ھمگام بلوچی
گڑا 2011 ءَ تیوگیں ھاشد ٹکرّ ءُ برادری المار براتانی بزاں ھمید ءُ سادک ءِ سیاسی ءُ جنگولی گَلاں ھوار بیتگ انت۔ پمیشکا 2013 ھیسک ءُ ھمپانیں الی ابدلسالہ ءَ وتی نیمگ ءِ سرکاری لشکر ءَ پرمان دات کہ ھوتی جنگلولاں موکل اش بِہ دنت کہ سادک ءُ ھمید المر ءِ بُن بیھیں شَھر آمران ءِ کوچگ ءُ دمگانی نیمگ ءَ اُرُش بِہ کن انت ءُ بیڑ ترین انت۔ گڑا بمب ءُ تُپنگانی آس جمبور بیتگ ات انت ءُ جنگ تْرندیں تبے ءَ کپت پمیشکا ھر نیمگے ءَ تاوان ءُ بیرانی البار بیگ ءَ اَت ءُ تیوگیں شھر ماں ھپتگے ءِ لاپ ءَ ھوتیاں وتی دست ءِ چیر ءَ آؤرت ءُ 3 اُستپان 2014 ءَ دوئیں برات سادک ءُ ھمید چہ یمن ءَ تتک انت ءُ درانڈیھ بوت انت۔ بلے ھوتی جنگولاں وتی دژمنانی شھراں سَکیں بیرانی داتگ ات توری دربرجاہ ءُ شھدربرجاہ، سرکاری کارگس ءُ کارجاہ ھمک سرکاری ءُ دژمنانی آسراتی پروشینگ بوت انت یک یک ءَ یاگی ءُ گَدار ھم کُشت انت۔ اے دراھیں جنگاں الی ابدلسالہ ءِ لشکر ءَ مدام ھوتی جُھدکار ءُ جنگولانی کمک مھکمی ءَ برجاہ داشت۔
البت اے وَ ھبکّہ ئیں گپ ءَ ات کہ زیکیں دژمن مرشی ئیں روچاں یک دوزواھے زانگ بیگ ءَ ات۔ ھوتی جَنگولاں ایشانی کلات ءُ سَنگر ھمپُسگ ءُ پروشنتگ انت۔ گڑا آ ساھتاں ءُ میان اُستمانی پجارتگیں پاگواجہ (internationally recognized president )ابدلرابو منسور الھادی ءَ ھم یمن ءِ بُندریں شھر سنا ءَ چہ تتک ءُ آیڈن ءَ آتک ءُ پد ءَ ریاز سھودی بُندری شَھر ءَ درانڈیھ بوت۔ بزاں یمن ءَ نوں سُنیانی راجداری ھلاس ءُ شھیانی راجداری بیوک انت۔
چوناھیگا سھودی ارب ءِ گوں ھوتی زیدیاں سْیادی چَہ اولی ھلیج جنگ 1990 ءَ ایراک ءُ کویت ءِ ھونیگیں جنگ وھد ءَ ھراب ات انت۔
سھودی ءَ مار ات کہ اے شیھانی آشوب زیت ماں سھودی ارب ءَ ءُ آئی ءِ بادشاھی ھلاپ ءَ یک زمینچَنڈے کار ایت ءُ اود ءَ ھم پہ سھودی بادشاھاں یک بیرانی یے ودی بیت کنت۔ پد ءَ ماں یمن ءَ سھودی ءِ دْریشّاپیں دژمنانی سرکار(ھوتی جنگولانی سرکار) پہ سھودی ءَ شَرّ ھم نہ ات چے ءَ کہ ھمساھگیں دژمن تباھی ءِ ھچ موہ ءَ نباد نہ کنت۔ یک سھودی ءِ کْوھنیں سنگت الی ابدلسالہ ھم سھودی ارب ءَ چہ گَداری کت ءُ ھوتی جنگولانی نیمگ ءَ شُت۔
گڑا انچوش گْوش اَنت کہ زَرّ ءَ سلام انت پد ءَ سھودی ارب دگنیا ءِ تیوگیں وتواھیں مسلمانیں ملکانی سرکاری لشکر(Militaries) پہ مال ءُ زَرّ ءِ سیت ءُ لالچ ءِ سر ءَ آؤرتگ اَنت ءُ چہ ایشاں یک جنگی گَل نام ئِے ارب تِپاکی گَل(Arab coalition) بستگ ات
اے گَل ءَ سھودی ارب، یو ای اے ءُ مِسر ءَ ھوری ءَ کساس 36 کسان ءُ مزنیں مسلمانانی استان شریدار انت۔
