دومی بَھر
نبشتہ کار: واسیپ ھیات
ھمگام بلوچی
چہ ھمے نبشتانک ءِ لاپ ءَ واجہ رالپ پیٹرز ءَ ھمے درشان کتگ اَت کہ امریکہ ءِ پاگواجہ وَوڈرو ولسن ءِ دَور ءِ ءُ اولی گیدی ءِ جنگ ءَ رندی کشتگیں میانجی ئیں رودرآتک ءِ سیم سر رَد اَنت پمیشکا اود ءَ ءُ تیوگیں گیدی ءَ مُدام جنگ ءِ بیرانی اِنت چمیشکا تیوگیں یورپ بزاں روایرشُتی اِستان ھم ایوکیں وھداں چہ جنگ ءُ جدل ءِ آماچ بیت۔ گُڑا ھمے دراجیں نبشتانک ءِ لاپ ءَ لُیٹینیٹ کولنل رالپ پیٹرز ءَ وتی سوج ءِ میانجی ئیں رودرآتک ءِ سیم سر ماں میان اُستمان ءِ دیم ءَ آورتگ انت۔ زانگ بِہ بیت کہ واجہ رالپ پیٹرز ءَ وتی ھمے نبشتانک ءِ لاپ میانجی ئیں رودرآتک ءِ دراھیں استانانی نوکیں نکشھے کشّ اِت۔
زانگ بِہ بیت کہ اے دراجیں نبشتانک ءِ لاپ ءَ بازیں استانانی پروشینگ ءِ گْوشگ بوت انچوش کہ ترکی، ایراک، شام، یمن، پاکستان ءُ سھودی اَرب بزاں اِے استان ھر وڑ ءَ پروشینگ ءُ کسان کنگ بنت۔ چمیشکا (اے آکبت ءَ) لھتیں استانانی ڈیھ ءِ ونڈے کشگ ءُ ونڈے ھوار کنگ بیت بزاں وتی اولی کَدّ ءُ سائیز ءَ بنت انچوشکہ اوگانستان اسرائیل، لیبنان ءُ آزربائیجان مزن بنت ءُ لھتیں نوک استان ودی کنگ بنت انچوشکہ کُردستان، بلوچستان شیئا یمن،ارب شیئا استان ءُ سونی ایراک دگہ دگہ۔
لُیٹینیٹ کولنل رالپ پیٹرز وتی نبشتانک ءِ تہ ءَ گْوش اِیت کہ اے سوج پہ بنی آدم ءِ اِنساپ ءُ ھک ءِ ٹَوک اَنت ءُ اِے سرسوج ءُ پنت میان اُستمانی تیوگیں جیڑھانی راست ءُ گڈسری توجِیل انت۔
چوناھیگا ھرکس زانت کہ واجہ لُیٹینیٹ کولنل رالپ پیٹرز یو ایس ڈیپنس ڈیپارٹمنٹ ءِ یک بلاھیں کارسرے اَت ءُ دنیگا پینٹاگون ءِ یک ھاسیں نبشتہ کارے کہ لشکری شست (Miltary strategy ) ءُ امریکی ڈنّی شوندات(Foreign Policy) ءِ بابت ءَ بے کساس نبشتانک نبشتہ کنت پمیشکا چہ آئی نبشتانک ءَ بازیں استان تُرس اِتگ اَنت ءُ چہ آیانی ڈنّی کارگساں جارکشّ گْوشگ بیتگ اَنت امریکہ سٹیٹ ڈیپارٹمنٹ اے ٹَوک ءَ پدّر کنت کہ نبشتانک ءِ مول ءُ مراد چے اَنت۔ چہ ھمے تُرسوکیں استان کُلاں پیش پاکستان، ترکی ءُ ایران ئیگ اِت اَنت کہ نبشتانک ءِ سر ءَ زنگ ءُ سکیں نگدکاری اِش کُت۔ بلے ترکی سَک برانز گپت ءُ زاہ ءُ زِکت ئِے کت۔
البت لُیٹینیٹ کولنل رالپ پیٹرز ءَ ماں وتی نبشتانک ءِ لاپ ءَ اے درشان نہ کت کہ اے نوکیں استان چون جوڑ کنگ بنت ءُ ھستیں استان کجام وڑ ءَ پروشینگ بنت۔ پد ءَ یک ماھے ءَ رند 10 جَلکشان 2006 واجہ لُیٹینیٹ کولنل رالپ پیٹرز وتی نامداریں وانگی “نیوَر کویٹ دی وار” بلوچی ءَ رجانکین ئِے کہ “جنگ ءَ ھجبر یلہ مہ کن” ءُ دومی وانگی ءِ نام “بلڈ بورڈرز: ھاو اے بیٹر مِڈل ایسٹ وڈ لوک” بلوچی ءَ رجانکین ئِے “ھونانی سیم سر: چونیں درشمے ءَ میانجی ئیں رودرآتک گِندگ بیت”
چہ ھمے وانگیانی لاپ ءَ لُیٹینیٹ کولنل رالپ پیٹرز ءَ تیوگیں دَگ پیش داشت کہ اے کار چون سرجم کنگ بیت۔ ماں ھمے وانگیاں درشان اِنت کہ امریکہ وتی دژمناں آیانی جِند ءِ ڈگار ءَ ھلاس بِہ کنت ءُ اود ءَ وتی دوزواھیں گَلاں ٹھین اِیت کہ پہ دژمن ءِ ھلاسی ءَ آئی ءِ کمک ءَ کنت۔ اسلامی نیکراھی جنگریز چہ اود ءَ بیران ءُ کشگ بِہ بنت چوش مہ بیت کہ اِے پد ءَ اے اسلامی جنگریز لندن پیرس، واشنگٹن ءُ نیویارک ءَ بیا اَنت ءُ مارا ایشانی دیم جنگ وتی دَمک ءُ شھراں کنگ بیت ءُ جنگی بیرانی ءُ زوالی اد ءَ مئے استاناں بیت۔ باید اِنت جنگ ءَ مدام اسلامی استاناں ماں آیانی دمک ءُ شھراں برجم دار اِیں ءُ ھر وڑیں بیرانی بِل ئِے اود ءَ بیت۔
گْوشت ئِے کہ اولی بَر ءَ مارا اود ءَ بزاں میانجی ئیں رودرآتک ءَ، بِہ گِر لبینان ، شام مسر ایراک پرشین گلپ ایران تا نیٹو جنگی سنگر اوگانستان ءَ جنگی کشک ءُ اڑ ودی کنگ بنت بزاں مردماں وت ماں وت مڑائین ایں، کُشت ءُ کوش ءَ کڑو کن ایں۔۔۔۔
روان انت
