ھنوپر (ھمگام نیوز) آجوئی بلوچستان جنز (ایف بی ایم) ءِ نیمگ ءَ 11 گوبشان ایرانی ایردستیں بلوچستان ءِ سر ءَ کبزہ کنگ ءِ درگت ءَ جرمنی ءِ شَھر ھنوپر ءَ زھرشانی کنگ بوتگ۔
رسانکدر ءَ شنگ بوتگیں جار ءِ ھساب ءَ 11 گْوبشان ءِ درگت ءَ برجاہ داشتگیں زھرشانی آجوئی بلوچستان جنز (ایف بی ایم) ءِ میان استمانی تُکشامانی یک بَھرے کہ آ جتائیں جاھاں مراگش ءِ وسیلہ ءَ چہ لس مھلوک ءَ را سرپدی دیگ ءِ جھد ءَ کنت، کہ چہ زھرشانی ءِ سوب ءَ ایردستیں بلوچستان ءِ جاورھال، پاکستان ءُ ایرانی کبزہ ءِ بگیری ءَ بلوچ راجی جنز ءَ را کمک ءُ ھمدردی بہ رس اِیت۔
اِے زھرشانی 11 گوبشان ءِ روچ پیشِیم ءِ ساھت 2 ءَ ھنوپر ءِ شھر ءِ بنجاہ ءَ بندات کنگ بوتگ ءُ تاں بیگہ ءِ ساھت 4 ءَ برجاہ بوتگ۔ زھرشانی ءِ تہ ءَ
آجوئی بلوچستان جنز (ایف بی ایم) ءِ باسکاں ھوار الاھواز ءُ آ دگہ بلوچ راجکاریں باسکاں ھم بھر زرتگ، زھرشانی کنوکاں جُتائیں بینر ءُ پلے کارڈ دست ءَ کرتگ کہ آیانی سر ءَ روکپتی بلوچستان ءِ کبزہ، لس مھلوک ءِ اگبالانی لپاشگ ءُ ایرانی ریاست ءِ نیمگ ءَ آ دگہ زلم ءُ زوراکیانی بگیری ءَ اوگام نبشتہ کنگ بوتگ۔ اِے زھرشانی ءِ تہ ءَ واجد مھمد بکش، دانیال بلوچ، ھداداد بلوچ ءُ پارس بلوچ ءَ وتی ھیال ءُ لیکہ درشان کرتگ اَنت۔
زھرشانی ءِ تہ ءَ تران کنوکاں وتی ھیال درشان کنان ءَ گْوشت کہ بلوچ راج ءَ را ایران ءُ پاکستان ءَ چہ انگریز ءِ کمک ءَ وتی گلام جْوڑ کرتگ، کہ اِے مئے راجی پجّار ءُ راجی ھستانک ءِ واست ءَ یک مزنیں تاوانے، مارا یک یکمشتیں راجے ءِ بستار ءَ وتی راجکاری ءُ آجوئی ءُ وتواکی ءِ واست ءَ یکجاہ بوگ ءُ دویں دژمن (پاکستان ءُ ایران) ءِ بگیری ءَ جنگ برجاہ دارگی اِنت۔ تاںکہ ما وتی راجی وتواکی ءُ ھستانک ءَ پھاز ات کرت بہ کن اَنت۔ گلامی راج ءِ ھستانک ءِ ھلاس کنگ ءِ اولی گام اِنت، وھدے کہ کجام راج وتی گلامی ءَ بہ من اِیت گُڑا مدان مدان ءَ آئی ءِ راجی ھستانک ءُ پجّار وھد ءِ مجانی تہ ءَ گار بوان بیت۔ بلے چُشکہ پاکستان ءُ ایران کجام ھساب ءَ مئے راجی ھستانک ءُ پجّار ءِ سر ءَ اُرش کنگ ءَ اَنت اِے مئے واست ءَ گیشتر بیمناک اِنت۔ اِے دویں ریاست لوٹ اَنت کہ بلوچ راجی وتی پجّار ءَ گار بہ کنت ءُ پاکستانی ءُ ایرانی جْوڑ بہ بیت۔ بلے بلوچ راج ءِ دراجکشیں ءُ نہ دمبروکیں گھگیری ءِ برورد اِنت کہ بلوچ راج ءَ روچے مروچی تاں وتی راجی گلامی نہ من اِتگ۔ بازیں نزوریاں چہ پد ھم بلوچ راج یک انچیں آجوئیں جنزے ءِ واھند اِنت کہ چہ ایشی ءِ مھکم کنگ ءَ نہ ایوک ءَ بلوچ وتی پجّار ءَ رکینت کرت کنت بلکیں وتی راجی آجوئی ءَ ھم پچ گیپت ءُ یک مزن شانیں ءُ شرپمندیں راجے ءِ بستار ءَ دگنیا ءِ آدگہ وشھالیں راجانی لَڑ ءِ تہ ءَ وتی واست ءَ جاہ جوڑ کنت۔
آیاں دیمتر ءَ تران کنان ءَ گْوشت کہ بلوچ راج گولڈ سمت لکیر ءِ دویں نیمگ ءَ جاھمنند اَنت، چہ اِے بے بُنیں لکیر ءَ پیسر ھم بلوچ راج اِے جاہ ءِ واھند بوتگ، اِے وتسریں لکیر ءِ وسیلہ ءَ چہ بلوچ راج ءَ را یکے دومی ءَ گْوں جُتہ کنگ بوتگ، آیانی نپاناں انچش چہ یکے دومی ءَ گسر کرتگ تاںکہ آ چہ یکے دومی ءَ بیگانگ بہ بنت، بلے اے جُنز ءَ ءُ آجوئی ءِ جنگ ءَ اگاں اِے تپاوت ءَ را سرجم ءَ ھلاس نہ کرتگ بلے یک مزنیں ھدے ءَ تاں کم ئِے الّم کرتگ۔ اِے وھد ءَ بلوچ راج اِے وتسریں لکیر ءِ چہ دویں نیمگاں یکیں راجی بیرک ءَ را وتی پجّار پھمگ ءَ اَنت ءُ ایشی ءِ ساھگ ءِ چیر ءَ یکجاہ بوگ ءَ اَنت، ھمے دِرچ تاں اِے بیرک ءَ را آجوئیں بستارے ءِ دیگ ءَ برجاہ دارگی اِنت۔ بلوچ راج ءِ یکمشتی ءُ وت مہ وتی بیسہ ءَ چہ دویں نیمگ ءِ دژمن سک تکانسر بوگ ءَ اَنت ءُ آ یکے دومی ءِ ھمکوپگ جوڑ بوتگ اَنت آیاں یک بے تواریں ءُ چیریں اتھادے جوڑ اِش کرتگ ءُ ایشی ءِ وسیلہ ءَ چہ بلوچ ءَ را بلوچ ءِ دستاں ایردست کنگ ءِ جھد ءَ کنگ ءَ اَنت۔ اِے وھد پہ بلوچ راج ءَ یک چکّاسے کہ آ اِے دمگ ءِ تہ ءَ وتی راجی نپ ءُ پائدگاں چے پیم ءَ پھاز اِیت ءُ وت ءَ را چہ دژمن ءِ ساز ءُ بازاں چے پیم ءَ رکین اِیت ءُ دیم ءَ جنزاں کنت۔
تران کنوکاں دیمتر ءَ وتی ھیال درشان کنان ءَ گْوشت کہ 11 گوبشان ءِ بستار بلوچ راجدپتر ءِ تہ ءَ 27 مولمان ءِ پیم ءَ اِنت۔ اِے ھژدری اِنت کہ ما اِے دویں روچاں یک سیاھیں روچے ءِ بستار ءَ برجاہ بہ دار اَنت ءُ دگنیا ءَ ھوار وتی دژمناں اِے پیام ءَ بہ دے اَنت کہ بلوچ اگاں پاکستان ءِ ایردستیں بلوچستان ءَ جاھمنند بہ بیت یاںکہ ایران ءِ ایردستیں بلوچستان ءَ بہ بیت آ گلام اِنت ءُ وتی راجی ھستانک ءُ پجّار ءِ پھازگ ءِ واست ءَ یک پیم ءَ جھد کنگ ءَ اِنت ءُ بلوچ راج چہ دژمن ءِ ساز ءُ بازاں، مکاریانی سوب ءَ کدی ھم وتی راجی نپ ءُ سیتاں دستکش نہ بیت۔
