بُن اسلءَ اے بنی آدم ءِ کرنانی عادتاں چے یک عادتے کہ مردم وتی عیباں چیر دئیگ ءِ ھاترا دومی ءَ را ڈوباریت ءُایر جیگ کنگءِ جُہد ءَ کنت۔ ناکامیں مردم مدام کامیابیں مردمانی راہ ءِ دیم ءِ ڈنگر جنت۔ تہار ءُ نازانتیں چاگرد مّدام ڈنگر دئیوکیں مردمانی گوما تپاک کن اَنت. بلے اے پد منتگیں چاگرد ءَ ہچبر راستی ءِ پولگءِ تحقیق ءُ تصدیق کنگءِ جُہد نہ بیت۔ پرچاکہ آئی ءِ چمانی رژن چہ پیسرا پچ گرگ بوتگ اَنت۔ آ زانت کہ دیمءِ مردم رد گشگ انت بلے پدا اوں آئیءِ پلہ مرزیءَ کنت ۔نہ کہ راستی ءِ گوما اوشیت۔ انچش مئے واجہیں سنگت مجاہد بلوچ(کہ وت ءَرا زور پی ایچ ڈی ڈاکٹرے پدر کنت) لہتیں چیر اندریں ٹولیءِ دست کارمز بوہگ انت، انوں آہانی نامءِ دیمءَ آرگ ضرورت نہ انت اگن ضرورت بوت آہانی نام المءَ پاشک کنگ بنت کہ آ مجاہد صاھب ءِڈولیں مردمےءَ چون ءُ پرچہ وتی مقصدءِ ھاترا غلط کارمرز کنگءَ انت۔ مجاہد صاھبءَ چندیں روچ بیت انت یونیورسٹی آف تربت ءِ ھلاپ ءَ بے بُن ایں بہتام سازی ءُایراد گیری کنگءَ انت۔ آئی ءِ دل ءَ آ تہنا بلوچی ءِ شھزانت ءُ محکم تریں مردم اِنت آدگہ درستاں پس ءُ میش چاریتگءُ شپانکی کرتگ۔ پدا اے پد منتگین چاگرد ابید پٹ ءُ پولءَ بر گشتگیں گپ ءِ سرا ستک ءُ یقین کنت ۔ بلے اے چاگرد انچو اوں سما ءُ سنچ نیست کہ واجہءِ گوہر کماتگیں گال وتی جوھراں(ثبوت ءُ دلیل) پیلو کنگءَ نہ انت۔ کسءَ اے سما نہ بوت کہ واجہ ءِ گپانی تہا ساپ ءُ پلگاری نیست۔ ہر یک جملہے ءَگوں دومیءَ ہمگرنچی نیست انت، پدا چاگردءِدرستیں مہلوکءَ واجہءَ پہ بزگ بوہگءَ انت، اے گپءَ نوں عالم ءُ شہززانت بہ گیشین اَنت کہ یونیورسٹیءِ لیکچرار شپ پہ بزگی ءُ لوچی، جنگ ءُ کوکارءَ رسیت ؟یا پہ سنچ ءُ لائقی ؟؟اگاں یونیورسٹی لائقین استاد لوٹیت گڑا اودا بزگی میرٹ چارگی انت۔
گپءَ دیمءَ براں دومی نیمگءَ بلوچیءِ زبانءِ بازیں اسکالرءُ زانتکاراں یونیورسٹی انٹریو داتگ ۔ نوں جست پاد کئیت، آ دگہ درست نالائِک ءُ نابود بوت انت ایوک ءَ مجاہد بلوچ ءِ قد ءُ بالاد انچو مزن انت کہ آئی ءِ برزی ءَ کس سر بوت نہ کنت؟ مجاہد صاھب ءَ چے مستریں زانتکار است، ہمے ٹولی ءَ آہانی گم پرچا پر نہ انت؟ ایشاں اے سما اوں گور نہ جنت کہ اے انٹرویو ءَ اگاں کسے زورگ بوتگ اَنت آچونیں مردم اَنت؟ کئی مردم اَنت؟ چے ایشانی زانت ءُ پگر اچ مجاہد بلوچ ءَ کمتر اَنت؟ زاناں حق ایوک ءَ مجاہد بلوچ ءِ ئیگ اَنت کہ آئی ءَ یونیورسٹی ونتگ، ایندگہ مردمءَ میش چارینگ، اگن میش نہ چارینتگ گڈا آ دگہ زورگ پرچا زورگ مہ بنت ؟ آہانی گناہ چی اِنت؟ زاناں ایم افل ایوک ءَ مجاہد صاھب ءَ کرتگ ءُ اے دگراں نہ ونتگ ایف۔اے ، بی۔ اے، ءُ ایم اے والا بوتگ اَنت؟ آیا آ درست ایم افل والا نہ بوتگ انت؟؟؟؟آیا یونیورسٹی ءِ وانینگ ءِ تجربہ تہنا مجاہد بلوچ ءِ گورا است ایندگہ کسی کرا نہ نیست انت؟؟؟ آیا گلاب مرزا ،فیرروزہ ءُ شہناز طارق ڈاکٹر عبدالصبور ءِ وتی کس ءُ مردم اَنت؟ ادا من اے گپ ءَ تچک کنگ لوٹاں کہ من ء گلاب مرزا ،فیروزہ،ءُ شہناز طارق ڈاکٹرعبدالصبور بلوچ ءِ ہچ سیاد ءُ وارث نہ اَنت۔ ما ہم بلوچ راج ءِ بچ ءُ جنک اَنت۔ما ہم ونتگ ءُ ایم فل کتگ۔ما ہم شپ روچ منت کتگ ءُ وتی چمانی ھُوردگ ریتکگ انت۔ اگاں ما ہم حقے دار اَنت گڈا ڈاکٹر صبور نام ءُ دپ کنگ بوھگ ءَ انت۔ مجاہد صاھبءِ گورا اے چے ثبوت است کہ ڈاکٹر زینت ثناء ءِ فینل ءِ نمبر ڈاکٹر صبور صاھبءَ داتگ انت ؟اگاں ڈاکٹر صبور نمبر داتگ انت گڈا میڈم زینت ءَ پرچا وتی ڈیسنت نوٹ نبشتہ نہ کتگ؟ اگاں مجاہد ءِ گورا اے گپانی نبشتہی ثبوت است آ کورٹ ءُ عدالت ءَ بروت۔ اگاں نہ مفت ءِ حدا ڈاکٹر صبور ءُ میڈم زینت ءَ نام ءُ دپ مہ کن ءُ چہ وتی نیمگ ءَ گپ مہ جن انت۔ منی اے گپانی مقصد ڈاکٹر صبور صاحب ءِ ساڑا ءُ ستا نہ انت بلکیں ہما دروگانی پدر کنگ ءُ رد کنگ انت کہ مجاہد بلوچءَ بستگ انت۔
مجاہد بلوچ ءِ بے بُنیں گپ پی ایچ ڈی اسکالرے سنچ ءُ بود ءَ نہ جن انت ۔ پرچاکہ اسکالر وتی گپانی ثابت کنگ ءَ پٹ ءُ پول کنت ءُ گوں منطق ءُ دلیلاں گپ جنت بلے واجہ وتی ثابت کنگ ءَ چوں بازاری مردمانی وڑا بازاری سوگند ءُ قسم وارت ءُ وتی نابودیءَ پیش داریت۔
پہ درور۔۔۔۔
1۔اول سرا آ عاصم زہیر ءِ مثال ءَ دنت کہ بے معنا اِنت پرچکہ عاصم زہیر ءِ ڈگریاں دو تھرڈ ڈویژن مان ءُ ایچ ای سی ءِ رھبندانی ردءَ عاصم زہیر یونیورسٹی ءَ لیکچرار بوت نہ کنت۔ اے درگت ءَ تھرڈ ڈویژن والا بلوچستان آئی کورٹ ءَ شتگ انت ءُ کورٹ ءَ اوں آیانی کیس رجیکٹ کتگ۔ایچ ای سی ءِ رھبند اوں شمئے حاترا من جہل ءَ داتگ آں۔
شر بچار اتےتانکہ شمئے زہنءِ تہا ہچ شک ءُ شُبہ ءِ گنجائش ودی مہ بیت ۔
