ھمگام پٹ ءُ پولی رپورٹ
ھمے انوھیں ھالے کہ ماں ایران ءِ زورگیپتیں بلوچستان ءَ پاکستان ءِ جاھمنندانی کوش ءِ بابت ءَ پاکستانی رسانکدر ءَ باز گپ بیگ ءَ انت-
پاکستانی رسانکدر گشتگ، سے سلاھبندیں مردماں روچ رھمی ساھت دو ءَ اتکگ ءُ گیراج ءِ تہ ءَ پترتگ انت نو پنجابی کُشتگ اِش- رسانکدر ءَ اے مرتگیں مردمانی کوش ءِ زمہ واری بی ایل اے ءِ سرا جتگ ءُ بھتام بستگ ءُ گشتگ کہ بی ایل اے ءَ ایران ءِ تہ ءَ کارکنوکیں مزدور کشتگ انت-
ایران ءِ حکومت ءَ پاکستان ءَ را باوری داتگ کہ اے جیڑہ ءِ اسل سبب ءَ شوھاز کنت ءُ دیم ءَ کار ایت، ھمے رد ءَ ایران ءَ گشتگ کہ کُلیں راستی یکجاہ کنگ بوھگ ءَ انت-
اے بیران بوتگیں مردم ملک ازھر، مھمد شھیب، مھمد آسپ، مھمد اکمل، مھمد ابوبکر، شھریار، مھمد بشیر، مھمد زبیر ءُ مھمد شھزاد ءِ نام ءَ چہ زانگ بوتگ انت ایشانی ھواری ءَ مھمد اشپاک، مھمد ازگر ءُ ازمان نامیں مردے ٹپی بوتگ انت، ایشاناں کاجولگ، دیم ءُ سرین ءَ تیراں گیپتگ انوں سراوان ءَ رزی نادراہ جاہ ءَ دوا ءُ درمان کنگ بوھگ ءَ انت، گشگ انت کہ ایشانی تہ ءَ یکے ءِ جاور نگیگ انت، اے کُل پنجابی انت ءُ پنجاب ءِ شھر ملتان، مزپرگڑہ ءُ پیسل آباد ءِ جاھمنند انت-
27 بھاران ءَ سروان ءِ ھند سرکان ءِ میتگ ممیشت ءَ اے واکیہ بوتگ، اے ھند ءِ جاھمنند گیشتر بلوچ انت، اد ءَ آبادی نیستی ءِ برابر انت اد ءِ جاھمنند سکیں گریب ءُ تنگ دستیں مردم انت، اے جنگ بوتگیں مردمانی ھمے ھند ءَ گاڈی شر کنگ ئے گیرج بوتگ-
ھمگام نیوز ءَ اے جیڑہ ءِ اسل راستی ءِ پٹ ءُ پول وتی وسیلہ ءَ چہ کتگ راستی پدر کتگ کہ مرتگیں ءُ ٹپی بوتگیں مردمانی سیادی چہ پاکستانی آرمی ءَ انت ایشی ءَ چہ ابید اے مردم ایم آئی ءُ آئی ایس آئی ءِ کاردار ءُ سپاھی بوتگ انت، ایشی ءَ چہ ابید دلاری ءُ بلوچ ءِ چکچینی ءُ بلوچ کُش (ڈیتھ اسکواڑ) ٹولی ءَ پہ کمکاری ءِ دروشم ءَ کار ءَ بوتگ انت
جنگی زانوگر اے گپ ءَ جوانی ءَ پوہ بنت اے رنگیں دلار ءُ کمکاراں کاکد ءُ سَنّد دیگ نہ بیت ءُ اے چیروکائی ءُ روپوشی ءَ گوں کار کن انت-
ھندی مردمانی گشگ انت اے مردم نا مزدور بوتگ انت نا بے وسیں مردم بوتگ انت اے بلکیں پاکستانی لشکر ءِ کارمند بوتگ انت، مزدوری ءِ نام ءَ اد ءَ بلوچ آجوئی لوٹوکیں جھدکارانی دلاری ءَ کنگ ءَ بوتگ انت ایشاں مزنیں کچے ءَ بلوچ کُش ٹولی جوڑ کتگ ھمایاناں لب ءُ لالچ داتگ ءُ بلوچ ءِ چکچینی پرماتگ-
ھندی مردمے ءِ گشگ انت رو ایرشتی بلوچستان ءِ دگہ بازیں ھند ءُ دمگاں ایشانی بے کساس ٹولی ھست انت، بلوچ کُش ٹولی ءِ سروکی ءَ کنگ ءَ انت ءُ رو دراتکی بلوچستان ءَ چہ لڑ ءُ بار کرتگیں ءُ اد ءَ اتکگ ءُ جاھمنندیں بلوچانی بابت ءُ زانگ ءُ آیانی بابت ءَ پٹ ءُ پول کنگ ءَ پد ءَ آیاں نشانگ کنگ ءِ کار دیگ بوتگ انت-
