لندن: (ھمگام نیوز) بلوچ آجوئی لوٹوکیں گل پری بلوچستان مومنٹ ءِ سروک ھیربیار مری ءَ وتی درشان ءِ تہ ءَ گُشتگ اوگانستان ءِ سرڈگار ءِ سر ءَ گوستگیں پاکستان ”فضائی“ اُرشاں پد وتساچیں پاکستانی ریاست اوگانستان ءَ گیش مالی تنگ دستی ءِ جنجالانی تہ ءَ دور دیگ ءِ ھاترا اوگانستان ءِ ھمک روچی روگ ءُ آیگی راھاں بند کنگ ءَ انت دانکہ دوئیں نیمگ ءِ نشتگیں اوگاناں وتی ماں وتی روزگار بند رؤ ءُ آ بند کنگ ءَ انت کہ آیاں گیشتر جنجال ءُ نگیگانی دیمپان کنگ لوٹ ایت، اوگانستان ءِ سر ءَ اے ”فضائی“ اُرش بوت کنت نوکیں گپے بلے نوزدہ سد ءُ ھپتاد سئے ءَ بھٹو ءِ ھاکمی ءِ زمانگ ءَ پاکستانی لشکر چمالنگ ءُ چپ ءُ چاگرد ءَ فضائی اُرش کتگ ءُ ھزاراں بلوچ شھید کتگ انت، مئے واستا اے گپ نوک نہ انت، پد ءَ مشرپ ءِ زمانگ ءَ مزنیں کساسے ءَ بلوچانی ھلاپ ءَ ھزارانی ھساب ءَ فضائی بمب گواری کنگ بوت، انوھیں روچاں ایران ءُ پاکستان ءَ دوئیں نیمگ ءِ زیردستیں بلوچستان فضائی بمب گواری کتگ ءُ بلوچ جنین ءُ زھگ شھید کتگ انت اوگانستان ءُ بلوچستان ءِ بمب گواری پاکستان ءِ زوراک ءُ زورگیری پگر ءِ درشان انت۔
دیمتر ءَ وتی درشان ءِ تہ ءَ رھشون ءَ گشتگ وتساچیں ڈیورنڈ لائن ءِ سرا ۱۶۰۰ میل ءِ گیر کانودی ٹٹ جنگ ءُ دوئیں نیمگ نشتگیں اوگان کھولانی یک دومی ءَ چہ دور دارگ ءَ پد نوں پاکستان نیمگ ءَ ھمک روچی اوگانستان ءِ رو ءُ آ ئی راھاں بند کنگ بلے اوگان راج ءِ روگ ءُ آیگ ءَ راہ ءِ بند کنگ ءِ مانا اِش انت کہ مالی جنجالانی دیمپانیں اوگان راج ءَ سیاسی ءُ عسکری بنیات ءَ بلیک میل کنگ ءُ آئی سر ءَ گیش زور دیگ لوٹ انت، ما دنیا ءُ وتی ھمساھگاں گور ءَ وتی گپ ءَ تچک کنیں آیوکیں وھد ءِ آجوئیں بلوچستان ءِ خارجہ پالیسیانی تہ ءَ اے پیمیں انسان دژمنی ءُ بلیک میلنگ کنگ نہ بیت۔
یات بہ بیت اے پیمیں رپک انوگیں نہ انت پیسرا اوں وتساچیں پاکستانی ریاست ءَ اوگان راج ءِ ھمراھی ءَ میان استمانی تاگتاناں بلیک میل کنگ ءِ واستا اوں ھمے رپک کارمرز کتگ، یک نیمگے میان استمانی تاگتاں اتحاد ءِ نام ءَ اربانی ڈالر گیپتگ دومی نیمگ ءَ آیانی ھلاپ ءَ ڈبل کراس پالیسی کارمرز کتگ، پاکستان ءَ ھر وھد ءَ وتی نپانی ھاترا اوگان راج کارمرز کتگ ھد ءَ شہ گیش تاوان داتگ۔
