“مَرگ ءِ اَمبازاں کپاں زندگ باں
اَنچیں کردانی ھُدابُند راجانی تلْب”
دگنیا ءِ تہا بازیں راجے گار ءُ بے گواہ بوتگ ما اگاں گار ءُ بے گواھیں راجانی بے گوْاھے ءِ سببّ آنی سرا ھُرْت چاری بِہ کن انت تاں مارا ہمے گندگ ءَ کیت کہ اے راجانی گار ءُ بے گواھے ءِ سبب اِشانی زوراک ءِ دیما سرجَلی ءُ ھاموشی بوتگ وھدے انگلستان ءِ سورْگ امریکہ ءَ کا انت گڈا امریکہ ءِ ھَندے جامنند انگلستان ءِ لشکرءِ دیم ئے دارگءَ ساڑی نہ بنت بلکہ آیانی زورگِری ءَ تسلیم کن انت ءُ آیانی اِیردست جوڑ بنت ہمے سبب اِنت کہ امریکہ ءِ بُنکی جامنند چہ وتئی سرڈگارءَ زِبَھر بنت ءُ اَچ دگنیا ءِ نکشہ ءِ تہا گار ءُ بے گواہ کنگ بنت ہمے رنگ ءَ ابورجنیز انت۔ ابورجنیز آسٹریلیا ءِ بنکی جامنند بوتگ اَنت بلے مرچی آسٹریلیا ءِ زمین ءِ سرا اِشانی مَلپد ھَم گِندگ نہ بنت ھِشی ءِ سوْب ھَم زوراک ءِ زورکیاں مَنگ ءُ ایرستی ءَ را کبول کنگ اِنت ۔ ھمے پیما دگہ بازیں راج زوراک ءُ زورگِر ءِ دیما سجدہ ریز بوھَگ ءِ سوْب ءَ دنیا ءِ راج دپتر ءِ مُجانی تہا گار ءُ بے گواہ بوتگ انت
ہمے داب ءَ ، ہما راج زندگ مان اِتگ اَنت کہ آیاں راجی زندمان ءِ ھاتر ءَ وتئی زند ببّا داتگ اَنت ۔ زالم ءِ دیما سَرجَل نہ کتگ، بلکیں پہ وتئی راجی بنکی ھَک ءِ ھاترءَ زالم ءِ دیما چو کوہ ءَ میلانک بوتگ انت ۔ ۔ ۔
پاکستان ءَ چہ بنیاد ءَ بلوچ راج ءِ گار ءُ بے گواہ کنگ ءِ ھاترا جتا جتائیں ھیل ءُ مکْر سازیتگ ۔ بریں پہ لب ءُ لالچ ، بریں پہ بمب ءُ ٹوپ بلوچ راج وتئی ایردست کنگ ءِ کوشست کتگ بلے بلوچ راج ءَ استان ءِ دراھیں ریپک ناکام کتگ انت ءُ زور گِریں استان ءِ ہمک زوراکی ءِ دیما چو کوہ ء البرز ءَ میلانک بوتگ ھَنچو کہ من بُرزا گُشتگ اَت کہ ہما راج زندگ مان انت کہ آ زورگِر ءِ دیما سر ءَ جل نہ کن انت ہمے ڈول ءَ بلوچ راج ھِجر گار ءُ بیگواہ کنگ نہ بیت پرچہ کہ بلوچ راج ءَ روز ء اوّل ءَ زُور گِر ایں استان ءِ ایرستی نہ مَن ات ءُ استان ءِ زوراکیانی دیما مھکمی ءَ اُوشتات ۔
زور گِرایں استان ، پاکستان وتئی تمامیں زور ءَ بلوچ راج ءِ بے گواھے ءِ آترا ھَرچ کنگ ءَ انت کلیں بلوچستان زور گر ایں پاکستان ءِ زور گَریں پوج ءَ وتئی انگراں زورتگ ہمک سباہ بلوچ ءِ کھڈک آس مان دارگ بوھگ ءَ انت ہمک روچ بلوچ ءِ پسگ چست کنگ ءُ گار ءُ بے گواہ بوھگ ءَ انت کسان سالیں آسم ءِِِ پیمیں تِپل ھم استان ءِ سیاھیں کوٹی آنی تہا لٹ ءُ کٹ سگّگ ءَ انت بلے بلوچ راج وتئی آجوئی ءِ لوٹ ءَ پُشت کنزگ ءَ تیار نہ انت استان ءِ ہمک زوراکی بلوچ راجی آشوب ءِ آس ءَ گیشتر جمبور کنان انت بلوچ سرمچار پہ وتئی سرڈگار ءِ ھاترا زور گِر ایں استان ءِ زورگِر ایں پوج ءِ دیما چو تلار ءَ مِک انَت ءُ ہمے سرڈگار ءِ پہازگ ءِ جہد ءَ ہزارانی ھساب ءَ کنگریں سرمچاراں وتئی نگرھیں جان ندر کتگ انت ءُ ھمے کُنگریں سرمچارانی تہا یک نامے قادر مری عرف ء لاغری انت کہ نوزدہ اپریل ءَ ماں بھمبور براہمی کوگڑت ءَ زور گر ایں استان ءِ زورگریں لشکر ءَ گوں جنگ کنان ءَ شھید بوت۔۔ قادر مری جنگ ءِ میدان ءَ گوں دشمن ءَ جنگ کنان ءَ ذدگ بیت بلے آئی ءِ جان ءِ توکل کم نہ بیت ھون ءُ ایریچ بوھگ ءَ باوجود شھید گوں تمردے ءَ دشمن ءَ نفس گیر کنت
