بیبگر رند، اولی سیاسی ڈپلومیٹ، 

نبشتہ کار: کوہ گرد بلوچ

ھمگام بلوچی

شانزدھمی کرن ءَ بلوچانی چاکر ءُ گوھرام ءِ وت ماں وتی جنگاں 42 ھزار بلوچ کُشگ بیت۔ اے وت براتی کُشت ءُ کوش ءَ رند،  بلوچ دْرگان دْرگان بنت ءُ بلوچ ءِ یکجاھی ءُ وھدت پْرشیت۔

شئیری سر شونانی رِدا،  اے دَور ءُ زمانگ ءَ بلوچانی تہ ءَ زانندہ تر ءُ وانندہ تریں مردم  بیبگر رند بیتگ۔ بیبگر وت شائرے بیتگ ءُ بلوچانی یکّیں اسکالر ءُ زانتکار بیتگ کہ آئی ءَ آیوکیں وھد ءِ اے سرجمیں چیزانی پیش گیری ءُ پیش ڈاھی کُتگ۔ شھید نواب اکبرخان بگٹیءَ گشتگ کہ بیبگر رند  بلوچ راج ءِ اولی سِپارت کار بیتگ کہ آ وت ماں وتی جنگانی ھلاپ بیتگ ۔

بیبگر رند، رندانی نامئیں کماندار میران رند ءِ کستریں برات بیتگ۔ بلوچانی دانشور بیبگر رند ءَ چاکر ءُ گوھرام دوئیں ھر وھد ءَ چہ جنگ ءَ مکن کرتگ ءُ گْوشتگ انت کہ اے جنگ شمارا تاوان اِنت۔ پہ بلوچ ءَ تاوان اِنت۔  اے براتی کُشت ءُ کوش ءَ نپ ءُ سیتّ نیست۔

شش جنگ ءَ میر گْوھرام لاشاری پروش وارت۔ رؤت نوھانیانی میار بیت۔ نوھانی چاکر ءَ گوں نزّیک بنت۔ میر چاکر ءَ کلوہ دیم دئینت کہ گْوھرام مئے میار ءَ اَتکگ۔ نوں نبا کن ئے کہ دیم ءَ بیا ئے کہ تئی جنگ گوں مارا بیت، بلے رند سر ءَ نہ گِر اَنت۔ پہ جنگ ءَ ءُ گوھرام ءِ چُک چین کنگ ءَ ساڑی بنت۔

بیبگر زانت کہ اے رندی رندانی لشکر نوھانیانی کوی ئیں لشکر ءِ دست ءَ پروش ورگ ھژدری اِنت۔ آ رندانی لشکر ءِ دیم ءَ مان تَرّ اِیت ءُ میر چاکر ءِ اسپ ءِ لگام ءَ دست جنت ءُ گْوشیت کہ سردار سر گنوکے مہ کن ءُ بلوچاں ناراھیں گَر ءُ گَٹّاں مہ شیپ۔ اے رند ءِ شکست تئی بھت ءَ کپتگ۔ پیش ءَ چہ ھوش بہ کن ءُ کینگاں کوتاہ کن ءُ جنگ ءَ مہ رَو ءُ پہ ترا گران ءَ کپیت۔

سردار کینگاں کوتاہ کن

شاھیں کردگار ءَ یات کن

بِل ات برات کشی ءِ جنگاں

لاشاری ھزار مڑد بنت

بئید ءِ زھم جنیں نوھانی

ھر دو بنداں پلّو ءَ پجّی ءَ

دیم کِنزگ ترا گران تَرّ اِیت

پَد کِنزگ پَر آھاں ھَیب اِنت

بلے رندانی جنگی ورناہ جزباتی بنت۔ آ جنگی کیپانی تہ ءَ ھمینچو ملار بنت کہ بیبگر ءِ سیاسی زانِشت ءُ پیشڈاھی پَر آھاں بُزدلے ءِ ھساب بیت۔

آ بیبگر ءُ آئی ءِ برات میران ءَ بزدلے ءِ شگان ءَ گْوند اَنت۔ گْوشنت شُما پِکر مہ کن اِت۔ اودا کہ ما جنگجاہ ءَ رویں۔ شُمارا یک پَلّو ءَ نادینیں۔ جنگ ءَ ما وت مِڑیں۔ شما بس بہ نند اِت ءُ بہ چار اِت کہ کئے سوب مند بیت،  لاشاری یا ما۔

