بلوچ رھشون ھیربیار مری ءَ وتی بیان ءِ تہ ءَ گُشتگ کہ زور گیپتیں بلوچستان ءَ پاکستانی لشکر ءِ چیردستی ءَ گچینکاریانی کانودی ھچ بستار نہ بوتگ، ھمے وڑ ءَ دنیا ءَ دیست بلوچ لس مھلوک ءَ بلوچستان ءِ بازیں جاھاں گچینکاری ءِ روچ ءَ سیاسی گھگیری کت، بلوچستان ءِ دگہ بازیں ھند ءُ دمگاں بلوچ اُلس ءَ پولنگانی سَرا شتگ اُوٹ کنگ ءَ نئیشتگ-
راجی رھشون ءَ دیمتر ءَ گُشتگ کہ بلوچ راج ءَ اُوٹ نہ دات ءُ دنیا ءِ دیم ءَ پاکستان ءِ زورگیری ءِ ھلاپ ءَ وتا منارینت ءُ آجوئی ءِ ھک ءَ وتی پیسلہ دات، بلوچ راجی آجوئی جنز ءِ یکشلا برجمی ءِ سوب ءَ نوکیں پدریچ جوانیں رنگے ءَ وتی گلامی ءَ پوہ بوتگ انت ءُ گلامی ءِ ھلاپ ھمک پِڑ ءَ کرد ادا کنگ ءَ انت-
آئی دیمتر ءَ گشتگ گچینکاری ءُ اُوٹ ءِ کُمک ءَ سروکانی گچین آجوئیں ڈیھہ آں کنگ بیت، اود ءَ لس مھلوک وتی منشا ءَ گوں ابید تُرس یا لالچ ءُ زورانسری ءَ گوں اوٹ ءِ کمک ءَ وتی سروکاں گچین کن انت، بلے بلوچستان وڑیں زورگیپتیں سرڈگارے ءَ گچینکاری تھنا بس دروگ ءُ دگا بازی یے، پاکستانی لشکر دروگیں گچینکاری ءِ نام ءَ وتی داشتگیں مردماں بلوچ ءِ سرا مُش ایت-
ھیربیار مری ءَ گُشتگ کہ بلوچستان و ھیر زورگیپتیں سرڈگارے بلے پنجاب ءِ نوکیں پدریچ سرپد بوتگ آ آجوئی ءَ ابید پاکستانی لَشکر ءِ دست ءَ زورگیپت انت-
ھیربیار مری ءَ دیمتر ءَ گشتگ بلوچستان زور گیپتیں سرڈگارے، زورگیر زور گیپتگیں ھند ءُ دمگاں لس مھلوک ءِ لوٹ ءُ واھشتانی ھچبر ازت ءُ شرپ ءَ نہ کنت، ھمے رنگ ءَ زورگیپتیں بلوچستان ءَ ساپ ءُ پلگاریں گچینکاری ءِ امیت دارگ دُروھاپے ءِ پشت ءَ تچگ ءِ ھساب ءَ انت، بلے نوں پنجاب ءِ نوکیں پدریچ پوہ بوتگ کہ آ اوں پاکستانی لشکر ءِ پنجگ ءِ تہ ءَ انت ءُ پاکستانی لشکر ھما پیم بہ لوٹ ایت وتی دل ءِ تب ءِ مردماں “دھاندلی” ءِ کمک ءَ گچین کنت، لس مھلوک ءِ ھچ وڑ ءَ گپ ءَ گوش نہ دار انت ءُ بستار نہ دے انت-
ھیربیار مری ءَ گُشتگ بلوچستان ءَ لس مھلوک ءِ نیمگ ءَ گچینکاری ھلاپ ءَ بائیکاٹ کنگ بوت اے یک وشی ئے گپے پرچا کہ بلوچستان ءِ جیڑہ ءِ توجیل پاکستانی اوٹ ءُ گچینکاری نہ انت، اے رنگیں اُمیت دارگ ءِ مانا وتسریں واب ءِ گندگ ءِ ھساب ءَ انت بلوچستان ءِ جیڑہ ءِ توجیل آجوئی ءُ وت واجھی انت، اود ءَ تیوگیں ادارہ پہ راجی ھدمت ءِ سرا ستک دار انت وتی کاراں دیم ءَ بر انت وتی لس مھلوک ءِ لوٹاں پوہ بنت ءُ آیاں بستار دے انت، چش کہ پاکستان سیاسی ءُ معاشی جنجالانی تہ ءَ انت، ایشی ءِ مستریں سبب فوجی ادارھانی وتا بُرزتر لیکگ ءُ آئین ءُ کانود ءِ مان نیارگ ءُ وتا مزن پھمگ انت ءُ مئے جھد یک انچیں آجوئیں ریاستے ءِ ھاترا انت اود ءَ ھمک ادارہ نہ تھنا وتی ھد ءُ کارانی پابند بنت کار کن انت، بلکیں جمھوری بنیاد ءَ لس مھلوک ءِ لوٹاں مزنیں بستارے دیگ بیت، ایدگہ ملکاں ناروے، سوئیڈن ءُ سوئیزرلینڈ ءِ وڑیں ملکانی تہ ءَ یکیں ھساب ءَ چاگردی، مالی ءُ بنکی انسانی ھکانی لوٹ سرجم انت-
آئین ءِ تہ ءَ وتا لس مھلوک ءِ گپانی گوش نہ دارگ ءُ وتا مزن لیکگ ءِ آسر ھمیش بیت مرچی پاکستان وڑیں ڈیھ انت کہ مئے دیم ءَ انت چنچو جنجالانی (بحران) ءَ تہ ءَ انت
ھیربیار مری ءَ دیمتر ءَ گُشتگ چندے پاکستانی پارلیمنٹ پرست ھست انت کہ آیانی مکسد راجی نہ انت بلکیں زاتی انت، ایشی ءَ چہ ابید بلوچ ھر کجا وتی کد ءَ بلوچے ءِ بستار ءَ پہ وتی سرڈگار ءِ آجوئی ءَ کار ءَ انت ءُ پہ راجی جنز ءَ وتی کِرد ءَ اَدا کنگ ءَ انت چش کہ اے کار بلوچ راج ءِ باندات ءَ ءُ پہ آجوئی ءَ اُوست ءُ امیتے-
ھیربیار مری ءَ گشتگ سرجمیں ءُ مھکمیں بلوچ راجی آجوئی ءِ جھد بلوچی پجار رکینگ ءِ مانزمان بوت کنت، اگاں نا ایران ءُ پاکستان بلوچ ءِ پجار ءِ گار کنگ ءَ، وتی زورگیری ءِ مھکم کنگ ءِ ھاترا شپ ءُ روچ کار ءَ انت، ایشانی ھترناک تریں کار بلوچ راج ءَ (اقلیت) ءِ تہ ءَ بدل کنگ ءُ راجی مال ءُ مڈیانی سرا داھمی زورگیری ءِ ھواری ءَ اد ءَ دری مردمانی آرگ ءُ آباد کنگ انت، ایران، پاکستان ءُ چین ءِ وڑیں ”نو آبادیاتی“ زوراکانی کمک ءَ جتا جتائیں ”فوجی پروجیکٹانی“ سرا کار ءَ انت چش کہ بلوچ راجی جنز ءَ چیر ترینگ ءُ بلوچ راج ءَ جند ءِ وتی زمین ءَ چہ درکنگ ایشانی پالیسی ءِ بھر انت-