داں یمن ءِ جنگ ھست بزاں اے توگیں استان سھودی ھر وڑیں( زَرّی ءُ ٹیل ءِ کُمک دنت ءُ جنگ ءِ ھرچ ھم وتی سر ءَ زورگ ءِ اھد کت) پد ءَ ھمے ارب گَل ءُ سھودی پوج ءَ مولمان 2015 ءَ گوں بالی جنگی گراباں یمن ءِ سر ءِ بمب ءُ میزیالانی ھَور گْوارگ بُنگیج کت۔ اے درگت ءَ چہ ساری ءَ وت ماں وت جنگ ءَ دُچار کپتگیں یمن ءِ ھمک وڑیں آسراتی ھلاس بوان شُت انت لس مھلوک ءَ را آپ ءِ تْرپ ھم رسگ یک بلاھیں جُھد زانگ بوت ءُ نادراھی ءُ بے درمانی ءِ سوب ءَ مردم مران بوگ ءَ انت۔
اے جنگ ءِ سوب ءَ روایرشُت ءِ استانانی ھاسکن امریکہ انگلینڈ پرانس ءُ جرمنی ءِ سِلاہ جوڑ کنوکانی انڈسٹریانی پوریاگِری ءُ بزنساں بے کساسیں نپ ءُ سیت زورگ بندات بوت۔
سھودی ارب ءَ میان اُستمانی گَل یو این ءَ پہ پوتاری ءَ ٹوھیں زَر ءُ مڈی ھرچتگ انت کہ یمن ءِ شھراں بمبانی ھَور ءِ گْورینگ ءِ روا ئِے رس ایت ءُ کَس ملک لانت مہ دنت ئِے۔
دومی Buy America & Hire America نامیں رِدے امریکہ وتی راجداری مَنّہ کانگرس ءَ منّیتگ ءُ کانود ءَ 18 کِرّ 2018 ھوار کت کہ مڈل ایسٹ ءِ استاناں جنگی جاواراں اڑ ءُ گپچل کنائینگ بِہ بنت ءُ پد ءَ آیاں ھنچو بے وس ءُ لاچار اش بِہ کنت کہ آ امریکہ اے دجالی سِلاہ، میزائیل، بم ءُ جنگی گراباں بھا زور انت ءُ پہ بلد بوگ ءَ ھم آیانی انجینئرانی ھزمت ءَ پہ بھا گِر انت ءُ آ سِلاھاں وتی مسلمانانی سر ءَ کارمرد بِہ کن اَنت پمیشکا اے جنگ پہ امریکہ ءَ یک بلاھیں وشیں موھے ات ءُ آئی ءَ سھودی ءَ وتی سلاھانی دائمی گِراک ئِے کتگ۔
پاگواجہ ٹرمپ ءَ سوچکان 2017 ماں ریاز شھر ءِ دلبند ءَ گوں سھودی ءَ اے واپار ءِ تاکدیم ءَ دزنام کتگ۔ ھمے پیم ءَ واجہ ٹرمپ ءَ کتر، کویت، ایراک ءُ یو اے ای ءُ مسر ءِ وڑیں بازیں ترسوکیں ارب استان دزگِیر کتگ انت کہ امریکہ ءِ گون ءَ جنگی آسراتیاں زور انت۔
گڑا داں 2015 ءَ یمن ءِ مردمانی سر ءَ سھودی ءُ آئی ءِ ارب ملکانی بمباری بوگ انت۔ یو این ءِ رپورٹے گْوش ایت کہ چہ سھودی بمباری ءَ یمن ءِ مزنیں شھرانی ھمک وڑیں کارگس، نادرھجاہ ءُ وانگجاہ ءُ بالی گرابانی پِڑ تباہ بوت انت۔ مردماں پوریاگِری ءِ ھچ وڑیں راہ نیست انت بازیں گْونڈو لنگڑ ءُ گُژن ءِ سوب ءَ بیران بوت انت کودک سیوگ ءُ چورہ بوت انت ءُ بے کساس چہ جنگ ءَ زدگ بوت ءُ مرت انت ءُ گیشتریں کور ءُ لَنگی سر ءَ نیم جان بوت انت۔
دومی نیمگ ءَ ھوتیاں وتی کْوھن ءُ ھونیگیں دژمن ھلاس کتگ انت ءُ سھودی سیم سر ءُ ھَدّاں میزائیل ھم بال دات ءُ سھودی ءَ را جت اش۔ گڑا اے جنگ دراج بوان ءَ شُت ءُ امریکہ ھم نہ لوٹ ایت کہ جنگ ھلاس بِہ بیت ءُ آئی ءِ سلاہ ءِ کاربار ءَ اوشت ءِ آماچ بیت۔ ھمے درشماں سھودی ءِ بازیں لُچّ ءُ شَتَلیں سنگت ھم نہ لوٹ انت کہ جنگ ھلاس بِہ بیت ءُ ایشانی پگار بند بِہ بنت ھاسکن مسر ءُ درگریں بازیں بزگیں استان کہ آیانی سرجمیں پوج چہ ھمے جنگ ءِ سوب ءَ رودینگ بوگ انت۔۔۔
