چاکر ءُ گوہرام ءِ سی سالی جنگ ( پولکار : ابدالله میر)

دومی بَھر

ھمگام بلوچی

پولکار ءُ لچہ کار وتی لچھانی تہ ءَ گش انت کہ میر چاکر شش سال ءَ ماں ھرات اوگانستان ءَ جَلّیت سلتان شاہ ھسین گوھرام لاشاری ءِ گپ ءُ کولانی سر ءَ ھر سال مالیات ءُ دھک گر ایت ۔شاہ ھسین وڑ وڑیں مکر ءُ ھنر سازیت پہ چاکر ءِ کُشگ ءُ گار کنگ ءَ ھر وڑیں چکاس گر ایت بلے میرچاکر رند ھچ وڑا چہ اے چکاساں پشت نہ کنزیت انچوش گش انت کہ بے زین ءَ نریان ءِ تاچگ ۔ گوں شِیر ءَ جنگ پرمائیگ ۔مستیں پِیل ءَ گوں دُچار گیجگ۔بے رھت ءَ لیڑہ ءِ تاجگ وڑ وڑیں چکاساں چہ میر چاکر رند سوبین بیت

اے بابت ءَ شائر وتی ھیالاں چش درشان کنت ءُ گش ایت ۔ ۔

آ روچ ءَ نہ گوشت چندے روچ

شاہ ءَ ماں دل ءَ کرتگ سوچ

کاسد آتکگ اَت آ شاھی

گشت ئِے چاکر ءَ پہ ڈاھی

چاکر شاہ ترا. لوٹاھی

پّتو مالیاتے بکشاھی

شاہ ءَ زھرکنیں شیرے ھست

گوں تو گوھریں تیگے ھست

دست ءَ گر وتی شمشیر ءَ

آزمودگ بہ کن نرشیر ءَ

سھب ءِ روشنیں روچ بیتگ

سردار پہ نماز ءَ رپتگ

شیرپان وتی شیر بوتکگ

شیر ءَ شراب وارینتگ

دیم پہ چاکر ءَ راہ داتگ

مھلوک یک دمان جم بیتگ

چنگو چاکر چانگو شیر

دپ کپتاں مزار ءُ نرشیر

گُرّ ءُ ھیب ءُ امبازی

انچوش شانتگ شیرازی

شیر چو کونڈواں جھلادبی

سردار ایمن ئیگ ءَ رپتگ

دنیا ءَ تمامیں دیستگ

ترک ءِ لشکر ءَ بد برتگ

سردار منگھاں اوشتاتگ

دست ئِے ماں بروتاں مشتگ

سُلتان شاہ ھسین بازیں مکر ءُ ھنر ءَ چہ پد درستیں چکاس ءُ لوٹ میر چاکر رند ءَ سرجم کت انت گڑا ھمے بیت کہ شاہ ءِ مات ءَ چہ چاکر ءِ مزن مردی ءُ بھادری ءُ دلیری ءِ سر ءَ پَھر ءُ ناز کنت ءُ گوں وتی چُک (شاہ) ءَ گش ایت کہ اگاں تو چاکر ءِ لوٹ ءَ سرجم ءُ پورہ نہ کن ئے گڑا من وتی پہ میر چاکر ءَ وتی سی سالی ستر (موجری) ءَ ھلاس کناں ءُ لشکر ءَ زوراں وت لشکر ءِ سروک باں پہ میر چاکر ءِ ھمراھی ءَ رواں شاہ ءَ شگان جنت آئی ءِ مھکیں مات ۔اے بابت شائر وتی ھیالاں چش درشان کنت ءُ گش ایت۔

