ہمگام بلوچی نبشتانک
بلوچ سلاہ بندیں گَلانی اتحاد بلوچ راجی آجوئی سنگر (براس)ءِ اتحادی گَل بی این اےءِ سربراہ گلزار امامءِ پاکستانءِ دستءَ کپگا پد چہ آئیءِ نزیک تریں سنگتاں یکے میرجانءِ گشگ اِنت کہ آ 23 مئی 2022ءَ چہ ایرانءَ درکپیت ترکیءَ روت۔ داں سے روچءَ گْونائیءَ ھال اھوالءِ تہا بیت۔ 27 مئیءَ رابطہ ہلاس بیت ءُ ہمے روچءَ واجہ کارءَ گرنت ءُ برنت پاکستانءَ۔ پدا گلزار امامءِ گَل بی این اے سرپد بیت کہ چشیں ویلے بوتگ ءُ آئیءِ اتحادی براس ہم۔۔۔ ہمے وہدءَ میرجان ہم گوں براسءِ زمہ واراں رابطہ کنت کہ گلزار چہ ترکیءَ گِرگ ءُ برگ بوتگ، بلئے گلزار اے مردمانی کرّا زمہ داریں سنگتاں راہ داتگ۔
میرجان گشیت کہ اے جیڑہءِ سرا شما براسءِ زمہ وار ایکشن بزور اِت، اگاں ناں، گڑا من درستیں گپّاں دیما کاراں۔ اپریل 2023 ءَ گلزار پاکستانءَ میڈیاءِ دیما زاہر کت کہ ما گپتگ ءُ مئے کرّا اِنت ءُ پدا آئیءِ جند میڈیاءِ دیما آرگ بوت۔
گلزار امامءِ دیما آرگا پیسر بی این اےءَ بیان داتگ ات کہ رزاق پنّام پُلّین ءُ حمید پنّام میرجان گَلءِ مجرم انت، اشاں گلءِ تہا ٹولی بازی، مالی کرپشن کتگ ءُ اے گلءِ اہمیں سروکےءِ گرائینگءَ سرپد انت، جواب دیئگا نہ انت ءُ تتکگ انت۔
پُلّینءَ مارا ھال نداتگ ءُ وتی وڑا گلءِ ریجنل کمانڈر بابر یوسف جاگہےءَ لوٹائینتگ ءُ گوں ہمراہاں شہید کنائینتگ ءُ میرجان گَلءِ سروکےءِ آوارجنئگ ءُ گرائینگءَ سرپد انت ءُ چہ ما جِستگ۔
پدا ھال اتک کہ میرجانءَ گوں براسءِ زمہ واراں ھال کتگ کہ گلزارءِ ترکیءَ ہمے مردمانی کِرّا راہ دئیگ ءُ گرائینگا شمئے زمہ واریں سروک ہوار انت، اگاں شما ایکشن نہ زرت، گڑا من اے جیڑہءَ دیما کاراں۔ اے گپءَ ہپتگے نہ گوزیت میرجانءِ جند چست کنئگ بیت ءُ بی ایل ایفءِ اوتاکءَ دارگ بیت۔
گلزار میڈیاءِ دیما آرگ بیت، بی این اے بیان دنت کہ ما گلزارءِ گرائینگءِ جیڑہ براسءِ دیما ایر کتگ ءُ سرجمءَ واک داتگ ءُ براسءَ بی ایل ایف ءُ بی ایل اے جیہندءِ سنگتانی ہواریں یک 5 کسّی کمیٹی یے ٹہینتگ، بلئے اپسوز کہ کمیٹیءِ تہا اشاں گلزار ءُ میرجانءِ بابتا ہچ گپ نہ کتگ، بلکیں بی این اےءِ تتکگیں باسکاں سرجمیں واک داتَگ کہ آ گوں گلءِ سلاہاں کجام ہم سلاہ بندیں گَلےءَ شت کننت، پدا لہتے باسک بی ایل اے جیہندءَ وت زرتگ، اتحادیءِ ہسابءَ گوں ما ہچ پیمیں شؤر ءُ سَلاہ کنگ نہ بوتگ ءُ مارا کِمار اِش نہ کتگ۔ براسءَ مئے کَشّتگیں باسک انور پنّام چاکر پرماتگ کہ مئے تہا گیش پرشت ءُ پروش بیاریت ءُ آئیءِ پُشت بوتگ۔
پدا ہمے توکاں گلزار امامءِ تواربندے شنگ ات کہ منا چیئرمین خلیل ءُ ڈاکٹر خدابخشءَ گرائینتگ۔
