ھمگام بلوچی
,,,,,
جُست,,,
نور پلیزئی
,,,,,,,,,,,
میر چاکر ءُ میر گوھرام لاشاری ءِ بارو ءَ انت کہ پہ بلوچ راج ءَ چی شری کتگ ءُ ایشانی پشتَ ءَ چے سوت ءُ چے تاوان بلوچ راج ءَ رس اِتگ؟
پَسّو
الی جما زامرانی
سردار میر چاکرھان رند 1468ء ءِ سال ءَ سردار میر شیھک رند ءِ لوگ ءَ پیداگ بوتگ ءُ آ چہ کسانی ءَ سکیں دلیریں مردمے بوتگ ءُ شانزدہ سال ءِ اُمر ءَ آئی ءَ جنگاں بھر زرتگ ءُ آئی پت سردار میر شیھک ءِ بیرانی ءَ رند راج ءِ مستر ءُ کماش میرچاکر رند ءَ سرداری ءِ پاگ ءَ سر ءَ دینت بلے رندانی ٹک لاشاری کُٹم ءِ کماش میر گھرام ء میر نودبندگ میرچاکر ءِ مستری ءُ رندانی کماشی ءَ نہ وش بیت ءُ بلے زیادھیں سردار میر چاکر ھان رند ءَ سردار کن انت ءُ میر چاکرھان رند وھدیکہ سرداری ءَ نند اِیت گُڑا سبی ءَ ھمک سال مُچی میڑہ کن اَنت پزور ءُ ساٹ اِتگیں گوک ءُ پس ءُ گورانڈ ءُ ھشتراں ھمے میڑہ ءُ مچی ءَ کار انت ءُ اَسپ ءُ نریاناں جلوان دینت ءُ ورنا بور تاچی کن اَنت ءُ ھمے بورتاچی ءَ میر گھرام لاشاری ءِ چک میر رامین ءُ میر چاکر ھان رند ءِ چک ریھان بھر زور اَنت ءُ گوشگ ءَ آیانی دوئینانی نریان یکپارگی جپت ءَ سر بنت بلکیں میر رامین ءِ نریان ءِ سُنٹ دیم ءَ بیت بلے آ میر ریھان ءَ سوبمند کن اَنت, لاشاریانی ورنا اے ھبر ءَ بد بر اَنت ءُ نہ وش بنت,
میر چاکر ءَ یک جنوزامیں میارے بیت آ سکیں مالدارے بیت کہ نام ئےِ گوھر بیت آئی ءَ ھشتر ءُ یک بلائیں بَگّے بیت آ کیت چاکر ءِ میار بیت کہ آئی بگ ءَ کس مہ رمبینیت لاشاری ورنا میڑہ ءُ جلوان ءُ بورتاچی ءَ واتر کن انت ءُ راہ ءَ گوھر ءِ بگ ءَ گند اَنت آ گوھر ءِ بگ ءِ ھِرّاں گُڈ اَنت کُش انت ھنچوش کہ راجدپتری لچہ ءِ تہ ءَ لچھکار اے وڑ گوش ایت ,کہ
*پیری آتکگ اَنت لاشاری*
*شِکّ ءُ شادِہ ءُ بورسواری*
*ھِرّ اِش گُڈ اِت اَنت جُتکیگءَ*
*چوُٹی کُرتگ اَنت باجیگ ءَ*
*سیھان اِش جَت اَنت سَجّیگ ءَ*
*جَمبوریں جَلان اِش پتک اَنت*
*تَرّیں سُندَگان اِش جُرت اَنت*
*بُرت اَنت پَہ جناں شَرڑیناں*
*مَھدیم ءُ مزن دُرّیناں*
یک روچے چاکر گوھر ءِ ھند ءَ کیت بیگاہ ءَ ڈاچی دنز انت ءُ چاکر چہ گوھر ءَ جُست کنت کہ تئی ڈاچی دنزگ ءَ اَنت گوھر یک برے نہ مَنّ اِیت بَلے میر چاکر پد ءَ جُست کنت گُڑا گوھر میر چاکر ھان رند ءَ ھال دنت ھمے ھرانی سوْب ءَ میر چاکر ھان رند ءُ میر گوھرام لاشاری ءِ نیامءَ جنگ بیت ءُ اے جنگ 30 سی سال ءَ دار اِیت ءُ برے میر چاکر سوبمند بیت ءُ برے میرگوھرام لاشاری سوبمند بیت ءُ گُڈسر ءَ دوئیں نیمگ ءِ ورنا ھمے جنگانی وڑالی بنت ءُ بلوچ راج ءِ یک دردناکیں کِسھے آسر بیت ءُ میر چاکر ھان رند ءُ میر گوھرام لاشاری پیر ءُ آجز بنت ءُ آ دوئیں چہ وتی ھنکین ءَ در کاینت ءُ میر گوھرام لاشاری ملتان پنجاب ءَ روت ءُ میر چاکرھان رند سَتگڑہ ءَ روت ءُ
