کراچی (ہمگام نیوز) نوکاپ لبزانکی مجلس ءِ اِمبری داد دیوان 23 نومبر 2025 ءَ بلوچی زبان ءِ کواس ءُ شائر اسحاق خاموش ءِ شرف ءَ ماں بلوچ ویلفیئر سوسائٹی فقیر کالونی کراچی ءَ جم دارگ بوت۔ اے دیوان ءِ ھاسیں مھمان اسحاق خاموش ءُ سرمستر مسکان مجید اَت۔ اے دیوان ءِ دو بھر اِتنت۔ اولی بھر گُشتانکی ءُ دومی بھر شعر ءُ شائری۔ دیوان ءِ اولی بھر ءِ جارچین بختاور امیر ءُ دومی بھر ءِ شعیب رحیم اَت۔
دیوان ءِ اولی بھر ءَ میر ساگر رحمان ءُ غلام رسول کلمتی ءَ واجه اسحاق خاموش ءِ شائری ءُ لبزانکی کارانی سرا ءَ تْران کُت۔ میر ساگر رحمان ءَ اسحاق خاموش ءِ شائری ءِ سرا تْران کنان ءَ گُشتگ اَت که اسحاق شاعری قبیله ءِ ھما مردمان اِنت که مارشتانی زبان ءَ سرپد اِنت، پدا شائری ءِ بُنگپ ھم اَنچیں اَزیت ناکیں لبزاں گوں گْرنچ دَیگ بیتگ که آئی ءِ اَندر ءَ بید ء اَندوه ءُ مارشتاں دگه ھچ چیز جاگه کُت نه کنت۔ دیمتِر ءَ واجه میر ساغر ءَ گُشت که بُن اَسل ءَ اسحاق ءِ شائری درشان گیشتر دستونک اِنت، البت درمیان ءَ چندیں لچّهے ھم پِربستگ، بلئے چوش که غزل آئی ءِ شُناس ءِ بھرے جوڑ بوتگ، لچّه آ رنگ ءَ آئی ءِ ٹَپّانی درمان نه بیتگ۔
ھمے رنگ ءَ واجه غلام رسول کلمتی ءَ وتی ھیال درشان کنان ءَ گُشت که اسحاق خاموش ماں بلوچ راجمان ءَ گیشتر په شائری ءَ نامدار اِنت۔ شائری راجانی مزنیں مَڈّیاں ھساب کَنگ بیت، په زبان ءِ پْراه پَھناتی ءَ شائری چه زِند ءِ مستِریں لوٹاں یکے۔ شائری لبزاں سَمبھینیت ءُ زبان ءِ تک ءُ پَھناتاں پْراه تِر کنت۔ زبان ءِ گلستان ءَ شائری پُلانی پیم ءَ اِنت۔ ھَمُک شائر ءِ شائری ءِ وتی یک رنگے، چه ھمے رنگ ءَ واجه اسحاق ءِ شائری ءِ جتائیں رنگے۔
اولی بَھر ءِ گُڈسر ءَ دیوان ءِ سرمستر مسکان مجید ءَ دیوان ءَ ساڑی ئیں مردمانی مِنّت گِپت۔
دیوان ءِ اولی بھر ءِ ھلاسی ءَ رند یک کسانیں سازءُزیملی بَھرے ٹَھینگ بوت که اِشی ءِ تَها بشیر حیات، ناصر ءُ شئے نضرت ءَ وتی اِزم ءَ گوں دیوان وش کُت۔
دیوان ءِ دومی بھر مشائره اَت۔ دیوان ءِ دومی بھر ءِ ھاسیں مھمان اسحاق خاموش ءُ حسن علی حسن اِتنت ءُ سرمستر واجه ظفر کریم اَت۔ اے بَھر ءَ مُحب بسمل، جام پکیر، امتیاز کمال، سمین غلام، کامران حیدر، جاسب جهان، سیدمحمد فقیر، یاسر کریم، ملناز منیر، سهیل میرانی، رحمان آزگ، بشیر بشارت، سرور آدم، عیسیٰ بلوچ، میر ساگر رحمان، حسن علی حسن، اسحاق خاموش ءُ ظفر کریم ءَ شعر ونت۔
