ہمگام : نبشتانک
گْوستگیں تومشان ءِ ماہ ءَ ترکی ءِ لُچّ ءُ رستریں پاگواجہ تیب اردگان ماں میان اُستمانی گَل ” یو این الباریں مجلس” ءَ پہ گیدی ءِ مسلماناں ھارگ ءُ ارس گْوارگ ءَ ات کہ مسلمانانی سر ءَ کَھر ءُ زورانسری بوگ اِنت، یمن ءُ کشمیر ءَ بِہ گِر داں پلیستین ءَ مسلمان کُشگ بیگ اَنت بلے ھما لُچّ ءَ مرشی یک رَند پد ءَ دو ھپتگ ءَ رَند 06 سارتان 2019 ءَ شام ءِ وتواجھیں کردستان، ڈیھ ءِ سر ءَ یک بلاھیں اُرشے گوں جنگی بالیگراب ءُ دیر جَنّوکیں توپاں بُنگیج ئِےکت۔
ترکی اے تھمت ءُ بھتام ءِ سرا اّرش کنگ انت کہ ترکی ءِ نیمگی کُرد سیاسی گَل پی کے کے ءِ جنگولی گَل HPG، HDP، TAK ءُ آئی جنینی سرمچارانی گَل YJA -3Star ءِ سرمچاراں گوریچی اِراک ءِ دمگ ءُ کوھاں( کوہ ء سنجار ءُ کوہ ء کندیل) ءِ سَنگر ءُ بندراں اڈکنگ ءَ رَند شام ءِ نیمگی وتواجھیں کُردستان ءِ دمگ وتی سنگر ایر اش کتگ انت۔ گْوش ایت کہ شام ءِ کردانی جنگولی گَل YPG ءُ آئی ءِ جنینی گَل YPJ پی پی کے ءِ جنگولیں گَلاں گوں یک انت۔
چوناھیگا ترکی سَک ترس ایت کہ اراک ءُ شام ءِ کُردانی وت واجہی ءَ رند رِندی بیرانی ترکی ئیگ انت پمیشکا وت ءَ را پہ رکینگ ءَ بے نپ ءُ بے سیتیں تچ ءُ تاگ کنگ ءَ انت۔ بلے ترکی نہ زانت کہ ترک راج نہ اراک ءِ زالمیں ھاکم سدام ھسن ءِ دیم ءَ سر اش جھل ءَ کتگ انت نیکہ چہ شام ءِ ھاکماں ترسیتگ انت۔
چوناھیگا اے وَ راست انت کہ تیوگیں کُرد راج یک یکی ءَ گلامی ءِ سانکلاں سِندگ انت اولی برے 1990 ءِ ھلیج جنگ ءَ رند اراکی کُرد چہ بازیں ندریگ ءُ کربانی ءَ پد وتواجہی ءَ سوبین بیتگ انت ءُ مرچی یک جتائیں استانے ءَ KRG ءِ وتواجہ اَنت۔ پد ءَ 2011 ءِ اراب آشوب ءَ رند وھدے تیوگیں شام ءِ استان ءَ جنگ ءُ بیرانی یے ءِ آماچ بیتگ انتءُ شام سرکاری لشکر وت ماں وت جنگاں کپتگ انت ءُ اے درگت ءَ 2012 ءَ شام ءِ کرداں ھم وت ءَ وتواجہی درشان کُت۔ مرشی گوریچی ءُ رودرآتکی شام ءَ اشانی یک جتائیں استانے ھست ءُ آئی ءِ لاپ ءَ ترکی ءِ ھلاپ ءَ جُھدکاریں سیاسی گَل پی کے کے ءُ شامی کرد پی وائی ڈی یکجاھی ءَ سرکار ءَ جُنزینگ انت۔
پی کے کے ءِ جنگولی گَل HPG، HDP، TAK ءُ آئی جنینی سرمچاری گَل YJA -3Star ءُ پی وائی ڈی ءِ جنگولی گَل YPG ءُ جنینی گَل YPJ یک انت۔
گُڑا ما زان ایں کہ ایشی ءِ سیمسر ترکی ءِ زیر دستیں کردستان ءَ ڈیج ور انت۔ پمیشکا ترکی نّی دلاپ انت کہ پی کے کے ءُ پی وائی ڈی دوئیں ایوکیں وھداں ھوار بنت ءُ ترکی ءِ ھلاپ ءَ چیر جنگے بنا کن انت۔ پیش ءَ پی کے کے ایوک ءَ ترکی ءِ ھلاپ ءَ جُھد ءَ ات ءُ اراکی کردستان ءِ کوہ ء سنجار ءُ کوہ ء کندیل ءَ ابید ایشاں دومی ھچ جاہ بندر ءُ سنگر نہ ات انت بلے نّی تیوگیں گوریچی ءُ رودرآتکی شام ءِ کردستان پی کے کے ءِ جند ءِ ڈیھ انت آپرین، تَل آبیاد، اکالے، راسلن، کمشلی، دْریک، ھسکاہ، الروج، الھاول، آنیسہ ءُ رکا ڈولیں مزنیں شھر ءُ کوہ پی کے کے ءُ پی وائی ڈی ءِ جنگولی گَلانی انت۔
