لیو ٹالسٹای / کریم بلوچ
مردے گوں ممے یک شرابجاهے ءَ رست انت ، ممی شرابجاه ءِ دپ ءَ بست و په شراب ءِ پیالهے ءِ ورگ ءَ ، شرابجاه ءَ مان بوت . اپس گاڑی والایے که سئے اپس بستگ ات ، هم هموداں رست و مهاری پتات و هموداں ایر کرت و آئی هم شرابجاه ءَ مان بیت .
مرد ءِ اپس گاڑی ءَ لهتے ورگانی بو هست ات و ورگانی بو که مم ءِ پونز ءَ رست ، آئی ءِ ورگ ءِ شوهاز ءَ وتی بندی پچ کت و اپس گاڑی ءِ نیمگ ءَ شت و اپس گاڑی ءَ نشت و تامداریں ورگ ءِ شوهاز ءَ کاه و اسپستاں ، اے نیمگ و آ نیمگ کناں بوت . اپساں که پُشت ءَ چَک جت و چار اتش ، مم اش دیست ۔ چه شراب جاه ءِ دروازگ ءَ بِرّ و تراس اش کرت و راه ءَ تیزی ءَ تچاں بوت انت . مم که تچوکیں اپس گاڑی ءَ نشتگ ات و مدام اے نیمگ و آ نیمگ بیتگ ات ، وتا گوں اپس گاڑی ءَ مُهر داراں بوت و نزانتی که چئے به کنت . اپساں هر چی دیماتر شت انت ، تیزتر تچاں بوت انت . مم وتا اپس گاڑی ءِ داراں گوں لچینتگ ات و تهنا آئی ءِ سر ات که کدیں اے نیمگ و آ نیمگ سُرینان ات . اپساں پُشت ءَ چَک جناں مم ءِ گندگ ءَ گیشتر هَؤل کناں و تیزتر راه ءَ تچاں بوت انت و جهلادگ و بالادگ اش هم نه زانت … مردمان ءَ یک کِرّ بیگ موه هم نیست ات .
اپس گاڑی ءِ سئیں اپس ، جوان تتک انت . گاڑی ءَ مم نشتگ ات ، یا گهتر بگوئشاں لچتگ ات و گاڑی ءِ داراں وتا داران ات و اے نیمگ و آ نیمگ ءَ چاران ات . مم دیست که جاور سک هراب انت و اے اپساں آهر آئیا کوشاریننت ، گُرّگی جت . چه ائی ءِ گُرّگ ءَ اپساں تیز تر تچاں ، تراس کناں و بال کناں بوت انت تاں که وتی کلگ و وتی لوگ ءَ یهت و سر بوت انت .
پهک هیران اتنت و چارت اش گوانز و تراس ءَ . اپساں لرزاں و جُپُک جناں وتی سراد ءَ مان بوت انت . لوگبانک چاراں بوت که چئے بوته ؟ چون من رد نه وارته و اے منی لوگ واجه انت که مست انت و نه په وهد آتکگ ؟ درا درکپت و چارت ئی ، گاڑی ءِ تها آئی ءِ لوگواجه سوار نه ات . مم ات که ایر کپت . تتک ڈگارانی تها و جنگل ءَ شت .
