نبشتہ کار: نوشاد بلوچ
ھمگام بلوچی
اگاں ما انسانی راجدپترانی سرا چمشانکے بہ دیاں گڑا مارا چشیں سدانی ھساب ءَ مسال دست کپت کنت کہ راجاناں چہ راجدپتراں ءُ جند ءِ سرڈگار ءَ چتور ولگوج کنگ بیتگ انت ۔برٹش سرکار ءِ بگر دانکہ پنجابی ءُ گجر ءَ درا ،اے درستانی پالیسی ھمے یکیں بیتگ کہ وتا مھکم کنگ ءَ ھاترا نزوریں راجانی سرا کبزہ بہ کن پدا آوانی کلچر ،زبان ،ھسٹری ءِ سرا ارش بکن تاکہ اے کوم چہ راجدپتر ءَ بیگواہ بہ بنت آیانی وتی کبزہ گیری تاں ابد بمانیت ،ھمے پالیسی ءِ ساھگ ءَ پنجابی و گجر ءَ بلوچانی زبان (کلچر ھسٹری) ءِ سرا سک دیریں ارش کتگ وتارا چہ وتی جند ءَ سندگ ءَ پالیسی ءِ سرا اے وڑا کار کنگ ءَ انت ، کہ ایشانی پالیسی ھمیش انت کہ اگاں یک راجے چہ راجی بستار ءَ ھلاس کنگ ءُ راجدپتر ءَ چے لوڈینگی بیت گڈا الم انت کہ آ راج ءَ زبان کلچر ھسٹری پچ گرگ بہ بیت ءُ ھما راجی بامرد کہ آوانی ھیرو انت چشیں ابدمانیں ھیرو بدنام کنگی انت ،دز ، ڈنگانی نام پر کنگی انت تاکہ مردمانی دل ءَ ءُ آوکیں نسلاں پہ وتی گوست ءِ یک نشانے پشت مہ کپیت انچو کہ پنجابی ءِ وتی سرکاری اسکول ءِ کورسانی کتابانی توک ءَ ھچ بلوچانی راجی بامردانی کسہ نیاورتگ انت اگاں جاگھے زکر بیتگ گڑا بلوچ دز بیتگ ڈنگ بیتگ یا جنگلی بیتگ ،اے ڈولیں کارانی مز چوش بیت کہ دری کوم بلوچ ءَ شریں چمے ءَ نہ چارانت ءُ بلوچانی وتی اوبادگ وتارا جنگلی ، دز ،ڈنگ ،گشگ ءَ شرم کن انت پمشکا وتی زبان کلچر روایاتاں یل کن انت بلوچ بوگ آوانی ھاترا گرانیں بارے بیت کم کم ءَ اے راج گار بیگواہ بیت ۔وتی راجی بامرداں دز، ڈُنگ ،گشگ ،وتارا وتی زمین ءِ سرا مھاجر گشگ ،وتی آسار کدیمہ ءَ درآمدانی سرا مُشگ ،نہ تھنا کبزہ گیر ءِ مول ءُ مرادانی پیلو کنگ ءِ کمک کنگ انت بلکیں وتی راجدپتر ءَ پہ آوکیں نسلاں (کنٹرورشن) کنگ ءُ گار و بیگواہ کنگ انت بلکن پہ کبزہ گیر دشمناں راھے پچ کنگ انت ۔
من سرپد باں کہ پہ بلوچ ءِ ھستی ءِ گار ءُ بیگواہ کنگ ءَ ھما پندل کہ سازگ بیتگ انت یک کساسے ءَ تک اے ھاترا کامیاب بیتگاں کہ نوں بلوچ ءَ گار ءُ بیگواہ کنگ ءَ نہ تھنا بلوچانی ادارھانی توک ءَ پترتگاں بلکیں سیاسی گل ءُ بلوچ نبشتہ کارانی کلمانی توک ءَ ایر کپتگ انت ,پہ (سسٹیمک) بلوچ دژمنی ءَ واجہ جان مھمد دشتی ءِ کردگار درستانی دیم ءَ زاھر انت بلے کسہ ھما روچاں منی مجگ ءَ نشت کہ من ڈاکٹر نسیر دشتی ءِ ترانے من گدان ٹی وی ءَ اشکت ءُ دیست ۔ھما روچاں منی دماگ ءَ اھت کہ شے رگام جما نسیر دشتی برابر ءِ جان مھمد دشتی( شے رگام + نسیر دشتی = جان مھمد دشتی ) سے ادینک ءِ یکیں اکس .
