سپرنامہ سیدی رئیس
ھمگام بلوچی
دومی بَھر
اے جنگی جُنز ءِ درگت ءَ سیدی رئیس روچگانی ماہ ءِ ۲ رمس ءَ مسکت ءَ سر بوت کہ اودا پُرتگیزی بیڑہ ءَ گوں دیم پہ دیمی بوت اے جنگ ءِ تہ ءَ دوئیں بیڑہ ءِ لشکراں مزنیں تاوانے وارت سیدی ءِ بوُجیگاں زور وارتگ ات ءُ پہ گدارے جنگی ھالت ءِ وڑا اِت اَنت سیدی رئیس ءَ وڑے نا وڑے بوجیگاناں گِرّان ءَ تاں مکران ءِ بندر شھبار (چھبار) ءَ سر بوت چہ اود ءَ آ گوادر ءَ اَتک کہ اود ءِ ھاکم بلوچ راج ءِ جلال الدین بچ دینار اَت.
سیدی رئیس ءَ اِد ءَ نندار نہ بوت ءُ آ دیم ءَ شُت تاکہ پرتگالی جزیرہ (زِروان) (دیو Dev) ءَ اَتک ءُ پدءَ چد ءَ گجرات ھندوستان ءِ تیاب دیم ءَ وت ءَ سر ئِے کُت بلے اِداں آ یک بلاھیں گْورمے ءِ تہ ءَ گھپ اِت کہ اے گْورم ءِ تہ ءَ بازیں بُوجیگے بُڈّ اِتگ ءُ گار بوتگ اَنت گوں مزنیں جنجالے ءَ سیدی رئیس گوں سراھتگیں چیزوکے بوجیگاں بمبئی ءِ تیاب ءَ رس اِت ءُ اود ءَ پُرتگالی بندر ءِ دامن ءَ لنگر کت ئِے اِد ءَ بلاھیں ھور ءُ گوارشتے ءِ تہ ءَ کپت اے ھوری توپان ءَ پراھی ءَ ھچ چیز پشت نہ اِش نہ کپت اَنت ناکام ءَ سر زیاستی ایں چیزان ءَ زر ءَ دور دات ءُ وت یک بوجی یے ءَ سوار بوت ءُ سورت بندر ءَ اتک چہ بسرہ ءَ تاں سورت بندر ءَ سر بوھگ ءَ سیدی ءَ را سے ۳ ماہ مان آتک.
سورت بندر ءِ مسلماناں سیدی رئیس ءِ منگھی ءُ مردی دیست ءُ آئی ءَ را مزنیں اِزّت ءُ شرپے دات اِش ءُ آئی ءِ ھال گجرات ءِ نوکیں بادشاہ کسان سالیں سُلتان اھمد سیمی ءَ را سر اِش کُت. سُلتان اھمد ءِ ھاکمی نوبت 1555 تاں 1561 اَت گجرات ءِ یک پیر سالیں وزیرے ناسر الملک ءَ سُلتان ءِ دست ءَ بیئت نہ کُت ءُ وتی ھاکمی ءِ جار ئِے جت آئی ءَ پہ چیر اندری چہ پُرتگیزاں کُمک لوٹ اِتگ اَت وھدے کہ سُلتان اھمد ءَ سیدی دیست ءُ گوں پُرتگیزاں آئی ءِ مڑ ءُ جنگ ءُ سوبکاری ءِ باروا شرّی ءَ سھی بوت ءُ آئی ءَ چہ سیدی رئیس ءَ کُمک دیگ ءِ دست بندی کُت سیدی ءَ سُلتان اھمد ءَ راھاں کُت سُلتان اھمدءِ بردشتیں ءُ کستیں وزیر ناسر الملک ءَ پہ چیروکائی وتی مردمان ءَ گوں سیدی ءَ نزیک تر کناں کُت تاں کہ آ راز ھرچارینگ بہ بیت بلے کُدرتءَ آرا چہ اے پندلاں رکھین ایت ءُ ناسر الملک ءِ جند چہ دنیا ءَ شُت ءُ سلتان اھمد چہ بلاھیں ویلے ءَ رکھ اِت۔
سیدی رئیس اے دراجیں جنگی پند ءِ درگت ءَ چہ ھال ءَ بدھال بوتگ اَت لشکر ءِ بازیں مردُم جنگ ءُ شرتگ ءُ توپانانی وڈالی بوتگ ات اَنت ءُ زری بیڑہ ءَ چہ اے کچّ ءَ بوجیگ پشت نہ گپتگ ات انت کہ پد ءَ بیڑہ ءَ اڑ بہ کنت۔ لھتے پہ بسرہ ءَ سر بوت بہ کنت پمیشکا آئی ءَ اے دراھیں ھیال ءُ گڑ تیانان ءَ یلہ کُت گیشتریں سنگت گجرات ءِ سُلتان ءِ وسیلہ ءَ نوکر ءُ کار دار بوتگ ات انت تھنا سیدی رئیس ءِ دل ءَ گجرات ءِ نندگ نہ کشّ اِت آ پہ وتی ملک ءَ زھیری ات پمیشکا سنگتاناں موکل ئِے کُت ءُ اھمد آباد ءَ شُت چہ سُلتان اھمد ءُ چہ آئی ءِ وزیر ءُ درباریاں رُکست ئِے کُت چہ ھُشکی ءِ راہ ءَ پنچ روچانی پند ءَ پد پٹن(پٹنہ) ءَ سر بوت ءُ چہ اود ءَ ۹۶۲ ھجری ءِ ربیھ الاوّل ءِ اوّل سر ءَ ترپارکر سندھ ءَ اَتک چند ئِے روچ ساھی کُت ءُ پد ءَ وتی پندئِے بندات کُت چہ ھراسان(انوگیں اوگانستان) پارس ءُ آزربائیجان ءِ راہ ءَ بگداد ءَ سر بوت پد ءَ چہ اود ءَ کستنتنہ ءَ اتک ءُ منتگیں روچان ءَ بادشاہ ءِ نوکری ءِ تہ ءَ پہ مزن شانی ءُ منسبداری گوزینت ءُ نیٹ 1574 ءَ اے دلاوریں تُرک زادگ ءَ اے دنیا یلہ کُت.
سیدی رئیس ءَ وتی زری جنگی سپرانی درگت ءَ بازیں اِلمی کار کتگ آئی ءُ تُرکی اُسمانی ءُ چگتائی زبانانی تہ ءَ شائری ھم کتگ شائری ءِ پِڑّ ءَ آئی ءِ پنام ” کاتبی ” بوتگ.
“* دیمءَ روان انت *’
