ھمگام بلوچی
نیلسن منڈیلا گُشیت:
“پہ آجوئی ءَ المّی نہ اِنت کہ تو زمین ءُ آزماناں بَھا بہ زور۔ بس وتی جند ءَ بھا مہ کن۔”
آجُوئی ھَما دَاد اِنت کہ رَاج ءَ وَت وَاجہ ءُ وَش ھال جُوڑ کَنت۔ راج وتی مَستر ءُ کَستر وَت بیت۔ آ دِگر ءِ چَم دَار نہ بیت۔ آئی ءِ وتی سَرڈگار بِیت، وَتی نام بِیت ءُ وتی پجّار بیت۔ وتی زُبان ءَ گپ جنت، وَان اِیت ءُ وانین اِیت۔ دُگینا ءِ تہ ءَ وتی ھستی یے بِیت ئے۔ وتی لَشکر ءِ سر ءَ پَھر بند اِیت ءُ وتی بیرّک ءِ سَتاہ ءَ کَنت۔ ھرچ کُدرتی مال ءُ مڈی یے آئی ءِ سرڈگار ءَ بیت، آھانی واھُند ءُ مستر وت بیت۔ چہ وتی مال ءُ مڈیاں سیر ءُ آباد بیت چہ دگرے ءَ پنڈّگ نہ لوٹ ایت ھما وڑ کہ دل اِش لوٹ اِیت ھما وڑ کت کَنت۔ بلے بژن چہ گلامی ءَ کہ درستاں چہ زِبَھار کنت۔ مرچی بلوچ ھمے گلامی ءِ آماچ اِنت۔
بلوچ دگنیا ءِ تہ ءَ اولی ءُ ایوکیں راج نہ انت کہ گلام اِنت۔ کُرد، پلستینی، کشمیری، تامل، سندھی ءُ دگہ بازیں راج ھست کہ گلام اَنت۔ پیسر ءَ ھم ھزارانی ھساب ءَ راج گلام جُوڑ بوتگ اَنت۔ انچوشکہ امریکہ، جاپان، پرانس، جرمنی، الجزیرا، چائینہ، ارب ملک ءُ دگہ بازیں۔ مرچی ما اگاں اے راجاں گِندآں کہ وش ھال اَنت۔ دیمروئی کتگ اِت ءُ سیر ءُ آباد اَنت۔ اے درا آجو اَنت چوش نہ اِنت کہ گلامی تہ ءَ وش ھال اَنت۔
مرچی من وتی بلوچ راج ءَ گنداں بژنیگ باں گنجانی واجہ اِنت بَلے پہ لُنکئے نان ءَ چم دار اِنت۔ ایشی ءِ ذمہ وار کے اِنت، دژمن اِنت یا تئی جند اِنت؟ الم تئی جند اِنت۔
پہ زلم ءُ زوراکی ءَ کس کس ءَ را داشت نہ کنت ءُ نہ کہ کسے ءَ کسے ءَ را داشت کُت کُتگ۔ اگاں ما بِہ چار ایں۔ الجزیرا پرانس ءِ گلام بوتگ۔ آ وھد ءَ کہ الجزیرا گلامے بوتگ پرانس ءِ لشکر ءِ مُچّی 25 لک بوتگ کہ پاکستان ءِ لشکر ءَ چہ سے درسد مستر بوتگ۔ کیوبا لاتین امریکہ (Latin America) ءِ گلام بوتگ۔ اے وھد ءَ کہ کیوبا ءَ آجوئی گپتگ امریکہ مزن زوراور (Super Power) مُلکے بوتگ۔ اَرجنٹائینا سپین ءِ گلام بوتگ سپین زورآوریں ملکاں چہ یک ملکے۔ چائینہ جاپان ءِ گُلام بوتگ جاپان دگنیا ءِ تہ ءَ ھما ملک اِنت کہ ھرچ ملک ءَ دومی مزنیں جنگ ءَ چہ پیسر آئی ءِ کر ءَ تُرسْ اِتگ۔ پرانس ءُ امریکہ برتانیہ ءِ گلام بوتگ اَنت۔ برتانیہ ھما ملک اِنت کہ آئی ءَ ھرکس وتی دست ءِ چیر ءَ کتگ۔ اے درائیں ملکاں وتی آجوئی گپتگ گڑا توئے بلوچ چہ پاکستان ءَ وتی آجوئی ءَ گپت نہ کن ئے کہ چہ ھرکس ءَ پنڈگ لوٹ ایت، امریکہ ءُ ارب ملکانی چم دار اِنت! الّم تو وتی آجوئی ءَ گپت کن ئے انچوشکہ تو وتی پکر ءَ بدل بہ کن ئے۔
اے گپ ھم راست اِنت کہ گلامیں راج انچوش ذھنی گلام جوڈ بنت کہ آھاں تو ھرچ نیمگ ءَ بَرّ اِت گوں کئیت گوں۔ مرچی بلوچ ءِ درور ھمیش اِنت۔
او منی راج ءِ ورناہ!
