شال (ہمگام نیوز) بلوچ اسٹوڈنٹس ایکشن کمیٹی ءِ نیمگ ءَ شال( کوئٹہ) ءَ ادبی ءُ دودمانی مراگش صباء لٹریری فسٹیول برجم دارگ بیتگ، مراگاہ ءَ گل ءِ بنجاہی کماش شبیر بلوچ، بنجاہی مزن کارگشاد اظہر بلوچ، کمک کارگشاد محمد بلوچ، بنجاہی کمیٹی ءِ باسک پیرجان، عامر ءُ بالاچ بلوچ ساڑی بیتگ اَنت۔ مراگش ءِ مہمان ڈاکٹر منظور بلوچ، ڈاکٹر فاروق بلوچ، پروفیسر حامد بلوچ، ڈاکٹر باری آجو، افتخاربلوچ، پروفیسر منیر بلوچ،لکچرار مسلم شفیع، لکچرار عمران شبیر ءَ ہوار ایدگہ استاد، شائر ءُ ادیب بیتگ اَنت۔ دیوان جتائیں بہرانی تہ ءَ بیتگ چوشکہ راجی سوت، تران، پینل ڈسکشن، کسمانک، ڈاکومنٹری پیش کنگ، ٹیبلو، دوچاپی، کتاب میڑہ ءُ بلوچی ساز ءُ زیمل۔
دیوان ءِ بنگیج چہ بلوچ راجی سوت ءَ کنگ بیتگ ءُ دیمتر ءُ گُشتانکی بھر ءِ تہ ءَ پروفیسر حامد بلوچ ءَ نمیران صباء دشتیاری ءِ زِند ءُ اِزم ءِ سرءَ تران کُت۔ گُشتانکی بھر ءِ تہ ءَ کماش شبیر بلوچ، اظہر بلوچ ءُ ماہکان بلوچ ءَ بلوچ نودربر، سیاستءُ بلوچ چاگرد ءِ سرہالانی سرءَ گُشتاک داتگ۔ ہمے پیم دو پینل ڈاکشن بیتگ اَنت کہ آہانی تہ ءَ “بلوچی، براہوئی زبان ءُ ایپسٹومولوجی” سرہال سرءَ مسلم شفیع ءَ ڈاکٹر منظور بلوچ ءِ مہمانجلی کتگ ءُ گوں پروفیسر ءَ بلوچی ءُ براہوئی زبان ءِ سرءَ گپ داشتگ۔ دومی پینل ڈسکشن بھر ءَ “ بلوچ بن دپتر” ءِ سر ءَ فاروق بلوچ ءَ تفصیل ءَ گوں گپ کُتگ کہ آہی ءِ مہمانجل عمران شبیر بیتگ۔ اے بھر ءَ بلوچ بن دپتر ءِ سر ءَ جتائیں دلیل ءُ دپتری ریفرنساں گوں گپ ءُ تران بیتگ۔ اے بھرانی ہلاسی ءَ نندوکیں مردمانی گوں مہماناں جُست ءُ پرُسی بھر ہم بیتگ۔
دیمتر ءَ مراگش ءَ جتائیں ڈاکومنٹری پیش کنگ بیتگ چوشکہ نمیران صباء دشتیاری ءِ زِند ءُ اِزم، نمیران زاہر بلوچ ءُ نمیران نزیر احمد بلوچ ءِ سرءَ ڈاکومنٹری ہوار بیتگ اَنت۔ بلوچ چاگرد ءُ چاگرد ءِ جیڑہ ءُ جنجالانی سرءَ ورنایاں مراگش ءَ کسمانک ءُ زہگاں ٹیبلو پیش دارگ ءَ ہوار بلوچی دوچاپی ہم کنگ بیتگ۔ ہمے ڈول ءَ کتاب میڑہ ہم برجم دارگ بیتگ کہ او ءَ جتائیں پبلشراں وتی اسٹال جتگ اَنت ءُ مردماں کتاب زُرتگ۔ اے بھرانی ہلاسی ءَ پد گل ءِ زمہ داراں مراگش ءَ اتکگیں مہماناں چادر سر ءَ داتگ ءُ شرپ بکشاتگ۔
مراگش ءَ تران کنان ءَ مہمان ءُ گل ءِ زمہ داراں جتائیں بنگپانی سرءَ وتی ہیال درشان کُت اَنت ءُ صباء ءِ اِزم ءِ سرءَ تران کنان ءَ گوشت اِش کہ صباء بلوچ ءِ یک کاملیں دانشور ئے اَت کہ یک نپر ئے ءِ جاہ ءَ ادارہ ءِ بستار ءَ کار کنگءَ بیتگ، استاد ءَ بلوچ ءِ زبان، ادب ءُ سیاست ءِ تہ ءَ وتی راجی زمہ داری پیلو کنان ءَ وتی نپری بھر ادا کُتگ۔ دانا ءُ زانتکار ئے ءَ ہوار یک دلیر ءُ تمردیں جہدکارے بیتگ کہ مدام وتی پگِر ءِ سرءَ اوشتاتگ اَت ءُ ورنا ءُ لس مہلوک ءِ راجی تربیت ءَ کنان اَت۔ بلوچ ءِ زبان ءُ لبزانک ءِ سرءَ جہد ءَ پیش گام اَت ہمے رنگ ءَ دانشوری ءِ راستیں ھک ءَ ادا کنان ءَ بلوچ ءِ جہد ءَ سرجم ءَ ہوار اَت۔
مراگش ءَ بلوچ ءِ زبان ءُ بن دپتر ءِ سرءَ تران کنان ءَ مہماناں گوࣿشت کہ بلوچ کوہن ءُ کدیماں چہ مزنیں دود ءُ زمین ئے ءِ واھُند اِنت کہ ہستیں مئے تب ءُ دود گوستگیں نوہ ہزار سال کوہنیں مہرگڑھ ءِ نشانگاں گوں نزیک اَنت۔ بلوچستان تہذیبانی بنجل اِنت کہ ادءَ چہ دگہ بازیں تہذیب درْتکگ اَنت، ہمے پیم اد ءَ آبادیں بلوچ سکیں کوہنیں راجے کہ آئی ءَ وتی راجی پجار جتائیں دودانی وسیلہ ءَ زِندگ داشتگ کہ مئے گورءَ مرچی زبانی بہ زاں کسِوانی دروشم ءَ ہست ءُ زِندگ اَنت۔
مراگش ءَ استاد، ورنا ءُ نودربر، ادیب ءُ شائراں ہوار ایدگہ پِڈ ءِ مردماں مزنیں کچ ئے ءَ بھر زُرتگ۔ دیوان ءِ گُڈی بھر ساز ءُ زیملی بیتگ کہ آہی ءِ تہ ءَ وش الہانیں گُشندہ خالق فرہاد، شاہ سمال ءُ نوید بلوچ ءَ وتی وش تواریں گُٹ ءَ گوں سوت جتگ ءُ بلوچ ءُ بلوچستان نازینتگ۔
مراگش ءِ سرجمیں بھر گوں دلجمی ءَ برجم دارگ بیتگ اَنت ءُ سوبینی ءَ گوں دیوان آسر کنگ بیتگ۔
