ہمگام بلوچی نبشتانک ( اولی بہر)
سال 2010 ءِ گُڈّی ماہاں چہ پَنجگُور ءِ ہنکین پروم ءُ بالگتر ءِ نیام ءَ چہ تلانگ ءَ کروڑانی ہساب ءِ منشیات ءِ بارے برگ بوت۔
بی این ایم ءِ سیشن ہم ہمے زوتاں جاھُو ءَ بؤگی اَت۔
ہمے منشیات ءِ بارکہ پُلگ بوتگ ات، مئے علاقہانی منشیات فروشانی بہرے ہم ہوار ات، بازار ءَ گپ بؤگا اَت کہ سیٹانی بارے پَنجگُور ءَ برگ بوتگ ۔ اے کیس ءَ بی این ایم ءُ بی ایل ایف ءِ باسکے مقبول شمبے زئی ءِ نام گِرگ بؤگا اِنت۔
دومی روچ ءَ میتگ ءِ سنگتے ءَ مقبول شمبے زئی گون ات منی لوگ ءَ اتک انت من اوتاک ءَ نادینت انت۔ گپ ءُ تران بوت من مقبول ءَ جست کت کہ منشیات ءِ بار برگ بوتگ انت اد ءِ سیٹانی مال ہوار انت تئی نام ءَ گِرگا اَنت ءُ تو ادا سرء عام ترّگا ئے، یکے اد ءِ منشیات پروش تئی سرا زَہر انت ءُ تئی رندا اَنت ءُ دومی سرکار۔
گشت ے ادا مردم منا پجّاہ نیارنت بس نام ءَ زاننت۔ تو بے پگر بو۔مقبول منی مہمان ات، یک شپے ءُ روچے منی اوتاک ءَ داشت ے، دومی روچ ءَ شت ۔ اے شپ ءُ روچاں ما نند ءُ نیاد ءُ کسّہ کت، ہمے دؤرانءَ گَل ءِ برزی واجہ کارانی فونے اتک، مقبول ءَ گشت نوں کیس زاتی سورت ءَ منی سرا پیداک اِنت، شما قبول کن ات ے ءُ بگش ات کہ ما منشیات گپتگ ءُ سوتکگ انت۔
پدا منی کرّا منّ اِت ے کہ ما مالے گپتگ گَل ءِ مالی سسٹم ءَ شر کنیں۔
پدا بیان اتک بی ایل ایف ءَ اے ویل ءِ زمہ واری زُرتگ ات ءُ گشتگ ات کہ ما منشیات گپتگ ءُ سوتکگ انت۔
اے وہد ءَ منی ءُ بی این ایم ءِ سنگتانی نیام ءَ اختلاف ہست ات، من چہ وتی بنجاہی کمیٹی ءِ اگدہ ءَ دزکشّ بوتگ اتاں۔
مئے دزکشّی ءَ پد خلیل گروپ ءَ بی این ایم ءِ رہبنداناں پروشتگ ات ءُ پہ زور جاھُو ءَ سیشن ءِ جار جتگ ات۔ بازیں باسکے سیشن ءَ روگا ات۔ مقبول ءُ سنگتے منا کنونس کنگا اتنت کہ تو بیا گوں پدا مئے کاروان ءَ ہوار ببو تئی ایراد سیشن ءَ گوشدارگ بنت ءُ ما پدا ترا مرکز ءَ زوریں گوں۔ من نہ منّئت ءُ نہ شُتاں گوں، اے شُتنت محمد بکش جگوءِ لوگ ءَ، کئی بہرءَ چینچو کپت من سرپد نہ اتاں، بلئے جگوءَ گوں من رابطہ کت، من ہمے بابتا جست کت، آئیءَ سرجمیں کسہ آورت انت ءُ منا گشت کہ ما کئے کئے ہوار بوتگیں اے مالانی گرگا۔ اے ہم گشت ے کہ مالءِ گیشتری بہر مرکز ءَ دئیگ بیت ءُ پشت کپتگیں بہر، ہر کس کہ ہور بوتگ کاروائی ءَ آیانی سرا بہر ءُ بانگ بیت۔
مال ءِ بہر ءُ بانگ وتی جاگہ ءَ رندا اشانی جند بہر ءُ بانگ بوت انت۔ محمد بکش جگو ءَ سنگتے ءَ گشت کہ 100 کیلو رستگ کہ اشاں بہا بکن ءُ وتی ہمراہاں بدئے گوں۔ مقبول شمبے زئی ءُ ٹھیکہ دار شہید یونس ءِ ونڈ ءَ نزاناں چنت سیر/مَن کپتگ ات، ٹھیکہ دار شہید یونس شت ایرانءَ اشانی بہا کنگا، ہمودا ایران ءَ گپت ءُ پاکستانءِ دست ءَ دات، پاکستان ءَ آوار جتگیں سنگت جلیل ریکی ءِ پجّی ءَ شہید کت ءُ ہردُکانی لاش دور داتنت۔
مقبول شمبے زئی سرنڈر بوتگ ات۔ محمد بکش جگو چہ بی ایل ایفءَ دست کش بوت ءُ بی این ایل ایفءِ جوڑ کنگا گون ات۔ اشکنگا جگو ءِ کرّا 20 لک کلدار مرکز ءَ چَمے منشیات ءِ زرّاں پچ گپتگ ات ءُ مندی سیٹے ءَ داتگ ات کہ ہمے برتگیں مالانی تہا آئیءِ بہرے مان بوتگ ءُ اے سیٹ واجو ءِ سنگت بوتگ۔ پدا دگہ سنگتے ءَ منا گشت کہ 4 لک کلدار ءُ تپنگے ہمے مالانی ہساب ءَ منی ونڈ ءَ کپتگ، بلئے جگو ءَ منا نداتگ انت۔
اولی منشیات برگءِ کیس ہمے وڑا بوت، ہمے منشیات کہ گرگ بوت انت، پدا بلوچ مہلوکءِ تہا، بلوچ میتگانی تہا بہا کنگ بوت انت، زرانی سرا اڑ ءُ کُڑ بوت۔ کماندار جگو جتا بوت، چیزے وہد ءَ پد سرنڈر بوت۔ کماندار ماسٹر سلیم ہم رندا جتا بوت ءُ سرنڈر بوت۔ مقبول شمبے زئی ہما وہد ءَ سرنڈر بوت۔ کماندار ٹھیکہ دار یونس شہید کنئگ بوت۔
(روان اِنت)
دلگوش: ادارہ ہمگام گوں نبشتہ کارے ھیال ءُ لیکہاں تپاک کنگ الم نہ انت۔
