پنجگور(ہمگام نیوز) بلوچ ورناھاں صباء ءِ دیستگیں واب پِگری ءُ کردی رنگ ءَ پیلو کنگی اِنت۔
پنجگور ءَ صباء لٹریری فیسٹیول برجم دارگ بیتگ ءُ نمیرانیں صباء ءَ دروت پیش کنان ءَ آئیءِ پِگر ءُ فلسفہ ءِ سرءَ جتائیں بھراں تران بوتگ۔ مراگاہ رنگا رنگیں بھراں گوں چاروک ءُگوشداروکاں ھدوناکیءِ درانگاز کت، مراگاہءِ رنگ رنگیں بھراں زانتکاراں گشتانک، پینل ڈسکشن، ٹیبلو، صباءءِ زِند سرءَ ڈاکومنٹری، آرٹس ایگزیبیشن، شئیر ءُ شائری دیوان ءَ ھوار ساز ءُ زیمری بھر ھوار بوتگ اَنت۔ مراگاہءَ جتائیں پِڑاں گوں سیادی داروکیں مردماں بھر زُرتگ۔
گشتانکار ڈاکٹر مہرنگ بلوچ، پروفیسر اکبر گمشاد ءُ بساک ءِ بنجاہی کمیٹیءِ باسک فوزیہ بلوچ بوتگ اَنت۔ گشتانکاراں وتی تراناں گشت کہ صباء بلوچ ءِ ھما نمیرانیں کارست اِنت کہ آئیءَ وتی پِگرءَ گوں بلوچ چاگردءَ زانت بکشاتگ، لبزانک ءُ زبانءَ ھوار سیاسی پِڑءَ آئی ءِ کتگیں کار مئے دیمءَ ایر اَنت کہ نپری بنیاتءَ ھما کار کتگ اَنت بگندئے ادارہ آھانی کنگءَ بے سوب گِندگ کیت۔ صباء یک رُژنے بوتگ کہ وتءَ بلوچ چاگردءَ تالان ئِے کتگ کہ روچء مرچیءَ مئے دلانی تہءَ زِندگ اِنت۔
مرچیگیں اے مُچی ھمے گپءِ شونءَ دنت کہ بلوچ ورنا وتی بامرداں شموشکار نہ اَنت بلکیں صباء سوبین بوتگ ءُ آئیءِ دیستگیں واب مرچی ورناھاں وتی کرتگ انت ءُ دیمءَ جُنزان اَنت۔ صباء بگندئے جسمانی جَھتءَ مارا چہ پُلگ بوتگ بلے آئیءِ داتگیں پِگر ہزاراں ورناھانی تہءَ زِندگ ءُ شاہ جنان اِنت۔ بلکیں صباء یک زِرے ءُ مارا صباء انگت گِہتر پہمگی اِنت، مرچی مئے بدبہتی اِنت کہ مئے گوْرءَ چوشیں نبشتہ کارے ودی نہ بوتگ کہ نیمرانءِ پِگرءَ درانگاز کت بہ کنت، چوشیں ندکارے نیست کہ آئیءِ دیستگیں واب ءُ کتگیں کاراں سیاھگ بہ دنت۔ استادءَ گوں انساپ کنگءَ مارا ھکیگیں دروشمءَ آ پہمگی اِنت پرچاکہ صباءءِ وڑیں کردار کرناں ودی بنت۔
دومی بہر سیاست ءُ لبزانکءِ سرھالءَ پینل ڈسکیشن بوت کہ ایشیءِ موڈریٹر بنجاہی کمک کماش رفیق بلوچ بیتگ ءُ گوں بلوچ نبشتہ کار ءُ لبزانت بالاچ بالی، طاہر حکیم ءُ الطاف بلوچ ءَ گپ ءُ تران کنگ بوت۔ پینل ڈسکشن ءَ واجہ صباء ءِ لبزانک ءُ سیاستءِ کار ءُ کِردءِ بابتءَ جُست ءُ پُرس بوت۔ جتائیں جستانی پدءَ واجہاں گشت کہ صباء ھما استاد اِنت کہ آئیءَ بلوچی زُبان ءُ لبزانکءَ مزنیں کار کُتگ کہ ایشانی تہءَ کتابجاہءِ جوڑ کنگ ءُ پہ زبان ءَ بلوچ راجءَ جہد کنگءِ سکین دیگ بندپترءِ نوں بھر جوڑ بوتگ انت۔ واجہ بازیں کتابانی واہند اِنت ءُ پہ زبانءَ کسان ءُ مزنیں کار ھم کتگ ئِے۔ دومی نیمگءَ واجہ صباء ءِ بلوچ سیاستءَ ھم مزنیں کِردے است، آئیءَ بلوچ سیاست پہم اتگ ءُ ھما لوٹانی بنیاتءَ بلوچ سیاستءَ ھوار بوتگ۔ واجہءَ سیاست ءُ لبزانکءِ سیادی گیشینتگ کہ لبزانک ابیدء سیاسی زانتءَ مئے چاگردءَ ناسرجم اِنت۔ مرچی بازیں مردمے انچو گشیت کہ واجہ جذباتی بوتگ ءُ آئیءَ زندگ بوگی بوتگ بلے آئیءَ وتی کسانیں مدتےءَ ھما کار کتگ اَنت کہ مرچیگ ءَ داں زندگیں مردماں کُت اش کنگءَ نہ انت۔ ھماھاں کہ تہنا گپ جتگ مرچی آھانی کِرد واجہ صباء ءِ دیمءَ ہچے نہ انت۔ استادءَ وتی کِردءَ گوں اے پدر کُتگ کہ لبزانکءِ پِڑءَ کار کنگءَ ھوار سیاستءَ ھم کار بیت کنت بلکیں سیاستءَ گوں لبزانک ءَ ھور کنگ ءُ کار کنگ گہتریں کارے بیت کنت۔
مراگاہءِ ایدگہ بھراں بلوچستان کتاب کاروانءِ نامءَ کتاب میڑہ ھم اڈ دیگ بوت کہ اودءَ بلوچستان، بندپتر، سیاست، لبزانک، سائنس ءُ ایدگہ سرھالاں بندوکیں کتاب ایر کنگ بوتگ اَنت۔ کتاب میڑہءَ گلءِ تاکبند نوْشت، زھگانی تاک گام ءُ بلوچ لٹریسی کیمپئن ءِ کتابُک ھم ایر کنگ بوت انت۔ استاد ءُ نودربراں اسٹال سیل کُت ءُ وتی دوستیگیں کتاب پہ وانگءَ زُرت اَنت۔
آرٹس ایگزیبیشن ءِ بھرءَ بلوچستانءِ جتائیں ازمکاراں وتی آرٹ آورت ءُ سمبہینت اَنت۔ آرٹسٹانی تہ ءَ پروفیسر عبدالحفیظ گوہر جی، نور فاطمہ، ربیعہ بلوچ، ماہین بلوچ، سعید بلوچ، مہیم بلوچ، ہدایت بلوچ ءُ ملیحہ بلوچ ءَ وتی آرٹساں گوں بلوچستان ءِ کسہ پیش داشت۔ بلوچ بُتکار کمانچر بلوچ ءِ اکسکاری ھم ایر کنگ بوت کہ آہانی تہ ءَ بلوچستان ءِ جتائیں کسہ ءُ ہندانی اکسبندی کنگ بیتگ۔
فسٹیول ءِ دیمترءِ بھر شئیر ءُ شائری دیوانءَ بلوچی زبان ءِ جتائیں شائراں وتی شئیر ونت انت ءُ بلوچ چاگرد ءِ درانگازی کُت۔ شائیرانی تہ ءَ اکبر گمشاد، صادق راہچار، زبیر واھگ، زاکر زہیر ءَ اوار ایدگہ ورناہاں وتی شئیر ونت اَنتءُ بلوچ، بلوچی زبان ءُ بلوچستان وتی کماتگیں لبزاں گوں درشان کُت۔
گُڈی بھر ساز ءُ زیملی دیوان بیتگ کہ اودءَ بلوچ گُشندہ بیبگر بلوچ، نادر اسلم، مسرور بلوچ، کمال بلوچ ءُ مہران دلاوری ءَ گوں وشیں توارءَ سوت الہان کُت۔ وش الہانیں گُشندہاں سوت جت ءُ مراگاہ ءَ اتکگیں مردماں دیوان دلجم ئے ءَ گوں ساڈات۔
صباء لٹریری فِسٹیول سوبمندی ءَ گوں آسر کنگ بوت کہ آئیءِ تہءَ بلوچ زالبول ءُ مردین، استاد ءُ نودربرانی مزنیں کچےءَ بھر زُرتگ ات۔ ما کُلیں مردمانی منتواریں کہ مراگاہ ءَ بھر زیرگ ءُسوبین کنگ ءَ اوار اِت اَنت۔ مئے جھد بیت کہ آؤکیں وھداں بلوچستان ءِ ایدگہ دمگاں ھمے وڑیں فسٹیول ءُ مراگش برجم بہ دار ایں دانکہ بلوچ چاگردءَ زانت ءُ زانشت ءِ چراگءَ گوں رُژنا بہ کنیں۔
