زھریچک
ندکار: انام رزا
ہمگام: آزمانک
بانگواه انت،مات ءَ مسلهے پچ کتگ ءُ نمازءَ رند نشتگ ءُ وزیپہ ءَ مشگول انت،
کستریں گهارءَ چل ءَ آسے روک کتگ ءُ آرت ءَ کول کنگ ءَ انت،من چہ واب ءَ بست کتگ، چہ کنوری ءَ گهارءِ گراستگیں شیرچاهاں کوپے وارتگ ءُ دنزے آرت تهیلی یے ءَ کتگ، کمو ناه بگل جول ءَ چادر بڈءَ کتگ ءُ چہ لوگ ءَ درکپتگ آں.
،
کماشے ءَ مسیت ءَ نماز ونتگ ءُ شالے مانپوش اتگ ءُ جکان ءَ چہ مسیت ءَ درکپتگ ءُ لوگ ءَ روگ ءَ انت،
کمو دیمترءَ پیر زالے ءَ چہ مسیت ءِ چات ءَ ڈولے آپ کش اتگ ءُ بالٹی ءَ کتگ ءُ بالٹی سرءَ کتگ،،
دهکانے ءَ وتی گورشان ءُ کپات گون انت ءُ مچکدگاں روگ ءَ انت،
گزیرءَ گرک ءِ دیم ترینتگ ءُ آپ وتی ڈگاراں کتگ،.
من همے ندارگاں سیل کنان ءُ رهادگ آں روچ ءَ انگت وتی تیراسکیں سر نہ کش اتگ،. نودانی پیاپیں تْرمپ چو ماهگونگ ءِ نوک ششتگیں ملگورانی تْرینزکاں منی ارواه ءَ وشنود کنگ ءَ انت، جمبری پٹهے ءَ آزمانے کنڈے اسپیت کتگ،.
دور چک ماتیں جنینے وتی گریواسکیں چک ءَ لیلو دیگ ءُ سهڑینگ ءَ انت،
هینزکے ءِ منتگانی توار چہ دوراں گوشاں کپگ ءَ انت،
من سپر وتی پادانی میار کتگ ءُ دیم پہ شان ءَ برزاداں،
بُلّی ایں چڈولے ءَ چہ سنگانی شم ءَ وتی سر کش اتگ ءُ لڈگ ءَ انت،
نوں من ماتکوه ءِ شیپ ءَ سربیتگاں، مدگے ءَ چہ منی پادانی دیم ءَ شپرگ جت ءُ کمو گستا نشتگ،
چہ زلاریں کانیگانی سارتیں نوکاپاں وتی چاگل آپ کتگ ءُ چہ گرءَ سرکپان ءُ کوه ءِ آدست ءَ روگ ءَ آں،
گرءِ دومی نیمگ ءِ بن ءِ کانیگاں شکاری یے ءَ دامے چیر کتگ ءُ کش ءُ کرانی آپ ششیم کتگ انت ءُ وت کاشانی سرءَ جوڑ کتگیں کڈے ءِ تہ ءَ نشتگ، من سلامے داتگ ءُ دیم ءَ رواناں،
آزاتیں کنرے ءِ بن تپار انت من گپڈے کنر چتگ وتی چادرءِ لمب ءَ بستگ.