مروچی دَہ روچ ءَ گیش اِنت کہ پاکستان ءِ زور گِر ایں پوج ءَ کاھان ، سبی ، ڈیرہ بگٹی ءُ بلوچستان ءِ ایدگہ ھَند ءُ دمگ چپ ءُ چاگرد ءَ گیر ءَ کتگ انت ءُ آپریشن کنگ ءَ انت آھوکیں ھالانی ردا زورگریں لشکر ءَ بازیں بلوچ ورنا، پیر ءُ کماش گوں چُک ءُ زالبولانی ھمرائی ءَ ھاوار جتگ ءُ گار ءُ بے گواہ کتگ انت۔ ماں کاہان ءَ زورگریں پوج ءَ بلوچ راج ءِ مال ءُ مڈیانی لوٹ ءُ پل ھم گیش کتگ ۔ ۔ ۔ ماں ڈیرہ بگٹی ءُ کاہان ءَ بلوچ سرمچار وتئی راجی مڈیانی رکینگ ءِ ھاترا استان ءِ پوج ءَ گوں دیم پہ دیم اَنت ھستیں ھالانی ردا دنیگہ پنجا پوجی بلوچ سرمچاراں مردار کتگ ۔ ۔ ۔ ءُ وتئی گلزمین ءُ گلزمین ءِ دلبند ءَ کَلیں راجی مڈیانی پہازگ ءِ جہد ءَ قادر مری عرف لاغری دشمن ءِ تیرانی آماچ بوتگ ءُ شھید بوتگ قادر مری ءِ تیر سُمبتگیں جون پہ بدواہ ءَ کلوہ ے کہ بلوچ گلزمین بے وارث نہ انت پہ گلزمین ءِ ننگ ءِ رکینگ ءِ ھاترا بلوچ پُسگ مدامی وتئی نگراھیں جانانی دیگ ءَ ساڈینت
قادر مری دو ہزار پنچ ءَ بی ایل اے ءَ ہوار بوت سینزدہ سال ءِ جد جہد ءِ دوران ءَ شھید ءَ بازیں راجی ٹوھیں زِمہ واری پلّو کُت۔ شھید دزجنگی ءِ دراھئیں ریپکاں بلد اَت ہمے سبب اَت کہ شھید ءَ زوراکیں بدواہ آس ماں دل ءَ دتگ اَت بریں کوہ ءُ کوچگاں بریں شہر ءُ میتگاں، ھَر جاہ دشمن ءِ دیما مانتراِت۔ شھید دزجنگی ءِ ھُنر ءُ ھیلاں آشنااَت پمیشکہ شھید شوک ءُ شان، پیشدارگ، عکس کشی ءُ ایدگہ دزجنگی ءِ رھبندانی پروشوکیں عمل آں چہ دور ءُ گِستہ اَت شھید ءَ مدام دزجنگی ءِ راھبندانی ھیال داری کُت ہمے سبَب اَت کہ دشمنَ ءَ آئی ءِ توپگ ءِ توار اِش کُت بلے اے نہ زانت کہ اے توپگ ءِ واھند کے اِنت دومی نیمگ ءَ بازیں سرمچار ارزانی ءَ دشمن دست ءَ اتکگ ءُ شھید کنگ بوتگ انت ھشانی آشکاری ءِ سبب دزجنگی ءِ بنکی راھبندانی لگت مال کنگ بوتگ بزاں وت ءَ پیشدارگ ، شو ءُ شان ءُ بازیں عکس کشی کنگ بوتگ ، اے رِدا گیشر بلوچستان لبریشن فرنٹ ءِ سرمچارانی نام سھرا بیت۔ دزجنگی ہمے ھاترا کنگ بیت تا کہ وت ءَ چہ دہ گنا زوراور چک پروش دیگ بہ بیت اگاں ایک گوریلاے دُزجنگی ءِ راھبندآں پاد مال بہ کنت ءُ وت ءَ پدر ءُ سھرا بہ کنت گڈا آ زوت زوراک ءِ دست ءَ جنگ ءُ گار ءُ بے گواہ کنگ بیت پرچہ کہ نزور زوراور ءِ گونا دیم پہ دیمی جنگ کُت نہ کنت آئی ءَ الما دزجنگی ءِ رھبندانی ھیال داری کنگی انت ۔ ۔ ۔ کم تجربہ کاریں ءُ گوریلا ھُنر ءُ ھیلاں کم آشناھیں سرمچار بائید شھید قادر مری عرف لاغری ءِ جنگی زندمان ءِ سرا چم شانکے بدیانت ءُ آئی دزجنگی ءِ ریپکاں در برگ ءِ کوشست بہ کن اَنت