پری بلوچستان مومنٹ ءِ سرکماش ءَ گشتگ کہ پاکستان ءَ وتی بدیں سیاسی مکسد ءِ واستا ھزارانی اوگان کارمرز کنگ ءَ پد نوں پاکستان ءِ ریاست ڈیورنڈ لائن ءَ اے نیمگ پشتونستان ءَ آبادیں اوگاناں بدیں نگاھے ءَ چارگ ءَ انت، پاکستان ءِ زیردستیں بھر ءَ نشتگیں پشتوناں ھر وھد ءَ پاکستان ءِ ھاترا وتی ھرچیز ببا داتگ بلے پشتونانی سرا ریاستی زوراکی ءُ ھاکمی، بدیں سیاسی واھشت کہ اوگانیاں راجانی بنیات ءَ نشانگ کنگ ءُ چکچینی ءَ پد وھدے پشتون راج ءَ ریاست ءِ ھلاپ ءَ وتی ھکانی ھاترا توار چست کنک بندات کت نوں آیاں آوار جنگ ءِ اوں بندات کت، نوں پاکستانی ریاست ڈیورنڈ لائن ءِ آ نیمگ ءَ آبادیں پشتونستان ءِ اوگاناں اوں بدیں نگاھے ءَ چاریت ءُ سرکاری ادارھانی پالیسانی بنیات ءَ ھما کلیں مردماں ”سول ءُ عسکری“ ادارھاں چہ در کنگ ءَ انت ھما کہ وتا اوگان گُش انت۔
ایشی ءَ چہ ھمے پدر بیت کہ پاکستان پشتونانی اوگان پجار ءِ ھواری ءُ نزیکی ءَ باز ترسگ ءَ انت وتساچیں پاکستانی انتظامیہ ءِ وزیر دفاع خواجہ آسپ وت من اتگ آئی ءَ اے گپ ءِ اجازت داتگ کہ سرجمیں اوگاناں اگدہ داریں سول ادارہ ءُ ایدگہ درستیں اگدھاں چہ در کنگ بہ بنت چش کہ پشتون ڈیورنڈ لائن ءِ کجام ھم تک ءَ نشتگ بنیات ءَ آ اوگان انت آئی ءِ درشان ءِ تہ ءَ ھمے گپ پدر انت۔
پاکستان ءِ پالیسی جوانیں رنگے ءَ پدر انت کہ اوگان ءَ گوں دژمنی یے ھست، ھما سرجمیں اوگان ءِ پجار داراں شک ءِ نگاہ ءَ چار انت، اوگان راج ءَ وتی ریاستی نپانی ھاترا مزنیں مدتے کارمرز کنگ ءَ پد نوں آیاں بلوچ راج ءِ پیم ءَ بدیں نگاھے ءَ چارگ بوھگ ءَ انت پاکستانی ریاست لوٹیت یک انچیں لشکر ٹھینگ بہ بیت آئی تہ ءَ پالیسی ساز تھنا پنجابی سنٹرک بہ باں ءُ آئی تہ ءَ مزنیں اسٹرٹیجک اگدھانی سرا اوں سرجمیں مردم پنجابی بہ بنت۔
راجی رھشون ھیربیار مری ءَ دیمتر ءَ گشتگ کہ بلوچستان ءِ سر ءَ پاکستان ءِ زورگیری ءِ بنداتی روچ ءَ گر داں انوں ھچبر آ پاکستان ءَ گوں رازی نہ بیتگ انت، پمیشکا بلوچاں ھر وھد ءَ پاکستان بدیں نگاھے ءَ چار اِیت ءُ پاکستانی ھاکم بلوچ ءِ گلامی ءِ داھمی ھساب ءَ برجم دارگ ءِ ھاترا چیروکائی انچیں پالیسی ٹھینتگ کہ سما نہ دنت ھمے پالیسی ءِ بنیات ءَ بلوچ راج ءَ پہ پروفیشنل ءُ ٹیکنیکل وانگ ءُ زانگ دروازگ بند کتگ انت، بلوچ ھچبر پاکستان ءِ دیمروئی ءُ وانگ ءُ زانگ ءِ واھشت مند نہ انت بلے پاکستان ءَ بلوچ راج ءِ گلام ءِ دارگ ءِ ھاترا ایوی ایشن ءَ ھوار پروفیشنز ءِ رنگ ءَ ھچبر ءَ دیم ءَ آیگ ءَ نئیشتگ پرچا کہ پاکستان ءَ مدام ھمے تُرس اِنت بلوچ ٹیکنیکل ءُ پروفیشنز رنگ ءَ زانت در بہ بر انت ایوی ایشن وڑیں ٹیکنیکل اگدھانی سر ءَ بوت انت گڑا پد ءَ بلوچانی ٹیکنیکل بنیات ءَ زانت ءُ سرپدی راجی جنز ءَ جوانیں راھے گیشینت کُت کنت۔
