ندکار ۔۔ اصغرزہیر
مغلانی سے سد سالءَ برز ءِ مزن شانیں ہندوستانءِ سرءِھکمرانیءِ گڈی نپس ھما روچءَ سستگ کہ جہانگیرءَ ملکہ الزبِتھءِ کاگدءِ پسوءَ انگریز وتی راجدارءَ باپار ءِ اجازت داتگ انت ءُ کاگدءِ سرءَ دزنشان جتگ۔بزاں اے دزنشان چو غوث بخش بزنجو ءِ گشتن ءَ موت ءِ پروانہ ءِ سر ءِ دز نشان بوتگ۔ چدءُ پد انگریز ءَایسٹ انڈیا کمپنیءِ نامءَ باپاری گوارچ ءِ ساھگءَ پندلانی ماھورءِ سراچگ بنا کتگ۔ھمے کمپنیءِ سرشونءَ مسلمانانی توکءَ پترگ، آیانی تبءُ مئیلاں درگیجگ، نزوریءُ دگہ کمی گیشیاں زانگءِ کمکءَ چرایانی ناتپاکیءَ نپ چست کنانءَ ،آیانی توکءَ لالچ،شکءُ شبوءُدگری ودی کنگءَ سوب مند بوتگ اِنت۔
آیانی تھی جیڑھانی زانگءُ درگیجگءَ پد وتی کوھنیں پندلی رِپکءَ کار بندانءَ صادقءُ جعفر بھا زرتگ انت ءُ ہندوستان ءِ سرءَ الگار بستگءُ ہندوستانی وتی گلام کتگ انت۔
چہ تپنگءِ جنگءَ گیشترلس مھلوکءِ رگءُ ریشگانی توکءَ پترگءُ زھن ءِ تکنیکی جنگی رِپکاں کارمرزانءَداں سدءُ نیم سالءَ اے گلامی ئِے برجاہ داشتگ۔
یک انچیں شرکنیں زھرے پاکستان اوں صادق،جعفرءُ مرزا غلام محمدانی کُمکءَ ”کلچرڈئے،کیچ فیسٹیول،ٹورنامنٹ،کتب میلہءُ دگہ بازیں“ کہ مھلوک ءِ رگءُ ریشگانی توکءَ ھوار گیجان اِنت کہ انوں ایشیءِ سانءُسما مارگ نہ بنت بلے وھدیکہ دیوال کپیت گڑا سجھیں چیز الکاپیءَ پدر بنت۔
٭جست ایش انت کہ یک نیمگے کتابانی سرءَ بندش جنگ بیتءُ دومی نیمگءَ جاربادشاھی کتاب مراگہ دارگ بیت کہ یک سرکاری کارندھےءِ گوشاں موریے اوں نہ وارت؟
ادءَ ھمے گپ پاد کئیت کہ یکبرے لٹ بہ دئے ءُ پدءَ پہ دل ءِ ریپنگءُ واپینگءَ وشان بہ کنءُ بہ سھڑین۔
من زاناں شمئے زھناں ھمے جست سرکشیتءُ شما ھمے گش ات کہ کتابءُ وانگ گندگیں چیزنہ اِنت ۔گڑا اے ھساب ءَ شما وانگءِ دژمن ات،بلے چوش نہ انت بلکن مارا پودنیءِ کاگدءِ توکءَ زھر مان کنگءُ دیگ بوگءَ انت۔ڈنءَ دکانءِ دیمءَ شربت نبشتہ انت بلے توکءَ شراب انت۔
من کہ کتاب دژمنے بوتیناں گڑا منی سرجاہءِ چیرءَ اوں کتاب ایر نہ بوت کہ وپسگءِ وھدءَ داں چار لبز مہ واناں واب نہ کپاں۔گشگ ءِ مول ایش انت کہ اے کار وَ سکیں شریں کارے بلے اے کارءِبوجکارءُ پشدری مول دگر انت۔ من کتاب مراگہ،کتاب وانگءُ زانت دربرگءِ بگیر نیاں۔کتاب یک روژنائی یے۔بلے دومی نیمگءَ ھمے روژنائیءِ تالانوکیں رھشونءُ مکتبی چست کنگءُ کشگ بوگءَ اَنت،زنگول کنگ بوگءَ اَنت۔گڑا کتاب میلہ پہ کئے ءُ پرچا؟اگں آیاں گوں کتاب،بلوچءُ وانگءَ ھدوناکی است انت گڑا تربتءِ کتابجاہ ءَ پرچا پچ کنگءَ نیل انت؟
٭جست اے پاد کئیت کہ ”کلچرڈئے“وَ ھرابیں چیزے نہ اِنت گڑا آجوئی دوستیں کواسءُ جھدکار پرچا ایشیءِ بگیر اَنت؟راجءُ ربیدگ یکے دومیءِ گوشتءُ ناکُن اَنت۔ھو!من ربیدگءِ بگیر نیاں بلے ربیدگی روچ چوں دارگ بوگءَ انتءُ آئیءَ کئے دارگءَ انت،ھمے یک مھمیں گپے،ربیدگی روچ ءِ پشدری کسہ چے انتءُ نوں ربیدگی روچ چوں آوار جنگ بوتگ ؛ھمے زانگی انت۔ربیدگ ایوکءَ ناچءُ گاناءِ نام اِنت؟ یا چار کپات،داسءُ تگردےءِ پیشدارگءَ ربیدگ گش انت؟ربیدگءِ وتی یک شاھگانیں پجارے است اِنت کہ مرچی آ بس ناچءُ گاناءَ گوں بندگ بوتگءُ دنیاءِ دیمءَ آئیءِ دروشم تیزاپ پِرریچگ بوتگ۔ربیدگ چرےمانایاں بالاتریں چیزے۔ربیدگ یک اھدءُپیمانےءِ نام انت۔بلے انوں دنیا ءَ ھمے پیش دارگءِ جھد بوھگءَ اِنت کہ بلوچ ایش اَنت،اے بلوچانی راجدپتر اِنت۔
