نبشتہ کار: ھدا وشک ءُ مھمد پاروک بلوچ
چارمی بھر
ھمگام بلوچی
گوں راج ءِ اُلس ءَ ھمگرنچی: ماں چیرجنگی جُنز ءَ گوں راج ءِ لس مھلوک ءَ رھوت دارگ ءُ ھمگرنچ بیگ سَک زلوری انت انچو گْوش ئے اُلس راجی چیرجنگیں جُنز ءِ زِرد (دل) انت۔ اگاں دژمن راج ءِ سر ءَ زُلم ءُ زوراکی کنت گُڑا باید انت کہ راجی چیرجنگول گوں آئی ءَ رھوت بہ دار اَنت گُڑا دلجمی ءَ بزان کہ راجی جُھد سد در سد سوبین بیت چی ءَ کہ چہ ھمے زیردستیں مھلوک ءَ ترا ھبکھیں اُرُشانی آسر کنگ ءَ پناہ رس ایت، سپر ءِ ساھت ءَ ترا نگن ءُ ورگے دے انت، بزاں چہ دژمن ءَ چیرڈاھی، زری کُمک، سامان ءُ ورناھیں باسکانی ماں جنگ ءَ ھوار بیگ دْراہ چہ لس مھلوک ءَ کیت۔ ھمے لس مھلوک چیرجنگولانی ھک ءَ زھرشانی ءِ روانکاں کش انت ءُ راج ءِ تہ ءَ راجی جُھد ءِ سرپدی ءُ آگاھی یے ودی کن انت۔ وھدیکہ راج ءِ لس مھلوک ءَ راجی آشوب ءُ راجی مارشتانی سما بیت ءُ راجی جُنز ءِ آگاھی یے ودی بوت گُڑا بزاں تئی جُھد شریں نیمگے ءَ روگ اِنت ءُ تو سوبین بہ ئے۔ اگاں راج چہ راجی جنگولاں دلپروش بیتگ گُڑا اے جُھد یک پَکّیں بے سوبی یے۔ گُڑا باید انت کہ چیرجنگول وتی راج ءَ رھوت بہ دار ایت ءُ ھیالداری کنت کہ ھمے رھوت دژمن ءِ گوشاں ھلوت مہ بنت انچوشکہ چریشی ءَ راج ءِ لس مھلوک گِرانیں اندوھے ءِ آماچ بیت بزاں راجی چیرجنگول لس مھلوک ءَ ھچبر وتی ھلاپ ءَ مہ کنت۔چیرجنگولیں گل ءُ آئی ءِ باسکانی اولی زمہ واری ھمیش بہ بیت کہ چہ زورانسر ءِ بندیگاھاں لٹ شاپ وارتگیں مردماں وتی چیرجنگولی گل ءَ ھوار کنائین اَنت۔ دومی ھما راج ءِ ورنا کہ راجی چیرجنگولانی کُمک ءَ کنگ ءَ انت آیانی رازاں ھچ جاہ پاشک مہ کن انت بزاں وتی جِند ءِ باسکاں ھم سما مہ بیت چی ءَ کہ گوں چُشیں گنوکیاں راج ءِ مھلوک چہ راجی جنگولاں بیزار بنت ءُ وتی راجی جُھد ءَ دلپروش بنت۔
تْراکانی تُرس ءُ بیم ءِ کارمرزی: چیرجنگ ءَ دژمن ءِ شھرانی تہ ءَ دژمن ءِ بلاھیں ترامگیجانی سر ءَ بمب تْراک کارمرز اَلم بہ بنت کہ تئی جُھد ءُ تئی جیڑہ میان اُستمانی رسانکدر ءُ جھان ءِ مُلکانی دیم ءَ بئیت چریشی ءَ دژمن ءِ راج وتی راجداری ءَ تْراکانی سوب ءَ ھم جُست کنت۔
البت بلاھیں پائدگ ایش انت کہ چَہ چُشیں تْراکاں دژمن ءِ دژمناں تئی بامردی ءِ سما بیت ءُ گُڑا توری زری ءُ توری جنگی سامان ءُ ازباب یا دگہ کُمکے تئی چیرجنگیں جُھد ءَ بیت تئی ھر وڑیں کُمک ءَ کیت ءُ ساڑی بیت انچوشکہ ماں چیرجنگ ءَ ڈن مُلکی کُمک سَک زلوری انت۔ انچوشکہ میان اُستمانی ڈِپلومیسی ءِ دستورے کہ دژمن ءِ دژمن منی دوست اِنت(اِنیمی آپ دی اِنیمی از مائی پرینڈ) ءُ بلاھیں پائدگ ایش انت ئِے کہ چیرجنگ ءِ باسک ءُ راج ءِ تہ ءَ جزبگے ودی بیت۔ تئی چَپیں گَل بے وانک بنت۔ چُشیں بمب ترکائی ءَ ماں دژمنیں مُلک ءَ میان اُستمانی ڈنی واپار(پوران انویسٹمنٹ) نئیت، دژمنیں مُلک ءَ بے پوریاگِری بنت ءُ جاور ئِے نگیگ بنت۔
روان انت…..
چیر جنگ (دی گوریلہ وار)