اوھے پَر تئی تُرکی ءَ

زار اِنت پہ تئی چُکّی ءَ

من ءَ بیزار پہ تئی ماتی ءَ

مرد ءَ گون بہ کپ سکّی ءَ

اے مرد چاکر ء شیھَکّیں

رِند ءِ تیگ زنیں سالونکیں

راج ءِ پَلّو ءِ داروکیں

ھَپت پُشت ءَ بلوچ ءِ ھانیں

گُمراہ ءُ دلیر ءُ جوانیں

اپساں بے لگام ءَ تاچ ایت

تازی کُرّگاں بے زین ءَ

مازاتیں جَڑاں بے گوْمس ءَ

مَستیں لیڑواں بے رَھت ءَ

پارسائیں جَناں بے لَبّ ءَ

پیلاں ھم گشیت شھمات ءَ

شِیراں گوں وتی زَرّ مُشت ءَ

سلتان شاہ ھسین یک روچے چاکر ءُ آئی بھادریں کماندان میر بیبگر ءُ براھیم ءَ دربار ءَ لوٹاھینت ءُ آھاناں شاھی پوشاک اش گور ءَ دنت ءُ کندھار ءِ ھاکم ( زُنّون ) ءِ نام ءَ کاگدے نبشتہ کنت ءُ راہ دنت ۔کاگد ءِ تہ سلام ءُ دروت ءَ پد نبشتہ کنت کہ چہ تُرکانی مزنیں لشکرے بُزور ءُ میر چاکر رند ءِ ھمراھداری ءَ بہ کن برو بلوچستان ءَ لاشاریاں چکچین بہ کن انچوش بہ کن اش کہ یکے ھم پشت مہ کپ ایت ۔کندھار ءِ ھاکم ءَ شاہ ءِ نمدی ءُ کاگد رسگ ءَ پد پہ اشتاپی لشکرے ساجو کنت ءُ میر چاکر ءِ ھمراھداری کنت چہ لشکر ءِ در آھگ ءَ پد شاہ سلتان پہ چُست اشتاپی گواھرام ءِ دل واپینگ ءَ وتی مردمے ءَرا کاگدے دنت ءُ آئی ءِ ھمراھی چنگانی سئیت ءَ ھم راہ دنت کہ برو ات بلوچستان ءَ ھمے ھال ءَ شنگ کن ات کہ میر چاکر شاہ سلتان ءَ بستگ ءُ چہ بندیگ جاہ ءَ شش ماہ گوستگ کہ چاکر رند گرمپگ ءِ نادراھی ءَ کُشتگ نوں آ ھچ بر واتر نہ بیت ۔شاہ اے مکر ءُ ھنر ءَ کنت بلے لشکر ءِ روگ ءَ چہ ساری وتی کاسد ءَ روان دنت پہ گوھرام ءَ ۔۔

شائر وتی لچھے تہ ءَ چش گش ایت۔ ۔

ھت ءُ کاگدے راہ داتگ

چنگانی سئیت در کپتگ

سہ روچ پیسر ءَ پیش کپتگ

گوں گوھرام ءَ ھمے ھال داتگ

چاکر بادشاہ ءَ بستگ

شش ماہ ھساب ءَ گوستگ

چاکر گرمپگ ءَ کُشتگ

ایمن تو یلیں نام ءَ ور

دُمبّار نئیت میر چاکر

واتر آ نہ کنت انت ھچبر

تئی راجانی نہ پروشیت سنگر

سلتان شاہ ھسین ءِ کاسد گوھرام لاشاری ءَ سر بیت کہ تو پہ ایمنی بہ نند چاکر نادراھی ءَ گرمپک ءَ گشتگ آ نوں پد ءَ ڈاڈر ءُ باگیں سیبی ءَ دوبر نہ اِت گوھرام ھمے ھبر ءَ شنگ کنت ءُ شادے بیت کہ بلے یک شپے میرگواھرم لاشاری ءِ مات شپ ءَ واب گندیت کہ ھور ءُ گوات ءِ توپان انت نَلی ءِ کور ءَ ھار کرتگ انچیں بلاھیں ھارے آورتگ ئِے کہ ھار ماں سَر شَماں لِک بوت ءُ مئے ھلک ءَ پَتارئِے دات سرجمیں ھلک ءُ دمگ ویران بوت اَنت گڑا سھب ءَ وتی دیستگیں واب ئِے کسھاں گوں وتی بچ میر گوھرام ءَ گوں کنت ءُ گش ایت کہ من زان آں اے واب ءِ پشدر میر چاکر رند انت الم چاکر گوں لشکر ءَ کیت تو وتی تیاری ءَ بہ کن ۔لچہ کار وتی لچھے تہ ءَ چش واب ئِے کسہ ءَ درشان کنت۔

مات ءُ ماں شپ ءَ واب دیتگ

سُھب ءَ۔گشت ئِے گوں گوھرام ءَ

سوگند من ءَ ھدا ءِ نام ءَ

دوشیگیں شپ ءِ گوربام ءَ

انچوش وپتگوں آرام ءَ

وابے دیستگوں پہ مانا

ھکم ءُ کادر ءِ دَیّان ءَ

پیش کہ نلی ءِ کور ءَ

وھدے ھم رگام کت ھور ءَ

آپ ءِ رمب اِتگ جھلادی

گوستگ مئے زمانگ یادی

دوشی کہ گروکاں آورتگ

ھور ءُ جمبراں بند وارتگ

دوشی کہ رگاماں گورتگ

آپ اِش بے ھساب ءَ ریتکگ

آ کور تانسر ءَ پُر بیتگ

آپ ماں سر شماں بُرز بیتگ

کوہ ءُ کنڈگاں سَر گوستگ

تئی ھلک ءَ را پتارئِے داتگ

اے واب ءَمنی گمان ایشیں

موجیں ھاتروں اندیشیں

زاناں چاکر ءِ شیھکیں

کول ءُ واھدھاں گُڈّیگیں

کیت انت پہ مِڑ ءُ داوائی

ھلک ءَ ایر کپ ایت بانگواھی