٭ جست اے سرکشیت کہ فیسٹیولءُ ٹورنامنٹءِ توک ءَ چے بَھی مان انت کہ شما دنیا سرءَ زرتگ؟پہ ھمے وڑیں جستانی پسوءَ مبارک قاضیءَ گشتگ کہ
اے عیشءُ نوشءُ جوانی پہ ایمنی وش انت
تئی گلزمین گلام انت بشانگءَ یل دئے
اےسجہ ءَ پہ تاھیرءُ ایمنی وش اَنت۔جشن پہ کئے؟کجام وشیءُ شادھانی پشدرءَ جشن دارگ بوگءَ اِنت۔بلکن پمشکہ کہ لاش کپگءَ اَنت،بلکن پمشکہ کہ ماتانی سریگ چانک بوگءَ اَنت؟بلکن پمشکہ کہ لاڑکیں گوھار ءُ سنگلیں جنک جنوزام بوگءَ اَنت؟بلکن پمشکہ کہ بنگو بروت ماں بندی جاھاں آزار دئیگ بوگءَ اَنت؟پہ کئے جشن بوگءَ اِنت؟کجام وشیانی باپشتءَ؟
پدءَ ھمے گپ دیمءَ آرگ بوگءَ اِنت کہ اگں راج گمیگ اِنت،آجوئیءِ جنگ بوگءَ اِنت گڑا ما سجھیں زندگیءَ پرسءِ پتّرءَ بہ نندایں؟
تو یکروچے چاگیءِ ایٹم زدگیں چکانی ھال گپتگ؟زمینءِ سرءَ کپتگ اَنت، پیدائشی نادراہ اَنت۔ناں ورگ اِش است ءُ نیکہ پہ الاجءَ زر۔۔۔
چہ نادراھیں چکاں تئی ناچءُ گانا گیشتر بستار داراَنت؟ تو یکروچے آ بزگانی بابتءَ مراگشے ایر کتگ؟بینیفٹ شوےکتگ؟ترا تئی جشنءُ گانا مراد بات اَنت واجہ۔
سجھیں بلوچستانءَ ناں الاجءِ شریں آسراتی است ءُ ناں وانگءِ،ناں کہ پہ دھکان کاراں سرپدی مراگش ،چہ ھمک بنکی آسراتیاں زبھریں مھلوک،ءُ گوادرءِ آپءِ جیڑہ کسی دیمءَ چیر نہ اِنت یاکہ آوارانءِ زمین جمبءِ سببءِ زبھری بہ بیت۔
چشیں روچ نیست کہ چُک،جنین ،ورناءُ پیرینانی لاش کپگ ءَنہ اَنت۔تو بہ نندءُ جشن بہ کن۔شاتکامیءُمراگش برجم بہ دار۔کجام کجام جیڑہءِ گپءَ بہ کناں،کجام کجام گارزدگی ءِ کسہءَ بیاراں؟
برے بہ چار بینظیر فنڈ ءِ نام ءَ جنیں آدماں چو ھڑکئیءَ ھب ھب پرمائنت، برے بچار میڈیکل کیمپءِ نامءَ وتی بیرک ءَ برز کنگ لوٹ انت۔بلے تو گار کتگ ھاکاں نوں پراں دز موش مہ کن۔
من ھیراناں کہ اینچو زبھریءُ شیرچینگءَ پد اوں لس مھلوک پرچاچریشاں یکیم ءُ ساکم نہ بیت۔
چو اردوءِھما شئرءَ کہ ”نہ خدائی ملا نہ وصالِ صنم“۔چہ دوئیں اولاکاں زبھریءَ پداوں آ وتی سرءُ چِٹءَ گرگءَ نہ اِنت۔
اسلءَ ھمے نزوریءُ گران جانیءَ دیمءَ ایر کنانءَ ایسٹ انڈیا کمپنیءِدابیں پارٹیءِ گوارچیءَ اے کاردیمءَ روان اَنت۔صادقءُ جعفر روچ پہ روچ پزور تر بوان اَنت۔اے سجھیں پوتاریاں پیچانءَ من ھمے آسرءَ سر بوتگاں کہ
٭دیٹا کلکٹ کنگءِ چیر اندریں رھبندے ایشاں بندات کتگ کہ مار بہ مریت ءُ لٹ اوں مہ پرشیت،پرچاکہ نان چہ شوءَ درکیت گڑا کس وتی دستءَ نہ سوچیت۔
٭اے یک ھسابےءَ ریفرنڈمءِ اٹکلے کہ باریں مردمانی تبءُ مئیل چے اَنتءُ کجام نیمگءَ اَنت،لس مھلوک چے لوٹیت،چشیں مچیانی واھوک اِنت یا اناں،چشیں مچیاں بھر زوریت یا اناں۔اگں بھر زوریت گڑا بزاں راج آیانی ھمراہ نہ اِنت ءُ آھشکیں بٹاک جنگءَ انت کہ راج آجوئی لوٹیت۔ چرے کارپداں آیانی اٹکل جنگءَ ارزانی بیت۔
اے یک تھرے ءِSilent researchبوگءَ انت کہ انوں ایشیءِ پد گوانک اشکنگ نہ بنت بلے یک روچےمنی اے نبشتانک شمارا المیءَ گیر کئیت ۔