بی این اےءَ ہم انچیں بیانے دات ءُ چہ براسءَ وتی جتائیءِ جار جت ءُ گشت کہ گلزارامامءِ گرائینگ ءُ گَلءِ پرشت ءُ پروش ءُ ہلاس کنگءِ پندلءِ سرپد بؤگا پد ما چہ براسءَ وتی جتائیءِ جارءَ جنیں ءُ اے گپّءَ پدّر کنیں کہ بی این ایمءِ گوستگیں چیئرمین خلیل پنّام موسٰی ءُ وائس چیئرمین ڈاکٹر خدابخش کے بی پنّام براہیمءَ پندلے سازتگ ءُ گلزار امام ترکیءَ دیم داتگ ءُ گرائینتگ۔
اشیءَ ابید حمید پنّام میرجان کہ مدام گلزارءِ گوما بوتگ، ہمے وہدءَ کہ گلزار سپر ءَ شتگ، گڑا آئیءَ گوں میرجانءَ گُشتگ کہ من اے سپرءَ خلیل ءُ خدابخشءِ گارنٹی ءُ شورٹیءِ ہسابءَ روگاآں کہ اے مئے اتحادءِ زمہ وار تریں سنگت انت، منا دیمءِ مردمانی گوما ہمیشاں رابطہ کنائینتگ۔ گلزارءِ گِرگا پد میرجان پُلّینءِ لوگءَ لوٹائینگ بوتگ ءُ پدا براسءِ سنگتاں آوار جتگ۔
خلیلءَ اے بیانءِ تردید کت کہ بی این اے چُکّی گپ جنئگا انت، اے ایجنسیانی پروپگینڈہ انت، گلزار امام دژمنءِ چالاکی ءُ وتی نادانی ءُ فکری ناپُہتویءِ سوَبءَ گِرگ بوتگ۔ منی ءُ گلزارءِ گَلی ہسابءَ ھچبر رابطہ ءُ ہمکاری نبوتگ، سرفراز بنگلزئی پنّام مرید گلزارءِ نائب بوتگ، آ سہی نہ اِنت کہ چوں گِرگ بوتگ؟ من کجا سرپد باں ءُ گلزارءَ اگاں دگہ آزادی پسندیں سروک شور بہ کتین انت آ گِرگ نبوتگ ات!! بی ایل ایفءِ جارکشّ میجر گہرامءَ ہم بیان دات کہ دلاور واحد بخشءِ کوشءَ پد سرفراز بنگلزئی بی ایل ایفءِ ہلاپءَ بیان دئیگا وتی ہمراہ گلزار امامءِ وڑا دژمنءِ دستءَ لیبءَ اِنِت، بی ایل ایف ءُ براسءِ ہلاپءَ کارمرز بؤگا اِنت۔ وتی ہمے بچکی حرکتانی سوَبءَ دوسالءِ تہا وتی آسرءَ سر بوتگ۔
بی این اےءَ بی ایل ایفءِ بیان تردید کت ءُ گشت کہ اخترندیم پنّام میجر گہرام وتی سیہ کاری ءُ پندلانی چیر دئیگءِ واستہ گوں وتی گَندگیں زبانءَ گلزار ءُ سرفراز بنگلزئیءِ ہلاپءَ راجءِ دیما دروگ بندگا انت۔
اختر ندیم بنداتءَ گوں بی این ایمءِ انوگیں چیئرمین ڈاکٹر نسیمءَ 2005ءَ ڈاکٹرنسیمءِ فلیٹءَ چِہ کراچیءَ ڈاکٹر اللہ نزرءِ گوما آوار جنئگ بیت۔ ڈاکٹرنسیم ءُ اخترندیم نزیکیں سیاد اَنت، یلہ بیئگا پد، ڈاکٹراللہ نزرءَ اے گپ ءَ باور کنائین انت کہ مارا بی ایل ایفءِ کمانڈر ماسٹر ستارءَ گرائینتگ، داں کہ مکُرانءِ مستریں کماندار ماسٹر ستار ءُ ڈاکٹر اللہ نزرءِ نیاما دوری پیداک بہ بیت۔۔۔ ہمے وڑا اے پندلءَ اے سوبین بنت۔۔۔
واحد کمبرءِ آوارجنئگا پد آئیءِ برات ڈاکٹر خالد چہ مشکےءِ کیمپءَ در کیت مکُرانءَ سربیت، شہید کنگ بیت ءُ بی ایل ایفءِ سربراہی سرجمءَ ڈاکٹر اللہ نزر ءُ اخترندیمءِ دستءَ کیت۔
