بلوچ ءِ جہد مرچی اَنچیں جاہے ءَ اتکگ ءُ سر انت کہ پنجابی استان سربتگی ءِ گڈی سیمسران انت مثل ءِ مستیں لیڈوا سر سر جنان انت ۔۔کسان ، مزن گناہ ءُ بے گناہ کل فرق شمشتگ۔۔اشیءِ زیتیں درور گوستگیں چیزے روچاں چُک ءُ ذالبولانی چست کنگ ،گار کنگ ءُ شھید کنگ ءَ سہرا انت بلوچی ءَ گپے کناں کہ “وھدے دست ھرا نہ رسیت گڈاں کرّگ ءَ پالام کنت”۔مرچی استان ءِ حالت سرجم ءَ ہمے دروشما اَنت سرمچار ایں گنگلاں دست ھِش نہ رسیت بلوچ ءِ چک ءُ نیاڑی آں گار ءُ بیگواہ کنگءَ اِنت کہ آیاں دیر دیرا ھم آجوہی ءِ جنز ءَ گوںَ سیادی نیست۔ ہاں بحیثیت بلوچ ہر نیاڑی ءَ گِر داں کسانیں چکاں داں کماش ءُ ورناہاں پہ آجوہی ءِ گنگلاں نیکیں واھگ داراں بلے آجوہی ءِ جنز ءَ باقاعدگی ءَ اشانی دست مانجنی ہوار نہ انت۔۔چیزے مدت بیت کہ چک ءُ ذالبول ھم مزنیں کساسے ءَ استانی ہوس ءِ آماچ انت ۔۔ چونہا پیشءَ ھم چک ءُ زالبول استانی درندگی ءِ آماچ بیتگ اَنت بلے نی استانی زوراکی چہ پیشی ھدءَ گیش بیتگَ انت
چار مارچ ءَ چاردہ سالیگیں عاصم امین چہ وتساچیں مکران میلہ ءَ استانی سیول دریس پوشتگیں کارداراں ھوار جت ءُ گار کت کہ روچ ء مروچی معصومیں عاصم استانی سیاھیں کوٹیانی تہا بندیگ انت ۔۔کسانسالیں عاصم ہزاراں مردمانی دیما استانءِ چیریں کارداراں پہ زوری بیگواہ کتگ۔۔ مردمانی گشگ انت کہ عاصم ءِ پہ ارزانی روگءَ ساڑی نبیتگ گڈا لگوریں چار فوجی آں پہ زور کسانکیں عاصم گر کنانءَ موٹر ءَ سوار کتگ ءُ برتگ مرچی یک ماہے ءَ برزیں کہ عاصم دنیگت بیگواہ انت ۔عاصم ءِ مکھیں مات عاصم ءِ بیگواہی ءَ پد ذھنی مریض جوڈ بیتگ۔ لاڈُکیں چک ءِ بیگواہی نہ ایوکہ مات ءِ ھاترا تکانسری ے بلکنہ کلیں کول ہمے ذھنی اذیت ءِ آماچ بیت ۔۔
گوستگیں روچ ءَ عاصم ءِ بانکیں گوھار ءِ نبشتانکے میڈیا ءَ اتکگ ات۔ نبشتانک ءِ وانگ ءَ پد سما بوت کہ عاصم ءِ دُوری پہ عاصم ءِ کول ءَ چِنکس تورناک انت ۔۔ عاصم ءِ گوھار ءِ نبشتگیں ہر یک لبزے درد ءُ اندواں مزنیں کساسے ءَ سہرا کنگ ءَ اتاں۔ بس لبزانی تہءِ دردانی پہمگ ءِ ھاترا کمیں مارشت درکار اَت۔۔
استانی اداراہ مروچی انچو رستر جوڈ بیتگاں کہ آ مرچی عاصم ءِ وڈیں معصومیں گونڈوہاں ھم غیر انسانی ازیت ءِ نشانگ جوڈ کنگءَ انت ۔۔عاصم ءَ چہَ پیش ہم معصومیں گونڈو استانی چیریں ادارہانی دستاں بیگواہ بیتگ انت آفتاب الفت ھم ہمے سرکاری جاریت ءِ آماچ بیتگ۔
سرکاری ادارہاں ءُ واکداراں چہ گلگ کنگ چونہا بیکارانت ۔
اِش نہ جنگی رھبنداں بلد انت نہ کہ اشانی تہا انسانی چہرگے است۔ بلے ماں گلگ درْی انسانی حقانی پلّہ مرزاں گوں الّم کن انت کہ آ پرچہ بلوچ ءِ چک چینی ءِ سرا یکسرا ھاموش انت ۔۔؟ انسانی حقانی دعوایدار یمن ، شام ءُ برما ءَ انسانی حقانی لگتمالی آنی سرا یکشلا گپ کنگءَ انت۔۔بلے وھدے کہ گپ بلوچ ءِ چکانی کیت گڈاں اِشانی دعواہ تہنا رسانکی بیاناں داں محدود بنت۔۔اگاں واقعی انسانی حقانی ادارہ انسانی نسل کشی ءِ ھلاس کنگ ءَ دل ءُ ستک انت گڈا آیانی بنکی فرض ہمیش انت کہ آ بلوچ نسل کشی ءِ سرا استانی واکداراں جُست بکننت۔۔ عاصم ءَ ھوار مزان ایں کچےءَ بلوچ مھلوک استانی سیاھیں کوٹیاں بندیگ انت۔ بازینانی تیر سمبتگیں جون مارا رستگ انت ءُ بازینے دنیگت بندیگ انت انسانی حقانی واکدارانی گیشیں ھاموشی عاصم ءَ ھوار کلیں بندیگیں بلوچ مھلوک ءِ ساہانی واستہ ھترناک انت ۔۔اگاں انسانی حقانی ادارہ واقعی پہ انسانی نسل کشی ءِ گر ءُ دار کنگ ءِ ھاترا جوڈ بیتگ انت ۔گڈاں زیتاں زیت بلوچ نسل کشی ءِ سرا وتی دیریں داشتگیں روچگی ءَ ھلاس بکناں ءُ بلوچ ءِ یکشلیں نسل کشی ءِ سرا وتی توار ءَ چست بکن انت
