لندن (ھمگام نیوز) پری بلوچستان مومنٹ ءِ سروک ءُ بلوچ راجی رھشون ھیربیار مری ءَ وتی درشانے ءَ گشتگ کہ ایران ءَ نا تھنا بلوچ راج زورانسری گلام داشتگ بلکیں زور گیپتیں بلوچستان ءِ اندر ءَ بلوچ ءِ چکچینی ءِ تہ ءَ گیشی آؤرتگ بلوچ ءَ ایران ءِ زورگیپتیں بلوچستان ءِ تہ ءَ بلوچانی پجار اوں چیر ترینگ بوھگ ءَ انت، اے پیم ءَ کجام اوں ڈیھہ ایران ءِ ھواری ءَ بلوچ ءِ مال ءُ مڈیانی کجام ھم وڑیں سودا ھچ وڑیں بستار نہ دار انت بلوچ اے وڑیں ھچ پیمیں سودا ءَ نہ من ایت۔
یات بہ بیت لھتیں روچ پیسر بھارت ءَ ایرانی زیر دستیں بلوچستان ءِ تیاب دپی شھر چھبار ءَ انفراسرکٹچر ءِ واستا یک سد ءُ بیست ملین ڈالر ءِ ھرچ کنگ ءِ ھواری ءَ دو سد ءُ پنجا ملین ڈالر ءِ لائن آف کریڈٹ دیگ ءِ اکرار کتگ دہ سال ءِ سودا ءِ سرا دزرند گیپتگ انت۔
بلوچ رھشون ءَ دیمتر ءَ گشتگ انڈیا ءَ لوٹیت بلوچ راجی آجوئی ءِ جدوجھد ءَ اخلاقی ءُ سیاسی کمک بہ کنت پرچا کہ انڈیا ءِ پیم ءَ بلوچ ءِ گلامی اوں برٹش سلطنت ءِ برصغیر ءِ آیگ ئے سبب ءَ چہ بوتگ بلوچستان ءَ را بازیں ھنداں بھر کتگ ایران ءَ داتگ ءُ پد ءَ دگہ بازیں ھنداں بھر ءُ بانگ کنگ ءِ ھمرائی ءَ بلوچستان ءِ سرا پاکستان ءِ زورگیری ءَ را اوں کمک کتگ۔
آئی گشتگ ات مرچی بلوچ چونیں جدوجھدے کنگ انت ھمے وڑیں جاور نوزدہ سد ءُ چل ءُ پنچ ءَ پیسر انڈیا ھم انچیں جاوراں دچار بوتگ برتانوی سلتنت ءَ انڈیا ءَ را گلام جوڑ کتگ ایشی ءَ چہ متحدھیں ھندوستان یک بھرے کپ کتگ ءُ آئی ءَ پاکستان ءِ نام داتگ مرچی انڈیا وتی ھما زمین ءِ بھر ءَ چہ دز کش انت بلے بلوچ وتی زمین ءِ یک یک چنڈے ءِ بابت ءَ جیڑ ایت۔
بلوچ رھشون ءَ گشتگ انڈیا یک وھدے پیسر وت برتانوی ءِ زیر دست بوتگ بلوچ سرڈگار ءِ یک بھرے ءِ سرا زور گیپتیں بلوچستان ءِ زورگیریں ایران ءِ ھکومت ءِ ھمراہ داری کتگ ءُ بلوچ ءِ کشت ءُ کوش ءِ ھک ءَ انت۔
زانگ بہ بیت ھندوستانی ریاست یک نیمگے وت ءَ بلوچ ءِ دوست ءُ دوزاہ گش ایت دومی نیمگ ءَ زورگیریں ملک ءِ ھمراہ داری کنگ ءَ انت اے وت یک اپسوزی گپے۔
آئی ءَ گشتگ انڈیا وسطی ایشیائی ڈیھاں اے دمگ ءِ دگہ ڈیھاں وتی تجارت ءِ جوان کنگ ءِ ھاترا پاکستان ءِ زمینی راھاں چہ ھمے واستا چھبار پورٹ ءَ گیش دلگوش دیگ ءَ انت ایشی ءَ چہ وتی دژمن ءِ شرتانی مننگ ءِ زلورت نہ کپ ایت آ جوانیں رنگے ءَ چہ اوگانستان ءِ کمک ءَ وسطی ایشیائی ڈیھاں وتی ساماناں رسینت کنت بلے اے درستیں سوداھاں ابید آ بلوچ ءِ لیکہ ءَ دلگوش دیگ ءَ نہ انت بلوچ راج ءَ ھچبر پاکستان ءُ ایران ءِ زلم ءُ زورگیری نہ من اتگ بلوچ ھر ھساب ءَ ایران ءُ پاکستان ءِ زوگیرانی ھلاپ ءَ کار ءَ انت ءُ کربانی دیگ ءَ انت۔