ھوتی جنگولانی مستر واجہ ابدلمالک الھوتی ءَ ھم جنگ ءَ نوکیں ردوم آؤرت انت ءُ بازیں استان ءَ چہ کمک تْرام کتگ انت۔
وھدے ھوتیانی مستر ابدلمالک الھوتی ھیال کنت کہ یمن ءِ گْوستگیں پاگواجہ الی ابدلسالہ نی ھچ کار ءِ نہ انت گڑا ھوتی جنگول پہ پَھر ءُ ناز ءَ الی ابدلسالہ ءَ 4 تاکستان 2017 سنا ءِ نزیک ءَ کُشت ءُ وتی رھشون بدر دین الھوتی ءِ بیر اش گپت انت۔
داں مرچیگیں روچ سھودی اے نہ ھلاس بیوکیں جنگ ءِ اوساں گٹ انت ءُ میان اُستمانی ھالانی رِد ءَ گْوشگ بیت سھودی پہ وتی رکینگ ءَ 50 بلین ڈالر زَر ھمک ماہ ءَ نباد کنت۔
دومی نیمگ ءَ یمن ءِ جاور ھراب ءَ چہ ھراب بوگ ءَ انت۔ یمن مرشاں سے بَھر انت۔ یک بَھرے ھوتی گوں مزنیں شھر ءُ تیاپ دپی شھراں، دومی سنی کہ زِرباری یمن ءَ گیشتر انت ءُ سیمی بَھر ءَ AQAP ئیگ انت کہ ھمے جھد ءِ انت کہ آ تیوگیں یمن ءَ وتی مُشت ءَ بیار انت۔
گروناکیں سھودی ارب ءِ جُنز ءِ بلاھیں لُچّی ءُ شتلی ءِ گپ ایش انت کہ ماں اے جنگ ءَ دوئیں سھودی ارب ءُ یو اے ای ءِ وتی جُتائیں مول ءُ مراد انت۔ وھدے ایو اے ای ءَ زانت کہ کَس ملک وتی ڈگاری پوج ءَ ماں یمن ءَ دیم دیگ ساڑی نہ انت پد ءَ آئی ءَ مدام لوٹ ءُ جھد ھمے کتگ کہ سُنیانی زِرباری یمن(North Yemen) چہ شیھانی گْوریچی یمن(North Yemen) ءَ جتا بِہ بیت چے ءَ کہ زِرباری یمن ءِ سیم سر یو اے ای ءَ گوں مان اَنت ءُ دوئیں سُنی انت گڑا پمشکا آ زرباری جنگول Southern Transitional Council ءَ واھر ءُ کمک بندات کتگ کہ یک جُتائیں استانے زرباری یمن ٹھینگ بِہ بیت۔ یو اے ای ءَ بلوچی/ البلوشی لشکر ھم پہ زِرباری سنی یمن STC ءِ جنگی کمکاں دیم داتگ انت ءُ انگت ءَ اود ءَ وتی شست ءُ مکسداں کار ءِ انت۔
آسر: زباری یمن گوں یو اے ای ءِ کُمکّ ءَ وت ءَ را جتا کنت بزاں پہ جتائیں ءُ آجوئیں استانے جار گْوش ایت ءُ وتواھیں یو اے ای وت ءَ را جنگ ءَ کش ایت گُڑا اے بے ایرموشیں ءُ نا ھلاس بیوکیں جنگ ءِ مول ءَ مراد پیلّو نہ بنت پمیشکا سھودی ارب ءُ امارات ءِ نیام ءَ زَھرگی ءُ دگری ودی بنت پد ءَ امارات وت ءَ را چہ اے جنگ ءَ کش ایت ۔ بلے سھودی سیم سر ءَ ھوتی مدام پہ سھودی ءَ یک نادْراھی یے بیت۔
سھودی مدام ھمے لُچّیں سنگتانی ھرچ ءُ پکاراں ءَ منّ ایت ءُ امریکہ ءِ سلاہ بھا زور ایت۔ یمن وت پیسر ءَ گار ءُ نباد انت بلے ایشی ءِ آس سھودی ءِ جِند ءَ ھم جھندم ءِ آس ڈول ءَ شوچ ایت۔
ھلاس: منی گْوشتگیں ٹوکاں منی پال ءُ گْوندو ءَ یات بِہ کن ات