واجہ ڈاکٹر دشتی گشیت کہ بلوچستان بلوچانی وتی سر ڈگار نہ انت ادا دگے کوم نندوک بیتگ انت پدا بلوچ ءَ مائیگریشن کتگ اے سر ڈگار ءٓ اھتگ ءُ نشتگ انت کہ انی بلوچستان گشگ بیت ۔
نوں واجہ نسیر پنجابی ءِ راہ ءَ آسان کنگ ءَ انت کہ پنجابی ءِ وڑا بلوچ ھم اے سرڈگار ءِ واھند نہ انت،
کوھنگ ءِ اے کوھیں کلات
کسی پت ءِ میراس نہ انت
ما گوں سگاراں گپتگاں
اے شئر ءُ کسہ درست دروگ انت ،
دومی واجہ گشیت کہ بلوچ ءَ یازدہ سد سال انت کہ مائیگریشن کتگ بلوچستان ءَ اتکگ ،متلب یازدہ سد سال پیسر ءِ دراھیں کسہ راجدپتر دروگ انت رابعہ خضداری دروگے قدیم ایرانی تاریخ دروگ انت بزاں پیسر ءِ دراھیں ھبر بئے نہ آنت ۔واجہ گشیت مھر گڑہ سندھیانی انت بلوچانی مڈی نہ انت ، بلے واجہ سرپد نہ انت کہ مھر گڑہ ءِ ھما ٹول ، اوزار ،چیز ،کہ دست کپتگ انت بلوچانی کار مرز ءِ چیز انت سندھیانی نہ انت بلوچ ءِ زمین ءُ اویجن ءُ آسار کدیمہ ءِ (کاؤنٹر) کنگ ءَ پد واجہ گشیت کہ ھمل کلمتی یک دز ،ڈنگ ،کاچاکے بیتگ ، داد شاہ ھم کاتلے ڈنگے بیتگ ،ایش مئے ھیرو نہ انت کہ ایشاناں پہ دروگ راج ءَ دیم ءَ آورتگ ھیرو کتگ نوں کسے واجہ دشتی ءَ بہ گشیت کہ اے زانت ءُ الم تو چہ کجا در برتگ کو ہ مراد ءِ نام ءَ اے کتابانی نام ءَ بلوچ راج ءَ بگش گوں کہ اے راج ھم تئی وڑا سرپد ءُ دانا بہ بیت ۔ انچش دانا بہ بیت کہ پہ وتا ھچ میل ایت، وتا گوں وتی ھستی ءِ گردو گبارانی اندر ءَ گار بہ کنت ،
ڈاکٹر دشتی وت پی ایچ ڈی ھربل ءِ سرا کتگ دارو درمانان ء سرا جڑی بوٹھی والا پی ایچ ڈی کیت راجدپتر ءَ آپریشن کنت گڑا ھمے وڑ بیت ۔اے ھبر ءُ اے کتاب پہ دژمناں سبوتے بوت کن انت کہ پہ درور دیم ءَ آرگ بیت کہ بلوچاں وت وتی بابت ءَ ھمے پیم نبشتہ کتگ _ وتا دز ءُ ڈنگ ءُ مھاجر سابت کنگ ءَ پہ نسیر ءَ کتاب یک ھوالھے بیت کنت ۔اگاں اے بلوچ دژمنی یے نہ انت گڑا بلوچ دوستی ھچ ھساب ءَ گندگ نہ بیت ۔