‏‎بیبگر گونڈلاں سرھمینتگ

ھندیاں مچنڈے داتگ

ماتیگییں تپے ءَ گِپتگ

گُڈّ ءِ کندھار ءِ جنگ ءَ

ھَے سُست ءَ نئیت داوایاں

اودا کہ رویں جنگجاہ ءَ

جُلّے تئی سرا پِرّینیں

تیراں ماں کش ءَ گْوازینیں

ما ءُ زھم جنیں نوھانی

تو نِند ءُ گِند کئی سوب بیت

رندانی جنگی ورناھانی چُشیں گپّاں گوں میران ءَ شگان سوچ اَنت۔ آ چُشیں گپّاں پہ وتی کوھیں بالاد ءَ مزنیں ھَیبے سرپد بیت۔ ھما راہ ءَ گچین کنت کہ ھما وھد ءُ زمانگ ءِ ردا پَر آئی ءَ ھَیبے مہ بیت۔ آ رندانی لشکر ءِ ھمراھی ءَ ناں گوں وتی چندے کمانداراں ایّوک ءُ تھنا دیم پہ لاشاریاں رؤت ءُ اوَل گَشت ءَ نوھانیانی دست ءَ جنگ بیت۔

گْوشتگ زھم جنیں میران ءَ

آ مات ءِ تاسپیں بچّیگ ءَ

گِندے بے نکائی چُکّاں

ڈوبار اَنت منی بالاد ءَ

ھمراہ نہ باں اِیشانی

موٹ اِت کُت منی پیشانی

میران ماں سرے سواران ات

بشّی جمبر ءَ گْواران اَنت

لاشار ءِ کلات ءِ دیم ءَ

گِپتگ گونڈلاں پِرّینتگ

آ ھیشی چوٹو ءِ گاڑینتگ

میران رند بلوچانی مستریں پوجی کماندار بیت۔ آ گوں دگہ چندے جوانیں کمانداراں نوھانیانی لشکر ءِ دست ءَ جنگ بیت۔ (اے کِسّہ انگت دگرے کہ نوھانی گوں میر چاکر ءَ باز نزّیک بنت ءُ آئی ءِ کمک کار بنت۔ لاشاریانی پناہ دیگ ءَ رند آ چون میر چاکر ءِ ھلاپ ءَ جنگ ءَ ساڑی بنت ءُ رند ءَ میر پہ کَست ءُ کینگ آھاں “لگوری” ءِ شگان ءَ جَنت۔)

میران رند ءِ کوش ءَ رَند رندانی لشکر ءِ گْورا دگہ چُشیں کوی ئیں پوجی کماندار نہ بیت۔ پمیشا میران ءِ کوش ءَ رند،  یک کَشت ءَ میر چاکر ءِ جوانتریں کماندار جنگ ءُ کُشگ بنت۔ سر کئے رؤت گڑا کلاہ نہ اُوشیت۔ رندانی لشکر پروش وارت۔

اے گپّ ءَ میر گوھرام لاشاری وتی پِر بستگیں شئیرے ءِ تہ ءَ دَرشان کنت کہ

تئی شست ءُ شش رند ءِ چوٹو گاڑینتگ

اَچ تئی پیشیگیں کمانداراں

کہ تیر اش ماں ھولان ءَ نہ اوشتاتنت

اَچ کُمیتانی آبریشمی بُکشاں

من کُشتگ تئی نامانی ملک میران

پروشتگ رندانی کاملیں دیوان

گوں ھر چھار ھَمنامیں سُمائیلاں

آ حسن نوتک ءِ نوھیں بچّاں

تئی سریں مڑداں مرد کُشیں عالی

من کُشتگ ءُ دبّوجاں سگارانی

بیبگر من اشتگ کہ بہ جنت شئیراں

زیمرے لانگو ئے بہ تَرّینیت

جاڑو پہ شیر ءِ پِنڈگ ءَ شرّ اِنت

ھینزک ءَ جونبو بیاریت پہ میر ءَ

کہ میر وتی ھلک ءِ شر سریں کاڑ اِنت

بیبگر ءِ پیش ڈاھی ءُ پیش گیری راست دَر کئیت۔ میران ءِ کوش ءَ رند،  میر چاکر ءِ لشکر پْروش وارت ءُ نزور تَرّیت۔ آ گیشیں جنگ ءُ بجنگ ءِ سِکّت ءَ نہ داریت۔ پروش ورگ ءَ رند میر چاکر اوں ادا نِشت نہ کنت، پنجاب ءَ رؤت۔ لھتے وھد ءَ رند میر گوھرام اوں سندھ ءَ رؤت ءُ نِندیت۔ بلوچانی یکدستی پْرشیت ءُ بلوچ بازیں وھدے ءَ سرانولی ءُ دْرگان دْرگان بنت۔