شال (ہمگام نیوز) بلوچ اسٹوڈنٹس ایکشن کمیٹی ءِ بنجاہی جارکش ءَ رسانکدر ءَ درشانے ءِ تہ ءَ گوْشتگ کہ گل ءِ نیمگ ءَ ماتیں زبانانی میان استمانی روچ ءِ درگت ءَ ماتی زُبان ءِ نام ءَ یک کتابُکے شِنگ کنگ بیت۔ کتابُک ءِ تہ ءَ زبان ءُ زبان ءِ دیمروئی ءُ پشتہ روگ، بلوچی ءُ براہوئی زبان ءِ آکبت سر ءَ مواد ھوار اِنت۔
دیمتر ءَ جارکش ءَ گوْشتگ کہ راجی نودربر گل یے ءِ بستار ءَ مئے مدام جھد اِنت کہ بلوچ راج ءِ سیاست، زبان، دود ءُ ربیدگ ءُ پجار ءِ سرءَ عملی دروشم ءَ جھد بہ کنیں۔ ھمے پیم گل ءِ پہ ماتی زباناں جھد یکشلہ برجاھ اِنت۔ ماتی زبانانی میان استمانی روچ ءِ درگت ءَ ادارہ سرجمیں بلوچستان ءَ مراگش اڈ دنت ءُ پسنی ءَ مبارک قاضی ءِ نام ءَ مزنیں مراگشے اڈ دنت۔
جارکش ءَ گُڈسرءَ گوْشتگ کہ کتابک 21 استپان ءَ چاپ ءُ شِنگ کنگ بیت ءُ وانوکاں گل ءِ برجاھیں مراگشاں دست کپیت۔
