کریم تھل
01.01.2023
بلوچی ھمگام
بلوچانی گوئستگیں دو سال ءِ زرمبش ، ماں گوادر و دزاپ پیش داشت که بلوچ ءِ زرمبشت ، نوکیں راهاں شت کنت . گوادر ءِ مهلوک که لکانی هساب ءَ دو سال پیش ، سڑکاں درکپتنت و بلوچستان ءِ هکانی لوٹ ءِ جار اش جت ، یا گوئستگیں سال ءِ گُڈی ماهانی آدینگانی روچ که لکانی بلوچ ءِ روانکی و مُچی ماں دُزاپ ءِ شهر ءَ ، په وتی شهیدانی هون و وتی هکانی لوٹگ و هکومت ءِ مردمانی سیه کاری گوں بلوچ گهاران ایر جنگ ، و میاربارانی گرگ و سزا دیگ ءِ لوٹ ، پیش داشت که بلوچ نیں وتی هکاں زانگ و سرپد بیتگ انت و په وتی هکاں ، راه و سڑکاں هم درکپت کن انت . مرچیگیں زمانگ ءَ مردم و انسان هما کس زانگ ءَ بیت که وتی هکاں بزانت و آهانی لوٹگ ءِ جهد ءَ بکنت . وهدے که کسے وتی هک ءَ بزانت و آئی ءِ لوٹگ ءَ په جهد بکنت ، الم دابے نه دابے ، پر وت راهے شوهاز کنت و اے راه ءَ مردم هر چی گیشتر ببنت ، ترس کمتر بیت و زلم ءِ کلات ءِ بادشاه و جرنیلانی ترس گیش ءَ بیت . په همے هاتر آهاں مدام جهد ءَ کن انت که راجانی رد و سِرَپ ءَ ، کدیں هوری و یکجاهی ودی مه بیت ، آهاں زهی زهی ، یا دینی و پگری یا نیکراهی و دینی ، مزنی و کسانی ، وش زات و بد زات و دگه پندلاں بهر بهر ببنت و آهانی اندر ءَ همے ناتپاکی ، گلامی و نزوری ءِ مارشت ءَ مردمانی تها گیش بکنت . بلوچستان ءِ نوکیں جهد که ورنا ، واننده ، ملا ، نیزگار ، جنین ، مردین ، کسان و مزن ، نمازی و بے نماز دورو هور و همراه اتنت ، پیش داشت که مردمانی اندر ءَ ، راجی مارشت و هک لوٹی ءِ زانت ، باز گیش بوته و چشیں راج و مردم ءِ پروشگ ، ارزان و آسانیں کارے نه انت . بلوچ ءِ وس و واک ، گیش چه هر چیز آئی ءِ تپاکی و راجی یکجاهی انت و بس ، پرچا که تپاکیں راجانی دست ءَ ، زوراکانی راه ءِ بندگ یا آهانی دزلٹ ءِ پُلگ و هر کارے گوں تپاکی بیت کنت . سرپدیں مردم هما انت که راج ءِ مردماں یکجاه کت بکنت ، هر بلوچے ءِ تاوان ءَ وتی جند ءِ تاوان بزانت . راج ءِ ملا ، دانشور ، زانتکار ، ناواننده و واننده ، مید ، مزور ، کِشتکار ، مالدار ، باپار ، ازمگر و سازگر ، استاکار ، وانینوک و واننده ، جنین و مردین ، کسانیں و مزنیں دورو وتی راج ءِ چم و چراگ و باسکے انت ، هر کجام ءِ تاوان ، راج ءِ تاوان انت په همے هاتر ما را یک و دگر ءِ پُشت اوشتگی انت ، هما جهد که راج هور و همراه انت و لکانی مردم ءَ سڑکاں کشیت و کاریت ، کجام گروپ یا رُمب ءِ جهد نه انت ، بلکیں راجی جهدے انت که لکاں مردم ءَ یکجاه کت کنت . مردمانی زانت و زانگ انت که ما را سرپد بیگ و دربرگ لوٹیت . ملیوناں و لکانی مردم وهدے که وتی ملک ءِ تباهی و زوراکانی زورگیری ءَ گند انت ، وهدے که بزاننت ، آهانی لاپ و هکاں پلیتیں زوراکان واجهی کتگ و برگ انت ، وهدے که وتی چک و مردمانی بزگی و پریشانی ءَ گندیت ، و وهدے که همساهگیں راجانی مردم ءَ گندیت که چون سیر و آباد انت ، الم ءَ راج جاه هم جنت و سڑکاں هم درکپیت . نون راجی زانتکار و وانندهانی زمه انت که اے تپاکی و نزیکی ءَ گیش کننت و پیشی گپ و هبراں ، کمتر و نوکیں گپ و مراداں که راج ءِ یکجهتی ءَ گیش کنت ، گیش کننت . الم انت که بلوچ راج پیکه وتی و همساهگانی جنز ءِ مراداں هور و یکجاه کن انت تاں زوراک و زورگیرانی سرا گهتر سوبیں به بینت ! روکپتی بلوچستان ءِ جهد که ملا و واننده ، جنین و مردین وتی راجی هکاں هور و هواری گوانک جن انت و دینی بندشتے آهانی سرا نیست و دیندار و بے دین ءِ ، جنین و مردین ءِ ، مسلمان و نامسلمان ءِ انسانی هکاں برابر زانگ انت و بلوچ ملایانی گیشتریں و مَستریں ملا هم اے جهد ءَ جوانی ءَ هوار و همراه انت ، ستا کرزیت ، امیت انت رودرآتکی بلوچستان ءَ هم سرجمیں بلوچ هواری ءَ په وتی جهد ءِ سوبیں کنگ ءَ ، سڑکاں در کپنت و رودآتکی بلوچستان ءِ مسیت هم بلوچانی هک لوٹی ءِ پشتیوان و همراه ببنت .
امیت انت نوکیں سال په بلوچ و بلوچستان سوب و شادهانی سالے ببات
