ھمگام بلوچی
چنچو واب آگھی ءَ دیستگ من
گوں ھمے واباں زندگاں انگت
واب لوٹ انت ارساں ھون بکن
او گوں مرگ ءَ مڑایے گون بکن
مرچی یک جون روچ استاد دشتیاری ءِ ھون ءِ بوہ ءَ کنت بلوچستان ءِ دلبند شال ءِ ھر دمک ءُ دَر ویران انت ۔پرچا کہ پیسرا اے دمک ءُ درانی توکا شھید ءِ توار ھرکسی گوشاں کپتگ اَت یک رزمبشے گون اَت آ توار ءَ بلے اپسوز مرچی ھچ کس اے ھیال ءَ ھم نہ اِنت کہ ادا یک سباھے بوتگ سباء سباء ٹوکانی توار آئی ءِ کش ءُ گورا شاگرد ءُ نودربرانی بچکندگ۔ سباء انسانیت کہ ھر تب ءِ مردم ءَ گوں ھوار اَت سباہ ءَ وتی راج ءِ ھر درد ءُ گم مار اِتگ اَت آئی ءِ دل ءِ مستریں واھش بلوچ راج ءُ بلوچستان ءِ وت واجھی اَت سباہ ءِ نَد مدام بلوچستان ءِ ھسار بندیں کوھانی سر ءَ سلاہ بند اَت سباہ ھر دَور ءَ آجوئی ءِ لوٹوکیں گَلانی تہ ءَ ھوار اَت سباہ ءِ بنداتی زند کجا چہ بندات بوتگ اے یک مزنیں جستے ۔! سباہ دشتیاری ءِ نام ءَ نامدار بوتگ بلے آئی ءِ بُندری نام گُلام ھسین بوتگ آ 1953 ءَ ماں جھلگیں کراچی ءَ (ماری پور) ءَ ودی بوتگ آئی ءِ واجھیں کماش نام مھمد اُزمان بوتگ شھید سباہ ءَ بنداتی وانگ ءُ زانگ چہ لیاری ءَ نیاآبادی ءَ بندات کرتگ 1971 ءَ سباہ دشتیاری ءَ بندات ءَ اُردو زبان ءَ شائری کرتگ آئی ءِ بنداتی شائری استاد بی بی مات بانل دشتیاری ءِ لوگواجہ آرپی بوتگ چشکہ آرپی وت یک مزنیں شائرے بوتگ اُردو زبان ءَ شھید سباہ ءِ مکھیں مات وھدیکہ 1973 بیران بیت گڑا اے زمانگ ءَ شھید کندیل سباہ یک دینّی مدرسھے ءَ “المرکز اسلامی ءَ وانگ ءَ اَت شہ ھمے مدرسہ ءَ سباہ ءَ بی اے پرائیوٹ ءَ کرت ءُ پدا سال 1976 ءَ آئی ءَ ایم اے اسلامیات چکاس دات ءُ سرجمیں ڈویژن اولی نمبر اَتک شہ آئی ءَ پد شھید سباہ ءَ پی ایچ ڈی کنگ ءِ واستا کراچی شھدربرجاہ ءَ وھد دات بلے پی ایچ ڈی ءِ امیت ناسرجم بوت انت آ بلوچستان شھدربرجاہ ءَ استاد بوت اے درگت ءَ سباہ ءَ پہ وتی ماتیں زبان ءَ باز کرت چشکہ سید ھاشمی کتابجاہ جوڑ ءُ آئی کتابانی سر ءَ کرت ءُ وت ھم لبزانک ءُ ادب ءِ پڑا ھر تک ءُ پھنات ءَ ھوار بوت سباہ ءِ چاپ بوتگیں کتابانی لُڑ چش انت.
1- گلکار ءُ چکنکار اے کتاب بلوچی لچہ کاری ءُ ازم 2- ترانگانی بُنزہ، ھون ءُ ھوشام، آس ءُ اَسیب، بلوچی زبان ءِ آکبت، بے تواری ءِ دریا، گنگدامیں سرزمین، ساچان ءُ سھاتو، بلوچی زبان ءُ لبزانک، انگریں واھگ، نمدیانی دروت ایشاں چہ باید اُردو زبان ءِ کتاب بلوچستان میں سرداری نظام، سید ھاشمی شخصیت و فن، مطالعہ فلسفہ، فلسفہ اسلام ویونان اے کتاب لبزانک ءِ ھر تک ءُ پھنات ءَ گون انت پولکاری بہ بیت یاکہ نبشتانک یا لچہ کاری یا چاگرد سباہ ءِ ھر آزمانک ءِ تہ ءَ بلوچ ءِ بزگی ءُ لگتمال ھوار انت سباہ ءِ ھر شئیر پہ راج ءَ سکین ءُ کلوہ انت –
وھدے من سرگراں تئی دیدانی رھسراں
رژنے دگہ بل ایت امیدانی رھسراں
ھونانی لیک رنگے دگہ دنت واھگاں
باریں تو کئے گوزیت شھیدانی رھسراں
مارا بچار! واب وابینگ نہ بئیں کدی
یک رندے درشتیں تئی میدانی رھسراں
زند ءِ بھار گوست شت اَنت گوں ترا امّل
نو ھشکیں تاک رتکگ انت نیادانی رھسراں
راہ منزلانی کور کت اَنت ناشراں بدیں
مپت ءَ اے راج نشتگ مرادانی رھسراں
مرچی پدءَ من ھون کتگ آزگیں جگر
پُلّے دگہ سرپ ایت تئی یادانی رھسراں
چانیگ ءَ میر ءِ گژن نہ روت اُو رھبراں
گرد اِیت چیءَ گوں کاسگ ءَ دادانی رھسراں
سباہ وڑیں دیوانگ پہ وتن ءَ نی مشکل انت کہ ودی بہ بیت کہ بلوچستان ءِ ھر کور ءُ ڈوک ءُ دشت ءُ گیابان ءُ تیاب ءُ زر ءَ چہ وتی ساہ ءَ گیشتر دوست تر اِت انت ءُ وتی نگرھیں جان ءَ پہ ماتیں گلزمین ندر ئِے کرت ۔1 جون 2011 ءَ شالکوٹ ءِ دلبند ءَ سباہ ءِ ھون تَلّان بیت انت بلوچستان ءِ آجوئی ءِ درچک پہ شھید ءِ ھون زندگ انت آ پہ مدامی وتی گڈی ھنکین لیاری ءِ دلبند ءَ واب شُت ۔ ۔