، تسوے ءِ بن ءَ سیسیگیں مرگے ءَ کپرگ جت ءُ بال کت ءُ کمو دیم ءَ نشت پہ پاد تیز تیزءَ کوه ءَ سرکپان انت،
من تولگی رومے ءِ تاک سست ءُ بوه چت کہ بلکیں گواتگے، همے وڑءَ ازبوتکی تاکے هم چت ءُ لنٹانی سرءَ تام چش ات ءُ دپ زپت کت، تْرپشکی تاکے چت ءُ وارت ، دپ تْرپش بیت ءُ دنتاناں کڈیسکگے جت،
من کوه ءَ سرکپان ءُ مزنیں تاپے ءِ سرءَ سربیتگاں، گواتگ چو اسپستیں کاه ءَ کشار انت، من وتی چادر گک کتگ ءُ گواتگ چنگ ءَ آں،همے میان ءَ من ءَ پت ءِ دو سال پیسریگیں گپ یات اتکاں ، هر وهدءَ کہ ما گواتگ ءِ چنگ ءَ اتکگ ات ایں آئی ءَ مدام گوشتگ ات کہ،” گواتگ ءُ ایدگہ کوهی بوٹگاں چہ بن ءَ مہ گْوج ات کہ اشانی نسل گار بیت، چہ سرءَ سرگڈاش کن ات ،دومی سال ءَ اشانی بنڈ پد ءَ جن انت ءُ سبز بنت”،،آئی ءَ مدام مارا ڈڈیں گواتگ پیش داشتگ ات انت ءُ گوشتگ ات کہ اے پاریگین انت اے سالیگیں هورءَ پدءَ اشاں تاک جتگ،”
من چادربندے گواتگ چتگ ءُ کوارءَ کتگ ءُ چہ کوه ءَ ایرکپاناں، نوداں انگت نہ براتگ ءُ ساهیل انت،
کنرءِ ساهگ ءَ دمے بالا کتگ ءُ ناهی دانگے وارتگ ءُ گپڈے کنر چتگ ءُ چادرءَ بستگ ،
واتر کتگ رهادگاں،شکاری ایں مرد چہ کڈءَ دراتکگ ءُ دام ءَ پیچگ ءَ انت،دمانے گوں شکاری ءَ گپ ءُ رپ ءَ آں شکارءِ بابت ءَ جست گرگ ءَ آں،،” مرگاں مرچی آپ نہ کت کہ نوداں انگت نہ بر اتگ،، شکاری ءَ انچو پسو داتگ،.
پدءَ درکپتگاں،..
چہ گرءَ ایرکپاناں، شانتلے کهیرے ءِ سرءَ نشتگ، چہ دورءَ شوانگے ءِ زهیرگانی توار انت،
چہ گرءَ ایرکپتگاں، چم ءُ دستے ششتگ ءُ چاگل آپ کتگ، ماتکوه ءِ شیپ گپتگ ءُ واتر جهلاداں،
شوانگ نزیک ءَ زاهر انت ءُ انگت زهیرگ جنگ ءَ انت،
شوانگ ءِ کرءَ سربیتگاں سلام ءُ دروت ءَ رند گوں شوانگ ءَ کنرءِ ساهگ ءَ دیوان کتگ ،
“تو مزار ءِ چک ئے”،؟ شوانگ ءَ جست کتگ ءُ من هو ءَ سر سرینتگ،
“،،تئی پت منی دوستیں مردمے بیتگ، شکاری ءُ کوه گردے بیتگ، دائم ءَ منی ڈوارءَ اتکگ ، شکاری یے بیتگ دام ءُ گوارچ ئِے کتگ، راست گوش ایت تئی ناکو مراد مهمد چون انت مرچاں؟”
ناکو کپتگ تهت ءِ باهوٹ انت مسیت ءَ هم شت نہ کنت ،
“،،اٹرے…… هو اڑے شکاری مراد مهمد تو چہ دْرک ءُ دوراں کپت ئے، تئی ناکو بلاهیں شکاری یے بیتگ،… من ءَ یات انت بهارسالے ات هوراں شر گورتگ ات ءُ بهارگاه ات کوه سبزءُ ملگزار ات انت، دلوتانی لاپ سیر ات انت، شیرءُ شیلانچ پنیر انچوش ات کہ مهلوک ءِ دلاں شتگ ات انت، منی ڈوار گندمی گوزءِ جپت ءَ ات، من ءَ وتی چک ءُ چلانگ هم گون ات انت، توئے چک ئے،.
