چہ ھما بلوچستان ءِ گلامی ءِ بنگیج ءَ بلوچ وتی رکینگ ءَ گلامی ءِ ھلاپ ءَ سُر پُر ءُ جھد کنان بوتگ ،بلے باز بَر ءَ بلوچ ءَ کاٹار چے وتی نیمگ ءَ مان جگران بوتگ۔
بلے پد ءَ اوں بیا کہ آ وھد ءِ سْیاسی ءُ سماجی گَل چش نزانتکار ءُ ربودگ نبوتگ اَنت بلکیں آئیان سرجمین بلوچ یکے من اِتگ ءُ بُنُکی مارشت اش یک بوتگ انت۔
نوری نسیرھان ءَ بگر دان نمیران گلامھمد ءِ لیکہ سرجمین بلوچستان بوتگ بلے زھر آیوک ءُ دشمن ءِ پندلانی آماچ بوتگیں مردماں اے گپ وش نہ بوتگ ءُ چہ زانت ءُ یا نزانتکاری ءَ آئیانی جھد مدام بلوچ راج ءِ بھر ءُ بانگ ءُ سْیاسی سماجی ءُ آشوبی جھدانی تہ ءَ دزمانجنی ءُ جھد ءِ دیم ءَ اوشتگ بوتگ ءُ منزل اش دوگام دیر تِر کتگ۔
بلے بیا اگاں انوگین جاورھالانی درگت ءَ ھیرت چاری بہ کن اِیں ،گند این کہ بلوچ ءِ زندگیں وارس انگت وتی سُر پُر ءُ جھد ءَ کنگ ءَ اَنت ءُ بلوچ ءِ یکجاھی ءُ یک مشتی ءِ شھمات ءَ بدواھانی دیم ءَ شکاپان اَنت۔
بلے چہ یک دگہ نیمگے ھم بلوچ ءِ ناھودکیں جھد اوں جاری اِنت ءُ آ وتی دشمن ءَ برات لیکگ اَنت ءُ چے آئی ءَ مدد ءُ کمک لوٹگ اَنت۔
اے چونیں کردار انت کہ تو یک نیمگے آ دیم ءِ بلوچان وتی برات لیک ئے ،چہ دگہ نیمگے تو گون برات ءِ دژمن ءَ وت ءَ یکدست کن ئے ،وتی برات ءِ کُشگ ءَ دژمن ءَ کوپگ دے ،بلوچ راجدپتر ءَ تو مدام وان ئے کہ بلوچ ءَ پہ وتی براتانی ھون ءُ ھک ءَ سر داتگ ،گڑا پکاہ بہ بو کہ ایوک ءَ نہ تو وتی نام ءَ انوگیں زمانگ ءَ پولنگ کنگ ئے بلکیں باندا پہ تئی پشتپداں اے کردار شگان ءُ ٹوک بنت شائر گُش اِیت:
برات ھما اِنت کہ مرتگ اَنت براتانی رم ءَ نام اِش مانیت مان جھان ءَ چو رُستم ءَ
مرچی کوم سوگہ ءُ سرپد انت ءُ بلوچ ءِ ربیتانی لیکہ ءَ پاسپانی کنگ ءَ اِنت ،زندگیں اَھد ءِ دانائیں مردم چو کہ سنگت ھیربْیار کہ مرد ءَ بلوچ یکجاھی ءِ جھد دان گڈی توکل ءَ برجاہ داشتگ بلے بید چہ اشی کہ شما اے گپ ءِ مَنّگ ءَ تیار نہ بوتگ ات ،بلکیں اوں مرد ءِ جھد تہ ءَ دزمانجنی کُتگ ءُ مرد شما ڈوبار اِتگ ءُ پروش ءِ آماچ کتگ بلے پیرمرد ءَ چوناھا باز بر ءَ وت ءَ چِتگ ءُ اوشتاتگ بلے دوبارگ اوں شما وتی زاتی مپادانی ھاترا پہ دوبارگیں پروش ءَ وتی جھد برجم داشتگ۔
مرچی شمارا یا کہ باندا بگندے کوم ماپ نہ کنت، اے جستاں الم کنت کہ شما دژمن وتی برات لیک اِتگ ءُ برات گوں وتی دشمن ءِ نزر ءُ چشمک ءَ چار اِتگ ءُ نُکس داتگ آیوکیں راجدپتر ءَ شمئے نام ءُ پولنگ ءُ لیگار اِنت بلے من مرچی بہ حثیت کومے ءَ ،براتے ءَ ،بلوچے ءَ ، یک رندے پدا چے شما دزبندی کناں ءُ گُشان وتی بے بنیادیں لیکھان پُران شیپ اِت ءُ بلوچ ءِ یکجاھی ءِ سَنت ءَ کوپگ بدے اِت ءُ یکتواری ءَ وتی جھدان ،وتی کومی شھیدانی ھونانی پاسپانی ءَ تُرندیں مُشتے پہ دژمن ءِ دپ ءَ جوڑ بہ بئے ات۔