ھیربیار مری ءَ دیمتر ءَ گشتگ ھر کجام قوتے بیت ایران ءِ زورگیپتیں ھکومت ءِ بلوچ سرڈگار ءِ سر ءَ کجام ڈولیں سیاسی ءُ تجارتی سودا ءَ ھچ وڑ ءَ نہ من اِیت گوست ءَ چین ءَ بلوچ ءِ منشہ ءِ ھلاپ ءَ بلوچستان ءِ تیاب دپی شھر گوادر پورٹ ءَ ھوار مال ءُ مڈیانی بے کساس لٹ ءُ پل لشکری سر ءُ پرانی ھاترا دگانی سرا ٹٹ جنگ ءَ باریں چنچو بلین ڈالر سرمایہ کاری کتگ بلے بلوچ راج ءَ اے سرمایہ کاری ھچ رنگ ءَ نہ من اتگ آئی ھلاپ ءَ وتی گھگیری برجم داشتگ بھارت وڑیں ڈیھاں اے وڑیں سودا کنگ ءَ پیسر راجی جھد ءُ زورگیرانی ھلاپ ءَ یکلشلا برجمیں سیاسی گھگیری ءَ وتی مجگ ءِ تہ ءَ جاہ بہ دنت ءُ یات بہ داریت۔
بلوچ رھشون ءَ گشتگ کہ انڈیا ءِ سیاسی ءُ معاشی نپ وتی جاہ ءَ بلے بلوچ وتی سرڈگار ءِ سر ءَ وتی چکچینی ءُ پجار ءَ ھلاس کنوکیں زورگیراں سودابازیانی بھر بوھگ ءِ اجازت ءَ نہ دنت، بھارت ءَ یات بہ بیت ایران ءُ پاکستان دوئیں بلوچ راج ءِ بُنی دژمن انت دوئیں ریاست یک ءُ دومی ءَ گوں ھُور ءُ تور انت۔
آئی گشتگ کہ بلوچستان ءَ ھپتاد ءِ دھک ءَ پاکستان ءِ ھلاپ ءَ بیوکیں بلوچ راجی گھگیری ءِ وھد ءَ پاکستان ءِ کمک ءِ واستا ایران ءَ وتی ایئر فورس ءُ پائلٹ دیم داتگ انت دانکہ آ بلوچ راج جھد ءَ بہ لپاش ایت ءُ گوستگیں سال ءَ (زاھدان) دزاپ ءَ ایران ءِ زلم ءُ زوراکیانی ھلاپ ءَ توار چست کنگ ءَ ایران ءَ ھزارانی ھساب ءَ بلوچ تیراں گوں دُرشتگ ءُ شھید کتگ انت، ایشی ءَ چہ ابید ھمک روچ وتگڑیں ءُ دروگیں بھتام جتگ لس بلوچاناں دزگیر کتگ سر زاھر ءَ پاھو داتگ انت پد ءَ انچو زوراکی ءَ پد آیانی لاش بلوچستان ءَ ویرانگاں چگل داتگ انت اے مارشتاں درشان کنگ نہ بنت۔
بیان ءِ تہ ءَ دیمتر ءَ گشتگ ئے اے تیوگیں زلم ءُ زوراکی ءُ ناروائیانی بنکی سبب ھمیش انت بلوچستان ءِ سرڈگار زور گیپت انت ءُ وتا چہ زورگیپتی ءَ کشگ ءِ ھاترا ایران ءِ وڑیں فاشسٹ ایں ریاست ھلاپ ءَ کار ءَ انت، اے وڑ ءَ بھارت ءِ ایران ءِ کمک کنگ ھمے کلوہ ءَ دنت انڈیا بلوچ راج ءِ چکچینی ءَ ایران ءِ زوراکیاں شریدار انت اے گپ زانگ بہ بیت زورگیریں پاکستان ءُ ایرانی ریاست ءِ ھواری ءَ بلوچ راجی نپانی ھلاپ ءَ کجام ملک ءُ ڈیھاں بھر زورگ لوٹ ایت بلوچ راج ھما تیوگیں ملک ءُ ڈیھاں بلوچ چکچینی ءَ پاکستان ءُ ایران ءِ ھمکوپگ سرپد بیت۔