ہما روچءَ بگر داں انوں، بی ایل ایف ءُ بی این ایم ہمیشانی دستءَ انت۔ منشیاتءِ لُٹّ ءُ پُل ءُ اے دگہ بازیں ھرابیں کاراں اخترندیم ہوار انت۔ خلیل ساچان، نوکاپ ءُ فضل حیدر گوں شش سنگتءَ، ایرانءَ مراد، اوگانستانءَ سکندر ءُ دگہ بازیں سنگتانی شہیدیءَ ہوار انت۔ اے بوت انت اشانی بیانانی کسان کسانیں ٹُکر، چریشاں ابید دگہ بہتام بازی اشانی نیامءَ باز بوتگ۔
پدا ایف بی ایمءِ باسک ممتاز شمبے زئیءَ سوشل رسانکدرءَ اے گپ جت کہ گلزار منی ناکوزتک انت ءُ منی ہمسرو انت، مئے زاتی سیادیءَ ابید من آئیءِ لیکہی منوکے بوتگاں، ہمے سوَبءَ مئے رابطہ ءُ رازداری بوتگ ءُ ہمائیءَ منی گوں میرجانءَ رابطہ کنائینتگ۔۔۔
گلزارءِ سپرءَ پد کہ منی رابطہ کٹ بوتگ، گڑا من میرجان جست کتگ، یکبرے منا دلبڈی داتگ ے کہ گلزار سنگتانی کرا انچیں جاگہےءَ اِنت کہ رابطہ بوت نہ کنت، بلئے ھیر اِنت، وش ءُ سلامت اِنت، بلئے من یکیم نہ بوتگاں ءُ زور داتگ، گڑا منا میرجانءَ گُشتگ کہ ترکیءَ گِرگ بوتگ، گڑا ما جہد کتگ کہ گلزارءَ چہ ترکیءِ زندانءَ در بکنیں۔ ما وکیلے گپتگ، وکیلءَ گُشتگ کہ ما کاگدی کاروائی کنیں، مارا سپری کاگد درکار اَنت، گڑا من گوں میرجانءَ رابطہ کتگ، میرجانءَ یکبرے گُشتگ دیان ے، رندا گشتگ ے کہ بشیرزیب ءُ سنگت مکن کنگا انت کہ ما وتی وڑا جہد کنیں، کاگداں دگرانی سرا رہ مدئے، گڑا میرجانءَ مارا سپری کاگد نہ داتگ انت۔
پدا میرجانءِ جند چست کنئگ بوتگ ءُ منی کِرّا میرجانءِ کُمکّءَ بازیں سبوت ہست من دیما کاران اِش کہ گلزار خلیل ءُ خدابخشءَ گرائینتگ۔ اے گپ وھد پہ وھد ممتاز شمبے زئیءَ ماں سوشل رسانکدرءَ دیما آورتگ انت۔
نیامءَ تہ ءُ توکی انچیں ھالے شنگ ات کہ میرجان اشاں جتگ، گڑا میرجانءِ ہمزامات ءُ آئیءِ لوگبانک ءُ مئے بانکیں گُہار گُلنساءَ سوشل رسانکدرءَ کوکار ءُ سلوات کت کہ شما میر جان داشتگ اشیءَ یلہ بکن ات ءُ دیما بیار اِت ے۔ اشاں وتی سوشل میڈیائی کُلوہءِ تہا اَرز ءُ پریات کت گوں بشیر زیب ءُ ڈاکٹراللہ نزر ءَ۔۔۔
چیزے وہدءَ پد دوئیں مرد ءُ جن ھاموش بنت۔ جست ءُ پدءَ رند ما سرپد بوتیں کہ گوں اشاں میر جان اھوال کنائینگ بوتگ کہ زندگ اِنت، بی ایل ایفءِ اوتاکءَ اِنت، جست ءُ پدءَ رند یل دئیگ بیت، شما سبر کن اِت، رندا میر جان یلہ دئیگ بوت، پدا بی ایل اے جیہند گروپءَ ہوار بوت۔ نوں سوال ایش اِنت کہ میرجانءِ یلہ دئیگا پد بی بی گلنسا ءُ آئی ءِ لوگواجہ ھاموش بوتنت، آیانی مسئلہ بلوچ جُنزءِ جیڑہ نہ اِنت، آیانی مردم زندگ ءُ سلامتءَ یل دئیگ بوت۔
