گڈی بَھر
ھمگام بلوچی
اولی چہ ھندوستان ءِ بنی آدمی نیکیں کاراں تیوگیں اوگان لس مھلوک ھندوستان ءِ مھروان بیتگ اَنت دومی چہ ھندوستانی لشکری وانگجاھاں دربرتگیں اوگانی لشکر ءِ کارسر ءُ لشکری رھشون آیوکیں سالاں پہ پاکستان ءَ بلاھیں ترسے ودی بیگ ءَ ات انت، چوناھیگا اے وَ اولی بَر نہ اَت کہ ھندوستان ءَ پہ اوگاناں جْوانی یے کت بلکیں ھندوستان ءَ مُدام پہ اوگانستان ءُ لس اوگاناں وانگ ءُ دیمروئی ءِ کُمک کت۔ بلے چہ اوگان ءِ سْیاسی جیڑھاں ھچبر دزمانگیجی نہ کتگ ئِے بلکیں وت ءَ را دِیر داشتگ کہ اے اوگانانی جِند ءِ جیڑہ اَنت پمیشکا اوگان ھندوستان ءَ بے کساس مھر دے اَنت۔ گُڑا اے آکبت ءَ ھندوستان ءُ اوگانستان ءِ دوستی پہ پاکستان ءَ سَک نگیگ اَت بزاں پاکستان ءِ دوئیں نیمگ ءَ دژمن ساڑی ات انت چمیشکا پاکستان ءَ ھمے ھیال کت کہ دومی راہ وَ نیست انت ابید تالبان ءِ کُمک کنگ ءَ، انچوشکہ پاکستان مُدام وتی کاسگ چٹّاں اوگانستان سرکار ءِ لاپ ءَ آرگ لوٹ ایت کہ اود ءَ ھندوستان ءِ منّوگری ءُ کار کم بہ بنت۔ پمیشکا 2006 ءَ تالبان ءَ وتی کاسگ چٹّی پد ءَ بُنگیج کت ءُ اُلسان ءُ راج مستری اوگانستان ءِ ھلاپ ءَ زالمیں چیرجنگی ءِ بنا کت چہ اے جنگ ءَ بازار ءُ شھراں لس مھلوک ءِ سر ءَ وتکُشی بمب ترکّگ باز بوت انت اے وڑیں زالمی اوگانستان ءَ پیسر ءَ ھم نہ بیتگ اَنت ھاسکن پشتون شھراں:- جلال آباد، ھلمند ، کندھار ءُ کابل ءُ بے کساس بیرانی بیتگ انت۔
پد ءَ گیدی ءِ ھر وڑیں تنک ٹینک ءُ رسانکدراں ھمے ھال ءُ اھوال شِنگ ءَ اَت کہ پاکستان اوگانستان ءِ جنگ ءَ دو لمبری کنگ ءَ انت انچوشکہ پاکستان یک نیمگے ءَ چہ امریکہ ءُ نیٹو تپاک ءَ زَر ءُ ڈالر زِیر ایت ءُ دومی نیمگے ءَ امریکہ ءُ اوگانستان ءِ دژمن تالبان ءَ کُمک ءُ وَھِر کنت گُڑا امریکہ ھم زانت کہ پاکستان اوگانی تالبان ءَ کُمک کنگ ءَ انت پمیشکا کانگریس ءُ امریکی لشکر ءِ تہ ءَ یک جنجالے ودی بوت کہ نی امریکہ چے بہ کنت گُڑا آیاں ھم اولی بر ءَ پاکستان ءِ لشکری ءُ دیمروئی ءِ کُمک بند کنگ ءِ جار جتگ ءُ پاکستان ءَ را ھمے داب ءَ لٹ دیگ ءِ ھاتر ءَ پاکستان ھلاپیں تیوگیں چیرجنگی جُنزاں کُمکّ کت گُڑا پاکستان ءِ لاپ ءَ ھم ھرگورے ءَ جنگی بیرانی، بمب ءُ وتکُشی ترکّگ باز بوتگ ءُ بزان پاکستان ءَ ھم بیرانی آرگ بندات بوتگ۔