تئی پت ءُ ناکو ءُ بیچارگیں دهکان پنڈوک اتکگ ات انت پہ شکارءَ ، تئی ناکو ءَ شریں چارگوشیں گرکی یے گون ات، سهب ءِ سرءَ پدءُ رند ئِے کت ءُ جهل اسرءَ مزنیں ماتکوه ءَ سرکپت انت، داں مگرب ءِ بانگ ءَ پیسر دو اییی بلاهیں اژدهاهیں گرانڈ، ءُ یک گڈے جتگ ات ئے اتک انت ءُ منی ڈوارءَ وتا سر اش کت، یک بلاهیں گرانڈئے ما ڈوارءِ سرءَ پچ ءُ ور کت ءُ وارت ، آدگہ دویں پنڈوک ءَ وتی هرءَ کت انت ءُ شهرءَ برت انت توئے چک ئے.،
هو هو،،،، وش ات آں آدورءُ زمانگ” ،،،
شوانگ ءَ چہ هکہ ءَ مشوکی دپے درکتگ ات ءُ چیری لونس ءَ کتگ ،،.
گڑا تئی رمگ کج انت شوانگ؟
رمگ مئینچو من برزاد کتگ وتی وڑا چریت ءُ کیت جهلیں اسرءَ پدءَ واتر ڈوارءَ وت کیت،، .
گڑا چون انت تئی رمگ آپ ءُ لاپ انت؟
امبری جوڑ انت بے هچ نہ انت همے هورءَ کوه سبزینت انت کاه ءُ بوچاں جت، بلے منی رمگ پیشی سال ءَ نادرهائی یے ءَ گپت ءُ من ءَ بازیں نکسانے دات،. اجبیں بیماری یے کپتگ ات چدءُ پیش وَ مردنی انت من وتی زندءَ اے پیمیں بیماری پہ دلوتاں نہ دیستگ،نزاناں اے بیماری دلوتانی سرءَ کپتگ ات یا کانیگ ءُ آپانی سرءَ یا کاه ءُ بوچانی سرءَ ، توئے چک ئے،
سهب ءِ سرءَ من رمگ برازد کتگ ات، داں جهل اسرءَ درستانی دپ چہ گج ءُ زهرآپ ءَ پر ات انت، چیزے وَ هما چراگجاه ءَ سرلیٹ اتگ ات ءُ چیزے ءَ وتی گڑی ساه داں ڈوارءَ رس اینت، دو بلاهیں آپتے تْرشتر کہ منی تومی ات انت مرت ءُ شت انت دگہ پنچ شریں شیری ایں بز هم همے بیماری ءَ وتی ارجان کت انت توئے چک ئے،،
یک نیلگیں بزے هست کہ من ءَ چم ءِ چارگ ءَ دل نہ بوت، بزاں همے بزءِ مرگ من ءَ سک تور ات ترا ستک ءُ باور کنت اشی ءِ مرگ ءَ من ءَ سجهیں شپ ءَ واب نیتک
، پدءَ گواه اش انت کہ اشی ءِ پشپد هم نیست جاڑی تاهے هست کہ واجہ میر مولابکش ءَ لوٹ ات من همائی ءَ بکشات ، منی دپ ءَ اناں وَ مان نیست چیزے کہ یکے تلب کنت منی دپ ءَ اناں مان نیست توئے چک ئے
، من گوشاں منی مال نزرے ءَ گپت ، چدءُ پیسر من ءَ هجبر چوشیں تاوان نہ رس اتگ ،.
دگہ پرے وَ من وتی رمگ گندمی گوزءِ پشتی بندءَ راه دیگ ءَ توبہ کت، هدا بہ زانت چونیں هوپے کپتگ ات توئے چک ئے.
