ھمگام بلوچی
من ءَ ھُدا بِہ بکش ایت اگاں من رَد گپتگ آں۔ چوناھیگا اے وَ منی ھیل انت کہ من مدام ھما مسیت ءَ پہ آدینگ ءِ نماز ءِوانگ ءَ رو آں کہ اود ءَ مسیت ءِ مُلا بلوچے بِہ بیت یا ھما مسیت بے سیاسی ءُ ھچ نیکراھی ئِے تبک ءِ منوگر مہ بیت۔
من مرشی 25 سارتان 2019 آدینگ ءِ روش ءَ گوں سنگتے ءَ ھوار بیتگ آں ءُ ما سَک نند ءُ نیاد بیتگ ایں۔ روش ءِ اولی بیل گوں نیبگانی ورگ ءُ وشیں تواراں گْوست۔ پد ءَ نیم روچ ءِ ورگ ءِ وھد بیگ انت گُڑا من وتی سنگت ءَ را گْوشت اگاں سبارگے، نارشتے، ورگ ءِ چیزے پاشینگ ءَ ئے تو زیت پاشنائین نّائیں من رو آں کہ من ءَ دیر بیگ انت۔
گُڑا من ءَ درّائینت ئِے ” اڑے ھمید جان تو انگت ءَ چہ ھما شھدربر ءِ وھد ءَ کمیونسٹے ئے، تئی ھما سیکولر کمیونیزم گوں اوشو ءِ وانگ ھلاس بیت اَنت یا انگت ءَ ھما تئی شومی جُنزان انت۔۔۔۔”
من ھبکّہ بیتگ آں کہ اے وَ منی جُست ءِ پَسّو نہ انت۔ آئی ءَ وتی توار دیم ءَ برت ءُ گْوشت ئِے بیا پہ آینگ ءِ نماز ساڑی بِہ بو پد ءَ کَا ایں نگن ور ایں، تو زان ئے کہ ما آدینگ ءِ روش ءَ نیم روش ءِ سبارگ ءَ نماز ءَ رَند ور ایں۔
من بے توار بیت آں ءُ من ھم گْوشت “ھو بیا بر ایں نماز ءَ۔۔۔”
ما دوئیں نزیکیں مسیت ءَ یک ادار ءُ نیم ءَ گوں پیلوئیں وھد ءَ مسیت ءَ پُجّتگ ایں ءُ نماز سُنت ءِ رِد ءَ ونت ءُ سرجم کت ءُ نوں مُلا چہ ھُدا دُوا لوٹگ بنا کت۔
مُلا چہ درستاں پیش گوں ارسیگیں چَماں ءُ گریوگیں تواراں ماں ھندی ءَ دُوا ءِ الھان کنت ” اَے ھُدا گیدی تیوگیں پرنگ ءُ گوراں بیران ءُ تباہ کن۔ اے ھُدا کشمیر ءِ جھاد ءَ سوبین کنائین اے ھُدا کشمیری بے وس ءُ لاچار اَنت تو کشمیریانی واھر ءُ کُمک بِہ کن۔ پلستین ءُ شام ءِ مسلمانانی کمک ءَ گوں گیبی واھر ءَ کنائین۔۔۔۔۔۔”
ھمے ساھت ءُ دمان ءَ بلوچیں نمازی ھم گریوگ ءَ ات انت کہ مُلا راست گْوشگ ءَ انت۔ بلے اناگاہ من ماں دُوا ءِ وھد ءِ ٹَھکیں کندگے جَت پد ءَ ھرکسے منی نیمگ ءَ گوں زھر ءُ تھلیں چَمّاں چارگ ءَ اَت۔ دُوا ھلاس بوت ءُ ملا من ءَ ماں ھندی ءَگْوشت “تو شیتان ودار بِِہ کن تیوگیں نماز پیلو بیت من تئی گون ءَ ھبر ءُ ٹوک کن آں۔ گُڑا من ھم بے بیم ءُ ترس ءَ درّائینت” ھو واجہ من ھَمِد ءَ بَہ آں ءُ من ءَ ھم چہ ترا کارے ھست” من مار ات کہ مُلا دلاپ بوت۔
نماز پیلو بیتگ ءُ بازیں مردم ھم ودار ءَ نشتگ ات کہ مُلا ھمید ءَ را چے گْوش ایت۔
دروت ءُ سلام ءَ رَند چہ من ءَ جُست ئِے کُت” تو کَے ئے ءُ تو ماں دُوا ءِ وھد ءَ چی ءَ کِند ات؟ چہ تئی داب ءَ تو وش رنگیں ءُ سرپدیں کارسرے مان آیگ ءَ ئے بلے ترا اسلامی نیکراھی ءِ ھچ زانت وَ نیست۔۔۔۔۔”
آئی ءِ گپ ھلاس نہ بیگ ءَ ات انت۔ وھدے کہ من ءَ آئی ءِ پسّو دیگ ءِ کَسانیں موھے رست ءُ من گْوشت” تو دروگ بستگ پمیشکا من کند ات”
پد ءَ آ برانز گپت گُڑا من آئی ءَ گْوشت “اگاں ایوک ءَ تو ھبر کن ئے گُڑا من تئی تیوگیں تواراں گْوشدار آں چے ءَ کہ I am a good listener but do What exactly i feel good for me
البت تو منی گپاں گْوشدار کہ تو چہ من ءَ جست ءَ ئے کہ من پرچا کند ات۔ تئی ھشکیں ھبر وھد ءِ نبادی انت۔ آ بے توار بُوت ءُ گْوشت ئِے “ھو ھبر کن کہ تو پرچا کِند ات۔۔؟”