ھیربیار مری ءَ دیمتر ءَ گُشتگ کہ پنجابی ریاست ءِ ھیال انت ھرکس ءَ چہ وتی نپاں کش ءُ پد چگل بہ دے ءُ ھمساھگیں راجانی سر ءَ ناروائی ءُ بلیک میلنگ ءِ ھنر کارمرز بہ کن بلے بلوچ وتی ریاست ءِ وت واجہ بوھگ ءَ پد ھمساھگیں ڈیھانی ازت ءُ شرپ ءَ کن انت وتی سیادی ءَ برجم دارگ ءَ پہ ھچبر ناروائیں ھنر کارمرز نہ کنیں۔
زورگیریں پاکستان ءِ وڑ ءَ آئی ءَ یک نیمگے راج ءِ زمین ءِ یک بھرے سر ءَ زور گیپت انت دومی نیمگ ءَ اوگانستان ءَ لگمتال کنگ واستا سیاسی ءُ عسکری پلینڈیاں دلگوش انت گوستگیں وھد ءَ پاکستان ءِ چیریں ادارہ آئی ایس آئی ءَ بے ترس ءُ لرز گشتگ اوگانستان پاکستان ءِ پنچمی سوبہ انت ایشی ءَ چہ پدر انت پاکستان اے وھد ءَ اوں وتی ناروائیں کارپداں ءُ گوستگیں اسٹیرٹیجک ڈیپتھ پیمیں پالیسیاں چہ در نہ کپتگ۔
پاکستان ءَ ھر وھدے کہ موہ رستگ آ ھر وھد ءَ اوگانستان ءُ بلوچستان ءِ سر ءَ وتی سیاسی ءُ عسکری زیردستی ءَ دیم ءَ جنزینان ءَ دوئیں راجانی راجی مھکمی ءُ تاگت ءُ یکمشتی ءَ نزور کنگ ءِ واستا کوشست کنگ ءَ انت دیمتر ءَ اوں کنت۔
بلوچ سیاسی باسکاں لوٹ ایت بلوچستان ءُ آئی بابت ءَ علمی بنیات ءَ چیزانی بابت ءَ سرپدی بہ دار انت آیانی واستا یک چیز ارزان بیت گوست ءَ گر داں انوں کجام ھمساھگ بلوچ ءِ چکچینی ءِ بابت ءَ یکجاہ ءُ ھم پت انت ءُ کجام ھمساھگاں بلوچانی مشکلیں وھداں دست گیپتگ آیانی راجی ءُ سیاسی بنیات ءَ کمک کتگ۔
یات بہ بیت راجی جھد ءِ یکشل ءَ برجمیں سپر ءِ تہ ءَ گوستگیں تیوگیں گھگیری ءُ سیاسی گوستانک ءَ بچار ئے ایران وڑیں ڈیھاں نا بلوچستان ءِ اندر ءَ بلوچانی دود ءُ دودمان لگمتال کتگ انت بلکیں بلوچانی مدام چُکچینی کتگ تاں انوں ھم برجم انت ایران ءَ پاکستانی ریاست ءَ را اوں مالی ءُ عسکری بنیات ءَ جوانیں رنگے ءَ کمک کتگ بلے دومی نیمگ ءَ مشکلاں کپتگیں اوگانستان یکہ وتی مالی ءُ عسکری نزوری ءَ ابید بلوچ ءِ بے کساس کمک کتگ اے وھد ءَ پیسر نوری نسیر ھان ءُ اھمد شاہ ابدالی ءِ میان ءَ آ وھد ءَ نا تھنا ایمنی برجم دارگ ءِ کول ءُ کرار بوتگ بلکیں اے گشگ بوتگ کہ دوئیں راج ھر وھد ءَ یکے دومی ءِ باسک جوڑ بنت۔
