مولانا فضل الرحمان کوھی پرچا بندیگ انت؟

ھمگام بلوچی

نبشتانک

نبشتہ کار: امینہ سربازی بلوچ

دنیا ءِ تہ ءَ بلوچ گیشتر سنی الاسلام انت بلوچی 99 نود ءُ نو درسد سنی انت بلے ھبر اِش انت کہ بلوچ مزھبی انتھا پسند نہ آں بلوچاں گوں ھچ دابیں مزھب آں کار نیست ھر کس کہ کجام مزھب ءُ دین ءِ رندگیر انت بلوچ آئی کدر ءَ کنت ھمے ھاترا بلوچ ءِ دژمن بے سوب انت بلوچ ءَ را مزھب ءِ نام ءِ سرا رِپینگ ءَ انت، مرچی اگاں کس ئے بلوچ مزھبی جوڑ بیتگ گڑا بزانکہ آئی وتی (شخصی مفادات و مراھاتانی) وتی زاتی نپ ءُ پاھدگانی ھاترا یا کہ گڑا دژمن ءِ گوں ما ھمکار انت پہ بلوچ ءِ چکچین کنگ ءِ ھاترا ـ

اسلام ءَ چہ پیسر بلوچ آتش پرست بیتگ انت بزانکہ زردشتی مزھب ءِ منوگر بیتگاں ـ ھما زمانگ ءَ ھم بلوچاں گوں ھچ دابیں ھُب ناکی گوں زردشتی مزھب ءَ نه بیتگ تھنا بلوچ وتی ابابت کتگ نا دگہ مزھبی چست ءُ ایراں ھمگرنچ بیتگاں نا بلوچاں دین ءِ نام ءِ سرا کس ئے ءَ ساہ ءَ کتگ مرچی اگاں کس ئے گش ایت کہ من دین ءِ ھاترا جان دیان ءُ کس ئے ءِ ساہ ءَ گڑا بزانکہ دژمن ءِ مردم انت یا کہ بلوچی کچ ءُ کیلو آں چی در انت ـ

چیا کہ بلوچ یک سیکولر راجے ھست انت بزانکہ آئی ءَ را دگہ ھچ دین ءُ مسلکاں دست ءُ داوا نیست ـ کس ئے اگاں ترا جست کنت کہ بلوچ ءِ دین کجام انت؟

تو تھنا بگش بلوچ ءِ دین آئی گلزمین ( Homeland) انت بلوچ دین ءَ وتی یل کنت بلے گلزمین ءَ ھچ یل نه کنت انی اگاں بلوچ ءِ زمین ءُ آئی جند گوں سانکلاں بندوک انت ایشی مستریں سبب بلوچ ءِ نزوری نہ انت نا کہ ناتپاکی انت بلکیں جدید دنیا ءِ سیاست ءُ آئی مزاج ءِ پوہ بوھگ نه انت اگاں مرچی جدید دنیا ءِ سیاست ءَ سرپد به بیت گڑا آ وتی بستار ءَ زانت ـ

بلوچ گلزمین مرچی سے جاہ ءَ دژمن ءَ بھر ءُ بانگ کتگ یکے ایران ءَ (اشغالی) زوبرد کتگ ءُ دومی پاکستان ءُ دگہ یک بلاھیں بھرے اوگانستان ءَ گوں ھور کتگ ھر سے ئیں ملک مزھبی ملک انت بلے انگت ھر سے ئیں ملکاں بلوچ دین دوست نہ انت بلوچ ءِ دوستی گوں وتی ھاک ءَ، وتی دود ءُ ربیدگ ءَ گوں نام ءُ شان ءَ انت ـ دین ءُ مزھب ءَ اوگانستان تباہ ءُ برباد کت ـ ایران ءَ دین ءِ نام ءِ سرا تو کلت ءُ چشت نہ کن ئے پاکستان ءُ پاکستانی توھین رسالت ءِ نام ءِ سرا رستر جوڑ بیتگ انت بلے بلوچاں گوں اے دابیں ھچ چیزاں ھمگرنچی ءُ ھب نیست ـ