میر چاکر ھان ءِ کلات ءُ ماڑیانی نشان ستگڑہ ءُ سبی ءُ ڈاڈر ءَ ھست اَنت ءُ میر چاکرھان رند 1565 ءَ بیران بیت آئی مانش ءُ کبر ستگڑہ پنجاب ءَ اِنت ءُ میر گوھرام لاشاری ءِ کبر ماں ملتان پنجاب ءَ انت ,
میر چاکر ھان رند ءِ زند ءِ بازیں داستان اَنت یکے شے مرید ءُ ھانی ءُ چاکر ءِ داستان اِنت کہ روچ مرچیگ ءَ ھانی ءُ شے مرید ءِ درد ءِ داستان ءَ کَسے گوش بہ دار ایت دل ءَ دردے مار ایت ءُ دگہ میر چاکر ھان رند ءَ ھمایون ھان ءِ مدت ءُ کمک کتگ ءُ دھلی گپتگ ءُ داتگ ءُ اے دھلی جنگ ءَ میر چاکرھان رند ءِ ھاتونیں گوھار بانڑی ءَ بھر زرتگ ءُ دھلی ءِ جنگ ءِ سوبمندی سوَب شیر زالیں بانڑی بوتگ ءُ میر چاکرھان رند ءُ میر گوھرام لاشاری ءِ داستان بلوچ راج ءِ ابدمانیں داستان انت کہ مدام یات کنگ بنت,ءُ راجدپتر ءَ ابدمان انت میر چاکر رند ءُ میر گوھرام لاشاری ءِ اے وت مہ وتی جنگاں بلوچ راج ءَ باز تاوان رس اِتگ ءُ ھما ناتپاکی سوب اِنت کہ تاں مرچیگیں روچ ءَ بلوچ راج ءِ کماش ءُ مِھتر ناتپاکی ءِ موکو تنداں مانگیش اِتگ اَنت ءُ وت ءَ گیشینت نہ کن اَنت
میرچاکر ھان رند ءُ میر گھرام ھان لاشاری ءِ جنگاں بلوچ راج ءَ ھنچوش کہ من برز ءَ گوْشت باز تاوان رس اِتگ اگاں اے جنگ نہ بوتگ اَت اَنت مئے بلوچانی جاور دگر اَت اَنت ءُ ما وتی واجہ وت بوتگ اَت اِیں بلے ھمے جنگ ءُ جیڑھانی سوْب ءَ بلوچستان ٹکی ءُ کُٹمی ھاکمانی تہ ءَ بھر بھر بوتگ ءُ ھمے ھاتر ءَ پرنگیاں سوب کُتگ ءُ بلوچ راج سے بھرءَ بھر کُتگ کہ مرچی مئے بلوچی نام ءُ توار گار ءُ بیگواہ اِنت ءُ ما ایرانی ءُ پاکستانی ءُ اوگانیانی نام ءَ زانگ بہ اِیں ءُ اے سئیں ملک مئے بیگواھی ءِ رند ءَ اَنت ءُ اے سئیں ملک نام ءَ مسلمان انت بلے چہ دین ءُ انسانیت ءَ چہ دور اَنت اگاں مرچی ما ءُ شما اے بے دینیں ملکانی تہ ءَ وتی زندءَ پہ چمداری گوازینگ ءَ اِیں اے درست ھمے ناتپاکی ءِ سوب اِنت اگاں آیاں چو اوگانانی وڑ ءَ ملکے جوڑ کرت اِیں ءَ بلوچ ڈیھ یک ملکے ءِ تہ ءَ ٹٹ کت اِیں ءُ ھاکمی یکے بوتیں جاور اے نہ بوتگ اَت اَنت کہ مرچی اِنت مئے مستریں پروش ورگ ءِ سوب ھمے بازیں ھاکم بوتگ اَنت کہ ھرچ کسے یک ھندے ءِ ھاکم بوتگ ءُ میر چاکرھان ءَ بلوچستان ءِ زمین شاھیگان کناں کتگ ءُ ھمُک ھند ءُ دمگاں ھاکمے نندارینتگ ءُ آئی ءَ ھانانی ھاکمی ھلاس کتگ ءُ کلات ءُ سبی ءُ ڈاڈر ءِ سر ءَ ھاکمی کتگ جوانیں کار کہ میر چاکرھان رند ءَ کتگ بلکیں میرچاکر ھان رند بلوچ راج ءِ راجدپتر ءِ اولی کس ےُ مردم بوتگ کہ بلوچستان ءِ درستیں ھند ءُ دمگ یکجاہ کتگ انت بلوچستان ءِ سیمسر گیشینتگ انت ءُ آئی ءَ ھاکمی ءِ بُن ھِشت اِیر کرتگ بلے اے ھند ءُ دمگانی ھاکمی یکجاہ ءِ نہ کرتگ اَنت رند چہ میر چاکر ءَ کلات ءَ میر نسیرھان نوری بلوچستان ءِ ھاکم بوتگ درستیں ھاکم گوں وت کتگ انت ءُ بلوچستان ءِ سیمسر نوکیں رنگے داتگ انت بلے بلوچستان ءِ سیمسرانی بُن ھِشت ایرکنوک میر چاکرھان رند انت میر نسیر ھان نوری ءَ رند اھمدزئی کلات ءِ ھاکم بنت ءُ اے میر چاکرھان ءِ جوانیں کارانی نام ءَ راجدپتر ءَ نبشتہ نہ کن اَنت میرچاکرھان رند ءِ نام پہ کست ءُ کینگ ھرابیں وڑے ءَ راجدپتر ءَ زاھر ءُ نبشتہ کتگ اِت بلے ایشانی گپ کست ءُ کینگی اَنت کہ ایشاں پہ میر چاکرھان رند ءَ نبشتہ کتگ اَنت چے ءَ کہ چاکر ءِ وھد ءَ ایشاں ھبرے نہ بوتگ میر چاکرھان رند ءُ میر گھرام ھان لاشاری ءِ دؤر ءَ بلوچستان بلوچانی بوتگ ڈَنّی ملک ءِ ھاکماں چہ میرچاکر ءُ میر گھرام لاشاری ءَ ترس اِتگ مرچی ھمے ھان کلات ءِ سوب ءَ ما گلامانی گلام اِیں. ھما پنجاب کہ یک بھرے میر چاکر ھان رند ءَ تاراج کُرتگ ءُ میر چاکر ءِ ھاکمی تہ ءَ بوتگ مرچی ھما پنجاب ءِ چِرکّی میر چاکر ءِ ماڑیانی پَد ءُ نشاناں گار کنگ ءَ اَنت ءُ بلوچ راج ایشاں ایرجیگ ءُ گلام کرتگ ءُ بلوچ راج چہ آیانی زُلماں نپس کش اِت نہ کنت ءُ اے درست چہ مئے ناتپاکی سوْب ءَ اَنت ھما ناتپاکی اِنت کہ روچ ءُ مروچی بلوچانی سر ءَ ھَست اِنت پہ وتی براتاں چو ھُشتر ءَ ھَسدیگ اَنت بلے درآمدیں دژمن پنجابی ءُ گجر ءُ اوگانیانی واست ءَ ھسد ءُ کینگ بیگواہ اِنت ءُ میرچاکرھان رند ءُ میر گھرام ھان لاشاری ھم وتی مانشانی تہ ءَ بش بش ورگ ءَ اَنت ءُ آیانی ارواھاں ھَزاب رسگ ءَ اِنت کہ مئے ناتپاکیانی سوب ءَ بلوچ راج ءَ وتی ھسد ءُ کینگ بیھال کرتگ ءُ دژمناں ھنچو بے وار ءُ شدیگ ءُ لنگر ءُ بہ زانت ءُ پھوال کُرتگ اَنت کہ مرچی بلوچی نام ءُ توار ءُ بلوچی دود ءُ ربیدگ گار اَنت ءُ بلوچ مرچی پاکستانی ایرانی ءُ اوگانی اَنت
اے درست ھمے ھان ءُ ھاکمانی ناتپاکی ءُ کست ءُ کینگ سوب اِنت کہ میر چاکر ھان رند ءِ گلیں گلین ءُ ڈیھ تاراج اِنت من بس ھمے گوشاں میر چاکرھان رند مئے راجدپتر ءِ اولی مردم اِنت بلوچ ءُ بلوچستان ءِراجدپتر ءَ نامے بَکش اِتگ ئے اے مئے سوت ءُ نَپ انت ءُ سی سالی جنگ ءِ سوب ءَ ما بلوچ سک نزور بوتگ اِیں اے مئے تاوان انت بلے میر چاکر ھان رند ءَ مارا راجدپترے بکش اتگ ,,
