نبشتہ کار: بزگر بلوچ
همگام نبشتانک
اے زند ءِ تہا منی ءُ ملا ءِ وڑیں دگہ ھزاراں بلوچ ھزاب ءُ نہ گیگیں جاورانی بنجل ءَ ودی بنت۔ ملا ءِ وڑیں زھگ دگہ زھگانی وڑا پیداک بنت، بلے انچوشکہ جرمنی ءِ مزن نامیں شاھزانت مارٹن ھیڈگھر گشیت:
‘Every man is born as many men, but dies as single one.’
ملا ھم چو ھما آ دگہ زھگ ءُ مردمانی پیمءَ دنیا ءَ ودی بوتگ اَت, بلے مرگءِ فیصلہ آئی جندءِ بوتگ کہ آئرءَ کجا ءُ چے رنگءَ گوں مرگءَ دوچار کپگی اِنت۔ ملا چو آ دگہ مردمانی وڑءَ وتی گسءَ وتی نیپادانی سرا نہ مرتگ بلکیں چو بامرد ءِ پیم ءَ وتی پُلیں سرزمینءِ کوھانی ارواہ ءِ تہءَ شہید بوتگ۔ ملا شہ بلوچستانءِ سرھیلیں ءُ گنوکیں شے مریداں یکے بوتگ کہ آ وتی بخت ءُ کسمت ءِ واجہ وت اَنت۔ یا کہ چو منیر مومن ءِ اے لچہ ءِ وڑءَ کہ:
مارا دیوانگیں چاگردے ھزانگ گون اِنت
ملا ھمے رنگیں دیوانگیں چاگردے ءِ بہر ءُ سنگت بوتگ۔
مُچیں بلوچ راج اے گپ ءُ ھبرءَ پوہ اِنت کہ ملا کجام مول ءُ مرادءِ واستہءَ کوہ ءُ سنگانی سنگت بوتگ۔بلیں مُچیں راج اے نہ زانت کہ مُلاءَ نہ زھگ ھست ءُ نہ لوگ بانک! اے درد نہ اِنت کہ ملا ءَ را زھگ ءُ لوگ بانک نہ بوتگ، درد ھمیش اِنت کہ مُلا پہ وتی پشت ءِ مردمان ھچ جیڑہ ءُ ھڑ ءُ جنجال پشت نہ گیپتگ.
ملاءِ وڑیں مردمانی سر ھراب نہ اِنت کہ وتءَ را کوہ ءُ سنگانی آماچ کن اَنت۔ اے ریاست ءِ مدنیہ ءِ بے سر ءُ پہ دیمیں راجکاری راہ ءُ راھبندانی برورد اَنت کہ ملا ءِ پیمیں مردم وتی جندءِ ساہءَ ھم کربان کنگ ءَ چک ءُ پد نہ بنت۔
اے گپءَ درستیں مردم ءُ مہلوک پوہ ءُ سرپد اَنت کہ پہ ملا یا عبداللہ ءِ کوہ ءُ سنگانی سنگتی بلوچستانءَ چو پہ زوت آجو نہ کنت ، بلے ھمے واجہ ءُ بانک کہ گس ءَ نشتگ ءُ وتءَ را ھزت داریں یا نام داریں بلوچ کن اَنت ، آ اے گپءَ ھم شر سرپد اَنت کہ باندءَ بلوچستان کہ آجو بیت گڑا ھمے باریں پلان زی ءُ پلان واجہ کار, ءُ بانک, بلوچ ءُ بلوچستانءِ سروگ ءُ کارمستر نہ بیت ، بلکیں رازق ءُ ملا ءُ احسان, ءُ دگہ, بلوچستان ءِ دائمی ءُ ابدمانیں سروگ بنت۔ ملا، احسان ءُ رازق بہ قولء یک کہوّسے ئیگءَ: آوانی بدن گار بوتگ.
آیانی اسل ءُ مہکمیں رنگ نوکی اندیمیں بلوچستان کہ آئی آجوئی پلان زی ءُ واجہ کار ءُ بدواہءِ چمان اندیم ءُ ودی نہ کنت , آ ھما جاہ ءُ دنیاءَ زاھر کنت ءُ ودی بیت .