یک نیمگے ءَ پاکستان ءَ زَر دیگ بند اَت ءُ دومی نیمگ ءَ پاکستان ءِ کسان ءُ مزنیں شھراں ھرگورے ءَ اسلامی نیکراھی وتکُشی بمبانی اُرُش ءَ ات اَنت پمیشکا پاکستان ءِ واپار بیرانی ءِ نیمگ ءَ روان بوت، سیمی پاکستان ءَ ھمے وس ءُ واک ءَ نہ اَت کہ پاکستان اے نیکراھی جنگولانی ھلاپ ءَ دْراجیں جنگے بہ کتیں بلے پاکستان ءَ ھرگورے جنگ کنگ ءِ جار جت بلوچ سرمچار ءُ پشتونستان ءِ اسلامی نیکراھی جنگولانی ھلاپ ءَ پاکستانی لشکر وت یک دْراجیں جنگی جنجالے ءَ کپت۔
امریکہ ءِ بازیں تنک ٹینک، جنگی زانتکار ءُ ھاسکن نامداریں زانتکار بانُک لیزا کرٹس ءُ ھستیں وھد ءَ امریکی اوگانستان ءِ کارسر واجہ زلمے ھلیل زاد ءَ گْوشت اگاں امریکہ اوگانستان ءِ ایمنی ءَ لوٹ ایت گُڑا پاکستان ءَ ھر وڑیں کُمک بند بہ بیت ءُ دومی پاکستان ءِ جاوراں ھراب دار دارگ بہ بنت پد ءَ یک نیمگے ءَ تالبانانی سرکماش ءُ سروگانانی سر ءَ ڈرون ءُ داجالی سلاہ اُرُش ءُ ھلاس کن اِت ءُ دومی نیمگ ءَ اگاں آ یک اُلسان اوگانستان ءَ سیاست لوٹ اَنت گُڑا ٹَوک ءُ توار ءَ جیڑھاں گیش ءُ گیوار بہ کن اِت گُڑا اوگانستان ءِ جیڑہ ھلاس بنت۔ گُڑا امریکہ ءَ یک نیمگے ءَ تالبان ءِ سرکماش ءُ جنگولانی سر ءَ تْرُندیں اُرُش برجاہ داشتگ اَت ءُ دومی نیمگ ءَ آیاں گوں ٹوک ءُ توار جُنزان کتگ انت ئِے کہ اوگانستان جیڑہ ءِ سیاسی توجِیلے بہ بیت اے درگت ءَ امریکہ وتی مول ءُ مُراد ءَ سوبین ھم بیتگ پمیشکا کتر ءِ شھر دوھا ءَ تالبان ءُ امریکہ ءِ گپ ءُ توار جُنزان انت کہ اوگانستان ءِ جیڑہ ھلاس بہ بیت ءُ تالبان ھم اُلسان ءُ راجمستری اوگانستان ءَ سیاست بہ کن انت آ ٹوک ءُ توار تنیگتا جُنزگ ءَ انت۔
پد ءَ پاکستان ءَ گوں ھمے وڑ ءَ کنگ بوت۔ انّی ئیں وھد ءَ پاکستان ءَ بہ گِر تیوگیں بلوچستان تاں پشتونستان ءَ یک بلاھیں بے ھلاس ءُ دْراجیں چیرجنگے ءِ زَر زوالی ءُ وتی لشکر ءِ بیرانی ءَ کپتگ پد ءَ پاکستان ءِ لاپ ءَ واجہ منزور پشتین ءِ سرکماشی ءَ پشتو آشوب آتک اے ھم پہ پاکستان ءَ جنجالے کہ پاکستانی پشتو لھم لھم ءَ پاکستان ءِ راستی ءَ سرپد بیگ ءَ اَنت کہ اے چونیں استانے، انچوشکہ اے آشوب ءَ اوگانستان ءِ ھستیں پاگواجہ اشرپ گنی ءِ پلامرزی ھم سَک باز ھست۔ البت تالبان ءَ پہ پاکستان ءُ ایران ءِ کاسگ چٹّی ءَ اوگانستان ءِ لس مھلوک ءَ بے کساس بیرانی کت۔
بلے دومی نیمگ ءَ اوگانستان لھم لھم ءَ چہ جنگل راج ءَ درکپان ءُ اُلسان ءُ راجمستری ءِ نیمگ ءَ جُنزان بیتگ 2009 ءَ پد ءَ گچینکاری بیتگ انت گُڑا یک رَندے پد ءَ واجہ ھماد کرزی اوگانستان ءِ پاگواجہ بوتگ۔ 2014 ءِ گچینکاری ءَ واجہ ڈاکٹر اشرپ گنی اھمدزی اوگانستان ءِ پاگواجہ بوت۔ بلے اوگانستان ءَ کُشت ءُ کوش، بیرانی ءُ وتکُشی اُرُشاں ابید دیمروئی ءِ دَگاں جُنزان بوت انچوشکہ اوگانستان ءَ روایرشُتی زروئیں استان کُمک کنگ ءَ اَنت بلے دومی نیمگ سھودی یمن ءِ بے ھلاسیں جنگ ءِ ھرچاں آماچ انت پاکستان ءِ جِند بدیں جاوراں دُچار کپتگ پمیشکا مُپت ءَ پاکستان ءَ کس کلدارے نہ دنت جنگی ھرچانی آکبت ءَ پاکستان ءَ روچ پہ روچ گِرانبھائی ءُ بیرانی بِیان انت بلے اوگانستان پاد آتک ءُ وت ءَ را شَر کتگ ئے پمیشکا 2019 ءِ گچینکاری ءَ پد ءَ ڈاکٹر واجہ اشرپ گنی باج بُرتگ ءُ اوگانستان ءِ پد ءَ پاگواجہ بوت۔
اد ءَ یک گپے زانگ بہ بیت کہ تالبان ءَ وتی ھستیں ھونیگیں جُنز ءَ ایوک ءَ اوگانستان ءِ پشتون شھر ءُ دَمگاں لس مھلوک باز کُشت البت اوگانستان ءِ تاجک، ازبک ءُ ھزارانی دَمگ ءَ تالبان ءِ ھاسیں زور نیست انت انچوشکہ تالبان ءِ لاپ ءَ گیشتر اوگانستان ءِ رَدیں پشتون انت پمیشکا نی اوگانستان ءِ پشتون ھم تالبان ءَ بے کساس زھر ور انت اے درگت ءَ تیوگیں اوگانستان ءِ لس مھلوک تالبان ءَ بے کساس پِٹّ دے انت پمیشکا تالبان زان ایت کہ یک اُلسان ءُ راجمستری ئیں استان ءَ زالمیں گل ھچبر نہ جُنز اَنت انچوشکہ آیاں کس ووٹ نہ دنت کہ آیاں مُدام راج ءِ لس مھلوک ءِ سر ءَ بیرانی آؤرتگ۔
آسر: انچوشکہ اے وھد ءَ ھم اوگان لشکر ءُ امریکہ ءِ تْرُندیں جنگی اُرش پاکستان ءُ ایرانی کاسگ چٹّیں تالبانانی سر ءَ برجاہ اَنت بلے تالبان ھم وتی وس ءُ واک ءَ چیرجنگ ءَ دزگٹّ انت۔ دومی نیمگ ءَ پہ اوگانستان ءِ ایمنی واستا امریکہ ءُ تالبان ءِ نند ءُ نیاد، ٹوک ءُ توار چہ سال ءُ نیم سالے ءَ جُنزگ ءَ انت کہ نیکراھی تالبان ھم اُلسان ءُ راجمستری اوگانستان ءِ سیاست ءَ بَھر بہ زور انت اگاں اوگان راج ءَ آیاں ووٹ داتگ گڑا اوگانستان ءَ پاگواجھی ءَ کن اَنت بلے ھرکس زان ایت کہ اوگانستان ءِ لَسّ مھلوک تالبان ءَ زھر کنت پمیشکا گچینکاری ءَ کس تالبان ءَ ووٹ نہ دنت پمیشکا اُلسان اوگانستان ءِ رِد ءُ رھبنداں تالبان وتی سیاست ءَ زندگ داشت نہ کنت۔
بلے امریکہ اُلسان اوگانستان سرکار لاپ ءَ پشتونانی لھتیں بَھر مُپت ءَ تالباناں دنت بلے ایشی ءَ موڈریٹ پشتون نہ منّ انت چوناھیگا اے اُلسان ءُ راجمستری رھبندانی لگتمالی اِنت بزاں کس وتی بَھراں مُپت تالبان ءَ نہ دنت پمیشکا منی ھیال ءُ لیکہ تالبان ءُ امریکہ ءِ گپ ءُ توار بے سیتیں گپ اَنت
البت اگاں تالبان ءَ سرکار لاپ ءَ سیاسی بَھرے رستگ پد ءَ ھمے پاکستان ءُ ایران اوگانستان ءِ سیاسی جیڑھاں دزمانگیجی کن اَنت ءُ رند ءَ تالبان وتی کاسگ چٹّی ءَ برجاہ دار اَنت ءُ اوگانستان ءِ آس گیشتر روک بیت۔
ھلاس۔