دومی گپ ایش کہ عاصم زہیر ایوکا تربت یونیورسٹی ءَ رجیکٹ نہ بوتگ بلکیں بلوچستان یورسٹی کہ چمودا آئی ءَ شعبہ ءِ بلوچی ءَ ایم اے، ایم افل، ءُ پی ایچ ڈی کتگ ،اودا ہم اسکرونٹنی کیمٹی ءَ ہم کہ ڈاکٹر رحیم مہر صاحب نندوک بوتگ واجہ عاصم زہیر صاھب ءِ نام پہ لیکچراریءَ اے واستہ short list نہ کہ ایچ ای سی ءِ پالسیانی خلاف انت۔ دومی بلوچستان یونیورسٹی ءِ شعبہ بلوچی ءِ چیرمین واجہ رحیم مہر صاحب ءَ عاصم زہیر ءَ را تانکہ وزٹنگ نہ زورتگ ءُ آئی ءِ جاہ ءَ عزیز بلوچ ءِ زرتگ۔ حالانکہ پہ وزٹنگ ٹیچنگ ءَ تھرڈ ءِ پابندی نیست۔
2۔واجہ مجاہد دیم ءَ نبشتہ کنت “آ دگراں کہ بلوچی ءَ وانتگ دہ دہ سال ءَ کار ءَ انت ایم افل، پی ایچ ڈی کرتگ، عاصم زھیر ،سعید عاقل، سلیم، بانل ،عزیز مراد ءُ دگہ”
راستی ایش انت کہ ایشانی تہا ایوک ءَ عاصم زہیر ءَ یلا کن کہ ہمے زوت ءَ پی ایچ ڈی سرجم بوتگ ایندگہ آ دگہ درست ایم ۔افل اَنت۔
تربت یونیورسٹی ءَ اوں ایم ۔اے ڈگری والا مردم Short list نہ کرتگ انت۔ اے زرتگیں درائیں ایم فل ڈگری اولڈر انت۔ ایم فل تہنا اے برزیں داتگیں مردماں نہ کرتگ ءُ نہ کہ علم ءُ زانت تہنا ہمیشانی ونڈ ءَ کپتگ۔
علم ءُ زانت کسی پت ءِ میراث نہ اِنت۔ کہ تو دگرانی نامءَ چیر دئیگ ءَ اَت ءُ گش ات کہ ما پی یچ ڈی کتگ نوں کجا برو اَنت ۔اے گچین ءَ ترا وتءَ کنگی اَنت۔ اگاں تو زانتکارے گڈا زانتکار ءُ سرپدیں مردم ءِ راہ تچک ءُ پلگار انت آ زانت کہ منا کجا روگی انت اگاں نہ تئی وڈا دومی مردم ءِ دست ءَ کارمز بیت ءُ مدامی گلگ کن اَنت۔ بلے تاں کد تو اے گلگ ءُ زاری آں برجم دارے؟ روچے نہ روچے لازم مردم تئی حال ءَ زان اَنت۔
3۔ “سالے ءَ پد پدا جار جنئگ بوت کہ پدا وتی کاگداں ھما مردم جمع کرت کن انت کہ آھاں ساری ءَ جمع نہ کرتگ انت۔”
عزت مندیں اسکالر یونیورسٹی 15 رند ءَ جار جنت کنت۔ اے گپ ترا پیسرا جنئگی بوتگ ۔بوت کنت یونیورسٹی ءَ آ کساس ءَ مردم نہ رستگ ءُ پدا جارے جتگ دانکہ گیشتر مردم جمع بہ کنت کہ اچ آہانی تہا زانتکار ءُ سرپدی مردم ہوار بوت کن اَنت۔ واجہ تئی اے گپ ءَاوں کردے نیست۔
4۔” واجہاں ہچ وڑیں سلیبس نہ دات، دومی وھدے کہ ٹیسٹ بوت 70% سبجیٹک ءُ 30% انگلش ، جنرل نالج، اینالاکئیکل ات انت”
اے سیلبس بس پہ تئی حاترا نہ بوتگ بلکیں سرجمیں بہر زوروکانی حاترا بوتگ ۔اگاں ترا سلیبس ءِ سرا ستک ءُ یقین نیست اَت گڈا واجہ تو ہما روچاں ءَ جاک ءُ کوکار بُہ کرتکیں بلکیں تئی ھمبلاں اوں تئی ھمراہی داری کرتگ اَت۔