دگہ گپّے کہ انگریز ءُ پرنگیاں مارا اے سئیں ملکانی تہ ءَ چے ءَ ونڈ ونڈ کتگ راستی ایش انت کہ بلوچستان ءِ پیسری بلوچ ھاکماں بزاں نسیرھان نوری ءُ میر مھراب ھان ءُ گوں میر بلوچ ھان ءَ انگریزانی ھاکمی نہ مَنّ اِتگ انگریزاں چہ بلوچاں باز تاوان رس اتگ ھمے ھاتر ءَ انگریزاں وتی بیر اے وڑءَ گپتگ کہ بلوچستان سے بھر ءَ بھر بھر کتگ ءُ پنجاب ءِ مردم دومی جنگ جھانی ءَ انگریرانی ھمراہ بوتگ اَنت پرنگیاں وتی روگ ءَ رند ھمے وتی بوٹ پالش کنوکیں وپادار ھاکم کتگ انت ءُ گجر ھم پرنگیانی دوست بوتگ انت آیاں بلوچستان ءِ یک بھرے پہ زور گپتگ دومی گجر ھمے ھاتر ءَ بلوچانی سر ءَ زلم کنگ ءَ اَنت کہ بلوچ راج ءِ لشکر ءَ اسلامی لشکر ءِ ھمراھمداری کتگ ءُ گجراں اسلامی لشکر ءِ دست ءَ پروش وارتگ روچ مرچیگ ءَ آ واجہ اومر ءَ زاہ بد دینت ءُ آ وتی ھما بیراں چہ بلوچاں گرگ ءَ اَنت ءُ اوگانیاں ھم ھمے پیم ءَ بلوچستان ءِ ھاکمانی دست ءَ آ ھچبر سُوب نہ رس اتگ,
دگہ راجدپتری گپ کہ باز مردم ءَ نبشتہ کتگ کہ بلوچ چہ ھلب ءُ شام ءَ آتکگانت ءُ لھتے ءَ نبشتہ کتگ کہ بلوچ ارب انت بلے راجدپتر ءُ مھرگڑہ ءِ راجدپتری نشان ءُ چیدگ اے شاھدی ءَ دینت کہ ما بلوچ ھپت سد ھزار سال پیش چہ (مسیح) ءَ ھمے سرزمین ءِ نندوک بوتگ ایں چہ ھلب ءَ آتکگیں لشکر ھما بوتگ کہ اسلامی لشکرءِ ھمراھی ءَ چہ بلوچستان ءَ شتگ انت گوں وھدیکہ واجہ ھسین ءُِ یزید ءِ جنگ بوتگ آیاں یزید ءِ ھمراداری نہ کتگ آیاں زانتگ نوں مئے نندگ اود ءَ جوان نہ انت آ واتر وتی ڈیھ ءَ بلوچستان ءَ آتکگ انت ,,
رند ءُ لاشار ءِ زات ءُ زریات ءُ نسب ءُ سیادی راجدپتر ءَ اے وڑ نبشتہ انت,
میر جلال ھان ءِ چُک,, میر رند ءُ میر لاشار بوتگ اَنت
میر لاشارء میر جلال ھان ءِ چک میر اسمائیل ھان انت میر اسمائیل ھان ءِ چک میر ابداللہ ھان انت میر ابد اللہ ھان ءِ چک میر نودبندگ انت میر نودبندگ ءِ چک میر گوھرام ھان لاشاری ءُ میر گوھرام لاشاری ءِ چک میر بکر ءُ میر رامین انت میر رامین چک میر براھیم ءُ میر مھمد انت ءُ میر بکر ءِ چک میر نوھک ءُ میر جیند انت,,,,,
میررند ءِ میر جلال ھان ءِ چک میر ابداللہ ھان انت میرابداللہ ھان ءِ چک میر شھداد ھان انت میر شھداد ھان چک میر شیھک رند ءُ میر ھسن انت ءُ میر ھسن ءِ چک میر ھمل ءُ میر ریھان ءُ میر رئیس ءُ میر کیاندار انت ءُ میر شیھک رند ءِ چک میر چاکرھان رند انت ,
اے ساب ءَ میر چاکرھان رند ءُ میر گوھرام ھان لاشاری یکیں پیرک میر جلال ھان رند ءِ نماسگ انت وت مہ وتءَ ناکوزاتک ءُ برات انت ,
راجدپتری راستیں الکاپیں ھلکاپ ھمیش انت
کسے باور کنت یا نہ کنت ,,,