ملا تہنا بدنے نہ بوتگ ، آ یک ارواہ ءُ لیکہ یے کہ گو آجوئی ءِ ارواہ ءَ بندوک بوتگ ءُ اِنت ، ءُ وھدے کسے ارواہ ءَ کہ بندوک بیت ، آئیءَ ھدا ھم سندگ نہ لوٹ اِیت ۔
ملا ءِ تہا ھمے چمان اندیمیں آجوئیں بلوچستانءِ گندگ ءِ سنچ ءُ سما بوتگ کہ آ وتی زاھریں ءُ وھدءَ گوں ھلاس بوؤکیں بدن, پہ آجوئیءَ ندر کرتگ.
ملا ءِ ھون ءِ ترپ ءُ آئی پہ وتی ماتیں گلزمین شہید بوگ ھر یک بلوچے ءِ واستہءَ اِنت۔ ملا ءِ ھون یک یک ترمپ پہ ھما بلوچءِ زھگ ءُ بانکءَ اِنت کہ تندی سرپد نہ اِنت ءُ نہ زانت کہ آئی بلوچ بوگ ءِ مانا ءُ مراد چے اِنت ۔ نہ زند ءَ را وڑ ءُ پیم ھست ، نہ شر وانگجاہ ءُ بیماراستان ءُ نہ کہ پہ زند ءُ زندگی کنگءِ واستہ ءَ شریں مال ءُ میراث۔ ملا پہ ہمے مردمانی واستہءَ کربان بوتگ۔
ملا پہ ہما مردم ءُ زیاں وتی ھون ءُ وھد پہ بلوچستانءِ آجوئی داتگ کہ بزاں وھدے یک بلوچے زھگ ءُ بانکےِ کہ دگہ ڈنی ملک ءُ جاھےءَ یاکہ پنجاب ءُ اسلام آبادءَ کہ روت ، گڑا ھما بلوچءِ زھگ ءُ بانک گوں مڑہ ءُ ناز گُشت بہ کنت ، کہ ھان من بلوچے آں ءُ منی جاہ ءُ گلزمین بلوچستان اِنت کہ آئی نام ءُ ازاتی ءِ واستہ ءَ ملا ءَ وتی ھون داتگ۔
پہ تئی (او بلوچءِ زھگ ءُ بانک) ھمے ناز ءُ مڑہءِ برجم دارگ ءِ واستہءَ ملا وتی ھر وشی، بے وسیں ماس، نازاں پُریں گُہار، دلبریں براس ءُ زند ءُ زندمانیءِ ھر رنگ ءُ دروشم کربان کرتگ اَنت!
تو بلوچءِ زھگ ءُ بانکءِ سر آزمان گوں ھوار بیت وھدے یک درآمیدیں مردمے ستا ءُ بستارءِ گپءَ کنت! تئی سر گوں ناز ءُ پہرءَ چست بیت!
دگہ رنگیں بازیں تک ءُ پہنات ءُ درور ھست کہ آوانی واستہءَ ملا ءُ آئی وڑیں بازیں مردمان وتی ھر چیز کربان کُرتگ، بلیں ھمے لہتیں گپ ءُ تران بس اَنت پہ سرپد بوگءَ کہ وھدے ملا یا دگہ کسے جنگ ءُ کوہ ءُ گیاباں کہ سر گپیت، آ بس ایوکءَ پہ وتی دشمنءِ ھونءِ ریچگءَ نہ روت، بلکیں آ یک دپترےءَ، یک دُود ءُ ربیدگےءَ ءُ سرجمیں زندھالےءِ رکینگ ءُ مڑہانی دیمپانی کنگءِ واستہءَ وتی مُچیں چیزاں کربان کنت۔
ملا نہ مرتگ ۔ ءُ نئے کہ مریت، تو مرئے چیا کہ تو چمان اندیمیں یا چیریں ‘آجوئیں ءُ سرسبزیں بلوچ ءُ بلوچستان’ ءَ گندگ ءَ نہ ئے! ھر روچ کہ تو راسکوہ یا بلوچستانءِ دگہ کوھےءَ کہ سرگرئے، ملاءِ توار تئی گوشان نہ بلکیں تئی ارواہءِ رگ ءُ بنداں کپ اِیت!