5۔ترا ٹیسٹ ءِ جُستانی سرا اوں یقین نہ اِنت۔ اے جُست بس پہ تو اوں جوڑینگ نہ بوتگ اَنت۔ تئی ھبر راستیں انت کہ ہرکس مست توکلی ءِ ودی بوہگ ءِ سن دگرے نویستگ۔ چش کہ بچاراِت تا بازیں چیزیں پلگار نہ انت۔ بلے مردم مدام پٹ ءُ پول کنت چاریت کہ کجام پسو ءِ سرا گیشتر زانتکار تپاک کن اَنت۔ ایشیءَ ابید ٹیست ءِ جُستاں گوں یونیورسٹی ءِ تہا مردماں ہچ تعلق نیست۔ اے ٹیسٹ نہ یونیورسٹی ءَ گپتگ ۔ اے ٹیسٹ این ٹی ایس ءِ گپتگیں ٹیسٹ یے ءُ اے رنگیں جُست درائیں ٹیسٹانی تہا مان بیت۔ انچوش بلوچستان ءِ یونیورسٹی ءِ ٹیسٹ ءِ تہا مان بوتگ۔ پدا تو واجہ اے رنگیں جُستاں چے مان گیشتگ اِت گڈا چیا پی ایچ ڈی کرتگ؟ تو وت پٹ ءُ پول بُہ کرتیں۔
6۔اسکالر صاھب ! تو کہ تھرڈ ڈویژن ءِ گپ جنئگ اِت بلے ترا اے سما نیست کہ تھر ڈویژن ایچ ای سی ءِ فیصلہ بوتگ بلے انگت ءَ لہتیں مردماں کورٹ ءَ کیس کرتگ ءُ کورٹ ایشانی زورگ ءَ ہچ وڑا تیار نہ اَت۔ یونیورسٹی واکی تھرڈ ڈویژن والا مردم ءَ لیٹر داتگ بلے آ وھد ءَ کورٹءَ وتی فیصلہ نہ داتگ اَت۔
انٹرویو 10 تاریخ ءَ بندات بوہگی بوتگ اَنت ءُ کورٹءَ وتی فیصلہ 8 تاریخءَ داتگ پدا 9 تاریخ ءَ یونیورسٹیءَ کال کرتگ ءُ مردم ءَ گشتگ انت کہ شما میا اَت پرچہ کہ کورٹ ءِ آرڈر انت ۔نوں ادا یونیورسٹی ءِ میار چی اَنت؟ فیصلہ وَ کورٹءَ داتگ۔ ہمودا کہ تئی وار گٹیت تو یونیورسٹی آف تربت، ایچ ای سی، کورٹ آرڈر تو کسی گپ ءِ منگ ءَ رازی کہ نہ ات، ءُ تئی بے سمائیں چاگردے پرچا چو بے سمائی ءِ آماچ اِنت؟ بژنءِ گپ انت۔
7۔ “اگاں ریسرچ آفیسر ءِ ٹیسٹ ءِ من گپ ءَ بہ جناںءَ عقل ھیراں بیت پرچکہ آ چیز مارا واجہیں استاداں واننتگ انت اھانی تہا یک جستے ھم مان نہ بوتگ 100%در سد انگریزی بوتگ، پدا انٹرنشنل ریسریچ ءِ درگت ءَ بوتگ”
اول گپ ایش انت کہ سد جست ریسرچ ءِ نہ بوتگ انت ۔پیپر ہفتاد درسد ریسرچ بوتگ انت، 10 انگلش، 10 جنرل نولج ءُ 10 انلاٹیکل بوتگ۔ منی سر پر نہ بیت کہ تو پرچا سدے سدئین جُست ریسرچءِ نامءَ کرتگ انت؟ یا واجہ تو انگلش نہ زانتگ، تئی دلءَ درستیں ریسرچ ءِ جست بوتگ انت۔پدا گپ ایش انت کہ تو واجہ ریسرچ ءِ پوسٹ ءِ حاترا تو جمع کرتگ گڈا ٹیسٹ ءَ بلوچی ءِ جست چوں کیت؟ اے ہمے یونیورسٹی ءِ مردمانی مہربانی بوتگ کہ بلوچی ءِ وانندہانی حاترا ریسرچ ءِ پوسٹ جوڑ کرت دانکہ بلوچی ءِ وانندہ روزگار بہ بنت۔
