بلوچ راج دپتر چہ راجی جھدکار ءُ سرمتاب ءَ چکار اِنت، بلوچ وتی استان ءِ پہریزگ ءَ پہ مدامی ساڈی بوتگ اگاں وہد ءُ نوبت بلوچ ءِ سرا زور بوتگ انت تاں بلوچ سر ءِ دئیگ ءَ چک ءُ پد نہ بوتگ ۔اگاں ما گوں ایمانداری ءَ بہ چاریں گُڑا ھمل جھیند ھما تمرد بوتگ کہ وتی سرڈگار ءِ رکینگ ءَ گوں دری تاگتاں جنگے سرا زوریت بلے آیانی دیم ءَ سر جھل کنگ ءَ بِھ نہ منّ ایت ،دومی نیمگ ءَ ما گِنداں کہ بلوچانی مزن شانیں سر ،نسیر ھان نوری وتی راجی جھد ءُ ازمت ءَ پُشت ءَ نہ کِنزتگ ،وھدے اوگان واجہ نسیر ھان ءَ گوانک جناں کہ پہ آیانی کمک ءَ در بئیت گڑاں ابیدے ھیل ءُ بھانہ ءَ پانی پت ءِ جنگ ءَ اوگان آں پہ کمکے بیت۔
منی گت ءُ گُمان ءَ بلوچ ءَ چہ بنیات ءَ شیوار ءُ اسٹریجک لیڈرشپ بوتگ ، آ دگہ ھبرئے کہ وھدے گوما رھبرانی لوٹ ءُ تلب مَٹ بوتگاں۔وھدے کہ پاکستان وڑیں چانو وار ءُ زر ھریدیں ملکے بلوچ ءِ ھند ءُ جاگھاں پُشت ءَ جنت گُڑاں ایے وھداں بلوچ ءِ راھشونی نیم سون بیت ءُ بلوچ وتی ردی آں چہ آئی ءَ را داشت اِت نہ کنت ،بِلے کہ پرنس کریم گوں وتی ھمراھاں پاکستان ءِ ھلاپ ءَ جنگے سرا زوریت بلے سیاسی قیادت ءُ نوک رنگی ایں لیڈرشپ ءِ نہ بوھگ ءَ اے جنگ آسر نہ بیت پرنس کریم ءَ کُران ءِ نام ءِ سرا رد دیگ بیت کہ آ اے جنگ ءَ مہ بارت ءُ اشی ھلاسی ءِ جار ءَ بہ جنت۔
اگاں خان آف کّلات ءِ سرا اے بھتام اِنت کہ نیکراھی ءُ کم اگلی ءَ آئی ءَ را نزور کُرتگ ءُ آئی پاکستان ءَ گوں بلوچستان ءِ ھواری ءِ گپ کُتگ،من گُشاں پرنس کریم اوں شریں وار اسپیشلسٹ ءُ سیکیولر ایں جنگولے نہ بوتگ کہ آئی ءَ را پاکستان ءَ پہ مزھب ءِ نام ءَ سرنڈر کنائینتگ ۔
بّلے پرنس کریم ءُ انوگیں دور ءِ میانجی ءَ مزنیں پرک ءُ درکے ھست انو اگاں اوں بلوچ ءَ گِنداں تاں دل ءَ ھیال کیت بائد مروچیگیں بلوچ چہ اھدی بامرداں گیشتر لائک ءُ زانتکار بہ بیت بلے تچک ءَ بُہ گشاں مروچی ایں بلوچ زرمبشت ءِ تہ ءَ اڈ ءُ جنجال پُرشت ءُ پروش، وتی منی چہ اھدی ءَ گیشتر آں۔
ھمے سر ھال ءَ گوں میر یار (دی لیڈر)ءُ بی این ایم ءَ دیما برگ ءِ جھدے کناں۔
میر یار بلوچ انچیں دورے ءَ نام کّشیت کہ بلوچ ءِ گورا آئی سپارتکاری ءَ وتی کدم نوکی ایر کُتگاں، میریار ءَ انگت کسے نہ زانت کہ اِنت ءُ بائد کسے مہ زانت اوں ،پرچے کہ مردم ءِ زانگ ءَ چہ آ مردم وتی کار ءُ ھزمت ءَ دیما بُرت نہ کنت۔ میر یار اولی رنداں گوں بلوچ ءِ اسٹریٹیجی ،ھند دمگ (پاکستان ءُ ایران) ءَ چہ آزاتی ءُ بلوچ ءِ سپارتکاری ءِ سرا گوں جوانیں ڈیبیٹ ءُ منانکاں دیم ءَ کیت کم وھد ءِ تہ ءَ میان استمانی جاگھے گیپت ءُ چہ میاں استمانی گل ءُ ادارھاں بلوچ ءِ آجوئی ءُ ایم بے سی ءِ لوٹ ءَ کنت ،دیر نہ گوزیت کہ انڈیا ءُ دگہ ملکے میر یار ءِ کاراں دیم ءَ کار انت من اَنت ،بلے ھیر چہ کوریں ھیدر ءَ روچاں چار نہ بوت ،بی این ایم وڑیں گلے کہ وت ءَ بلوچ ءِ مستریں ءُ سوبمند تریں گل گُش ایت میر یار ءِ دیم دراھی ءَ وش نہ بیت ءُ آئی ھلاپ ءَ پندل سازگ بِنا کنت ءُ گوش ایت کہ میریار ءِ گپ ءُ ھبر پہ بلوچ لیکہ ءَ تاوان اَنت ما زانگ لوٹیں کہ میر یار کے اِنت ءُ چونیں بلوچے ،ابید ءِ پجار ءَ ما چوں آئی ءَ را بلوچ ءِ اسٹیک ھولڈرے سرپد بہ باں۔
ہم توڈوبے ہیں صنم
تجھ کو بھی لے ڈوبیں گے
اپسوز ءِ ھبر اِش اِنت کہ بی این ایم ءَ اختر مینگل ءِ سرا بیسہ ھست ،ھدایت الرھمان وڑیں کاسگ چٹاناں یک وھدے کول ءِ بی این ایم ئے سنگتے ئیگ ءَ ما انجیکٹ کُتگ ،بلے میر یار کہ تچک ءَ گوں سیاسی بالیدگی ءَ بلوچ ءِ لیکہ ءِ منارینگ ءِ جھدے کنگ ءَ اِنت بی این ایم آئی ھلاپ اِنت۔
اگاں ھمے میر یار ایوکا پاکستان ءِ ھلاپ ءَ وتی جھد دیما بُرتیں منی ھیالا بی این ایم ءِ واستا اے جُست ءَ مھنا نہ داشت کہ ما میر یار ءَ بزاناں!!!
بلے گپ کہ ایران وڑیں ھون واریں ملکے ءِ کیت بی این ایم ءَ پہ میر یار جیڑھے بیت۔
دنیا ءِ کمک پہ ما ھما وھداں کایاں سر باں کہ ما ھمتوار ءُ یکمشت بہ بیں ،اگاں ما وتی ناتپاکی ءَ را گیش آس دات گُڑاں آ روچ دور نیاں کہ ما چو کُردانی پیما وتی شھیداں چہ شموشکار بیں۔
گُڈی ءَ گوں راج ءَ دز بندی کناں کہ میریار بلوچانی سیاسی جھدکار ئے ، آئی سیاسی پروگرام بلوچ ءِ واستا زوتاں وشھالیں زندئے کاریت ،بیا اِت میریار ءِ مِشن ءَ دیما برگ ءِ جھد ءَ کناں-
سلامت بات ئے گُلیں راج