یات بہ بیت رو ایرشتی بلوچستان ءَ اے رنگیں جیڑہ سک باز دیم ءَ اتکگ اود ءَ رو دراتکی بلوچستان ءَ چہ اتکگیں بے کساس مردم نشانگ کنگ بوتگ انت ءُ باز آوار جنگ ءُ کشگ ءُ دور دیگ بوتگ انت- اے ھما مردم بوتگ انت رو دراتکی بلوچستان ءَ زوراکیں لشکر ءِ لشکر کشی ءُ زورانسریں آوارجنی ءُ بے روزگاری ءُ بے وسی ءِ سوب ءَ وتی کھول ءَ گوں ھوار لڑ ءُ بار اِش کتگ ءُ وتساچیں سیمسر ءِ آ دیم ءَ رو ایرشتی بلوچستان ءَ شتگ انت ءُ در پہ دریں زندے ءِ گوازینگ ءَ لاچار بوتگ انت-
گوشگ ھمے بوھگ ءَ انت گوستگیں وھد ءَ رو ایرشتی بلوچستان ءَ بے کساس مردمانی کوش ءَ ھمے مردمانی دست تچک ءَ ھوار ءَ انت، ھمیشاں پد ءَ پاکستانی سرکار ءُ آئی رسانکدر مزدور زاھر کنگ ءَ انت، پہ بلوچاں وتی لس مھلوک ءِ دل ءَ زد ءُ کینگ ءَ مان کنگ ءَ انت اے جیڑہ ءَ لس جیڑھے ءِ رنگ ءَ پیشدارگ ءَ انت دانکہ وتی لس مھلوک ءِ ھمدردی ءَ گوں وت بہ کنت-
ھندی مردم اے گپ ءَ دلجمی ءَ گوں گشگ ءَ انت اے پیم چتو بوت کنت یک مردمے وتی ڈیھ ءَ یل بہ کنت یک انچیں جاھے ءَ کار بہ کنت کہ ھود ءَ مردم وت گژنگی ءُ بزگی زندے گوازینگ ءَ انت؟
آیانی گشگ انت کہ “آٹو موبائل مکینیکل” گیرجے ءَ کار کنگ ءَ چارگ بہ بیت پہ لاچاری چار یا پنچ مزدور بنت، بلے اد ءَ و شازدہ مزدور ءَ چہ گیش بوتگ انت اے بس پہ نام گیرجے بوتگ، کار ھچ نہ بوتگ-
دیمتر ءَ لس مھلوک ءِ گشگ انت وھدے کہ ایشانی سرا اُرش بوتگ اے کار ءِ بدل ءَ پتاھی ءُ لُڈو لیب ءَ بوتگ انت، یکے ڈن ءَ بیتگ دگہ یکے پَلُک ءَ بوتگ ھمے واستا بچ اتگ انت
مھلوک ءِ گشگ انت اود ءَ کہ ھمے واکیہ بوتگ اود ءَ نا کمپنی ھست نا سرکاری ءُ نا لس مھلوک ءِ گاڈی ءُ سیکل ءِ مزنیں کساسے ءَ کارمرز کنوک ھست کہ یکے بہ گش ایت اے سبب ءَ اے اد ءَ کار ءَ بوتگ انت-
ھندی مردمانی گشگ انت اے مرتگیں مردم نا مزدور بوتگ انت نا بزگ ءُ بے وس بوتگ انت اے پاکستانی لشکر ءُ آئی ایس آئی ءِ باسک بوتگ انت، اد ءَ نشتگ انت ءُ بلوچ کُش ٹولیانی سروکی اِش کتگ، ایشانی کارمنداں بلوچ آجوئی لوٹوک ءُ درگیپتگ انت ءُ آیانی دلاری کتگ-
پاکستانی رسانکدر گوستگیں وھد ءَ رو دراتکی بلوچستان ءَ ماں بلوچ سلاھبندیں گلانی ارش ءَ در ءَ اتکگیں مردم مزدور پیش داشتگ انت، نوں کار کہ رو ایرشتی بلوچستان ءَ مرتگیں مردماں پہ ھمے گپاں کارمرز کنگ ءَ انت چش کہ پاکستان ءِ مھلوک اے گپ ءَ منّ ایت سلاھبندیں گل وتی ارشاں ماں جتگیں مردمانی پجار ءَ وتی آفیشل چینل ءَ شنگ کنت، ایشی ءَ پاکستانی لشکر ءِ دروگ پدر بنت بلے آ وتی جوڑ کرتگیں رسانکدر ءِ کمک ءَ آ دروگ بندگ ءَ سوبین بیت-
پاکستان زیردستیں بلوچستان ءَ، بلوچ سلاھبندیں گلانی اُرش ءَ چہ مرتگیں مردمانی باز تامر چاگردی رسانکدر ءَ گوں آئی ادارہ کاڑ ءُ پجار کاڑ ءَ ھوار پوجی اپسرانی اکس گوں سبوتاں ھست انت، ھمے مردم مزدور ءُ دکانداری ءِ پوشاک ءِ تہ ءَ بلوچ کش ٹولی ءِ کاراں دیم ءَ برگ ءَ انت-
رو ایرشتی بلوچستان ءَ جنگ بوتگیں مردمانی لاش انگت پاکستان ءِ دست ءَ دیگ نہ بوتگ انت، بلے اے مردمانی کھول ءِ نیمگ ءَ سرکاری مردمانی سرا ترندی ءَ ایرادگری کنگ ءَ انت ءُ پنجاب ءَ لاشانی آرگ ءِ بے سوبی ءَ چہ سرکاری مردمانی ھلاپ ءَ روانک کشگ ءُ زھرشانی کنگ بوتگ-