اگاں نہ چوں آ دگہ یونیورسٹیانی وڑا ءَ ریسرچ ءِ پوسٹ دگے فیلڈ ءِ مردماں برت اَنت۔ دگہ گپے ایش انت کہ بلوچی ریسرچ ءِ سرا انگت کار نہ بوتگ ءُ ریسرچ ءِ ٹرم انگت بلوچی ءَ نہ بوتگ انت گڈا چوں تئی حاترا ٹیسٹ بلوچی ءَ بیت ؟ پدا ادا یک رندے ترا من گشاں کہ ٹیسٹ ءِ اتکگیں جستاں ڈیپارٹمنٹ ءَ ہچ تعلق نیست۔ تو بس وتی نزرویانی چیر دئیگ ءِ حاترا دگراں ڈوباریت ءُ دگرانی دست ءَ کارمرز بوہگ ءَ ات ۔بلے دگر ءِ گیگان آں کپے ءَ پدا تئی وتی پد گار بنت اسکالرصاھب، اے وڑیں پاسی ءُ فیلی بیت بلے بنی آدمی ءَ دوراندیشی پیش دارگی انت۔
8۔ مجاہد صاھب تو نبشتہ کتگ کہ انٹریو میرٹ ادا بوتگ۔ اولی سلیم ہمراز ءُ دومی منی نام اتکگ۔ بلے تئی نمبر 65 انت ترا چے پیسر 6 مردم کہ آیاں اچ ترا گیشتر نمبرے گپتگ اگاں لسٹ ءَ دیما بیارے گڈا اے وڑا بیت۔
1۔ محمد سیلم 75 نمبر بلے بی ۔اے تھرڈ ڈویژن انت۔ بلے پوسٹ ءِ ھاترا سیکنڈ ڈویژن ءِ ڈگری یے جوڑے کرتگ۔ اے ڈگری جہلءَ دئیگ بنت۔
2۔ عبداللہ دشتی 70 تھرڈ ڈویژن
3۔بانل 68 نمبر
4۔ گلاب مرزا 67 نمبر ءُ سے سال یونیورسٹی آف تربتءَوانینگءِ تجربہ۔
5۔فیروزہ 67 نمبر ءُ7 سال یونیورسٹی آف تربت ءَ وانینگءِ تجربہ۔
6۔زیبدہ درمحمد66 نمبر
7۔ وارث 65 نمبر
8۔ مجاہد بلوچ 65 نمبر
9۔ بالاچ حمید 64 نمبر
10۔عزیز مراد 64
11 ۔اسلم تگرانی 63
12۔ سعید عاقل 62
13۔ ناصر خان 59 ،7سال کہ یونیورسٹیءَ وانینگءِ تجربہ۔
14۔شہناز طارق 53 سالے یونیورسٹی وانینگءِ تجربہ۔
اے بُرز ءِ داتگیں لسٹ ءَ بچار اگاں اے لسٹ رد انت گڈا بگش ، اگاں ٹیسٹ ءِ نمبرانی حسابءَ مردم زورگ بہ بنت گڈا تو کجام پوسٹ ءَ کرزیت؟تو بس وتی نامینگءَ وتءَ سیمی مردم کرتگ بلے اسکالر صاھب ترا انگتءَ اے حیال گور نہ انت کہ تئی نام کجام نمبرءِ سرا اِنت۔ تو وتءَ سیمی کن اِت گڈا برزءِ اے داتگیں نام ؟ اےبرزءِ نام پرچا نہ گپتگ اَنت؟ ہمے ھاترا کہ راج ءِ دیمءَ تئی نام پاشک بیت انت؟
8۔”من پی ایچ ڈی کنگ ءَ انت ءُ من پی ایچ ڈی سرجم انت ۔داں مارچ ءَ تھیسز جمع بیت۔”