ممتاز شمبے زئیءِ ناکوزتک گلزار امام انگت دژمنءِ کرّا انت ءُ میرجان یلہ دئیگ بوت، پدا ممتازءَ ہچ وڑیں سبوتے چہ میرجانءِ نیمگا دیما نیاورت ءُ ناں کہ میرجانءَ چہ بی ایل ایفءِ زندانءَ آجوئیءَ پد گلزارءِ گِرگ ءُ گرائینگءِ بابتا چشیں گپے دیما آؤرت ءُ ناں کہ ہما گپ میرجانءَ چست کنگا پیسر وتی سنگتانی کرّا جتگ اتنت۔
گلزارءِ بابتا مردم شش ءُ پنچءِ تہا انت کہ سرنڈر بوتگ؟ وت شتگ یا گرائینگ بوتگ؟
اے بابتا تچکیں گپءَ براس گیشّینت کنت کہ آ اے کیسءِ بارہا شریءَ سرپد اِنت ءُ انگت ھاموش انت۔
میرجان کہ اے ویلءِ چم دیستیں شاہد انت، بی ایل ایفءَ اینچو ماہءَ وتی کرّا داشتگ ءُ پَٹ ءُ لوٹءَ پد یل داتگ، مرچی آ بی ایل اے جیہندءِ باسک اِنت، ناں بی ایل ایفءَ اے بابتا وتی مؤقف دیما آورتگ ناں کہ بی ایل اےءَ۔۔۔ البت بی ایل ایف، بی این اےءِ جوابی بیانےءِ تہا گُشیت کہ سرفراز وتی سنگت گلزارءِ وڑا دژمنءِ دستءَ لیبءَ اِنت، گلزار کہ دژمنءِ دستءَ لیبءَ اِنت، گڑا شما اے گپءَ ہم بگش ات کہ وت شتگ لیب کنگا؟ یا پسّارینگ ءُ گرائینگ بوتگ؟ اے کارپد چتور بوتگ ءُ کیا کتگ؟
دوسال کُبل بوت اے ویلءَ کہ گلزار وڑیں سلاہ بندیں گلےءِ زمہ داریں سربراہ، براسءِ اہمیں سروک ءُ شہید اسلمءَ پد فدائی اُرشانی مزنیں کردارے، اے وڑا پہ آسانی دژمنءِ دستءَ بہ کپیت ءُ آئیءِ گرائینوکءِ زانگ ءُ ہچ نہ گُشگ۔
گلزارءِ گِرگا پد آئیءِ گیشتریں سنگتانی شہیدی ءُ پش کپتگیں سنگت ءُ مڈیاں بی ایل اے جیہند زوریت۔
سرفرازءِ ڈالچار کنئگ ءُ پدا سرفرازءِ سرنڈر کنگ۔
اے پیچیدہیں جیڑہ بازیں سوالے ودی کنت۔
اگاں اے وڑیں ہر ویل ءُ واکیہ ہمے وڑا چیر دئیگ بیت، گڑا بالاچ مریءِ شہیدیءَ بگر داں کریمہ ءُ ساجدءِ شہیدیءَ بیا، شھید استاداسلم ءُ ہمراھانی شہیدی، شہید ڈاکٹر خالد ءُ شہید دلجان، شہید ڈاکٹر منّان، شہید کمبر قاضی، شہید حمید داؤد، شہید حکیم بلوچ، شہید علیم ءُ شہید غنی، ساچانءِ دستءَ فضل حیدر ءُ 6 سنگتءِ شہیدی، پدا ساچانءِ جندءِ شہید کنگ، ھانی گل ءُ سمیرءِ شہیدی۔۔۔
چشیں دگہ بازیں ویل انت کہ تَہ ءُ توکی جیڑہانی سوَبءَ چیر دئیگ ءُ گار کنگ بوتگ اَنت۔
ہمے وڑا گلزارءِ گرائینگءِ مزنیں ویل بوتگ ءُ چیر دئیگ بؤگا اِنت۔ میرجانءَ بی ایل ایفءِ اوتاکءَ پٹ ءُ پول کنگ بوتگ، گڑا میرجانءَ اش کنگا ہمے دورانءَ وتی پٹّ ءُ لوٹ کنوکانءَ گُشتگ انت کہ منی کرّا گلزارءَ خلیل موسٰیءِ نام نداتگ، رندا وتی آڈیوءِ تہا نام گپتگ ے، بلئے منی کرّا ہما وہدءَ گُشتگ ے کہ منا ڈاکٹر خدابخش اے مردمانی کرّا راہ دئیگا اِنت، زمہ واریں سنگتے۔ منا گلزارءَ ہمے وڑ گشتگ گڑا شما ڈاکٹرخدابخش ءُ خلیلءَ بیار اِت ما دیم پہ دیما گپ کنیں، اشاں گشتگ آ کماش چون آرگ بنت، چُش اِنت آ اِنت۔۔۔ میرجانءَ گشتگ آ کہ آرگ نہ بنت، گڑا منا یل دی ات۔۔۔ بازیں بے سر ءُ پادیں جست ءُ پُرسءَ پد میرجان یلہ دئیگ بوتگ ءُ میرجان پدا شتگ بی ایل اے جیہندءَ، بلئے بی ایل اے جیہند بی ایل ایفءِ اتحادی انت، پمیشکا میرجانءَ زانہ نیلیت کہ اے گپءَ قومءِ دیما بیاریت۔۔۔
