ھُزدار (ھمگام ھال) بلوچ اسٹوڈنٹس فرنٹ گریشگ ھنکین ءِ نیمگ ءَ چہ یک “کیریئر کونسلنگ ءُ کتابی مراگشے” مان ھائی سکینڈری اسکول سریج گریشگ ءَ برجم دارگ بوتگ۔ اے مراگش ءِ جارچین بُنجاھی پتر ءِ باسک گل ھسن بوتگ ءُ مھمان ھاس واجہ اسد نور بوتگ۔
دیوان ءَ تران کنوکیں مھمان چہ کودہ ءَ ھاجی میر رزاق، سردار زادہ کمبر ساجدی، بی این پی گریشگ ھنکین ءِ کماش سر جنگی ھان، بانک صدف رشید، ظفر زیب، وھاب گنی بلوچ، دامنِ شاشان پبلک لائبریری ءِ کارگشاد نسیر کیا ںلوچ، کامریڈ اسلم بلوچ، ءُ بی ایس ایف گریشگ ھنکین ءِ گوستگیں کماش سراج نور بوتگ اَنت ۔
دیوان ءَ ساڑیں مھمان بی ایس او پجار ءِ بنجاہی پتر ءِ باسک مظفر بلوچ گوں وتی سنگتاں، بساک نال ھنکین ءِ گوستیں کماش کریم آلم گوں وتی سنگتاں، یوتھ اسٹوڈنٹس آرگنائزیشن گریشگ ءِ کماش حفیظ بلوچ گوں وتی سنگتاں، نوجوان اتحاد گریشگ ءِ کماش فواد عالم ءُ کارگُشاد عرفان بلوچ، ھسن ھان ساجدی، ءُ مئے استاد واجہ نواز ساھب ءَ ابید باکی جتا جتائیں تبکہ ءِ مردماں بھر زورتگ ءُ مراگش براہ دار کتگ۔
دیوان ءِ تہ ءَ تران کنوکاں تران کنان ءَ گوشت کہ بلوچستان انچیں پدمنتگیں جاھے ادا نہ شریں وانگی ادارھے ھست نہ وانگی دگہ آسراتی کہ بلوچ نودربر وتی وانگ ءَ شریں دابے ءَ بہ کن اَنت اگاں ادا چنچو وانگ ھست بلے مئے نودربرانی رھبری کنگ نہ بیت کہ آ جوانیں راھے پہ وت بہ شوھاز اَنت۔
مئے بازیں نودربر یونیورسٹیاں سر بنت یک ءُ دو سمسٹر گوازین انت انگتاں نہ زانت آیاں ءَ چے وانگی اِنت، کُجام راہ ءَ روگی اِنت۔ دیمتر ءَ آواں بی ایس ایف ءِ سنگتانی جُھد سھڑات ءُ گْوشت گریشگ ءِ وڑیں پدمنتگیں چاگردے تہ ءَ بی ایس ایف ءِ سنگتانی برجہ داشتگیں مراگش پہ گریشگ ءِ نودربراں بلائیں ارزشتے دار ایت۔
گریشگ ءِ وڈیں چاگردے ءَ زندگی ءَ چوشیں مراگش برجم دارگ نہ بوتگ اِے وڑیں مراگش گریشگ ءِ ھر کُنڈ ءَ ءُ ھر سال برجم دارگ بہ بیت تانکہ نودربراں ءَ شریں رھبری بہ رس ایت۔ تران کنوکاں بلوچستان ءُ پنجاب ءِ وانگی ادارھانی سر ءَ تران کنان ءَ گْوشت اگاں راستی ءَ بچار ئے بلوچستان ءَ وانگی ادارہ نیست انچو کہ پنجاب ءِ وانگی ادارہ اَنت. دنیا ءِ نہ بلکن ما چہ پاکستان ءِ باکی جاھاں چہ ھم پدمنتگ اَنت مئے وانگی ادارہ روچ پہ روچ تباہ کنگ بوگ ءَ اَنت ۔ تعلیمی نظام کرپٹ کنگ بوتگ۔ نودربراں پہ وانگی ادارہ آزار جاہ جوڑ کنگ بوتگ اَنت ۔ بلے مارا زانگ لوٹ ایت بگیر وانگ ءَ ھچ راج دیمروئی نہ کنت مئے جُھد ھر وھداں گوں وتی وانگ ءَ بہ بیت تانکہ ما وت ءَ جاھے ءَ سر کت بِہ کن ایں باندا وتی راج ءُ چاگرد ءَ جاھے سر کُت کن ایں ۔ بلے بد بھتی ءَ مئے نودربر وتی راہ ءَ تنی وھدی تچک کت کنگ ءَ نہ اَنت کہ آوان ءَ کُجام پڈ ءَ روگی اِنت ءُ چے وانگی اِنت۔ سرپدی نہ رسگ ءَ چہ بازیں نودربر بگیر میڈیکل ءُ انجینرنگ ءَ ابید آدگیں وانگی پرانی بابت ءَ ھچ سرپدی نہ دار انت۔ آر ءَ چہ کھول ءُ چاگرد ءِ نیمگ انچو زور دیگ بیت آ تھنا ھمے دوئیں راھاں پہ وت در بہ چنت۔ چوناھا ھزاراں دگہ راہ ھست کہ مردم پہ وتی جند، چاگرد ءُ راج ءَ شریں کارے کُت کنت۔ دیمتراں آیاں گشت کہ مئے وانگی نظام یک ریس بازی ءِ جاھے جوڈ کنگ بوتگ انت، وانگجاہاں نودربراں وانگ ءِ بابت باز کم ءُ ریس بازی ءِ نیمگ ءَ گیشتر وانینگ بیت انچو ریس بازی کنگ پہ مئے آوھکیں باندات ءَ تباھی اِنت۔ مارا چرے ریس ءَ درکپگی انت ءُ یک شریں راھے درچنگی اِنت۔
مئے نودربرانی یک بلائیں جیڑاھے ایش اِنت کہ آ بلوچستان ءِ وڑیں پدمنتگیں جاھے ءَ نشتگ اَنت آوانی بُنکی وانگ تباہ اِنت وھدے کہ نودربر چہ میٹرک ءُ ایف اے ءُ ایف ایس سی ءَ رند درکپ اَنت پہ تیاری ءَ گُڑا آوانی واست ءَ جلدی چیزانی سرپد بوگ بلائیں جیڑھے بیت تانکہ آ شریں وڑے ءَ چیزاں سرپد بہ بنت، چار ءُ پنچ سال روت مئے نودربر پشت کپ اَنت۔ مارا وتی بنیاد مھکم کنگی اِنت گُڑا گرانیں چکاساں در کپت کن اَنت ۔
دیوان ءِ دیمتر ءَ گریشگ ھنکین ءِ کماش جاوید اقبال تران کنان ءَ گشت گریشگ ھما جاہ بوتگ کہ ادا ھر مردم ءَ وتی گس ءَ کتاب ایر کنگ ءَ تُرسیتگ مرچی بی ایس ایف ءِسنگتانی جُھد انت کہ اِے دومی سال اِنت گریشگ ءِ وڑیں جاھے ءَ کتابی مراگش برجم دارگ بوگ ءَ اِنت۔ گڈ سرا سنگت ءَ مھمانانی منت گت ءُ اِے گْوشت بی ایس ایف گریشگ ھنکین ھر سال اِے وڑیں مراگش برجم دارگ ءِ جُھد ءَ کنت تانکہ گریشگ ءِ تہ ءَ وانگی چاگردے ودی کنگ بہ بیت۔
کتابی مراگش ءَ بازیں کتاب دوستیں مردماں بھر زورت ءُ بی ایس ایف گریشگ ھنکین ءِ اِے جُھد ءِ ستاشانی کتگ۔