پہ حق ءِ حدا بچاریت کہ تئی داتگیں رِدانی(جملہانی) تہا انگت ءَ تضاد است انت۔ تو اولی رد (جملہ)ءِ تہا تئی پی ایچ ڈی بوہگ ءَ انت ۔دومی رد ءِ تہا تو نبشتہ کُتگ تئی پی ایچ ڈی سرجم انت۔سیمی رد ءِ تہا تو نبشتہ کُتگ تئی پی ایچ ڈی ءِ تھیسز مارچ ءَ جمع بیت۔ اے برزءِ داتگیں ردانی (جملہانی )تہا چی پیش دارگ لوٹے، باقی اے فیصلہ وانوک بکن انت کہ تئی چیچو تچک انت۔ من ہوں انسان دورگ بست کناں، بلے وانوکے کرا دوئیں نبشتانک موجود انت چار ءُ ٹپاس بکن انت۔
دومی گپ پی ایچ ڈی ءِ تھیسز انگت ءَ جمع نہ بوتگ ۔تو پی ایچ ڈی نہ انت بہ گندے تئی تھیسز رجیکٹ بہ بیت ءُ بہ گندے ترا دگہ 2 یا 3 سال اے پراسسءَ بہ لگیت۔ تئی پی ایچ ڈی انو وھد ءَ چے پیسر انت ۔وھد ءَ ساری وت ءَ را پی ایچ ڈی ڈاکٹرے مہ لیک۔
10۔ ” من ہفت کتاب رد ءُ بند داتگ، منی پنچ کتاب پہ چھاپءَ جریدگ انت، 5 سال وزٹینگ ٹیچر ءِ جہت ءَ وانینگءَ انت”
ایچ ای سی پالسی رد ءَ ہفت یا ہفتاد کتاب رد ءُ بند یونیورسٹی ءِ لیکچرار شپ ریکوائرمنٹ نہ انت چوشیں کتاب ءَ ایچ ای سی پالسی ردا ہچ ارزشت نیست، تو پی ایچ ڈی ءِ نودروبرے ۔گپ تئی بارازی مردم ءِ ڈول ءَ انت، مجاہد صاھب کسانیں تکلیف ئیے بکن ایچ ای سی پالسی بوان دانکہ تئی بلوچستان یونیورسٹی ءِ پجار اوں ہمے رنگ ءَ مہ بیت یا انوں تو زہنی حوالہ تکلیف ءَ چہ در کائیت کہ تو پرچہ زورگ نہ بوتگ ات۔ توئے مجاہد صاھب وتی ہفت کتاب ءِ بدل ءَ ہفت وتی ریسرچ پیپرانی گپ بہ جتیں جوان تر بوتگ اَنت۔ مجاہد صاھب تو تُری ہفتاد کتاب رد ءُ بند بدئے بلے ایچ ای سی ءُ یونیورسٹی رد ءُ بندی کتاب آنی امیت ءَ مہ نند کہ ترا لکچرار ءِ قابل بئیں۔ تو ریسرچ نہ کرتگ ءُ رد ءُ بند ءِ واستہ تو پی ایچ ڈی کنگ ءَ ات گڈا صاھب تئی بندیکءِ سر گار انت۔ رد ءُ بند دئیگ ءَ ہر کس ءَ ایم اے کتگ کرت کنت، ایشی متلب اے نہ بیت ہرکس بلوچی ءِ زبان ءِ بلائیں کواسکار ءُ یونیورسٹی ءَ لیکچرار بہ بیت۔
چو زبانی بولی مردم 5 نہ 50 کتاب ءِ جریدگی نام دات کنت انت۔
مجاہد صاھب تو اگاں 5 سال انت وانینگ ءَ ات گڈا آ دگراں زاناں میش ءُ بز چارینتگ یا کہ آیاں کباڈی ءَ کار کرتگ؟ تو پی ایچ ڈی کنگ ءَ ات ،بلے تئی گپ اجب انت۔ تئی اے گپ آنی تہا ہمیچو تضاد است کہ آ دانشمندی اندیم بوہگءَ انت۔