مرچی سدانی ھساب ءَ بلوچ ملا ءُ مزھبی اسکالرز ھست، بلے مجال انت که یک ملاھے بلوچ ءِ سرا بوھوکیں زلم ءُ زوراکی ءِ سرا ھبر بہ کنت ترا انچوش سما بیت که اے ملایانی زبان گنگ انت ـ
اے ملا ءُ دینی زانتکار زان انت کہ بلوچ ءِ سرا دژمن نارواھی کنگ ءَ انت بلوچ ءَ چکچین کنگ ءَ انت بلوچ ءِ ماتیں وتن سانکلاں بندیگ انت بلے انگت ھاموش انت ایشی مستریں سبب ھمیش انت کہ یا و ترس انت یا کہ لاپ ءِ مسلہ انت ایشاں ابید بازیں لس بلوچ پہ راجی آجوئی ءِ ھاترا جھد ءَ انت ـ ءُ سرانی کربانی ءَ ھم دیگ ءَ انت ـ
نی چرے ملا ءُ دینکاراں سد ءِ تھا یک ملاھے اگاں در بہ ایت په بلوچ ءِ بزگی ءِ ھاترا سخن تران به بیت دژمن ءِ دیم ءَ گرا بزانکہ آئی تہ ءَ ماتیں وتن درد ھست انت یا کہ پریشتگے، انسانے نه انت ـ

چرے راجدوست ءُ وتن دوستاں چے یکے مولانا فضل الرحمان کوھی انت ـ مولانا کوھی دینی ءُ مزھبی بلوچے بلے انگت آ وتی دین ءَ وتی ماتین وتن ءِ سرا (ترجیح) دلگوش دنت ـ مئے بلوچانی تہ ءَ چشیں دینی ملا ءُ آلم سک باز کم انت کہ راجدوست ءُ وتن پرست بہ باں مئے بلوچ ملا ءُ آلم گیشتر مسلمانانی بزگی ءُ بدھالی ءِ سرا ھبر کن انت دراج کشیں تران کن انت نبا کن ئے کہ کس ئے ملا بلوچانی گلامی، بدھالی ءِ سرا گپ ءُ تران بہ کنت ءُ بلوچستان ءِ بوھوکیں زوراکیانی سرا “سخن” تران به بیت ـ
بلے مولانا کوھی مدام بلوچ ءُ بلوچستان بزگی ءُ بدھالی سرا ھبر کتگ مدام وتی مجلس ءُ دیواناں ایرانی ناروائیں ھاکم ءُ ملایانی زلم ءُ زوراکی ایر جتگ ءُ گشتگ که ایران مئے ھک ءَ بھہ نه دنت چیا کہ گلام داشتگیں راجے ءِ بستار ءَ ایران توکا زندگی کنگ ءَ آں ـ مئے بلوچانی مستریں جیڑہ تھنا (فقط) گلامی انت نا کہ دین اسلام انت اگاں مئے جیڑہ دین بیت ایں گڑا ما بلوچ مسلمان آں مارا ایرانی مسلمان چوش بزگ ءُ ازاب نہ کتگ ات ـ

باز براں مولانا کوھی پنت ءُ سوج کتگ بلوچاں کہ اگاں راجدوستی ءُ وتن دوستی ھرام بوتیں کول ءِ ایرانی ملا گڑا محمد بن عبداللہ ءِ نام ءِ دیم ءَ محمد عربی نبشتہ نہ بوتگ ات ـ

بلوچ وتی گلزمین ءِ سرا بزگ ءُ وار انت گڑا کیامت ءَ وشھال به بیت ـ اِیش اللھی ازاب نہ انت بلکیں زالمیں ایرانی رستریں سپاہ پاسداران ءُ القدس ءِ زلم انت که بلوچ ءِ سرا بیگ ءَ انت ـ
مولانا کوھی ءَ مدام پہ بلوچ راج ءِ زور برتگیں ھکانی بابت ءَ گوں زالمیں ایرانی گجراں (اختلافات) داشتگ ـ مولانا ءِ گشگ انت که بلوچ ءِ جیڑہ شیعھ ءُ سنی نہ انت بلکیں یک (ھاکم ءُ محکوم) ءُ یک زالم ءُ مزلومے ءِ جیڑہ انت ـ بلوچ په کزدن بدھال کنگ بیتگ چیا کہ اگاں ایران چُش مہ کنت گڑا الم بلوچ سما کنت کہ من ءَ وتارا یک ازگاریں زبان ءُ لبزانکے ھست، من ءَ وتارا یک یک زمینے ھست، من ءَ وتارا دود ءُ ربیدگے ھست ءُ من وت یک زندگیں راجے آں دنیا ءِ نقشہ ءِ تہ ءَـ

