کنگانی ( Лебеди ، Swans ) گَلَگ چه سارتیں ملکاں دیم په گرمیں ملکاں ، بال کنان اتنت . آهاں چه زِر و دریای ءِ بُرزگ ءَ گوئزگ اتنت . آهاں شپے و روچے و دگه شپے و روچے بال اش کت و هچ جاه اش نه داشت و آرام اش نه کرت . آپ ءِ برزگ ءَ بال شاناں و دیما روان اتنت .
آزمان ءَ چاردهی ماه ءِ روشنیں مهکان بَلَگ ات و کنگاں چه هما بُرزی ءَ ، جهل ءَ نیلیں زر ءِ نیلیں آپ ءَ جوانی ءَ چاراں و گندگ اتنت . کنگاں ژئند بیتگ اتنت ، بلے نه داشت اش و بالاں شانگ و دیما روان اتنت . پیر و واکداریں کنگاں گَلَگ ءِ دیما بال کنان اتنت و کَستر و نزوریں کنگاں ایدگه کنگانی پُشت ءَ بال شانان اتنت .
یکے چه کَستریں کنگاں ، پهکانی رند ءَ بال کنان ات . آئی ءِ وس و واک ، کم و کمتر بوان ( بیان ) ات . وتی بالی شانت ، بلے دیماتری بال کرت ءَ نه کت . گڑاں وتی بالی نَزّ یائورت و دیم په جهل روان بوت . جهل و جهل تر شت . آپ ءَ نزیک بیان ات و آئی ءِ سنگتاں دور و دورتر ماں مهکانی ءِ روشنی ءَ بال کنان اتنت . کسانیں کنگ آپ ءَ نِشت ( نِست ) و وتی بالی بست انت . زر ءِ آپ ءِ گوئرم آئی ءِ چیرا جهل و برز بیان ات و آئی ءَ چو گوانزگے چنڈیناں و لُڈینان ات . کنگانی گَلَگ هنوں سک دور بیتگ ات و مهکان ءِ روشنی ءَ چو اسپیتیں ٹکے ماں آزمان ءِ دلبند ءَ کمے جاه ءَ یهت . آهانی بالانی توار هم ، ماں زر ءِ آرامی ءَ کمے اشکنگ بوت .
وهدے که پهک چه چماں اندیم بوت انت ، کسانیں کنگ وتی گردن ءَ پُشت ءَ یارت و وتی چمانی مُٹ کرت و بست انت .
وتی جاه ءَ آرام کناں بوت و نه سُرست . تهنا اے زر ءِ آپ ءِ جهل و بُرز بیگ ات که آئی ءَ چنڈیناں ، جهل و بُرز کناں و لڈینان ات .
گوئربام ءِ سُهری چه روٹک ءِ جاه ءَ ودی بیان ات . سمین و نرم گواتے ماں زر ءَ کشیت ، کمے آپی اسپیتیں کنگ ءِ اسپیتیں سینگ ءَ شانت ، کنگ وتی چماں پاچ کرت . روٹک جاه ءِ سُهری روشن و گوں زردی و گندیمی رنگ ءَ هور بیان ات . استاراں و ماه ءِ روشنی کم بیان ات . کنگ جوانیں گینے ( ساهے ) کشیت و وتی گردنی دراج و برز کرت و بالانی پاچ کرت و بال شاناں چه وتی جاه ءَ چست بوت ، و آپ ءِ برزگ ءَ بال شاناں و بال کنان ، بُرز و برزتر و برزتر شُت و ایوک و تهنا ، سیه دیم و تهار و گرینبوکین گوئرم و مَؤجانی بُرزگ ءَ بال کنان بوت .