11۔واجہ سینڈکیٹ ءِ بابت ءَ گشگ ءَ ات کہ “وتی دلدوستیں مردماں اپروئل کنائینتگ انت ۔” مجاہد صاھب ترا اے سرپدی است کہ سنڈکیٹ باڈی چی چیزے؟ ءُ کجام مردم سینڈکیٹ ءِ باسک کے بوت کنت؟ تئی درائیں وانوک اوں نزان انت سینڈکیٹ باڈی زمہ واری چی انت؟ یونیورسٹی اپروئل ءَ رند سنیڈکیٹ باڈی رو انت، نوں توئے مجاہد بگش سنیڈکیٹ چون دلدوستیں مردم ءَ زوریت۔ سنیڈکیٹ ءِ وتی آزات ءُ خود مختاریں ممبر انت کہ آہانی سیادی گون یونیورسٹی ءَ ہچ نیست انت ۔
12۔ دگے دروگے میڈم زینت ثناء پشت ءَ بستگ کہ درستاں چے گیش نمبر میڈم ءَ مجاہد ءَ داتگءُ پدا ترا اے کیا حال داتگ کہ ” من ءَ وتی ماس ءُ پس ءِ کسم انت کہ تئی انٹریو سک باز شر بوگ من کلاں گیش نمبر ترا داتگ ” یک ایش انت کہ پی یچ ڈی اولڈر سوگند نہ وارت، دلیل ءُ ریفرنس دنت ءُ وتی گپ آں ثابت کنت۔ تو اے گپانی پہ قسم ورگ ءَ ثابت کنگ ءَ ات بلے برو ہمے گپ ءِ ریفرنس ءُ ثبوت آں بیار مہلوک ءَ ادا کاہ نہ وارتگ کہ تو ہر غلط بیانی بکن ءِ صاھب ءِ علم ءِ مرسم تئی گپ آنی سرا بیسہ بکنت۔ برو نبشتہی صورت ءَ میڈم گپ ءَ بیار۔اے بلوچ راج تنیگہ چوں جاہل نہ انت کہ سوگند ءِ ورگ ءَ تئی رند ءَ کپیت۔ اگاں سوگند ءَ تئی سرا اعتبار کن اَنت گڈا آ مردم جٹ ءُ جاہل انت۔ اے گپ ءَ ثابت بکن کہ واکی میڈم ءَ اے وڑا گشتگ۔ ءُ واکی فینل ءِ نشتگیں درائیں مردماں ترا نمبر داتگ۔ یک سرپدیں مردمءِ زانت کہ زینت ثناء اے ڈول وتءَ را چو دور نہ دنت کہ گوں ھرکس ءَ یونیورسٹی ءِ چیر ءُ اندریں گپاں آں بہ بکنت۔
اگاں گوں تو گپ ئے جتگ گڈا بزاں تئی،ڈاکٹر رحیم مہر ءُ آئی ءِ معاہدے بوتگ ۔پمشکہ شمارا نمبر داتگ ءُ شمے حاترا جہد ے کرتگ بلے فینل ءِ باقی 15 مردم منگ ءَ اتگ۔انچوش انت نا؟؟؟؟؟؟؟ دومی تہنا زینت ثناء داتگیں نمبر اوں درد نہ ور انت ۔فینل ءِ تہا کل 15 ممبر بوتگ انت گڈا آدگراں چنچو نمبر داتگ؟
13۔ ” گڈی ءَ واجہ ڈاکٹر پروفیسر عبدالصبور بلوچ صاحب گوں من دیم پہ دیم بوت ، وتی جست ءِ کرت انت ، من یک یک ءَ پسو دات انت ، یک جستے ءَ ابید کہ زبان شناسی ءِ بابت ءَ ات من نہ زانت (یک چیزے انٹریو ءِ تہا است کہ یکے چکاسگ انت ءُ دومی بند کنگ انت) من ھما وھد ءَ ابکہ بوتاں وھدے واجہ ءَ من جست کرت کہ سور آزمانک ءِ گڈی ڈائیلگ ءَ بگش ، بلئے کدرت ءِ حدا من ایشر ھم زانت ”