ترکی ءَ 6 سارتان 2019 ءَ اُرش پہ اے مول مُراد ءَ بنا کتگ کہ ترکی ءُ شامی گوریچی ءُ رودرآتکتی شامی کردستان ءِ سیمسر ءَ کُرد میزران مہ بند بلکیں شام ءِ وت ما وت جنگ ءِ وھد ءَ ترکی ءِ نیمگ ءَ لَڈتگیں شامی اَرب بِہ گِر داں آپرین، تَل آبیاد، اکالے، راسلن، کمشلی تاں دْریک ءِ دمگاں آباد بنت ءُ 30 کلومیٹر یک سیپزونے(Safe Zone) اڈ کنت کہ کرد منی سیمسر ءَ مہ بنت پمیشکا ترکی گوں شام ءِ ارب یاگیاں کردستان ءِ سر اُرش کنگ ءَ انت۔
بلے کْرد گْوش انت کردستان مئے ڈیھ ءُ وتن انت گُڑا ما چی ءَ شامی لَڈتگیں اَرباں جاگہ بِہ دے ایں ءُ اے وَ بیت نہ کنت کہ چہ زور ءَ کَسے دومی راجے کُردانی ڈیھ ءَ آباد کنت پمیشکا اے بیت نہ کنت کہ ترکی لکانی کَچّ ءَ لَڈتگیں ارباں بیار ایت ءُ کُردستان آباد اش کنت ءُ پد اے ایمنی ءُ سلامتی ءَ لَکّیں ٹَکّ ءُ کَھول میزران بنت البت ترکی میان اُستمانی راج ءَ ریپنگ انت ءُ اے تیوگیں ٹکّ ءُ تُمن پد ءَ کُشگ بنت باید انت اے شامی لَڈتگیں تمَن وتی جِند ءِ شھر ءُ دَمگاں وتر کن انت۔
چوناھیگا ترکی ءِ شامی کردستان ءِ سر ءَ اے اولی اُرش نہ انت ایشی چہ ساری ءَ 2018 ءِ بَھاران ءِ وھد ءَ ھم ترکی ءَ گوں شامی اَرب یاگیاں روجاوا ءُ آپرین ءِ دمگاں بلاھیں اُرش کتگ ات بلے ترکی بے سوب بوت۔ مرشی میان اُستمان ءِ تیوگیں استاناں ترکی ءِ اے اُرش ءَ را لانت دات۔ سھودی اراب ءُ یو اے ای ءَ بیھار دات کہ ترکی میانجی ئیں رودرآتکی(Middle East) ءَ نوکیں شُھرتے ودی کنگ انت۔ تیوگیں ارب استاناں ھم ترکی ءِ کردانی سر ءَ اُرش ءَ را لانت دات ھمئے ڈول ءَ تیوگیں روایرشُتی استاناں(Western Countries) توری پرانس، انگلستان، جرمنی گْوش ئے توری آمریکہ ءَ درست ترکی ءِ اُرش ءِ سر ءَ زَھر انت۔ ھندوستان ءَ ھم ترکی ءَ را لانت دات۔ بلے ترکی ھچ نہ منّ ایت۔۔
دومی نیمگ ءَ اراکی کرد رھشون واجہ مھسود بارزانی ءَ ھم ترکی ءِ اُرش ءَ لانت دات ءُ جنگ زیت ھلاسی گوشت ئِے پد ءَ تیوگیں کرد جنگولی گَل ترک سرکاری لشکر ءَ سَکیں جنگی پَسّو دیگ ءَ انت ءُ دلجم انت کہ اے جنگ پہ ترکی ءَ بیرانی یے بیت ءُ گوشگ ءَ انت کہ اراکی ءُ شامی کردستان ءِ وتواجہی ءُ آجوئی ءِ رَند ءَ اے جنگ ترکی ءَ جِیدے بدل کنت۔
گیدی ءِ بلاھیں جنگی زانوگرانانی گْوشت ءُ پالانی رِد ءَ اگاں 40 ملکانی اَراب تپاکی گَل(Arab Coalition) ایمن ءَ چہ 2015 ءَ بے سوب انت اود ءَ یک چیر جنگی گَلے نام ئِے ھوثی انت، پروش اش دات نہ کُت گُڑا ترکی چون کرداں ھلاس کنت ءُ پروش ئِے دات البت اے جنگ پہ ترکی ءَ جانی ءُ زَر زوالی یے آکبتے بیت۔ اگاں 90،80 ءُ 2000 ءِ دَھکاں ترکی ءَ ایوکیں پی کے کے ءَ را پروش دات نہ کت وھدے آئی ءِ بُندر ءُ سنگر ایوک ءَ اراکی کردستان ءِ دمگ کوہ سنجار ءُ کوہ کندیل ءِ لاپ ات انت بلے نّی پی کے کے ءُ وائی پی ڈی ءِ جنگولی گَل یکمشت ءُ تپاک انت تیوگیں ارب ءِ استان گوش ئے توری میان اُستمانی دِگریں استان گْوش ئے کُردانی کُمک ءَ انت۔
نوکیں ھال ایش انت کہ شام ءِ سرکاری لشکر ھم پہ کرد راج ءِ کُمک ءَ ترکی ءِ ھلاپ ءَ جنگ ءَ پیداک انت۔ ترکی ءِ بیرانی ءِ وھد آتک۔ اراکی ءُ شامی کردانی وتواجہی ءَ رَند ترکی ءِ کرد ھم زیت وتی ڈیھ ءِ وت واجہ بنت.