،انچو گوش انت کہ لهتے درامدیں تپنگی یے مردم کہ بوٹ ءُ کلاه ءُ پتلون بیتگ انت ،همے بندانی پشت ءَ گندگ بیتگ انت،اگاں همیشاں کار هرابی یے کت بلے،بلے مردنی من وتی ایمان ءَ نہ دیاں کہ من چم ء وت نہ دیستگ انت توئے چک ئے”،
اے سالی همیش انت چار ءُ پنچ بزءَ وهر کتگ، شریں پاچن وَ نیست یکے هست کہ دنیگہ مست نہ انت،، دگہ لجگاروے هست همائی ءَ پاد داتگ انت توئے چک ئے،،”
آئی ءَ چہ چادرءِ لمب ءَ پرانیگ ءِ چنڈے سستگ ءُ کپے من ءَ داتگ ءُ دپارے وت دپ ءَ کتگ،.
من وتی کوارءِ آرت ءُ ناه بوتکگ انت ءُ آئی ءَ داتگ انت،.
“اووو……اوووو……او براهیم.”..،،
چہ برزی نیمگ ءَ گْونڈلے ءِ کوکاراں کوه پسہ دیگ ءَ انت،.
شوانگ ءَ گوں برزیں توارے ءَ آئی ءِ پسہ داتگ،.
“بیا کہ تئی رمگ رسترے ءَ شنگینتگ تئی کپتریں بز ءُ دراج گوشیں ببری اش کاد کتگ ءُ کشتگ انت ءُ دو سے گتاچ هم زدگ کتگ،”
گونڈل ءَ گوں برزیں توارے ءَ گوانک جتگ ءُ هال داتگ،.
“اُپ،،،، اے رستراں هدا وت بہ داریت،.”
شوانگ ءَ انچو گوشتگ ءُ وتی مکی جک دیان ءَ چہ کوه ءَ سرکپان انت،.
نوداں بر اتگ روچ سرءِ مهرءَ انت، من چہ چاگل ءَ گٹے آپ تنگ اتگ ءُ درکپتگاں،،.
شان ءِ دیم ءَ رمے گورداگ ءَ چہ سولے ءِ بن ءَ کپرگ جتگ ءُ کمو گستا چگردے ءِ ساهگ ءَ نشتگ انت.،
من جیڑگ ءَ آں کہ دام ءُ گوارچے بیاورتیں گوں ،شکارے کتگ ات،
نزیک ء میتگاں رس اتگ آں،دیزانی وشیں بوه تالان انت،یک نیمگے کاشکیں ماهیگ ءِ پچگ ءِ بوه ءُ یک دیمے بٹ ءُ ماشانی روگن ءِ گزگانی بوه،.
لوگ ءَ رس اتگ آں مات سلامے داتگ ءُ گواتگانی کوار آئی ءِ دیم ءَ ایرکتگ ءُ مشک ءَ آپے ءِ نوشگ ءَ شتگ آں،.
نیلگیں بزءَ گواتگانی چادر چہ مات ءِ دیم ءَ چست کتگ ءُ لوٹکے گواتگ دپ ءَ کتگ، مات ءَ چہ بزءَ گواتگ پچ گپتگ انت ءُ گوشگ ءَ انت”چم ءِ پشت مہ کپات اے نیلگ ءَ دمانے مردم ءِ دلگوش گور مہ بیت بزاں کہ وتی کارءَ کنت نکس بد”
آپ وارتگ ءُ مات ءِ کرا نشتگاں، مات ءَ گواتگی ٹالے وارتگ ءُ گوشگ ءَ انت” اے دورءَ هرچیزءِ تام شتگ وَ اے گواتگ انت پورا زهریچک انت”،
چم گوں نیلگیں بزءَ کپتگ انت کہ گج ءُ گلاٹ انت،.
گواتگ مانبراتگ انت مات ءِ چمانی تہ ءَ چاران ءُ شوانگ ءِ گپانی بابت ءَ جیڑگ ءَ آں.