اے رنگیں جست ہچبر پروفیسر ڈاکٹر عبدالصبور بلوچ نہ کنت من واجہ ءِ دیم ءَ باز رند ءَ انٹرویوءَ شتگوں بلئے ڈاکٹر صاحب ءَ کدی اے رنگیں جست نہ کرتگ۔ الانکہ آ وھدی منا پجا اش نہ آورتگ۔ ڈاکٹر صاحب مردم ءَ ڈسکشن پرمائیت۔ اے رنگ ءَ ترا چوں کنت؟ آئی چے زاتی دشمنی گون تو است، دومی بائید ہما آزمانک ءِ گڈی ڈآئیلگ دیما بیارتیں دانکہ ما بچارتیں کہ تو آزمانک ءِ گڈی رد(جملہ ) ءِ گپءَ ات یا کہ گڈی ڈائیلگ ءِ۔ گڈا دائیلگ ءُ گڈی رد(جملہ)ءُ ڈائلگ کسءَ یات نہ بنت۔ بلوچی ءِ یک آزمانکے نہ انت کہ تئی ڈولیں اسکالراں یاد بیت ۔اے رنگیں زانتکارے وت ءَ پیش مہ دار کہ قوم ءِ ستک تئی سرا ہلاس بہ بیت۔ مجاہد بلوچ تو انگت ءَ بلوچءُ بلوچیءِ تہا افلاطون نہ ات، نہ کہ وتءَ افلاطون پیش دارگءِ ضرورت انت۔
واجہ کہ رحیم مہر ءِ نمبرانی گپاں جنت ءُ زینت ثناء ریفرنسءَ دنت بلئے واجہ ءِ گورءَ ثابت کنگ ءِ حاترا پس سوگند ءِ و رگ ءَ ابید دگہ ہچ نیست ۔ زاناں وانگ ءُ زانگ بس شما زان اِنت دگہ درائیں مردم پس انت؟ چے ڈاکٹر غفور شاد ءُ ڈاکٹر طاہر حکیم بلوچ چہ ڈاکٹر رحیم مہر ءَ کم تر انت؟ ڈاکٹر غفور شاد ءِ ایم ۔ افل ءُ پی ایچ ڈی ءِ تھیسزاں پاکستان ءِ شرتریں ادارہ چے ایورڈ گپتگ۔ رحیم مہر ءِ کجام کتاب ءَ ایورڈ گپتگ؟ رحیم مہر ءِ ایم۔ افل ءِ تھیسزءَ ابید دگہ درائیں کتاب رد ءُ بند داتگیں کتاب اَنت۔ اگاں رد ءُ بند داتگیں کتابانی گپ ارزشت داریت گڈا ڈاکٹر طاہر حکیم بلوچ ءَ بلوچی ءِ شرتریں ردءُ بند دئیوک گشگ بیت۔ پرچکہ آئی ءَ بلوچی ءِ شرتریں پڑاں کتاب رد ءُ بند داتگ۔ گڈا نوں واجہیں اسکالر؟
اے درستیں گپانی تہا راستی درا نہ بوھگ ءَ انت ۔تو اے گل مہ بو کہ تئی پشت ءَ 100 مردماں گپ جتگ ۔اے گپ جنوک ہما مردم بوتگ انت کہ ایم ۔فل تھیسز کرت نہ کرتگ ءُ یونیورسٹی آف تربت ءَ میاری کنگ ءَ انت۔ یا اے درائیں بچک ءُ بازاری انت۔ دومی تو برز حیالی ءِ شکار ات تئی دل ءَ بلوچی ءِ افلاطون توئے۔ بلئے اے وڑ نہ انت۔تئی روزگار ءِ زمہ اوں یونیورسٹیءَ نہ زرتگ کہ تو گلگ کنگ ءَ ات ۔زانتکاریں ءُ سرپدی ایں مردم الم در کئیت۔ اے راج مرچی ترا نہ زانت باندا ترا زانت۔
مجاہد بلوچ ءِ گپانی تہا ہچ راستی نیست ۔مرد وتی گپاں وتءَ رَد(غلط) کنت۔
اے درائیں بے سریں گلگ انت کہ وتی کمی ءَ چیر دئیگ ءِ حاترا دگراں میار بار کنگ ءَ انت۔زانتکار ءُ عاقلیں مردمانی گپ تچک بنت، آہانی گورا دلیل ءُ ثبوت بیت۔ یک پی ای ڈی اسکالر چو میست ءِ جاہلیں ملاے وڈا سوگند نہ وارت، ریفرنس دنت۔
سلامت باتے
وژنام باتے