بس ھشکیں نِندگ ءُ مزن گپی ءَ تو وت ءَ چہ گلامی ءِ سانکلاں سِست نہ کن ئے۔ ھرچ مراد ءُ وابے کہ تو دل ءَ داشتگ یا دیستگ پہ شلوار ءِ گیر کنگ ءَ ءُ آپٹاپ ءِ رندگ ءَ آسر نہ باں داں تو وش وابی ءَ چہ در میا اِت ءُ گلامی ءِ سانکلاں مہ سِنّد اِت۔
گلامی ءِ سانکلاں الّم تو سِسّت کن ئے وھدیکہ تو وتی پکر ءَ بدل بہ کن ئے۔ وتی تہ ءَ گلامی ءِ اھساس ءُ مارشتاں ودّی بہ کن ئے۔ ترا وتی زبان، دود ءُ ربیدگ، نام، پجّار، سرڈگار ءُ مڈّیانی پکر بہ بیت۔ تو بہ زان ئے کہ تئی مڈی دُزگ بوھگ ءَ اَنت، تئی زبان ڈالچار کنگ بوھگ ءَ اِنت ءُ تئی دود لگتمال بوھگ ءَ اَنت۔ ترا دَرّی زبان (اربی، پارسی، اردو، چائینہ) وانینگ بوھگ ءَ اِنت دانکہ تئی جند ءِ شھدیں بلوچی زبان نیست ءُ نابود بہ بیت۔ انچوشکہ ما گندگ ءَ ایں کہ روچ ءِ مرچی مارا الکاپیں رھبندے پہ بلوچی سیاھگ ءِ نبشتہ ءِ واستہ نیست اِنت۔ چونی ءَ گُش اَنت، اگاں راجے گلام کنگ لوٹ ئے گڑا پیسر ءَ آئی ءِ زبان ءَ پچ بہ گِر۔ پہ زبان ءِ پچ گِرگ ءِ واستہ یکبرے آئی ءِ تب ءَ سرپد بہ بو۔ پدا آئی ءِ گوما ھمدردی ودی بہ کن دانکہ ھمئے وڑی ءَ آئی دود، نام، پجّار، سرڈگار ءُ مڈّیاں پچ بہ گِر۔ انچوشکہ مرچی گوں بلوچ ءَ بوھگ ءَ اِنت۔ پرچہ کہ پہ تپنگ ءِ زور ءَ کس گلام کنگ نہ بیت۔ اگاں نہ مرچی آ دگہ راج آجو نہ اَت اَنت۔ برتانیہ ءَ دگنیا ءِ 65 درسد گلام جوڑ کتگ۔ گیشتر ءَ چہ آئی ءِ دست ءَ وت ءَ پچ گپتگ ءُ آجو کتگ۔ درور پرانس ءُ امریکہ اَنت۔
ترا اگاں وتی زبان، دود، نام، پجار، سرڈگار ءُ مڈیانی پکر بہ بیت گڑا تئی تہ ءَ جذبہ ءُ اھساس ودی بیت۔ جذبہ ءِ آجوئی ءُ اھساس ءِ گلامی تئی تہ ءَ جاہ جَن اَنت۔ ھر ساھت ءُ دمان ترا چوں کرم ئیگ ءَ چنڈ اَنت۔ پدا ترا اے اوپار نہ بیت کہ وتی گلامی ءَ بہ سگّ اِت۔ بژن ءِ گپ ایش اِنت کہ من ءُ تو پہ ایشانی جیڑگءَ وھد نہ کَش اِیں۔ وتی زمیر ءَ را کُشتگ پہ گونڈیں چیزے ءَ رازی بہ اِیں۔ انچوشکہ داکٹر انیپ شریپ ءِ تامر “کریم” ءِ تہ ءَ یک ھبرے مان اِنت۔ “درس بے ھال بنت درس بے ھال بنت بس یک پوڑی ءَ چہ رند۔”
بلوچ راج ءِ وانندہ!
