ھمگام بلوچی
گیدی ءِ ھمک زندگیں راجانی زبانے وَ المی ھست بزاں بے زبان ءَ راج نہ بنت ءُ راج گوں بے زبان ءَ نہ بنت۔ ھمک راج ءَ وتی ماتی زبان دوست بیت ءُ ھمک زبانانی یکیں نبشتہ ءِ رھبند ءُ دستورے ھست انت کہ تیوگیں راج ھمے یکیں رھبند ءِ رِد ءَ وتی ماتی زبان ءَ نبشتہ کن اَنت۔ چہ مکتب ءِ اولی تبک ءَ وتی ماتی زبان ءِ وانگ ءَ بنا کن انت ءُ پدا نبیسّگ ئِے ھیل کن اَنت بلے بلوچ راج ءِ پدریچ ءَ کدی ماں وانگجاھاں ماتی زبان وانینگ نہ بوگ انت پمیشکا بلوچ راج چہ ماتی زبان ءَ دور گستا انت چمیشکا درستاں مزنیں مڑا ایش انت کہ بلوچ ھمے ردیں ھیال ءِ آماچ انت کہ مئے ماتی زبان بلوچی وتسر ءَ گوں ارابی آباں گوں نبیسّگ بیت پمیشکا ھر کسے چہ واب ءَ پاد کیت وتسر ءَ بلوچی ءَ گوں گِسر ءُ رَدیں رھبند ءَ نبشتہ کنت بزاں جِند ئِے ھم ھچ سُد ءُ سما نہ بوگ انت کہ من چی نبشتہ کنگ ءَ آں۔
بژن ءِ ٹَوک انت کہ لھتیں مئے برات ءُ گْوھار بے بلوچی سْیاھگ ءِ وانگ ءَ وت بلوچی ءِ دْراجیں نبشتانک نبشتہ کن انت ءُ ماں چاگردی رسانکدر ءُ بلوچی تندتاک ءُ تاکبنداں شِنگ اش کن اَنت پد ءَ راج ءِ بے وسیں ورنا ھمے رَدیں سْیاھگ نکاناں وان اَنت۔
باید انت ما بلوچی سْیاھگ ءَ وان ءُ زان ایں پد ءَ نبشتہ ئِے کن ایں کہ مئے رندگیری کنوکیں وانوک چہ مئے نبشتانکاں چیزے بلوچی ءَ دربر اَنت۔ مرشی پیسبُک ءُ وٹس ایپ ءِ دَور اِنت بلوچی سْیاھگ ءِ درونت ھرجاہ رس انت ءُ بلوچ راج ءِ بلاھیں وش بھتی ایش انت کہ بلوچ راج ءِ تہ ءَ بے کساس زبان دوست ھست انت کہ آ پہ ماتی زبان ءِ دیمروئی ءَ شپ ءُ روچ جُنزان اَنت آیاں بے کساس وٹس ایپی گَل ٹھینتگ انت پد ءَ چہ اود ءَ ماتی زبان وانینگ بوگ انت پمیشکا باید انت ما وت آیانی وٹس ایپی گَلاں ھوار بِہ بَہ ایں، سْیاد ءُ وارساں ھم سرسوچ کن ایں کہ چہ اود ءَ بَھر بِہ زور انت ءُ زوت ماتی زبان ءَ دربر انت۔ پد ءَ ھمے ڈول ءَ وتی شھر ءُ دمکاں بلوچی وٹس ایپی گَلاں گُلین اَنت۔
بلوچی ءَ دربرگ ءَ رَند بلوچی ءِ دْرج ءُ کسانیں نبشتانک ءُ آزمانکاں ماں راستیں رھبند ءَ نبشتہ کن ایں کہ وانوکاں ھم پہ وشیں داد ءُ ٹیکی بِہ بنت چی ءَ کہ رَدیں سْیاھگ ءِ نبشتانک وانوکاں گھتر رَد دنت ءُ راستیں سْیاھگ نوک وانوکاں شَریں وڑے ءَ وت وانین ایت پمیشکا مئے گْوشگ ءِ مول ءُ مراد ھمیش انت وت پیسر ءَ ماتی زبان ءَ دربر ایں پد ءَ راج ءِ ءُ وتی ماتی زبان ءِ ھزمت ءَ کن ایں کہ مارا وتی ماتی زبان زندگ دارگی انت چی ءَ کہ گلامیں راجانی زبان ءَ ھچبر بُنکی آسراتی نہ بنت بزاں پدریچ ئِے ماں وانگجاھاں وانینگ نہ بیت ءُ نیکہ کہ زبان ئِے دیمروئی ءَ روتاک، ماھتاک ءُ گندگُشانی موکل بنت بزان کہ پہ زبان ءِ دیمروئی ءَ ھمک آسراتی ءَ زبَھر کنگ بیت۔
