءَ اِنت، پاکستانی پنجاپی وتی کارستانی سوب ءَ سرجمیں دگنیا ءِ تہ ءَ بنّام اَنت ءُ سرجمیں دگنیا ءِ تہ ءَ آ زلیل کرنگ بوگ ءَ اَنت، پد ءَ ھمے پنجاپی شرپمندیں اوگانی آنی گْون ءَ ھمے روشت ءَ پیش آیگ ءَ اِنت، پنجاپی ءِ دستاں پٹان ءُ بلوچستان ءِ تہ ءَ پناہ زرتگیں اوگانی آنی بے شرپی تیوگیں بلوچ ءُ پٹان آنی بے شرپی اِنت، پاکستان پنجاپی آنی دستاں پٹانانی بگیری ءَ تُکشام بے منانک اِنت، اِے گامگیج ”من دُزّ ءَ را نہ گپت، دُزّ ءَ من ءَ گپت“ ءِ دروشم ءَ اِنت، کجام اوگانیاں کہ بلوچستان ءِ تہ ءَ اتکگ ءُ پناہ زرتگ، آ ھم پاکستانی ناشرکاری ءِ سوب ءَ چہ اوگانستان ءَ در اتکگ ءُ اِد ءَ اتکگ اَنت، نوں اوگانستان ءِ تہ ءَ جاور ایمن بوگ ءَ اَنت، بلوچستان ءِ تہ ءِ پناہ زرتگیں اوگانی وت مدان مدان وتی سرڈگار ءِ سر ءَ رو اَنت، بلے پنجاپی ءِ اِے گامگیج کہ پٹاناناں آیانی جِند ءِ سرڈگار ءِ سر ءَ در کنگ ءَ اِنت، بلوچ سرڈگار ءِ تہ ءَ پناہ زرتگیں پٹاناں یک زانت ءُ سرپدیں سرشونی ءِ بنھشت ءَ درکنگ ءَ اِنت، ءُ ایشی ءِ واست ءَ کبزہ گیر ءَ یک سرجھلیں بلوچے ءَ را جار جنگ پرماتگ ءُ دومی سرجھلیں پٹان کبزہ گیر ءِ لوٹانی سرجم کنگ ءِ ھاتر ءَ جھد ءَ اَنت،
ایف بی ایم ءِ جارکش ءَ دیمتر ءَ گْوشت کہ پاکستانی لشکر ڈیورنڈ لکیر ءِ سر ءَ باڑ جنگ ءَ اِنت، تاںکہ آ انگریز ءِ کش اتگیں لکیر ءَ را مھکم بہ کنت ءُ اوگانستان ءُ بلوچستان ءِ الاکھانی سر ءَ وتی کبزہ گیری ءَ دائم ءَ برجاہ بہ دار اِیت، ھما لکیر ءَ کہ بلوچستان ءُ اوگانستان ءِ الاکھان ءَ بھر ءُ بانگ کرتگ، نہ کہ بلوچستان اِے لکیر ءَ من اِیت ءُ نہ کہ اوگانستان۔ بلوچ ءُ پٹان آناں یکجاہ بوگ ءُ انگریز ءِ کش اتگیں لکیر کروجگ لوٹ اَنت، پاکستانی پنجاپی آنی پنجگاں چہ وتی سرڈگار ءِ آجوئی ءِ واست ءَ جھد کنگی اِنت۔