من مدام وتی وانندائیں ورناھاں گند ایں کہ دیمروئی کُتگیں ملکانی باروا گپ جن اَنت ءُ وتی ھالت ءِ سر ءَ بَشّ بَشّ ور اَنت کہ۔ “ما دگنیا ءِ سیرتریں راج اِیں بَلے انگت درستاں چہ وارتر اِیں۔” بَرے بَرے من ءَ چہ وتی وانندائیں ورناھاں کندگ کئیت۔ آھانی اِلم ءُ زانت ھمنچو نِزور اِنت کہ کمو نہ جیڑ اَنت پرچہ آ دگہ ملک وش ھال اَنت۔ امریکہ ءِ مزن زورآوری ءِ گپ ءَ جن انَت بَلے اے نہ جیڑ اَنت کہ امریکہ آجو اِنت۔ اربانی وش ھالی ءُ ایش ءُ نوشانی گپ ءَ جن اَنت بلے پہ ساھتے اِے نہ جیڑاں کہ آ وتی اَبرمّی مڈیانی واھُند وت اَنت۔ کار ءِ کنگ ءِ بود ءَ را کُشتگ ءُ نِند اَنت وتی ھالت ءِ سر ءَ بَشّ بَش ور اَنت۔
او منی بلوچ راج!
اگاں تو لوٹ ئے آجو بہ بے۔ وتی سرڈگار ءُ مڈّیانی واھُند وت بہ بے۔ سیر ءُ آباد بہ بے۔ دیمروئی بہ کن ئے۔ گڑا وتی جذبہ ءِ آجوئی ءَ ءُ اھساس ءِ گلامی ءَ زندگ بہ دار ئے۔ بہ جیڑ پہ زبان ءَ، بہ جیڑ پہ سرڈگار ءَ ءُ بہ جیڑ پہ مڈّیاں۔ دانکہ ترا پہ جھد ءِ آجوئی ءَ جوھر مان بہ بیت تئی بود ھست بہ بیت ءُ گلامی ءِ سانکلاں ھچ وڈ اوپار کُت مہ کن ئے۔ تئی سرزمیں چہ مڈّی ءَ انچوش پُر اِنت کہ زمین چَنڈے بہ بیت یک مڈی یے پدّر بیت۔ درور۔ گوادر ءِ تیاب ءِ تہ ءِ گیس اِنت 2013 ءِ زمین جنمب ءَ چہ دَراتک۔
اگاں تو لوٹ ئے دائم ءَ زندگ بہ بے۔ تو دگنیا ءِ تہ ءَ ھَست بِہ بے۔ تئی زبان، دود، پجار ءُ نام گِرگّ بِہ بَنت گؑڑا وت ءَ چہ گلامی ءَ آجو کن۔ اگاں نشتگ ئے دگہ ملکانی درور ءَ دئے ءُ بش بش ورئے گڑا زوت گار بے۔ تئی نام ھم ھما راجانی لُڑّ ءَ ھوار بیت کہ دگنیا ءِ تہ ءَ زندگ اَنت بلے ھست نہ مان اَنت۔ جھد پہ بلوچ۔ جھد پہ بلوچستان ءَ۔
بلوچستان آجو بات
پاکستان مردگ بات۔