من آئی ءَ را ایمنی ءَ گْوشت ” واجہ درامدیں مُلا تو کشمیر، پلستین ءُ شام ءِ مسلمانانی ھبر کت بلے تو وت نہ زان ئے کہ اود ءَ چے بیگ انت۔ من ترا پہ بلوچ ءَ نہ گْوش آں کہ بلوچ ءِ سر ءَ چے کھر بیگ انت یا پہ بلوچاں دُوایے لوٹ، چی ءَ کہ ترا تپ بیت پہ بلوچ ءَ ءُ تو نادراہ بَہ ئے۔
بلے تو بزان کہ پلستین ءِ چاریں نیمگ ءَ مسلمانانی ملک اَنت انچوشکہ مسر، لبیا، اودرن، سھودی اَرب، ایراک ، شام ءُ لبینان دگہ دگہ پد ءَ اے وَ کْوھنیں جیڑے چی ءَ کہ 90 ءِ دھک ءُ وھد ءَ اے تیوگیں لگوریں مسلماناں وتی دیم سیاہ کت چہ وتی اسلامی زمہ واریاں بَجّ ات انت بزاں آیاں اسرائیل ءِ ھلاپ ءَ وتی پلستینی مسلمانانی کمک چہ یھودی ءِ ترس ءَ وت نہ کت پمیشکا ھُدا چہ آیاں زَھر ءُ برانز گپت ءُ آیانی سر ءَ گیبی ازابے آورت ئِے مرشی اے تیوگیں مسلمان وت ماں وت ءِ جنگ ءَ یک یکی ءَ بیران بیتگ انت۔
اسلامی ملک ایراک ءَ 1988 ءَ کرد مسلمانانی سر ءَ ھلبجاہ ءِ دَمگاں زھرگیں بم جت انت آوھدی شما کُج ءَ ات اِت۔ مرشی چل ءُ دو لگوریں مسلمانانی ملک کہ اَرب کولیشن پورس ئِے گْوش انت گوں سھودی ءِ سروگانی ءَ یمن ءِ مسلمانانی سر ءَ گوں بالی گُراباں بمب ءِ ھور ءَ گْوارینگ ءَ انت اودا شُما چی ءَ نہ گْوش اِت۔ ھمے ارب کولیشن ءِ لاپ ءَ کَی استان ءِ پوج گیشتر ھوار ءُ بِھر زورگ انت ما سرجمی ءَ زان ایں۔ گُڑا 80 ءُ 90 ءِ دَھک ءَ شمئے ھمساھگیں اسلامی استان اوگانستان ھمے ایران ءُ پاکستان ءَ بیران کنائینت ءُ داں مرشیگیں روش پاکستان اوگانستان ءِ مسلماناں کُشائینگ انت ھرکس ایشی ءَ زانت۔ مرشی ترک رستریں پوج کرد مسلمانانی سر ءَ کھر ءُ جبر کنگ انت تو مسیت ءَ پہ اوگانستان ، یمن ءُ کُردانی واستا چی ءَ دُوا نہ کت کہ ھُدا آیاں ھم سوبین کنات۔ ۔۔۔۔۔
دومی من ءَ بِہ گوش کہ پہ کشمیریانی آجوئی اولی ڈبہ ءُ زمہ واری پاکستان ئیگ اِنت کہ گوش ایت۔
1- کشمیر ھمارا شہ رگ ہے
2- کشمیر بنے گا پاکستان
3- پاکستان اسلام کا کلا ہے
4-پاکستان کا مطلب کیا ۔۔۔۔۔
5-گزو ءِ ھند
زانگ نہ بیت چنچو زرمبش انگت ءَ ھست انت پہ کشمیر ءَ اود ءَ 72 سال ءَ پاکستان ءِ چے کت کہ آ کشمیر ءِ سیم سر انت۔ دومی مرشی جموں کشمیر لبریشن پرنٹ مزاپرآباد چی ءَ زھرشانی کنگ انت مارا ھمائی ءِ بارو ءَ کمیں سرپدی بِہ دے۔ 1948 ءِ میان اُستمانی گَل یو این ءِ سوڑگ ءِ رِد ءَ کشمیر جیڑہ ءِ مزنیں جنجال کَے انت مُلا تو ھچ نہ زان ئے۔
ما بلوچ نہ منّ ایں کہ ھندوستان ءِ نیمگی کشمیر ءَ کرپیو ھست اگاں اود ءَ کرپیوے بوتیں گُڑا پاکستانی پوچ پہ وتی کشمیری براتانی واھر ءُ کمک ءَ کشمیر ءَ شُت کشمیر آجو ئِے کتگ اَت چی ءَ کہ پاکستان ءِ پوج گیدی ءِ درستاں چہ دلیریں پوجے۔
مرشی 82 می روش انت کشمیری اگاں کرپیو ءِ لاپ ءَ انت گُڑا پاکستانی پوج ءِ چے زمہ واری انت گُڑا شما ھندوستان ءِ سر ءَ چی ءَ اُرُش نہ کن ات۔ ھُدا گْوش ایت کہ تو دستے بِہ جن گُڑا من تئی کُمّک ءَ کن آں۔ ما زان ایں کہ پاکستان ءِ پوج چنچو سرمچار ءُ دلیر انت پہ وتی جِند ءِ مھلوک ءِ کشگ ءَ ءُ پہ ڈالر ءِ مُزّ ءَ جنگ کنگ ءَ۔
ملُا بے توار بُوت ھچ ئِے نہ گْوشت۔