گلزار گرگءَ پیسر ہم اِش کنگا بی ایل ایفءِ سرا وش نبوتگ۔ سنگتے گشیت من جست کتگ کہ باریں ھالاں بدئے سردارءِ کرّ شرتر ات یا اشانی؟ گڑا گشتگ ے کہ آ وَہ چوناہا سردار اَنت، بلئے اشانی رَوِشت ہم مرچاں سرداریءَ ہما دیم انت۔
اش کنگا گلزارءِ مالی کمک پیسرا شہید اسلمءَ کتگ، استادءِ شہیدیءَ پد کمو باز بشیرزیبءَ ہیال داشتگ، بلئے بی ایل ایفءِ گوما گلزارءِ تعلق کمو شر نہ بوتگ اَنت۔ ہمے وہدءَ گلزار وتی فنانس سسٹمےءِ ٹاہینگءِ جہدءَ بیت۔ اشیءَ ہمے فنانسءِ واستہ راہ دینت ترکیءَ گرائین انت۔۔۔
گلزار تَہ ءُ توکی پندلانی آماچ بیت، پمیشکا اشیءِ گرائینگا برزی سطحءَ ہچ ایکشن زورگ نہ بیت ءُ زمہ دار ھاموش بنت ءُ پدا اشیءِ مہکمیں گلءَ پروشنت ءُ ہلاس کننت، اگاں ناں مرچی دگہ بی این اے، بی ایل ایف ءُ بی ایل اےءِ برابریءَ اتکگ ات۔
انچو گُشنت کہ مجید بریگیڈءِ گیشتر فدائی گلزارءِ سنگت بوتگ انت ءُ پیسری بی آراے ءُ رندی بی این اےءَ بوتگ انت۔ باید کہ گلزارءِ گِرگا پد بی این اےءَ را کمک کنگ ءُ مہکم کنگ بوتیں، بی این اےءِ جند اِشاں وت ہلاس کت۔
ادا چِہ ہمے زانگ بیت کہ دراہیں ویل تَہ ءُ توکی مزنیں پندلےءِ بہر اَنت۔ وہدے ہمے جیڑہءِ سرا بنداتءَ من یک ءُ دو پوسٹ دات فیس بکءَ، گڑا بی این ایمءِ جارکش قاضی داد محمد ریہانءَ منا وٹس ایپءَ دو دراجیں تواربند بیہارءِ ہسابءَ دات ءُ پدا منی نمبر بلاک کت۔
پدا فیس بک ءُ ٹویٹرءَ منا ءُ نزیردھکانءَرا فیک آڈیانی سرا شر زاہ ءُ بد کنگ بوت۔ رندا ہمے جیڑہ وت میڈیاءِ دیما اتک ءُ گلزار امام ہم زاہر بوت۔ رندا قاضی ریہانءِ پارٹی بی این ایمءِ گوستگیں چیئرمین خلیلءَ بگر داں بی این اے ءُ بی ایل ایفءَ الکاپیءَ یکے دومیءِ ہلاپءَ بیان بازی کت، بُہتام جَنوکائی بوت۔ منا مپتء ھُدا قاضی ریہانءَ وائس دات کہ چشیں چیز نیست تو وسّرا مئے جہدکاریں سروکے (گلزار امام) ءِ بابتا فیس بکءَ سرکاری پروپگنڈہ کنگائے۔
مرچی دراہیں چیز وت پدّر انت ءُ اے سوال جواب تلب اَنت۔
اے جیڑہءِ ھاسیں کردار ہست ءُ سلامت انت، بائد دیما بیا انت ءُ بلوچ راجءَ سہی ءُ سرپد بہ کننت کہ راستیں گپ ءُ کِسّہ چی انت؟
بلوچ راجی جنز پہ سوبمندی، آجویءِ منزلءَ سر بات۔
نوٹ: ادارہءَ گوں نویسوکے ھیالاتاں ہمپت بئیگ الم نہ انت۔