مروچی مولانا کوھی رستریں گجر ءُ آئی دادگاہ ءَ ھمے ھاترا زندانی کتگ کہ مولانا اولی آلم ءُ فاضل انت کہ بلوچ ءِ بابت ءَ ھبر کنت بلوچ ءِ ھک ءِ گپ ءَ جنت ءُ بلوچستان ءِ سرا بوھوکیں ایرانی ھاکمانی ناروائی ءِ ھلاپ ءَ وتی مھلوک ءَ سرپدی دنت پمیشکا مولانا فضل الرحمان کوھی ایرانی گجراں دوست نہ بیت ـ

چو وَ روکپتی بلوچستان (ایران ءِ چیر دستیں بلوچستان) بلوچ ملا ءُ دینی رھشون باز انت بلے کوھی ءِ دابیں آلم نیست کہ ھک ءِ ھبر ءَ بہ کنت ـ

زندگیں مسال مولانا عبدالحمید بلوچ انت یک مزنیں نامے روکپتی بلوچستان ءَ کشتگ واجہ ءُ دینی یک رھشونے ھر وھد ءَ مولانا عبدالحمید بلوچ تھنا بلوچ ءَ را ھمے درس ءَ دنت کہ ایران پمیشکا ما بلوچاں منوگر نہ انت ما شما بلوچ سُنی آں ءُ ایرانی حکومت شیعه آنی دست ءَ انت ایش مولانا ءَ کس ئے بہ گشیت کہ بلوچ ءُ ایرانی گجراں جیڑہ شیعه ءُ سنی نه انت بلکیں ھاکم ءُ مھکوم انت، گلام ءُ آقا انت (اشغال ءُ اشغالی) انت ـ

بژن ھبر ایش انت وھدیکہ امریکا ایران ءِ رستریں ژنرال ءُ بلوچانی کُشندہ قاسم سلیمانی ءِ سرا عراق ءَ درون ارشے کنت ءُ سلیمانی جھنمی بیت گڑا ھمے بلوچانی نام نھادیں دردوار ءُ دینی رھشون مولانا عبدالحمید گشیت کہ قاسم سلیمانی شھید انت پرائی ھاترا دوا کنت ـ نی کس ئے مارا بہ گشیت کہ دابیں ملا ءُ آلم کجا بلوچ ءِ درد ءِ دوا بنت ـ ایش الم گجر ءِ منوگر انت ءُ په گجر ءُ ایرانی رستریں ملایاں چاپ جنان ـ
مولانا عبدالحمید ءَ چے ابید دگہ انچیں بازیں ملا ءُ عالم باز انت ـ

بلے مولانا فضل الرحمان کوھی بلوچ چہ تمامیں آلم دیناں چے گستا ءُ جتا انت آئی المی زانت ایش انت که راجدوستی گناہ نہ انت اسلام ءِ توک ءَ بلکیں یک منتگیں لیکہ راجدوستی ءُ پہ وتی راج ءَ جھد کنگ ءُ گلزمین ءَ سرانی باھینگ ھر راج ءِ مردمانی سرا چوں نماز ءَ پرز انت ـ

ماں گوں سرجمیں انسان دوستاں ھمے دزبندی کناں که په مولانا کوھی ءِ ھاترا ھک ءِ آواز ءَ بلند ءُ بالا بہ کن انت چیا که اشغالی (زوراکیں) ایران ءِ حکومت ءَ بازیں وتی مخالفیں مردم دزگیر کتگ انت ءُ پدا زندانانی تھا زھر داتگ ءُ کشتگ یا کہ انچیں دابیں اَمل کرتگ کہ زندانی ءِ ھاترا کہ دنیا ءَ ھمے پیام بروت کہ پلان زندانی زندان ءِ تہ ءَ پلان نادراھی یا ھلت ءَ چی بیران بیتگ ھمے ھاترا دزبندی گوں ھر انسان ءَ انت که مولانا کوھی ءِ ھاترا توار ءَ وتی چست بہ کنت ھاس بلوچ راج ءِ سیاسی جھدکار گیش چہ گیش دیم ءَ بیا انت ـ