ھمگام بلوچی
پد ءَ چہ بازیں تندجاہ ءُ رسانکدراں اے گْوشگ بیتگ کہ واجہ لیپٹیننٹ کولنل رالپ پیٹرز ءِ نوکیں میانجی ئیں رودرآتک ءِ بارو ءَ نوکیں نکشہ، آئی ءِ سَسّا ءُ ھیالانی بارو ءَ پینٹاگون ءِ تہ ءَ باز وزبت ءُ ستا بیتگ۔ بازیں جنگی زانتکار(Defence Analyst) ءُ دَمگی سوھوَئیں مردماں(Regional Experts) تپاک کت کہ واجہ لیپٹیننٹ کولنل رالپ پیٹرز ءِ پنت ءُ سوج راست انت۔ باز نامداریں جنگی زانتکار چہ واجہ پیٹرز ءِ سَسا ءِ منّوگر بیتگ اَنت۔
اے ھم بازیں جاھاں گْوشگ بیتگ کہ واجہ ءِ پیشی چاریں وانگی ھم ماں لشکری ءُ سرکاری چاگرد ءَ باز منّگ ءُ ستا بوت۔ بلے آ وھدی ناٹو تپاک ءِ باسک ترکی چہ میانجی ئیں رودرآتک ءِ نوکیں نکشہ ءِ کَشگ ءَ سَک برانز گپت ءُ چہ امریکہ ءَ را گْوشت ئِے کہ راستی ءَ درشان بِہ کن ءُ باور بِہ دے کہ لیپٹیننٹ کولنل رالپ پیٹرز ءِ سَسا امریکہ ءِ راجی شوندات (State Policy) ءِ بَھر نہ اَنت۔ بلے امریکی اسٹیٹ ڈیپارٹمنٹ ءَ گْوشت “اد ءَ اُلسان ءُ راجمستری(Democracy) اِنت پمیشکا ھر کسے اے وَ ھک ھست چمیشکا وتی سوج ءُ پنتاں درشان ئِے کت کنت، ما نہ زان ایں چی ءَ لھتیں استان چہ لیپٹیننٹ کولنل رالپ پیٹرز ءَ باز دلاپ اَنت۔۔۔۔”
بلے دومی نیمگ ءِ امریکی ڈنّی شوندات ٹھینوکاں اے کار ءِ موکل دات۔ بزاں پد ءَ ھمے کار ءِ منّگ نامہ بوت چمیشکا اے سوج دیم ءَ امریکن راجی جنگی اَڈّ US National War Academy ءَ روان دیگ بوت کہ اے سوج ءَ شَر بِہ چار اِت ءُ پہ ایشی ءِ واستا وت ءَ را ساڑی کن اِت۔
انچوشکہ امریکہ ناٹو تپاک ءِ سروگان انت پمیشکا امریکن راجی جنگی اَڈّ ءَ رالپ پیٹرز ءِ سَسا ءِ سرپد بوگ ءَ رَند تیوگیں سوج پہ چمشانکے ءَ ءُ پنت ءُ سرسوجے ءَ ھاتر ءَ ناٹو دوارجاہ ءَ دیم ئِے دات کہ اود ءَ تیوگیں ناٹو تپاک ءِ باسک بُن کارگس ءَ نند ءُ نیادے بِہ کن اَنت۔ ھاسیں ھال ءُ اھوالانی رِد ءَ تومشان 2006 ءَ پہ یک مجلسے ءَ جارے کَشگ بوت کہ ناٹو باسکانی لشکری سروگاناں اود ءَ یکجاہ بِہ بنت ءُ یک ھاسیں جنگی سوجے ءِ سر ءَ باوست ءُ سوڑگ بِہ کن اَنت بلے کَس ءَ را ھال نہ اَت کہ مجلِسے مول ءُ مراد ءُ بُنکی باوست چے اَنت۔ ترکی ءِ سرکاری رسانکدر ءِ رِد ءَ 15 تومشان 2006 ءَ ماں اٹلی ءِ بندر شھر روم ءَ نآٹو جنگی دربرجاہ ءَ واجہ پیٹرز ءِ سَسّا گوں نکشہ ءَ پیشدارگ بوت ءُ ماں دیوان ءَ ترکی، پاکستان ءُ بازیں اَرب استانانی پروشینگ ءِ بارو ءَ ھبر بوت ایندگہ اود ءَ اے ھم گْوشگ بوت کہ امریکی راجی اڈّ ءَ رالپ پیٹرز ءِ سوج منّ ات نی بس شمئے گڈسری چمشانکے ءِ ھاتر ءَ اے سوج شمئے دیم ءَ ایرکنگ بوت۔ آ وھدی ترک لشکر ءِ سروگان جنرل بیوکنیت وَ برانز گپت چمیشکا چہ دیوان ءَ پاد آتک ءُ زھرشانی ئِے کت۔ ھمے ساھت ءَ امریکی لشکری یکجاھی پاگواجہ (یو ایس چیرمین آپ جوائنٹ چیپس آپ سٹاپ) واجہ جنرل پیٹر پیس ءَ گوانک (پون) ئِے جت ءُ گْوشت ئِے ” اے تو مارا چے پیشدارگائینگ ءَ ئے، تو اے دیوان پہ رالپ پیٹرز ءِ سوجانی واستا بُنگج کت کہ اود ءِ ترکی، پاکستان ایندگہ تیوگیں میانجی ئیں رودرآتک ءِ پروشینگ ءُ نوکیں سیم سرانی کَشگ ءِ گپ ءُ توار بوگ ءَ اَنت۔۔۔۔۔” پد ءَ ھمے وڑ ءَ پینٹاگون ءَ وتی گْوستگیں ھیلانی وڑ ءَ ترکی ءَ دروگیں تسلھے دات کہ اے لیپٹیننٹ کولنل رالپ پیٹرز وتی جِند ءِ سوج ءُ تپاس انت بلے پہ باسکانی سوج ءُ پنت ءِ واستا دیوان اڈدیگ بوت چوناھا اے وَ امریکہ ءِ راجی شوندات ءَ ھچ کار نہ کن اَنت شما دلاپ مہ بِہ ات۔
