ھمگام بلوچی
دُنیا ءِ توک ءَ ھما راج ءُ لَس مھلوک دیمروئی کن اَنت ءُ وتی منزل ءَ سر بنت کہ آ راج ءِ توک ءَ دلاری ءُ ھُدگرزی مہ بیت مئے بلوچ راج ءِ توک ءَ یک مردمے پہ راج ءَ پہ وتی ھکّ ءَ گپ کنت دگہ دہ مردم آئی پُشت ءَ کپ اِیت ءُ دژمن ءِ ھمراہ داری ءَ کن اَنت پہ چار پیسہ ءِ ھاترا گُڑا اے راجے نہ سرزمین آجو بیت نہ کہ اے راج ءِ مردم آجو ءُ مُھکم بنت من گُش آں کہ دژمن مارا جنئگ ءَ اِنت مئے سرا زُلم کنگا اِنت مئے راج ءِ نودربر ءُ جواناں چِست کنئگ ءُ بیگواہ کنئگ اِنت بلے پہ راستی ءَ ما بچاریں مئے نوجوان چِست کنئگ بوھگ ءَ اَنت مئے وتی جند ءِ راج ءُ بلوچ براتانی سوب ءَ اگاں مروچی ھزاراں راشد ءُ زاکر مجید ، زاھد بلوچ ءِ وڑیں ایماندار ءُ مُکلسیں راج دوست ءُ انسان دوست گار بنت یاکہ شھید رزا جھانگیر ءُ شھید ڈاکٹر منان ءُ غلام محمد ءِ وڑیں ازیم اِیں ھستی شھید کنگ بنت گُڑا مئِے دژمن ءِ سوب ءَ نہ بلکیں مئے وتی جندے ، لوگے ، میتگے ، راجے مھربانیانی سوب ءَ اگاں مروچی ما روڑانی سرا نندیں ءُ ارس گواریں چو بشامی جمبرا دُژمن ءِ سوب ءَ نہ مئے وتی داشتگیں آستینک ءِ مارانی سوب ءَ ھزاراں مات گریوگ ءُ راہ چارگ ءَ اَنت کہ کدّین منی سالونکیں بَچ آجو بیت ءُ لوگ ءَ واتر کنت مروچی اگاں زاکر مجید بیگواہ اِنت گُڑا تھنا آئی مات گریوگ ءُ ارس گوارگ ءَ نہ اِنت دگہ ھزاراں مات ارس گوارگ ءَ اَنت پہ ھمائی ءَ ۔ کُل بلوچ بیگواہ ءُ شھید اَنت کُلیں مئے برات بیتگ آں آکِستیں یک مات ئے ءِ چُک ءُ یک گھارئے ءِ برات نہ بوتگ اَنت آ بیگواہ ءُ شھیدانی ھاتر ءَ ھزاراں کساس مات ءُ گھار ھم گریونت ءُ آیاں یات کن اَنت ھماوانی شریں کردار ءُ جُھدانی بدولت ءَ مروچی اگاں بلوچ وتارا یک بھادُریں راجے گُشیت کجام مردم مکبری کنگ ءُ راج ءِ نودبر ءُ دانشوراں چست کنائینگ ءَ اِنت بانداتیں روچ ءَ بہ مِریت راج سرپد بہ بیت کہ دژمن ءِ ھمراہ بیتگ ءُ مروچی جنئگ بیتگ ھزاراں مات گُڑا آئی ءِ نازینگ ءِ بدل ءَ آئی ءِ نام ءَ پِٹّ ءُ لانت کنت۔ مئے راج ءِ کُجام برات یاکہ کُجام نودربر ءُ گُھار راجی جنز ءِ کاروان ءِ ھمراہ دار بیت کُت نہ کن اَنت یا کہ بھوک ہڑتالی کیمپ ءَ نشت نہ کن اَنت پہ بیگواہ ءُ بندیگیں براتانی ھاترا گُڑا آھانی باید ھمیش اِنت کہ دُژمن ءِ دست ءَ وتی راج ، وتی راجی جُھدکارانی ھلاپ مہ بنت ءُ دژمنی ءَ مہ کن اَنت گُڑا مئِے راج ءُ راجی جُھدکاریں برات سوبمند بنت ءُ دُژمن ءَ گوں شریں وڑے ءَ پروش دات کن اَنت ءُ وتی سر زمین ءِ مالک وت بنت اگاں مروچی ماما کدیر ءِ وڑیں بُزرگیں مردم ئے شال ءِ سارتیں موسم ءُ ھور ءُ بْرپ باری ءَ یک دِرتگیں ٹینٹ ئے ءِ توک ءَ نشتگ پہ وتی جندے ھاترا نہ بلکیں پہ راج ءِ ھاترا ھمے ماماکدیر ءِ نندگ ءِ سبب ءَ چے سَدّاں کِساس مردم ھم چہ بندیگ جاہ آں آجو بیتگ ءُ لوگ ءَ سر بیتگ اَنت۔ شال ءَ دگہ مردم ھم باز اَنت کہ آ اسمبلی ءِ باسک اَنت سرکار ءِ گون ءَ گِند ءُ نند کنگ ءَ اَنت ھما آں کہ گلامی منتگ ءُ کبول کُتگ ھماھانی نزوری ءُ گُنگ بوھگ ءِ سوب ءَ مارا چہ بی ایم سی ءِ ھاسٹلاں ھم درکنگ بیتگ ءُ مزن شاہ دربرجاہ ءَ نودربر بلیک میل ءُ رد دئیگ ھم بیتگ اَنت گُڑا سوب مستریں ھمیش اِنت کہ ما گُلامیں ءُ گلامیں راج ءَ دژمن ءِ چمّاں ھِچ کدر ءُ کیمت نہ بیت اگاں مروچی دژمن ڈاکٹراللّہ نزر ءِ نام ءَ اِش کنت آئی ھاٹیگ کار کنگ ءَ یلہ کنت ءُ آئی ایمان ھمراہ داری ءَ یلہ کنت گُڑا ڈاکٹر یک سوچ ئے ءُ یک لیکّہ ئے ۔ڈاکٹر ءَ چے ابید اگاں مروچی بانک کریمہ ئے ءُ ھوران ءِ نام ءَ دژمن اِش کنت سبز ءُ سُھر بیت نام ءِ اش کنگ ءَ آ زانت کہ اگاں بانداتیں روچ ءَ ھمے ھوران ءُ کریمہ دگہ ھزاراں کساس ھوران ءُ کریمہ جوڈ کن اَنت ءُ وتی ھمراہ کن اَنت روڑانی سرا بیگوائیں بلوچانی ھاترا جار جن اَنت ءُ مارا تاوان رسیت ڈاکٹر مالک ھم بلوچ ئے سنا اللّہ زھری ءُ آدگہ اسمبلی ءِ باسک بازیں ھَست اَنت کہ بلوچ اَنت ھماھانی سر وزیر ءُ کماش بوھگ ءَ دژمن تاکت ءُ انرجی زورگ ءُ راج ءِ پروش دئیگ ءِ جُھدا کنگ ءَ اِنت تو باریں ھما اسمبلی ءِ باسک آں چے یکے ءِ نام ءَ بگر باریں آئی ءِ دیم سبز مہ بیت ءُ تُرس ءِ آماچ مہ بیت گُڑا من زاناں ھما اسمبلی ءِ باسک ءُ کارگُشاداں بِیم نیست بلے من زاناں کہ آھانی نام ءِ اش کنگ ءَ چے دژمن ءِ ھمت گیشتر مزن بیت چیا کہ آیاں گُلامی منتگ ءُ کبول کُتگ اگاں ھمے مئے راج ءِ واجہ کارانی ھلاپ ءَ گپ کنے واجہ برانز گِر اَنت ءُ ھمے گپ ءَ کن اَنت کہ ما کِستیں بلوچ راج ءِ ھاترا اسمبلی ءَ نشتگ ءُ پَنڈگریں ءُ راج ءَ کُمک کنیں بَلے اگاں مئے راج ءِ کماش ءُ اے دگہ مردم بچاراں ءُ بے جیڑ اَنت کہ ھمیشاں کُتگ چے پہ راج ءُ مھلوک ءِ واست ءَ ؟ ھمے واجہ کارانی اسمبلی ءِ نندگ ءِ سوب ءَ مروچی نوجوان بیگواہ بوھگ ءَ اَنت ما روڑانی سرا روانک کشّگ بوھگ اِنت جار جنئگ بوھگ اِنت ھمیشاں اینچوکیں ھِمّت ئے ھم نیست کہ بلوچ نودربرانی جیڑھاں شال ءِ توک ءَ بہ گیشین اَنت اگاں دگہ کارے کُت نہ کن اَنت زیکیں روچ ءَ ندا کازمی یک اسسٹنٹ کمشنرئے آ چہ ڈنّی ھَند پنجاب ءَ سیادی داریت ھما کئیت مارا چہ بی ایم سی ھاسٹل ءَ شپ ءَ درکنت ءُ سارتی ءِ سرا نادینیت آئی ءَ اِینچو اُگدہ ھَست گُڑا زُبیدہ جلال ءُ دگہ مئے زالبول ھَست اَنت اسمبلی ءَ نشتگ اَنت آیاں ھمینچو اُگدہ نیست کہ یک اسٹنٹ کمشنرئے ءِ گون ءَ دو گپ بہ جنت مئے جیڑہ ءِ بابت ءَ ۔ اگاں ھمے زبیدہ جلال ءُ ایندگہ وزیرانی باروا ما گپ بہ کنیں گُڑا میڈیا ءِ دیما ھمے گُش اَنت کہ مارا اے وڑ گُشگ بوھگ ءَ اِنت بلوچ ءِ جیڑہ بلوچ ءِ جیڑہ بنت ھمے میڈیا والا ھمے اسمبلی ءِ باسک درا نہ بنت کس نزانت کہ زندگ اَنت یاکہ مُرتگ اَنت یک کسانیں جیڑھے بلوچے گیشینت کُت نہ کن اَنت بلوچ راج ءَ نہ گیس رسگ ءَ اِنت نہ بجلی نہ کہ اِلم ءُ زانتی (تعلیم ) شریں سسٹم نہ کہ بلوچ ءِ ھمے نودربر ءُ نوجوان دژمن ءِ چَنگُلّاں چے رکّگ ءَ اَنت دُژمن ھمُک رنگیں پندل سازگ ءَ اِنت کہ بلوچ ناوانندہ ءُ نازانت بہ بنت ءُ پدا مئے گلامی ءَ بہ کن اَنت ھپتاد سال اِنت کہ دژمن ءَ سرزمین اِیردست کُتگ ءُ وت واجھی کنئگ ءَ اِنت بلوچ راج ءِ سرا وَ انگت ءَ ھم دژمن ءِ زوراکی برجم اِنت کہ بلوچ ءِ نام ءَ راج ءَ چے روتگ بہ سِندّیت ءُ گار بہ کنت گُڑا بلوچ ءَ پہ مُھکم بوھگ ءِ ھاترا مکبری ءِ زرورت نہ اِنت دار بوھگ لوٹیت تپاک بوھگ ءِ زرورت اِنت پنچ ھزار کلدار ءِ بِستار اینچو نہ اِنت گلام اِیں راج ءِ دیما چیا کہ ھمے دُژمن بلوچ آں مُکبر جوڑ کنگ ءِ ھاترا ھمے بلوچ ءِ جند ءِ سرزمین ءِ مَڈّی ءُ مِلکت آں چے دنت اگاں کجام بلوچ لوٹیت کہ من سرزمین ءِ مال ءُ مڈیّانی واھند بہ بنت گُڑا آئی ءَ پہ واھند بوھگ ءِ ھاترا نیستی ، گریبی ، گُژنگّی ، تُنگّی ، گرم ءُ سارت سگگ ءُ برداشت کنگ لوٹیت آئی ءَ جُھد کنگ لوٹیت پہ سرزمین ءَ پہ منزل ءَ سر بوھگ ءِ ھاترا اگاں ما بچار اِیں ھمے مکبر ھم وت بچار اَنت کہ مروچی گیس چہ بلوچستان ءَ درکنگ بوھگ ءَ اِنت ءُ پدا بلوچ دار ءُ پیش ءِ سرا ورگ جوڑ کنت وتی زندگی ءَ پہ بزگّی ءُ لاچاری گوازین اِیت ءُ بلوچ چہ گیس ءَ نہ دزرس اِنت ھمے مکبرے جند ءِ مات ، گُھار چُک ھم چمدار اَنت دژمن ءِ دیما انوگیں وھد ءَ پہ بلوچ ءِ واستہ دژمن ءَ ھچ نہ بچارینتگ اگاں انوں بَچ اِتگ تھنا بلوچ ءِ نام گُڑا پہ نام ءِ برجم ءُ مُھکم کنگ ءِ ھاترا بلوچ ءَ وتی بزگی مارگ لوٹ اِیت وتی زبان وانگ لوٹیت وتی دود ءُ ربیدگ زندگ دارگ لوٹ اَنت بلوچ ءَ دومی بلوچ ءِ ھمکوپگ ءُ ھمسپر بوھگ لوٹیت اگاں بلوچ ءَ اے چیز داشت کت اَنت سوبمند بوت گُڑا پدا تھنا بلوچ ءِ نام نہ بچ اِیت بلکیں بلوچ ءِ سرزمین ھم چہ دژمن ءَ آجو ءُ یل ءَ کنگ بیت ءُ بچ اِیت ۔
