کراچی ( ہمگام نیوز) بلوچ اسٹوڈنٹس فرنٹ کراچی ھنکینی جار کش ءَ بی ایس سی لیاری ءِ نوک گچین بوتگیں ھنکینکی کابینہ ءَ را گوں دل ءِ جُھلانکی ءَ مُراد باتی دنت ءُ ما ھمے اوست ءَ دار اِیں کہ بی ایس سی لیاری ءِ نوک گچین بوتگیں کماش نوید سنجرانی، کار گُشاد جویریہ میر ، کُمک کار گُشاد کے بی ندُل، ھنکینی شنگکار اسماعیل اسرار گوں وتی ھمکوپگیں ھنکینی ھمبلاں لیاری ءِ تہ ءَ بلوچ نودرانی جیڑہ ءُ جنجالانی واست ءَ شَریں وڑے ءَ گام چِست کن اَنت ۔ بلوچ نودربرانی جیڑہ ءُ جنجالاں جْوانیں رنگے ءَ گیش ءُ گیوار کن اَنت ۔
دیمتر ءَ بی ایس ایف کراچی ھنکین ءِ جارکش ءَ ھمے گوشتگ ما ھمے اوست ءُ امیت ءَ دار ایں کہ بلوچ نودربرانی وانگی جیڑہ ءُ جنجالی دیمپانی کنگ ءِ ھاتر ءَ بی ایس سی لیاری ھنکین گوں ما ھر پڑ ءَ ھمراھداری کن اَنت ۔ ما ھمے امیت کن اِیں کہ ماں لیاری ءِ تہ ءَ وانگ ءُ زانگ ،مُلکاری ءُ سْیاسی پڑ ءَ جْوانیں وڑے ءَ جَد ءُ جُھد کن اَنت ۔
گُڈ سر ءَ بی ایس ایف کراچی ھنکین ءِ جارکش ءَ ھمے گوشتگ کہ لیاری بلوچ سْیاست ءِ گڑ زانگ بیت البت مارا اسٹوڈنٹس پولیٹکس ءِ درگت ءَ گیش کار کنگی اِنت ءُ ما ھمے اوست کن ایں کہ بی ایس سی لیاری ھنکین اے درگت ءَ جَد ءُ جُھد کنت ءُ مئے ھمراھمداری ءَ کن اَنت چی ءَ کہ مئے منزل یکین اَنت ۔
