بلوچی ھمگام
نبشتانک: کریم تھل
جهان ءِ دیمرئی و بدلی ، گوں جهد و لوٹ بندوک انت و جهد و لوٹ گوں پگر و هیال و لیکه ءَ .
تاں وهدے که پگر و لیکهے مه بیت ، مزنیں بدلی یے آرگ نه بیت و پگر و لیکه و هیال هم گوں وهد و چاگرد و زرورتانی بدلی ، بدل و نوک بینت . پگر و زانت انت که وس ءَ کار بندیت و جهد ءِ شون دنت . اداں انت که ما گندیں که مئی و سرجمیں مردمانی پگر و هیال ، هر روچ نوک و نوکتر بنت . هما چیز که تاں زی مئی دل ءِ واهگ ات ، مرچی ما آئیا ویل و دیماتر جنزان بئیں . ادان انت که ما گندیں ، زیکیں تپاکیں گروپاں یا مردماں ، مرچی یک و دگر ءِ دیما ، اوشت انت و یک و دگر ءِ جَنَگ و گار کنگ ءَ چَک و پد نه بینت یا ناتپاک و جنگیں گروپ و مردماں کاینت و سُهل و هَیر کن انت و یکجاه بنت و په وتی راج ءَ مَستریں و پر واکتریں جهدے ءَ بنگیج کن انت .
زانتکاریں مردماں ، وتا _ وتی لیکه و هیالانی تها بند ءَ نه کن انت ، بلکیں مدام چاگرد ءَ چاراں و گهتریں راه ءَ په وتی و وتی راج ءِ زند ءِ گهبودی ءَ ، گچین کن انت ، هر جهد نبا که مدام گوں جنگ و آشوب همراه ببیت ، بلکیں جنگ و آشوب هما وهد الزامی انت که دگه راهاں سرجم بند و تئی وس و واک په آشوب ءِ بنگیجی و آئی ءِ دیمبری ، کم و گیش تیار ببنت .
پگر و لیکهانی بدلی ءِ دلیل باز بوت کن انت ، چیزے که دلگوش کنگی انت ، وتی راج و مردمانی لوٹ و هکان انت که هچ داب نبا که ڈالچار کنگ یا شموشگ ببنت ، هئو بیت که مردم جاهے وتی هبر ءَ سر راست گوئشت مه کنت ، یا نه گوئشگ ءَ ، چه گوئشگ گهتر بزانت ، بلے جهدی په وتی مرادانی رسگ و راج ءِ یکوئی و دیمرئی ، پیکه برجاه ببیت .
جهان ءَ هچ راج یا مردمے ، آدگر ءِ مدامیکیں دوست یا دژمن بیت نه کنت . جاور بدل بینت ، دژمناں دوست و دوستاں دژمن هم بینت ، بلے گهتر هما انت که مردمگری و راجدوستی کدیں شموشگ مه بیت . دورچاری ، راجانی و زرمبشانی دیمرئی و سوب ءِ گهتریں مانزمان انت !
بلوچ ءِ جهد په وتی هک ، په وتی ازت ، په وتی لوگ و ملک ، په وتی پجار و پت و پیرکی ، مات و بلکانی رستگیں میراس انت . په وتی لوگ ءِ ایمنی و باندات ءِ روشنی انت .
راجانی ملک ، آهانی هستی انت که چه راجدپتر و تاریه ، گوں آهانی گوستگینانی بامردی و سرمچاری آهاں رسته . آهانی پجار و آهانی زبان و دود انت که سداں و هزاراں سال ، آهانی زند ءِ رنگ دیوک بوته . په آئی ءِ دارگ یا پَد جَنَگ ءَ ، راج پیکه یکدست و هور و همراه ببیت . پرچا که راجی هستی ءِ دارگ ، گوں راجی جهد بیت کنت . راج ءَ هر دابیں مردم هست وبیت کنت که درآمد و زورانسرانی برابر ءَ ، اگں گوں یک و دگر ءَ تپاک ببنت ، آهانی پروشگ گران ، و په سوب ءِ جنگ ءَ آهانی سوبیں بیگ ءَ آسان و سادگتر کنت ! راجی اندری جیڑه و گپ و هبر ، پیکه راجی چاگرد ءَ ، گوں تپاکی دیما برگ بنت گهتر انت که هر براتی کارے ءَ گوں جنگ و شدت دیما برگ و گیشینگ ، جند ءِ تاوان انت و بس !