بلے یک نیمگے ءَ میانجی ئیں رودرآتک ءَ بے کساس امریکی لشکری سنگر ءُ بے کساس دریائی جنگی گراب گوں بے کَچ ءُ کساس ءَ جنگی بالیگراب ءُ دومی نیمگ ءَ ماں اوگانستان ءَ ناٹو تپاک ءِ لشکری سنگر ءُ آئی ءِ دوستگیں مردمانی سرکار، اے دراہ ھمے کار ءَ سک زیب دیگ ءَ اَنت کہ وڑے اَلم ءَ ھست۔
مرشیگیں میان اُستمانی جاور شمئے دیم ءَ اَنت وھدے 2010 ءَ ارب آشوب چہ تیونس ءَ بنا بوت پد ءَ ھمے ھونیگیں آشوب ءَ تیوگیں میانجی ئیں رودرآتک ءِ استاناں یک یکی ءَ آس ماندات چمیشکا 2012 چہ وت ماں وت جنگ ءَ ھِیسک ءُ ھمپانیں شام ءَ پروش وارت ءُ آئی ءِ زیردستیں کرد راج ءَ ھم وت ءَ را وتواجہ کت گُڑا اے آکبت ءَ ترکی ءِ زیر دستیں کرد ھم شام ءِ کرداں گوں ھوار بوت انت پمیشکا مرچاں ترکی بے سوب انت ءُ کُردانی ھلاپ ءَ یک ناھلاسیں جنگے ءِ زر زوالی ءِ آماچ انت۔یمن ءُ اوگانستان ءِ جاور شمئے دیم ءَ اَنت۔ پد ءَ انچوشکہ ما زان ایں کہ چہ گْوستگیں گْوبشان ءِ ماہ ءَ تیوگیں لیبنان، اَیراک ءُ ایران ءَ چے بوگ ءَ اَنت، آئی ءَ ھرکسے زانت۔ چہ لس مھلوک ءِ ترُندیں زھرشانی ءِ سوب ءَ لیبنان ءِ مستریں وزیر الھریری ءَ دستکشی ءِ جار جت ءُ اود ءَ جاور تننگا شَر نہ اَنت۔یمن چہ 2015 ءَ ماں سَے ھند ءَ بَھر ءُ ونڈ انت بزاں بَھرے شیئا، بَھر سُنی ءُ بَھر اَلکائدہ اَرابیان پینسلا ءِ دست اِنت۔
مزنیں مسکرائی ھبر ایش انت کہ 36 لگوریں مسلمانانی سرکاری لشکر چہ یک ھوتی نامی گَلے ءِ دیم ءَ بے وس اَنت، اے لگوریں باڑو ءِ لشکر یمن ءِ توک ءَ جنگ کت نہ کن اَنت بس یمن ءُ سھودی ءِ سیمسر اوشت اَنت ءُ چہ بالیگراب ءُ میزائیلانی اُرُش کن اَنت چمیشکا اود ءَ شپ ءُ روچ جنگی بیرانی انت انچوشکہ شمئے دیم ءَ اَنت۔
ایران ءِ سر ءَ ھم تْرُندیں میان اُستمانی واپاری بندیگ جنّگ بوتگ اَنت پمیشکا آئی ءِ ٹیل ءَ کس بھا نہ زور ایت ءُ پد ءَ ایران وتی جِند ءِ ودی کتگیں ٹیل ءَ وتی مھلوک ءَ گِرانبھائی بھا کنگ ءَ جار جت پمیشکا پد ءَ اود ءَ ھم اَرب آشوب ءِ برانز سر بوت انت۔
اگاں ایران ھم شام ءُ ایراک ءِ وڑ ءَ ژامبلت ءُ کپت گُڑا اے پہ ایرانی کرد ءُ بلوچاں یک ھُدائی دادے بیت۔ بزاں استان ءِ نزوری پہ کرد ءُ بلوچانی واستا یک وشیں موھے بیت کہ آ ھم وتی وتواجھی ءِ جار ءَ بِہ جن اَنت۔ ایران ءِ ھرابیں جاور یا ایران ءِ نزوری پاکستان ءَ ھم بے کساس نزور ءُ ھیسک ءُ ھمپان کنت۔
نبشتانک ءِ مول ءُ مراد ھمش انت کہ لیپٹیننٹ کولنل رالپ پیٹرز ءِ میانجی ئیں رودرآتک ءِ نوکیں سیمسرانی بابت ءَ کار بوگ انت بلے کسے زانت ءُ کسے نہ زان ایت۔
ھلاس انت۔