دومی نیمگ ءَ اگاں ما کمیں بچاراں گڑا دومی برات واجہ جان مھمد دشتی کہ اے اسکرپٹ ءِ ندکار گشگ بیت آئی بلوچی اکیڈمی ءِ زر ھرچ کتگ ءُ بلوچی کلاسیکل شائری پونز ءُ گوش کتگ انت ،ھما شئیر کہ جام دُرّک ءِ بیتگ انت یا اھدی کلاسیکل شئیر ھما کہ سے سد سال پیسرا شوھاز کنگ ءُ آرگ بیتگ انت ھما شئیر واجہ جان مھمد دشتی ءَ وتی وڑا (آپریشن) کتگ ءُ چاپ کتگ انت ۔اے دو کتاب انت یک کتابے ءِ سرا ھپتاد لک ھرچ کتگ تھنا شئیر بدل کتگ انت مزھبی بند دور کتگ انت وتی وڑا مان داتگ ءُ شنگ کتگ انت پدا ھمے کتابانی (کاپی رائیٹس) ھم واجہ جان مھمد دشتی ءَ ھمے ھاترا وتی نام ءَ کتگ انت کہ باندا کسے ایشاں پدا وتی اسل رنگ ءَ کوم ءَ دیم ءَ آرت مہ کنت ، بلے انگہ تک کس ءَ اے جست واجہ ءِ دیم ءَ ایر نہ کتگ کہ لا نگھ ورتھ ڈیمز ءِ یکجاہ کتگ ایں شئیر اگاں رد انت تو کہ اے بند مان کتگ انت گڑا کجا چے آورتگ آنت پکیر شاد ءِ شوھازتگیں شئیر گوں گوں (ریفرنس) آں اگاں رد آنت گڑا ترا راستی ءِ چے سبوت گون کہ تو وتی وڑا ھر کجا کہ لوٹ اتگ کم ءُ گیشی کتگ، دومی اکیڈمی ءِ زر ھرچ بوتگ انت گڑا کتاب ءِ (کاپی رائیٹس) چیا اکیڈمی ءِ نام ءَ نہ انت یک شکسے ءِ نام ءَ انت ۔بلوچ دژمنی ءِ پلاننگ باز تمرد، توانا، کتگ ایر کپتگ انت ،کلاسیکل شئیر مئے راج ءِ (وورل ھسٹری) انت وتی راج ءِ (وورل ھسٹری) ءِ گار ءُ بیگواہ کنگ وتی راجدپتر ءِ بیگواہ کنگ انت ،ھمل ء ھمراھ بے دلیں دشتی بیتگ انت ۔اے بند واجہ ءَ بدل کتگ ایشی جاگہ ءَ آورتگ کہ ٫ ھمل ءِ ھمراہ بے دلیں جدگال بیتگ انت ”گشیت لوڑی ءَ دروگے بستگ پمشکا من راست گشاں کہ جدگال بیتگ انت شئیر بدل کنگ بہ بیت ادا ھم واجہ چو فیس بک ءِ لنڈن جعفری ءَ گشیت کہ ”نہیں بتاؤں گا“ کہ اے ھبر یا شئیر من کجا چے اشکتگ ۔
بس یک سسٹیمک رنگے ءَ دوئیں برات گوں سیمی نام ءَ آوار پہ بلوچ دژمنی ءَ ایر کپتگ انت یکے بلوچ ءِ گار ءُ بیگواہ کنگ ءَ (وورل ھسٹری) ءَ تباہ کنگ ءَ انت دومی راجدپتر ءَ گوش ءُ پونز کنگ ءِ زمہ وتی کوپگاں زرتگ بلے توار پہ رپکیں پندلاں بیگواہ نہ بنت ،شئر گار نہ بنت پہ دروگیں پندلاں راجی بامرداں بنام کنگ ءَ بلوچ ءَ چہ وتی جند ءِ سِست نہ کن ات شما ۔
چوں زِبھر انت چہ پھم ءَ واجہ
آپ ءَ بریت گوں زھم ءَ واجہ
