اوتھل ( ہمگام رپورٹ) بلوچ اسٹوڈنٹس پَرنٹ اُتھل ھنکین ءِ نیمگ ءَ یک مراگشے پہ نوک اتکگیں نودربرانی وش اَتکی ءَ برجم داتگ بوتگ، اِے مراگش ءِ مھمان ھاس بلوچ اسٹوڈنس پرنٹ ءِ بنجاھی کماش ڈاکٹر شکیل بلوچ، بلوچ اسٹوڈنس پرنٹ ءِ گچینی مھمان بنجاھی پتر باسک سنگت عیسی اکبال ، بلوچی زبان ءِ نامداریں شائر واجہ نبی بکش نبل، بلوچ اسٹوڈنس پرنٹ کراچی ھنکین ءِ کماش سنگت اسد بلوچ ، بلوچ اسٹوڈنس پرنٹ ھب ھنکین ءِ کمک کماش سنگت مھراج بلوچ بوتگ انت۔
مراگش ءِ تہ ءَ بلوچی زبان ءِ توتی لسانیں گُشندہ استاد سلیم بلوچ، یاسر دریائی، سراج داد ءَ گْوں وش الھانیں توار ءَ سوت جتگ ءُ مراگش ڈولدار کرتگ۔
اے پیمیں مراگش بلوچ اسٹوڈنس پرنٹ اوتھل ھنکین ءَ ھمک سال پہ نوک اتکگیں نودربرانی واست ءَ برجم داشتگ، ساز و زیمل زِندمان ءِ ارواہ اِنت، ساز ءُ زیمل پہ چاگرد ءِ دیمروئی ءُ آشوب ءَ آرگ ءَ یک مزنیں ارزشتے دار اِیت، وتی زبان ءِ نبشتہ کرتگیں پیام شِئر ءُ شائری ءُ وش الھانیں دروشم ءَ مگزانی تہ ءَ جاہ کنت، بے ساز ءُ زیمل ءَ زبان ءِ شیرکنی ءُ تام ھلاس بیت، پمیشکا نوآبادی وانگی کارگساں، شھدربرجاھانی تہ ءَ نِسابی کتابانی وانگ ءُ رَٹّا جنگ ءَ چَہ گھتر اِنت کہ بلوچ نودربر وتی شیرکنیں زبان ءِ دیمروئی ءِ ھاتر ءَ ساز ءُ زیملی ءُ لبزانکی مراگش برجم بہ دار اَنت۔
ساز ءُ زیمل بنی آدم ءِ مگزانی بندیں مارشتاں پَچ کنت ءُ مردم ءَ پہ وتی سرڈگار، ھنکین، دود ءُ ربیدگ، وتی زبان ءِ مھراں گْوں ھمگرنچ کنت۔
اِے مراگش ءِ تہ ءَ بلوچ نودربر اتکگ ءُ ساڑی بوتگ اَنت، ھمک سال ءِ دروشم ءَ اِے سال ءِ مراگش ھم زیبدار بوتگ۔ آیوکیں وھداں ھم پہ نوک آیوکیں نودربراں ھمے پیمیں مراگش برجم دارگ بیت، تاںکہ بلوچ ورنایانی تہ ءَ آشوبی سِنچ ءُ مارشت، وتی گْوست، وتی راجدپتر ءُ سرڈگار ءَ گیش ءَ چہ گیش مِھر ودی بہ بیت۔
بلوچ، بلوچ ءُ براھوئی زبان، بلوچستان تاں جھان ھست زندگ بات ءُ شادمان بات اَنت۔
